GAPU ta rumigrigat ti kasasaad iti ‘maudi nga al-aldaw,’ ad-adda a kasapulan ita nga ipakita dagiti adipen ni Jehova ti mabayag a panagitured wenno kinaanus. (2 Tim. 3:1-5) Napalikmutantayo kadagiti managayat iti bagbagida, saan a sidadaan iti aniaman a tulagan, ken awanan panagteppel. Saan a naanus dagiti mangipakpakita kadagita a kababalin. Isu a masapul nga isaludsod dagiti Kristiano: ‘Matultuladko kadin ti kinaawan anus ti lubong? Ania ti talaga a kaipapanan ti mabayag a panagitured? Ken kasanok a mapagbalin a permanente a paset ti personalidadko daytoy a Nakristianuan a kababalin?’

Iti Biblia, ti mabayag a panagitured wenno kinaanus ket saan laeng a basta pananganus iti narigat a situasion. Ti naanus a tao ket agibtur nga addaan panggep. Saan la a ti kasapulanna ti ikabilanganna no di ket panunotenna met ti rikna daydiay nangpasakit kenkuana. Isu a no nasaktan wenno adda mangpapungtot iti naanus a tao, mangnamnama latta a sumayaatto met laeng ti relasionda. Saan ngarud a pakasdaawan a dinakamat ti Biblia ti ‘mabayag a panagitured’ kas umuna kadagiti adu a nasasayaat a kualidad a patauden ti ayat. * (1 Cor. 13:4) Iti Sao ti Dios, karaman ti mabayag a panagitured kadagiti aspeto ti “bunga ti espiritu.” (Gal. 5:22, 23) Ania ngarud ti aramidentayo tapno maparang-aytayo ti mabayag a panagitured?

Tapno agbalintayo a naanus, masapul nga ikararagtayo ti tulong ti espiritu ni Jehova, nga itedna kadagidiay agtaltalek ken agpampannuray kenkuana. (Luc. 11:13) Uray no nabileg ti espiritu ti Dios, masapul latta nga aramidentayo ti pasettayo ken aramidentayo dagiti inkararagtayo. (Sal. 86:10, 11) Kayatna a sawen, ikagumaantayo ti aganus iti inaldaw tapno agbalin daytoy a paset ti personalidadtayo. Ngem no dadduma, mabalin a saantayo a maipakita dayta. Ania pay ti makatulong?

Tapno agbalintayo a naanus, makatulong met ti panangadal ken panangtulad iti perpekto nga ulidan ni Jesus. Idi insurat ni apostol Pablo ti maipapan iti “baro a personalidad,” a pakairamanan ti “mabayag a panagitured” wenno kinaanus imparegtana a ‘bay-antayo nga agturay iti pusotayo ti talna ti Kristo.’ (Col. 3:10, 12, 15) Ipalpalubostayo nga “agturay” iti pusotayo ti talna no tuladentayo ti natibker a pammati ni Jesus nga ilintegto ti Dios iti umiso a tiempo ti bambanag a pakaseknantayo. No tuladentayo ti ulidanna, naanustayo latta uray ania ti mapaspasamak iti aglawlawtayo.​—Juan 14:27; 16:33.

 Magagarantayon a makakita iti inkari ti Dios a baro a lubong, ngem masursurotayo ti agbalin a mas naan-anus no utobentayo ti panangan-anus ni Jehova kadatayo. Ipasigurado ti Kasuratan: “Saan a nabannayat ni Jehova maipapan iti karina, kas ti panangibilang ti dadduma a tattao a kinabannayat, no di ket an-anusanna[tayo] agsipud ta saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” (2 Ped. 3:9) No panunotentayo ti panangan-anus kadatayo ni Jehova, saantayo kadi a matignay a mangan-anus met iti dadduma? (Roma 2:4) Ania ngarud dagiti situasion a kasapulantayo ti kinaanus?

Iti inaldaw, adu a situasion ti mabalin a mangsubok iti kinaanustayo. Kas pagarigan, no adda importante a kayatmo nga ibaga, baka kasapulam ti anus nga aguray tapno saanmo a maistorbo ti dadduma. (Sant. 1:19) Mabalin met a kasapulan nga anusam dagiti kasuronmo nga ugali dagiti kalanglangenmo a kakabsat. Imbes a maibus ti pasensiam, nasayaat no panunotem nga an-anusan ni Jehova ken ni Jesus dagiti pagkapuyantayo. Saanda a nakapokus kadagiti pagkamkamaliantayo. Imbes ketdi, kitkitaenda dagiti nasayaat a kualidadtayo ken siaanus a palpaliiwenda ti panangikagumaantayo a mangpasayaat iti personalidadtayo.​—1 Tim. 1:16; 1 Ped. 3:12.

Masubok pay ti kinaanustayo no adda mangibaga a madi ti imbaga wenno inaramidtayo. Mabalin a masaktantayo ket idepensatayo ti bagitayo. Ngem irekomenda ti Biblia ti sabali nga aramidentayo: “Nasaysayaat daydiay naanus ngem daydiay natangsit iti espiritu. Dika agdarasudos iti espiritum nga agrurod, ta ti panagrurod isu ti agsaad iti saklot dagidiay maag.” (Ecl. 7:8, 9) Isu nga uray saan nga agpayso ti akusasionda kadatayo, siaanus koma a panunotentayo ti aramidentayo. Sinurot ni Jesus dayta a prinsipio idi naum-umsi.​—Mat. 11:19.

Nangnangruna nga agan-anus dagiti nagannak no kasapulan nga ilintegda dagiti di umiso a kababalin, tarigagay, wenno tendensia dagiti annakda. Alaentayo a pagarigan ni Mattias, a miembro ti pamilia ti Bethel iti Scandinavia. Idi tin-edyer, kanayon a mauy-uyaw idiay eskuelaan gapu kadagiti patpatienna. Idi damo, saan nga ammo dayta dagiti nagannakna. Ngem masapul a sanguenda ti epekto ti mapaspasamak iti anakda, nga agduaduan kadagiti patpatienna. “Masapulmi idi ti adu nga anus,” malagip ni Gillis, a tatang ni Mattias. Isaludsod no kua ni Mattias: “Asino ti Dios? Kasanon no ti Biblia ket saan a Sao ti Dios? Kasanotayo nga ammo a talaga a kayat ti Dios nga aramidentayo daytoy wenno dayta?” Ibagana pay no kua ken tatangna: “Apay koma a husgarandak no saan a kas kadakayo ti riknak ken patpatiek?”

Inyestoria ni Gillis: “No dadduma, makasuron ti anakmi nga agsaludsod. Saan a dakami ken nanangna ti kasuronna, no di ket ti kinapudno nga ipagarupna a mangparparigat iti biagna.” Ania ti inaramid ni Gillis? “Agtungtongkami iti anakko iti sumagmamano nga oras. Kaaduanna a dumngegak ken agsaludsodak tapno maammuak ti rikrikna  ken opinionna. No dadduma, ilawlawagko ti maysa a banag ket ibagak a pagpanunotanna dayta iti agmalem wenno nabaybayag pay sa pagsaritaanminto manen dayta. Ngem no dadduma, ibagak a panunotek pay iti sumagmamano nga aldaw ti imbagana nga opinionna. Gapu kadagitoy a regular a panagtungtongmi, in-inut a rimmang-ay ti pannakaawat ken panangakseptar ni Mattias kadagiti sursuro a kas iti subbot, kinasoberano ti Dios, ken ayat ni Jehova. Nabayag ken kaaduanna a narigat, ngem in-inut a dimmakkel iti pusona ti ayat ken Jehova. Nakaragragsakkami ken ni baketko ta ti naanus a panangikagumaanmi a tumulong iti anakmi idi tin-edyer ket nagbunga ken dimmanon iti pusona.”

Nagtalek da Gillis ken ni baketna iti tulong ni Jehova bayat a siaanus a tultulonganda ti anakda. Malagip ni Gillis: “Kanayonko idi nga ibaga ken Mattias nga ay-ayatenmi unay isu a natignaykami ken nanangna a kanayon nga ikararagmi ken Jehova a tulonganna a maaddaan iti pannakaawat.” Agyamyaman unay dagitoy a nagannak ta impakitada ti nagpateg a kualidad a kinaanus!

Saan laeng a mangipaay iti naespirituan a tulong dagiti pudno a Kristiano. Masapul a naayat ken naanusda met a mangaywan kadagiti kapamilia wenno gagayyemda a nakaro ti sakitna. Alaentayo a pagarigan ni Ellen, * nga aggigian met laeng iti Scandinavia.

Agarup walo a tawen ti napalabasen, namindua a naistrok ti asawa ni Ellen a nangapektar iti utekna. Kas resultana, saanen a makarikna iti asi, ragsak, wenno ladingit. Nakarigrigat ti situasion ni Ellen. Kinunana: “Kasapulak ti adu nga anus ken adu a kararag.” Innayonna: “Ti paboritok a teksto a makaliwliwa kaniak ket ti Filipos 4:13, kunana: ‘Ta iti amin a bambanag addaanak iti bileg gapu iti daydiay mangmangted kaniak iti pannakabalin.’” Gapu iti dayta a pannakabalin, siaanus nga agib-ibtur ni Ellen ken naan-anay nga agtalek iti tulong ni Jehova.​—Sal. 62:5, 6.

Siempre, ti kasayaatan nga ulidantayo iti panangipakita iti kinaanus ket ni Jehova. (2 Ped. 3:15) Adu a salaysay iti Sao ti Dios ti mangipakita a nagpaiduma ti kinaanus ni Jehova. (Neh. 9:30; Isa. 30:18) Kas pagarigan, ania ti inaramid ni Jehova idi kinuestionaran ni Abraham ti desisionna a mangdadael iti Sodoma? Umuna iti amin, binaybay-an ni Jehova nga agsao ni Abraham. Siaanus a dinengngeg ni Jehova ti tunggal saludsod ken pakaseknan ni Abraham. Sa impakita ni Jehova a dimngeg ta inulitna dagiti pakaseknan ni Abraham ken impasiguradona a saanna a dadaelen ti Sodoma uray sangapulo laeng ti makitana a nalinteg iti dayta a siudad. (Gen. 18:22-33) Talaga a nagsayaat nga ulidan iti siaanus a panagdengngeg ken saan a dagus a panagunget!

Ti panangtulad iti kinaanus ti Dios ket nakapatpateg a paset ti baro a personalidad a masapul nga ikawes ti amin a Kristiano. No ikagumaantayo a parang-ayen daytoy a nagpateg ken manayon a kualidad, padpadayawantayo ti naasi ken naanus a nailangitan nga Amatayo, ken maibilangtayonto a maysa “kadagidiay a babaen ti pammati ken kinaanus tawidenda dagiti kari.”​—Heb. 6:10-12.