1. Kasano nga ipakita dagiti parsua ni Jehova ti kinaparaburna?

URAY no maymaysa laeng ni Jehova sakbay a nagparsua, saan la a ti bagina ti pinampanunotna. Imbes ketdi, inikkanna iti sagut a biag dagiti intelehente a parsuana, dagiti espiritu ken tattao. “Ti naragsak a Dios” a ni Jehova ket maay-ayatan a mangipaay iti nasayaat a bambanag. (1 Tim. 1:11; Sant. 1:17) Ken gapu ta kayatna met a naragsaktayo, isursuronatayo nga agbalin a naparabur.​—Roma 1:20.

2, 3. (a) Apay a naragsak ti mangted? (b) Ania ti adalentayo?

² Inaramid ti Dios ti tao sigun iti ladawanna. (Gen. 1:27) Kayatna a sawen, naparsuatayo a mangipakita iti personalidadna. Tapno ngarud makariknatayo iti kinaragsak ken pannakapnek, masapul a tuladentayo ni Jehova babaen ti panagbalintayo nga interesado ken naparabur iti sabsabali. (Fil. 2:3, 4; Sant. 1:5) Apay? Dinisenionatayo ngamin a kasta. Uray no imperpektotayo, matuladtayo ti kinaparabur ni Jehova.

³ Ibaga ti Biblia no kasanotayo nga agbalin a naparabur. Repasuentayo ti dadduma a masursurotayo iti Kasuratan. Makitatayonto no apay a maragsakan ti Dios kadatayo no naparaburtayo ken no kasano a ti panangipakita iti daytoy a kababalin tulongannatayo a mangaramid iti trabaho nga intalek ti Dios kadatayo.  Adalentayo met no ania ti koneksion ti kinaparabur iti kinaragsaktayo ken no apay nga itultuloytayo nga ipakita ti kinaparabur.

4, 5. Ania nga ulidan ti kinaparabur ti impakita kadatayo ni Jehova ken ni Jesus?

⁴ Kayat ni Jehova a tuladen isuna dagiti pinarsuana a tattao, isu a maragsakan no naparaburtayo. (Efe. 5:1) Nalawag a kayat ti Dios a naragsak dagiti tattao kas ipakita ti pannakaaramidtayo ken ti kinapintas ken kinaadu dagiti pinarsuana iti aglawlawtayo. (Sal. 104:24; 139:13-16) Gapuna, maidayawtayo ti Dios no ikagumaantayo a paragsaken ti sabsabali.

⁵ Dagiti pudno a Kristiano tultuladenda ni Kristo, a nangipakita iti perpekto nga ulidan no kasano nga agbalin a naparabur ti maysa a tao. Kinuna ni Jesus: “Ti Anak ti tao immay, saan a tapno pagserbian, no di ket tapno agserbi ken tapno itedna ti kararuana [wenno, biagna] kas subbot a kasukat dagiti adu.” (Mat. 20:28) Isu nga imparegta ni apostol Pablo kadagiti Kristiano: “Pagtalinaedenyo kadakayo daytoy a kababalin iti isip nga adda met ken Kristo Jesus . . . Inuksobanna ti bagina ket innalana ti langa ti maysa nga adipen.” (Fil. 2:5, 7) Nasayaat no isaludsod ti tunggal maysa kadatayo: ‘Adda kadi pay maaramidak tapno ad-adda a masurotko ti ulidan ni Jesus?’​—Basaen ti 1 Pedro 2:21.

6. Ania ti insuro ni Jesus kadatayo iti ilustrasionna maipapan iti naasi a Samaritano? (Kitaen ti ladawan iti rugi ti artikulo.)

⁶ Anamongannatayo ni Jehova no tuladentayo ti perpekto nga ulidanda ken Kristo, no interesadotayo iti pagimbagan ti sabsabali, ken no ikagumaantayo nga ipaay ti kasapulanda. Kinapudnona, pinaglawag ni Jesus iti ilustrasionna maipapan iti naasi a Samaritano a namnamaenna nga agsakripisio dagiti pasurotna a tumulong iti sabsabali, uray ania ti pulida. (Basaen ti Lucas 10:29-37.) Malagipmo kadi ti saludsod a nangtignay ken Jesus a mangyestoria iti ilustrasion maipapan iti naasi a Samaritano? Insaludsod ti maysa a Judio: “Asino a pudpudno ti padak a tao.” Ipakita ti sungbat ni Jesus a masapul a naparaburtayo a kas iti Samaritano tapno anamongannatayo ti Dios.

7. Ania ti epekto ti kinaparabur wenno kinamanagimbubukodan iti isyu a pinataud ni Satanas idiay Eden?

⁷ Adu ti nasayaat a rason dagiti Kristiano nga agbalin a naparabur. Kas pagarigan, adda koneksion daytoy a kualidad iti isyu a pinataud ni Satanas idiay hardin ti Eden. Kasano? Imbaga ni Satanas a naragragsak da Adan ken Eva​—kasta met ti amin a tattao​—no ti bagida laeng ti pampanunotenda ken no iyun-unada ti pagimbaganda imbes nga agtulnogda iti Dios. Agimbubukodan ni Eva ta tinarigagayanna ti agbalin a kas iti Dios. Managimbubukodan met ni Adan ta ni Eva ti mas kayatna a paragsaken. (Gen. 3:4-6) Nalawag a makita dagiti resulta ti desisionda. Ti kinamanagimbubukodan ket saan nga agresulta iti ragsak no di ket ladingit. No naparaburtayo, ipakpakitatayo nga agtalektayo a kasayaatan ti kidkiddawen ti Dios nga aramidentayo.

8. Apay a pinanunot koma ti immuna a pagassawaan ti pagimbagan ti sabsabali?

⁸ Dagiti instruksion nga inted ti Dios iti immuna a pagassawaan ti nangtignay koma kadakuada a mangpanunot iti pagimbagan ti sabsabali, uray is-isuda pay laeng idi iti hardin ti Eden. Binendisionan ni Jehova da  Adan ken Eva ken imbagana nga agpaaduda, punnuenda ti daga, ken aywananda dayta. (Gen. 1:28) Interesado ti Namarsua iti pagimbagan dagiti parsuana, isu a pinanunot met koma dagiti immuna a nagannaktayo ti pagragsakan dagiti saan pay a nayanak nga annakda. Manamnama a pagbalinenda a paraiso ti intero a daga para kadagiti annak ni Adan. Agkasapulan daytoy a trabaho iti kooperasion ti dumakdakkel a pamiliana.

9. Apay a nagresulta koma iti kinaragsak ti pannakapalawa ti Paraiso?

⁹ Masapul a naan-anay a makitinnulong ken Jehova dagiti perpekto a tattao tapno mapalawa ti Paraiso ket matungpal ti panggepna, iti kasta, sumrekda iti panaginanana. (Heb. 4:11) Panunotem laengen no kasano koma karagsak ti panangitungpal iti dayta a trabaho! Ti panagsakripisioda para iti pagimbagan ti sabsabali ket nagresulta koma kadakuada iti adu a bendision ken kasta unay a kinaragsak.

10, 11. Kasano a maitungpaltayo ti annongen a panangasaba ken panagaramid iti ad-adalan?

¹⁰ Ita, intalek ni Jehova iti ilina ti trabaho a panangasaba ken panagaramid iti ad-adalan. Tapno maitungpaltayo dayta, naimpusuan a panunotentayo ti pagimbagan ti sabsabali. Makapagibturtayo iti daytoy a trabaho no umiso ti motibotayo​—ti ayattayo iti Dios ken iti padatayo a tao.

¹¹ Idi umuna a siglo C.E., tinukoy ni Pablo ti bagina ken ti dadduma a kakaduana kas ‘katrabahuan ti Dios’ gapu iti pasetda iti panagmula ken panangsibug iti bukel ti kinapudno ti Pagarian. (1 Cor. 3:6, 9) Ita, agbalintayo met a ‘katrabahuan ti Dios’ no sipaparabur nga ipaaytayo ti tiempo, material, ken pigsatayo para iti trabaho a panangasaba nga intalek ti Dios kadatayo. Anian a nagsayaat a pribilehio!

12, 13. Ania dagiti maibagam a gunggona iti panagaramid iti adalan?

¹² Makariknatayo iti dakkel a rag-o no ad-adu a tiempo ken pigsa ti usarentayo a mangasaba ken mangisuro. Kasta ti ibaga ti adu a kakabsat nga addaan iti progresibo nga iyad-adalan iti Biblia. Nakaragragsaktayo no makitatayo ti iyad-adalantayo a maayatan a makaammo kadagiti naespirituan a kinapudno, dumakkel ti pammatina, agbalbaliwen, ken ibaganan iti dadduma ti kinapudno. Nakaragragsak met ni Jesus idi ‘sirarag-o a nagsubli’ ti 70 nga imbaonna a mangasaba gapu iti nasayaat a nagapuananda.​—Luc. 10:17-21.

¹³ Maragragsakan dagiti agibumbunannag iti intero a lubong a makakita iti positibo nga epekto ti mensahe ti naimbag a damag kadagiti tattao. Alaentayo a pagarigan ti kapadasan ti maysa nga agtutubo a ni Anna, * a nangpalawa iti ministeriona babaen ti iyaakarna iti maysa a  lugar iti Makindaya a Europa nga agkasapulan iti adu a manangaskasaba. Insuratna: “Nagadu ti gundaway a makapangyadalka iti Biblia ditoy, ket kaykayatko dayta. Nakaragragsakak iti ministeriok. No makaawidakon, saan la a ti bagik ti pampanunotek. Pampanunotek dagiti iyad-adalak​—dagiti problema ken pakadanaganda. Panunotek no kasano a maparegta ken matulongak ida. Kas resultana, ad-addan a kombinsidoak nga ‘ad-adu ti kinaragsak iti panangted ngem iti panangawat.’”​—Ara. 20:35.

14. Kasano nga agbalinka a naragsak iti ministeriom uray no manmano laeng ti dumngeg iti naimbag a damag?

¹⁴ Naragsaktayo no ikkantayo iti gundaway dagiti tattao a makangngeg iti mensahe ti naimbag a damag uray no dida kayat ti dumngeg. Ti obligasiontayo ita ket kas iti imbilin ni Jehova ken propeta Ezequiel: “Masapul a sawem ti sasaok kadakuada, uray no dumngegda wenno agkedkedda.” (Ezeq. 2:7; Isa. 43:10) Uray no adda dagiti saan a mangapresiar iti mensahetayo, apresiaren ni Jehova ti panagreggettayo. (Basaen ti Hebreo 6:10.) Nagsayaat ti kababalin ti maysa nga agibumbunannag iti daytoy a banag. Insuratna maipapan iti ministeriona, “Nagmulatayo, nagsibugtayo, ken inkararagtayo a padakkelen koma ni Jehova ti interes dagiti tattao.”​—1 Cor. 3:6.

15. Ania ti epektona iti adu ti naipakita kadakuada a kinaparabur, ken agpaapektotayo kadi iti dayta?

¹⁵ Kayat ni Jesus nga agbalintayo a naragsak babaen ti panagbalintayo a naparabur. Nasayaat ti epektona iti adu ti kinaparabur. Kinunana: “Iyugaliyo ti mangted, ket mangtedto kadakayo dagiti tattao. Ibukbokdanto kadagiti saklotyo ti nasayaat a rukod, nasedsed, nayegyeg ken agliplippias. Ta ti rukod a pangrukrukodyo, pangrukoddanto met kadakayo.” (Luc. 6:38) Siempre, saan a maapresiar ti amin ti kinaparaburtayo. Ngem dagidiay makaapresiar, matignayda met nga agbalin a naparabur. Isu nga iyugalitayo koma ti agbalin a naparabur, apresiaren man dayta ti tattao wenno saan. Saanmo nga ammo no anianto ti nasayaat nga epekto ti uray maysa laeng nga impakitam a kinaparabur.

16. Ania koma ti motibo iti panagbalintayo a naparabur?

 ¹⁶ Dagiti pudpudno a naparabur a tattao ket mangted a saan a mangnamnama iti aniaman a kasukat. Dayta ti pampanunoten ni Jesus idi insurona: “No mangisaganaka iti padaya, awisem dagiti napanglaw a tattao, lugpi, pilay, bulsek; ket naragsakkanto, agsipud ta awan maisupapakda kenka.” (Luc. 14:13, 14) “Daydiay naasi ti matana mabendisionanto,” kinuna ti maysa a mannurat ti Biblia. Imbaga pay ti sabali: “Naragsak ti asinoman nga agtigtignay a buyogen ti konsiderasion iti daydiay nanumo.” (Prov. 22:9; Sal. 41:1) Kinapudnona, masapul a mangtedtayo ta naragsaktayo no matulongantayo ti sabsabali.

17. Ania dagiti pamay-an ti panangted a makaparagsak kadatayo?

¹⁷ Idi kinotar ni Pablo ti sasao ni Jesus nga “ad-adu ti kinaragsak iti panangted ngem iti panangawat,” saanna la a tuktukoyen ti panangted iti material no di pay ket ti panangted iti pammaregta, balakad, ken tulong kadagiti agkasapulan kadagita. (Ara. 20:31-35) Iti sao ken aramid, insuronatayo ni Pablo nga agbalin a naparabur iti tiempo, pigsa, atension, ken ayattayo.

18. Ania ti konklusion ti adu a researcher maipapan iti kinaparabur?

¹⁸ Naobserbaran met dagiti researcher a mangad-adal iti kababalin ti tao a makaparagsak ti panangted. Kuna ti maysa nga artikulo nga “imbaga dagiti tattao a naragragsakda kalpasan a nakaaramidda iti nasayaat a banag para iti sabsabali.” Kuna dagiti researcher a no tulongantayo ti sabsabali, mariknatayo nga “adda direksion ken panggep” ti biagtayo “gapu ta dayta ti mangpennek iti kangrunaan a kasapulan ti tao.” Gapuna, masansan nga irekomenda dagiti eksperto nga agboluntario dagiti tattao a tumulong iti publiko tapno nasalsalun-at ken naragragsakda. Saan a nakaskasdaaw dayta kadagidiay mangbigbig a ti Biblia ket Sao ti naayat a Diseniador ti tao, ni Jehova.​—2 Tim. 3:16, 17.

19, 20. Apay a kayatmo ti agbalin a naparabur?

¹⁹ Nagrigat a pagtalinaeden ti kinaparabur no dagiti makalanglangentayo ket iyun-unada ti pagimbaganda ngem iti sabsabali. Ngem imbaga ni Jesus a ti dua a kadakkelan a bilin ket ti panangayat ken Jehova iti intero a puso, kararua, panunot, ken pigsa ken ti panangayat iti padatayo a tao a kas iti bagitayo. (Mar. 12:28-31) Kas naadaltayo iti daytoy nga artikulo, dagidiay mangay-ayat ken Jehova tuladenda isuna. Agpada a naparabur ni Jehova ken ni Jesus. Ken parparegtaendatayo a tuladentayo ida ta mangyeg dayta iti pudpudno a kinaragsak. No ikagumaantayo nga ipakita ti kinaparaburtayo iti Dios ken iti padatayo a tao, maidayawtayo ni Jehova ken pagsayaatantayo dayta ken ti sabsabali.

²⁰ Mabalin nga ikagkagumaamon ti agbalin a naparabur iti sabsabali, nangnangruna kadagiti kapammatiam. (Gal. 6:10) No itultuloymo nga aramiden dayta, sigurado nga ayaten ken apresiarendaka ti sabsabali, ket agbalinka a naragsak. “Ti naparabur a kararua mapalukmegto a mismo,” kuna ti Proverbio 11:25, “ket daydiay sibubulos a mangsibug iti sabsabali isu sibubulos a masibuganto met.” Siempre, maipakitatayo ti situtulok a panangted, kinaimbag, ken kinaparabur iti adu a pamay-an ken iti adu nga aspeto ti panagbiag ken ministeriotayo kas Kristiano. Ken adu ti magunggonatayo iti dayta. Ilawlawag ti sumaruno nga artikulo dagita a pamay-an ken aspeto.