1. Ania a pribilehio ti tagtagiragsakentayo?

ANIAN a pribilehio ti agbalin a paset ti kongregasion ni Jehova! Addatayo iti naespirituan a paraiso a napno iti natalna ken naragsak a tattao. Ania ti lugarmo iti kongregasion?

2. Ania nga ilustrasion ti inusar ni apostol Pablo iti dadduma a suratna?

² Adu ti masursurotayo maipapan iti daytoy iti ilustrasion nga inusar ni apostol Pablo iti dadduma a suratna. Kadagita a suratna, inyarigna ti kongregasion iti bagi ti tao. Inyarigna met ti tunggal maysa iti kongregasion kadagiti paset ti bagi.​—Roma 12:4-8; 1 Cor. 12:12-27; Efe. 4:16.

3. Ania a tallo a leksion ti usigentayo iti daytoy nga artikulo?

³ Iti daytoy nga artikulo, usigentayo ti tallo a napapateg a leksion a masursurotayo iti ilustrasion ni Pablo. Umuna, masursurotayo nga adda lugar * ti tunggal maysa kadatayo iti kongregasion ni Jehova. Maikadua, pagsasaritaantayo ti maaramidantayo tapno matarusantayo no ania ti lugartayo iti kongregasion. Ken maikatlo, pagsasaritaantayo no apay a masapul a kanayon nga okupadotayo a mangitungpal iti papeltayo iti kongregasion ti Dios.

4. Ania ti masursurotayo iti Roma 12:4, 5?

⁴ Ti umuna a leksion a masursurotayo iti ilustrasion ni Pablo ket adda napateg a lugar ti tunggal maysa kadatayo iti pamilia  ni Jehova. Kastoy ti panangirugi ni Pablo iti ilustrasionna: “No kasano nga adu ti paset ti maysa a bagi, ngem saan nga agpapada ti usarda, kasta met kadatayo, nupay adutayo, maymaysatayo a bagi a naikaykaysa ken Kristo, ngem tunggal maysa kadatayo ket konektado iti maysa ken maysa.” (Roma 12:4, 5) Ania ti punto ni Pablo? Nadumaduma ti papel ti tunggal maysa kadatayo iti kongregasion, ngem napategtayo amin.

5. Ania dagiti “sagut” nga inted ni Jehova iti kongregasion?

⁵ No panunotem dagidiay adda lugarda iti kongregasion, mabalin a dagidiay mangidadaulo ti dagus a malagipmo. (1 Tes. 5:12; Heb. 13:17) Agpayso a babaen ken Kristo, nangted ni Jehova iti “lallaki a kas sagut” iti kongregasionna. (Efe. 4:8) Karaman kadagitoy a “sagut” ket dagiti miembro ti Bagi a Manarawidwid, dagiti nadutokan a katulongan ti Bagi a Manarawidwid, dagiti miembro ti Branch Committee, dagiti manangaywan iti sirkito, dagiti field instructor, dagiti panglakayen iti kongregasion, ken dagiti ministerial nga adipen. Amin dagita a kakabsat ket dinutokan ti nasantuan nga espiritu a mangaywan kadagiti napateg a karnero ni Jehova ken agserbi para iti pagsayaatan ti kongregasion.​—1 Ped. 5:2, 3.

6. Sigun iti 1 Tesalonica 2:6-8, ania ti ikagkagumaan nga aramiden dagiti kakabsat a lallaki a dinutokan ti nasantuan nga espiritu?

⁶ Dagiti kakabsat a lallaki ket dinutokan ti nasantuan nga espiritu a mangibaklay iti nadumaduma a responsabilidad. No kasano a ti nadumaduma a paset ti bagi, a kas iti ima ken saka, ket agtitinnulong para iti pagsayaatan ti intero a bagi, agtitinnulong met dagiti kakabsat a lallaki a dinutokan ti nasantuan nga espiritu para iti pagimbagan ti intero a kongregasion. Saanda a kayat nga idaydayaw ida ti sabsabali. Ikagkagumaanda ketdi a paregtaen ken pabilgen dagiti kakabsatda. (Basaen ti 1 Tesalonica 2:6-8.) Agyamantayo ken Jehova gapu kadagita a managsakripisio a lallaki, a nakaragpat kadagiti Nainkasuratan a kualipikasion!

7. Ania dagiti bendision nga aw-awaten ti adu nga adda iti amin-tiempo a panagserbi?

⁷ Dadduma iti kongregasion ket mabalin a madutokan nga agserbi kas misionero, special pioneer, wenno regular pioneer. Kinapudnona, adda kakabsat a lallaki ken babbai iti intero a lubong a pinagbalinda nga amin-tiempo a karerada ti mangasaba ken agaramid iti ad-adalan. Gapu iti dayta, adu ti natulonganda nga agbalin nga adalan ni Kristo Jesus. Nupay bassit ti material a sanikua ti kaaduan kadagitoy nga amin-tiempo nga ebanghelisador, ginunggonaan ida ni Jehova iti adu a bendision. (Mar. 10:29, 30) Ipatpategtayo dagitoy a kakabsat, ket agyamantayo ta pasetda ti kongregasion!

8. Apay a napateg ken Jehova ti tunggal agibumbunannag iti naimbag a damag?

⁸ Dagiti laeng kadi nadutokan a kakabsat a lallaki ken dagidiay adda iti amin-tiempo a ministerio ti addaan iti lugar iti kongregasion? Saan! Tunggal agibumbunannag iti naimbag a damag ket napateg iti Dios ken iti kongregasion. (Roma 10:15; 1 Cor. 3:6-9) Kinapudnona, maysa kadagiti kapatgan a kalat ti kongregasion ket ti panagaramid iti ad-adalan ti Apotayo a ni Jesu-Kristo. (Mat. 28:19, 20; 1 Tim. 2:4) Dayta a trabaho ti ipangpangruna ti amin a naitimpuyog iti kongregasion, bautisado man wenno di bautisado nga agibumbunannag.​—Mat. 24:14.

9. Apay nga ipatpategtayo dagiti kakabsat a babbai?

⁹ Ipapaayan ni Jehova dagiti Kristiano a kakabsat a babbai iti nadayaw a lugar iti kongregasion. Ipatpategna dagitoy nga assawa  a babbai, inna, balo, ken babbalasang a simamatalek nga agserserbi kenkuana. Masansan a dakamaten ti Biblia dagiti naisangsangayan a babbai a nangparagsak iti Dios. Makomendaranda kas nasayaat nga ulidan iti sirib, pammati, regta, tured, kinaparabur, ken nasayaat nga ar-aramid. (Luc. 8:2, 3; Ara. 16:14, 15; Roma 16:3, 6; Fil. 4:3; Heb. 11:11, 31, 35) Agyamantayo ken Jehova gapu kadagiti Kristiano a babbai iti kongregasiontayo a mangipakpakita kadagita a nagsasayaat a kualidad!

10. Apay nga ipatpategtayo dagiti nataengan?

¹⁰ Naparaburantayo met iti kaadda ti adu a nataengan. Iti dadduma a kongregasion, adda dagiti kakabsat a lallakay ken babbaket a simamatalek nga agserserbi ken Jehova iti unos ti panagbiagda. Dadduma met kadakuada ti nabiit pay iti kinapudno. Adu kadakuada ti agib-ibtur iti nadumaduma a sakit gapu iti kinanataenganda. Gapu kadagita, mabalin a limitadon ti maar-aramidanda iti kongregasion ken iti panangasaba. Ngem ar-aramidenda ti amin a kabaelanda iti ministerio ken us-usarenda ti amin a pigsada a mangparegta ken mangsanay iti sabsabali! Ket magunggonaantayo iti kapadasanda. Talaga a makaay-ayoda ken Jehova ken kadatayo.​—Prov. 16:31.

11-12. Kasano a maparparegtaka kadagiti ubbing iti kongregasionyo?

¹¹ Panunotenyo met dagiti ubbing iti kongregasiontayo. Adu a problema ti pakaipaspasanguanda bayat a dumakdakkelda iti daytoy a lubong nga iturturayan ni Satanas a Diablo ken im-impluensiaan dagiti dakes a pilosopiana. (1 Juan 5:19) Ngem maparparegtatayo amin no makitkitatayo dagitoy nga ubbing nga agkomento iti gimong, mangasaba, ken situtured a mangidepensa iti pammatida. Wen, dakayo nga ubbing, adda napateg a lugaryo iti kongregasion ni Jehova!​—Sal. 8:2.

¹² Ngem marikna ti dadduma a kakabsat nga awan ti napateg a pasetda iti kongregasion. Ania ti makatulong tapno marikna ti tunggal maysa kadatayo nga adda lugartayo iti kongregasion? Kitaentayo.

13-14. Apay a mabalin a marikna ti dadduma nga awan pategda iti kongregasion?

¹³ Kitaentayo ti maikadua a leksion a maadaltayo iti ilustrasion ni Pablo. Inturongna ti atensiontayo iti maysa a problema ti adu a kakabsat ita​—mariknada nga awan ti napateg a pasetda iti kongregasion. Insurat ni Pablo: “No ibaga ti saka, ‘Gapu ta saanak nga ima, saanak a paset ti bagi,’ dina kayat a sawen a saanen a paset ti bagi. Ken no ibaga ti lapayag, ‘Gapu ta saanak a mata, saanak a paset ti bagi,’ dina kayat a sawen a saanen a paset ti bagi.” (1 Cor. 12:15, 16) Ania ti punto ni Pablo?

¹⁴ No ikomparam ti bagim iti dadduma iti kongregasion, mabalin a dimo makita ti pategmo. Dadduma iti kongregasion ket nalaing a mannursuro, nasayaat nga organisador, wenno nalaing a pastor. Nalabit mariknam a saan a kas kadakuada ti kalaingmo. Dayta ti mangipakita a napakumbaba ken naemmaka. (Fil. 2:3) Ngem agannadka. No kanayon nga ikomparam ti bagim kadagiti addaan iti naisangsangayan nga abilidad, maupaykanto laeng. Mabalin a mariknam pay ketdi ti dinakamat ni Pablo nga awan a pulos ti lugarmo iti kongregasion. Ania ti makatulong kenka a manglaban iti kasta a rikrikna?

15. Sigun iti 1 Corinto 12:4-11, ania ti masapul a bigbigentayo maipapan iti aniaman a sagut nga adda kadatayo?

¹⁵ Usigentayo daytoy: Inikkan ni Jehova ti dadduma a Kristiano idi umuna a siglo kadagiti namilagruan a sagut ti nasantuan nga espiritu, ngem saan nga amin a Kristiano ket immawat iti agpapada a sagut. (Basaen ti 1 Corinto 12:4-11.) Intalek kadakuada ni Jehova ti nadumaduma a sagut ken abilidad, ngem napateg ti tunggal Kristiano. Ita, awanen ti maawattayo a namilagruan a sagut ti nasantuan nga espiritu. Ngem agaplikar pay laeng dayta a prinsipio. Mabalin a saan nga agpapada dagiti abilidadtayo, ngem napategtayo amin ken Jehova.

16. Ania a balakad ni apostol Pablo ti masapul nga iyaplikartayo?

¹⁶ Imbes nga ikomparatayo ti bagitayo iti  dadduma a Kristiano, masapul nga iyaplikartayo daytoy a balakad ni apostol Pablo: “Sukimaten koma ti tunggal maysa dagiti aramidna tapno addanto panggapuanna nga agrag-o kadagiti aramidna, ken saan a gapu iti panangikomparana iti bagina iti sabali.”​—Gal. 6:4.

17. Ania ti pagsayaatanna no surotentayo ti balakad ni Pablo?

¹⁷ No surotentayo ti balakad ni Pablo ken usigentayo ti ar-aramidtayo, mabalin a makitatayo nga adda dagiti naiduma a sagut ken abilidadtayo. Kas pagarigan, mabalin a ti maysa a panglakayen ket saan a nalaing a mannursuro no agpalpalawag, ngem mabalin a nakabungbunga iti panagaramid iti adalan. Wenno, mabalin a saan a kas iti dadduma a panglakayen ti kalaingna nga agorganisar, ngem nalabit pagaammo a kas nadungngo a pastor a nalaka a maasitgan dagiti agibumbunannag para iti Nainkasuratan a balakad. Wenno, nalabit agdindinnamag a managpadagus. (Heb. 13:2, 16) No nalawag a makitatayo dagiti paglaingan ken abilidadtayo, mabigbigtayo nga adda maitulongtayo iti kongregasion. Saantayto met nga apalan ti dadduma a kakabsat nga addaan kadagiti abilidad a naiduma kadagiti abilidadtayo.

18. Kasanotayo a maparang-ay dagiti abilidadtayo?

¹⁸ Aniaman ti lugartayo iti kongregasion, masapul koma a parang-ayentayo amin ti panagserbitayo ken dagiti abilidadtayo. Tapno matulongannatayo ni Jehova a rumang-ay, mangipapaay iti nagsasayaat a panangsanay babaen ti organisasionna. Kas pagarigan, iti gimong iti tengnga ti lawas, maisursuro kadatayo no kasano ti agbalin a mas epektibo iti ministerio. Gunggundawayam kadi ti kasta a panangsanay?

19. Kasano a maragpatmo ti kalat a panageskuela iti School for Kingdom Evangelizers?

¹⁹ Ti sabali pay a nagsayaat a programa a panagsanay ket ti School for Kingdom Evangelizers. Silulukat daytoy nga eskuelaan kadagiti kakabsat a lallaki ken babbai nga adda iti amin-tiempo a serbisio ken agtawen iti 23 agingga iti 65. Mabalin a pagarupem a dimo pulos maragpat dayta a kalat. Ngem imbes nga ilistam dagiti rason no apay a dika makapageskuela iti dayta, ilistam ketdi dagiti rason no apay a kayatmo ti ageskuela. Kalpasanna, mangaramidka iti plano a makatulong kenka a mangragpat kadagiti kualipikasion. Iti tulong ni Jehova ken no agreggetka, ti kasla imposible ket agbalinto a posible.

20. Ania ti masursurotayo iti Roma 12:6-8?

²⁰ Ti maikatlo a leksion a maadaltayo iti ilustrasion ni Pablo ket masarakan iti Roma 12:6-8. (Basaen.) Ipakpakita manen ditoy ni Pablo a nadumaduma ti sagut dagiti kakabsat iti kongregasion. Ngem ita, ipagpaganetgetna a masapul nga usarentayo ti aniaman a sagut nga adda kadatayo a mangparegta ken mangpabileg iti kongregasion.

21-22. Ania dagiti masursurotayo kada Robert ken Felice?

²¹ Alaentayo a pagarigan ti maysa a kabsat nga awagantayo iti Robert. Kalpasan ti panagserbina iti sabali a pagilian, naawis nga agsubli iti pagilianna tapno agserbi iti Bethel. Nupay naipasigurado kenkuana a ti panagbaliw ti annongenna ket saan a gapu iti aniaman a madi a naaramidanna, imbagana: “Adu a bulan a saanak a naragsak ta impagarupko a napaayak iti annongek. Adda pay ketdin dagiti tiempo a kayatkon ti rummuar iti Bethel.” Kasano a napasublina ti rag-ona? Impalagip kenkuana ti padana a panglakayen a sinanaynatayo ni Jehova kadagiti dati nga asaynmenttayo tapno ad-adu ti maitulongtayo iti agdama nga  asaynmenttayo. Naawatan ni Robert a masapul a dinan sangkapanunot ti napalabas no di ket agpokus iti maaramidanna ita.

²² Umasping iti dayta ti napasaran ni Brother Felice Episcopo. Naggraduarda ken baketna iti Gilead idi 1956 ken nagserbida idiay Bolivia iti trabaho a panagdaliasat. Idi 1964, naaddaanda iti anak. Imbaga ni Felice: “Marigatankami a mangpanaw iti ipatpategmi nga annongen. Aminek a sinayangko ti makatawen a nangay-ay iti bagik. Ngem iti tulong ni Jehova, binalbaliwak ti panagpampanunotko ket inakseptarko ti baro a responsabilidadko kas ama.” Napadasam met kadin ti napasaran ni Robert wenno ni Felice? Maup-upayka kadi gapu ta awanen dagiti dati a pribilehiom? No wen, naragragsakka no baliwam ti pokusmo ket ipamaysam ti maaramidam itan nga agserbi ken Jehova ken kadagiti kakabsatmo. Agtalinaedka nga okupado, usarem dagiti sagut ken abilidadmo a tumulong iti sabsabali ket mariknamto ti ragsak bayat a parparegtaem ti kongregasion.

23. Ania ti masapul nga iwayaantayo nga aramiden, ken ania ti usigentayo iti sumaruno nga artikulo?

²³ Ipatpategnatayo amin ni Jehova. Kayatna nga agbalintayo a paset ti pamiliana. No iwayaantayo nga utoben no ania ti maaramidantayo a mangparegta kadagiti kakabsat sa ikagumaantayo nga aramiden dayta a papeltayo, ditayto marikna a saantayo a napateg a paset ti kongregasion! Ngem kasano ngay met ti panangmatmattayo iti dadduma a kakabsat iti kongregasion? Kasanotayo a maipakita nga ap-apresiarentayo ida? Usigentayo dayta a napateg a topiko iti sumaruno nga artikulo.