1. Kasano a naorganisar ti ili ni Jehova idi umuna a siglo?

 NO IKKAN ni Jehova dagiti adipenna iti annongen, namnamaenna nga aramidenda dayta iti organisado a pamay-an. (1 Cor. 14:33) Kas pagarigan, pagayatan ti Dios a maikaskasaba ti naimbag a damag iti intero a mapagnaedan a daga. (Mat. 24:14) Ni Jesus ti inikkan ni Jehova iti responsabilidad a mangiwanwan iti dayta a trabaho. Ket sinigurado ni Jesus a maaramid dayta iti organisado a pamay-an. Idi umuna a siglo, nadutokan dagiti panglakayen a mangidaulo ken mangipaay kadagiti instruksion idi naipasdek dagiti kongregasion iti nagduduma a lugar. (Ara. 14:23) Iti Jerusalem bayat ti umuna a siglo, adda grupo dagiti panglakayen a buklen dagiti apostol ken lallakay a nagaramid kadagiti desision a masapul a suroten ti amin a kongregasion. (Ara. 15:2; 16:4) Gapu iti panagtulnogda kadagiti instruksion a naawatda, “nagtultuloy a timmibker ti pammati dagiti kongregasion ken inaldaw nga immadu ti bilangda.”—Ara. 16:5.

2. Sipud 1919, kasano a nangipaay ni Jehova iti naespirituan a taraon ken panangiwanwan iti ilina?

² Agingga ita, agtultuloy ti panangor-organisar ni Jehova iti ilina. Sipud 1919, us-usaren ni Jesus ti bassit a grupo dagiti lallaki a dinutokan ti espiritu a mangorganisar iti trabaho a panangasaba ken mangipaay iti naespirituan a taraon kadagiti pasurotna. a (Luc. 12:42) Talaga a bembendisionan ni Jehova ti trabaho dayta a grupo.—Isa. 60:22; 65:​13, 14.

3-4. (a) Mangted iti pagarigan no kasano a pagsayaatantayo no organisadotayo. (b) Ania ti adalentayo iti daytoy nga artikulo?

 ³ No saantayo nga organisado, saantayo a maaramid ti trabaho nga imbilin ni Jesus kadatayo. (Mat. 28:​19, 20) Kas pagarigan, no saan a mangorganisar dagiti kakabsat iti espesipiko a teritoria a wanasen ti kongregasion, mabalin a dagiti agibumbunannag ket mapan lattan iti sadinoman a kayatda a pangasabaan. No kasta ti mapasamak, dadduma a teritoria ket mabalin a maulit-ulit a mawanas, idinto ta ti dadduma ket saan man laeng a makasabaan. Adda kadi pay mapanunotmo a pagsayaatan ti panagbalin nga organisado?

⁴ Idi adda ditoy daga ni Jesus, inorganisarna dagiti pasurotna, ket kasta met laeng ti ar-aramidenna agingga ita. Iti daytoy nga artikulo, pagsasaritaantayo ti ulidan nga impasdek ni Jesus ken no kasano a tultuladen dayta ti organisasiontayo. Pagsasaritaantayo met no kasanotayo a maipakita nga agtaltalektayo iti organisasion ni Jehova.

TULTULADEN TI ORGANISASIONTAYO TI ULIDAN NI JESUS

5. Ania ti maysa a pamay-an a tultuladentayo ti ulidan ni Jesus? (Juan 8:28)

⁵ Nasursuro ni Jesus iti nailangitan nga Amana no ania ti aramiden ken ibagana. Tultuladen ti organisasion ni Jehova ti ulidan ni Jesus babaen ti panangusarna iti Sao ti Dios a mangipaay kadagiti instruksion ken mangtulong kadatayo a mangammo iti umiso ken di umiso. (Basaen ti Juan 8:28; 2 Tim. 3:​16, 17) Regular a makaaw-awattayo kadagiti pammalagip a basaen ken iyaplikartayo ti Sao ti Dios. Apay a pagsayaatantayo no surotentayo dayta a balakad?

6. Ania ti maysa a napateg a pamay-an a magunggonaantayo iti panagadaltayo iti Biblia?

⁶ Nagdakkel ti maitulongna no adalentayo ti Biblia nga usarentayo dagiti publikasiontayo. Kas pagarigan, maikomparatayo dagiti pannursuro ti Biblia kadagiti instruksion a maaw-awattayo manipud iti organisasion. No makitatayo a dagiti instruksion a maaw-awattayo ket naibatay iti Kasuratan, bumileg a bumileg ti panagtalektayo iti organisasion ni Jehova.—Roma 12:2.

7. Ania a mensahe ti inkasaba ni Jesus ken kasano a tultuladen dayta ti organisasion ni Jehova?

⁷ Inkaskasaba ni Jesus “ti naimbag a damag ti Pagarian ti Dios.” (Luc. 4:​43, 44) Kasta met, binilinna dagiti adalanna nga ikasabada ti maipapan iti Pagarian. (Luc. 9:​1, 2; 10:​8, 9) Ita, amin a paset ti organisasion ni Jehova ket ikaskasabada ti mensahe ti Pagarian sadinoman ti ayanda wenno kasanoman kaadu ti responsabilidadda iti organisasion.

8. Ania a pribilehio ti adda kadatayo?

⁸ Ibilbilangtayo a pribilehio ti panangipakaammo iti sabsabali ti kinapudno maipapan iti Pagarian ti Dios! Saan a nakalukat dayta a pribilehio iti asinoman. Kas pagarigan, idi adda ni Jesus ditoy daga, saanna nga impalubos a dagiti dakes nga espiritu ti mangsaksi maipapan kenkuana. (Luc. 4:41) Ita, sakbay a mapalubosan ti maysa a makiraman iti ministerio a kadua ti ili ni Jehova, masapul a makualipikar nga umuna iti dayta a pribilehio. Ipakpakitatayo nga ap-apresiarentayo unay ti pribilehiotayo a mangipakaammo iti naimbag a damag kadagiti tattao, sadinoman ken kaanoman a posible dayta. Kas ken Jesus, ti kalattayo ket ti panangimula ken panangsibug iti bukel ti kinapudno maipapan iti Pagarian iti puso dagiti tattao.—Mat. 13:​3, 23; 1 Cor. 3:6.

9. Kasano nga ipakpakaammo ti organisasion ti nagan ti Dios?

⁹ Impakaammo ni Jesus ti nagan ti Dios. Iti kararag ni Jesus iti nailangitan nga Amana, imbagana: “Impakaammok kadakuada ti naganmo.” (Juan 17:26) Kas panangtulad iti ulidan ni Jesus, ar-aramiden ti organisasion ni Jehova ti amin a pamay-an tapno maammuan  dagiti tattao ti nagan ti Dios. Kas pagarigan, impablaakna ti Baro a Lubong a Patarus ti Nasantuan a Kasuratan a nangisubli iti nagan ti Dios kadagiti orihinal a nagparanganna iti Biblia. Magun-odanen ti patarus daytoy a Biblia iti intero wenno dadduma a pasetna iti nasurok a 270 a lengguahe. Iti Apendise A4 ken A5 daytoy a patarus, makitam dagiti detalye maipapan iti pannakaisubli ti nagan ti Dios iti Biblia. Makita met iti Appendix C ti Study Bible ti adu nga ebidensia a ti nagan ti Dios ket masapul a 237 a daras nga agparang iti Kristiano a Griego a Kasuratan.

10. Ania ti masursurom iti imbaga ti maysa a babai a taga-Myanmar?

¹⁰ Kas ken Jesus, kayattayo a tulongan ti adu a tattao agingga a posible a mangammo iti nagan ti Dios. Adda baket idiay Myanmar nga agtawen iti 67. Idi naammuanna ti nagan ti Dios, nakasangit ket imbagana iti mangyad-adal kenkuana iti Biblia: “Ita pay la a nangngegko a Jehova ti nagan ti Dios. . . . Insurom kaniak ti kapatgan a banag a masapul a maammuak.” Isuro daytoy a kapadasan a nagdakkel ti epektona kadagiti nasingpet a tattao no maammuanda ti nagan ti Dios.

ITULTULOYMO NGA IPAKITA NGA AGTALTALEKKA ITI ORGANISASIONTAYO

11. Kasano a maipakita dagiti panglakayen nga agtaltalekda iti organisasion ni Jehova? (Kitaen met ti ladawan.)

¹¹ Ania ti maysa a pamay-an a maipakita dagiti panglakayen nga agtaltalekda iti organisasion ti Dios? No makaawatda iti instruksion, masapul a basaenda a naimbag dayta ken ikagumaanda a suroten. Kas pagarigan, makaawatda kadagiti instruksion no kasano nga iparang dagiti paset iti gimong ken no kasano ti mangidaulo iti kararag para iti kongregasion. Kasta met, makaawatda kadagiti instruksion no kasanoda nga aywanan dagiti karnero ni Kristo. No iyaplikar dagiti panglakayen ti amin nga instruksion manipud iti organisasion, marikna dagiti kakabsat a natalgedda ken ay-ayaten ida ni Jehova.

12. (a) Apay a masapul a makikooperartayo kadagiti mangidadaulo kadatayo? (Hebreo 13:​7, 17) (b) Apay a masapul nga agpokustayo kadagiti positibo a kualidad dagiti mangidadaulo kadatayo?

¹² No makaawattayo iti instruksion manipud kadagiti panglakayen, masapul a situtulok a surotentayo dayta. No kasta ti aramidentayo, palpalakaentayo ti trabahoda a panangidaulo. Parparegtaennatayo ti Biblia nga agbalin a natulnog ken managpasakup kadagiti mangidadaulo kadatayo. (Basaen ti Hebreo 13:​7, 17.) Narigat dayta no dadduma. Apay? Imperpektoda ngamin. Ngem no agpokustayo kadagiti negatibo imbes a kadagiti positibo a kualidadda, kaslatay la tultulongan dagiti kabusortayo. Kasano? Pakpakapsutentayo ngamin ti panagtalektayo iti organisasion ti Dios nga isu met ti kayat a mapasamak dagiti kabusortayo. Ania ti aramidentayo tapno mailasin ken maliklikantayo dagiti kinaulbod nga iwarwaras dagiti kabusor?

DIMO IPALUBOS A PAKAPUYEN TI SABSABALI TI PANAGTALEKMO ITI ORGANISASION

13. Kasano nga inkagumaan dagiti kabusor ti Dios a padaksen ti organisasion?

¹³ Ikagkagumaan dagiti bumusbusor iti Dios a pagparangen a dakes dagiti nasayaat nga ar-aramiden ti organisasion. Kas pagarigan, naammuantayo manipud iti Biblia nga ekspektaren ni Jehova a dagiti agdaydayaw kenkuana ket nadalus iti pisikal, moral, ken naespirituan. Ikalkalikagumna nga asinoman a saan nga agbabbabawi ken agtultuloy nga agaramid iti kinadakes ket maikkat iti kongregasion. (1 Cor. 5:​11-13; 6:​9, 10) Ngem gapu ta sursurotentayo dayta a bilin, ibaga dagiti bumusbusor a saantayo nga ay-ayaten dagiti tattao, a konkondenarentayo ida ken saantayo a kayat ti asinoman a naiduma.

14. Pagtataudan dagiti ulbod nga estoria maipapan iti organisasion?

 ¹⁴ Ammuentayo ti pagtataudan dagiti ibubusor. Ni Satanas a Diablo ti pagtataudan dagiti ulbod nga estoria. Isu “ti ama ti kinaulbod.” (Juan 8:44; Gen. 3:​1-5) Ekspektarentayo ngarud nga usaren ni Satanas dagiti pasurotna nga agiwaras kadagiti ulbod nga estoria maipapan iti organisasion ni Jehova. Kasta ti napasamak idi umuna a siglo.

15. Ania ti inaramid dagiti lider ti relihion maibusor ken Jesus ken kadagiti pasurotna?

¹⁵ Idi umuna a siglo, uray no perpekto ken adu a milagro ti inaramid ni Jesus nga Anak ti Dios, sinugsogan ni Satanas ti dadduma a tattao a mangiwaras iti adu a kinaulbod maipapan ken Jesus. Kas pagarigan, imbaga dagiti lider ti relihion a ti pannakabalin ni Jesus a mangparuar kadagiti demonio ket inted “ti panguluen dagiti demonio.” (Mar. 3:22) Idi nabista ni Jesus, inakusaran dagiti lider ti relihion nga agsasao iti maibusor iti Dios. Gapuna, sinugsoganda dagiti tattao a kiddawenda a mapapatay ni Jesus. (Mat. 27:20) Idi agangay, idi inkasaba dagiti pasurot ni Jesus ti naimbag a damag, dagiti bumusbusor “sinugsogan ken inimpluensiaanda dagiti tattao” a mangidadanes kadagidiay a Kristiano. (Ara. 14:​2, 19) Maipapan iti Aramid 14:​2, kuna Ti Pagwanawanan a Disiembre 1, 1998: “Saan a napnek dagiti bumusbusor a Judio iti panangilaksidda a mismo iti mensahe, isu a nangiwayatda iti kampania a pammadakes, a sinugsoganda dagiti amin a Gentil a bumusor kadagiti Kristiano.”

16. Ania ti masapul a laglagipentayo no makangngegtayo kadagiti ulbod nga estoria?

¹⁶ Saan a simmardeng ni Satanas nga agulbod idi umuna a siglo. Ket agingga ita, ‘al-allilawenna pay laeng ti intero a mapagnaedan a daga.’ (Apoc. 12:9) No makangngegka kadagiti  negatibo nga estoria maipapan iti organisasion wenno kadagiti kakabsat a mangidadaulo, laglagipem no kasano a trinato dagiti kabusor ti Dios ni Jesus ken dagiti adalanna idi umuna siglo. Ita, ti ili ni Jehova ket maidaddadanes ken mapadpadakes kas iti impadto ti Biblia. (Mat. 5:​11, 12) Saantayo a maallilaw kadagiti ulbod nga estoria no ammotayo ti pagtataudanna ken no dagus nga agtignaytayo. Ania ti masapul nga aramidentayo?

17. Kasano a maliklikantayo dagiti dakes nga epekto dagiti ulbod nga estoria? (2 Timoteo 1:13) (Kitaen met ti kahon a “ Ti Aramidentayo no Makangngegtayo Kadagiti Ulbod nga Estoria.”)

¹⁷ Laksidem dagiti ulbod nga estoria. Nalawag ti instruksion ni apostol Pablo no adda mangngegtayo nga ulbod nga estoria. Imbagana ken Timoteo: “Balakadam ti dadduma a saanda . . . a denggen dagiti ulbod nga estoria” ken “laksidem dagiti ulbod nga estoria.” (1 Tim. 1:​3, 4; 4:7) Ti bassit nga ubing mabalin nga isubona lattan ti aniaman a mapidutna. Ngem saan a kasta ti aramiden ti maysa a nataengan ta ammona a delikado dayta. Laksidentayo dagiti ulbod nga estoria ta ammotayo ti pagtataudan dagita nga impormasion. Dumngegtayo laeng iti “nasayaat a sasao” ti kinapudno.—Basaen ti 2 Timoteo 1:13.

18. Kasanotayo a maipakita nga agtaltalektayo iti organisasion ni Jehova?

¹⁸ Nausigtayo ti tallo laeng kadagiti adu a pamay-an a tultuladen ti organisasion ti Dios ti ulidan ni Jesus. Bayat nga ad-adalem ti Biblia, siputam ti dadduma pay a pamay-an a tultuladen ti organisasion ti ulidan ni Jesus. Tulongam dagiti kakongregasionmo a mangpabileg iti panagtalekda iti organisasion. Ken itultuloymo nga ipakita ti panagtalekmo babaen ti napudno a panagserbim ken Jehova ken panagtalinaedmo iti uneg ti organisasion nga us-usarenna a mangitungpal iti pagayatanna. (Sal. 37:28) Sapay koma ta itultuloytayo nga ipateg ti pribilehiotayo nga agbalin a paset ti naayat ken matalek nga ili ni Jehova.