1. Apay a pinarsua ni Jehova ti biag?

ADDA idi tiempo nga agmaymaysa ni Jehova. Ngem saan a naliday. Dina kasapulan ti asinoman tapno agbalin a naragsak. Nupay kasta, kayat ti Dios a matagiragsak ti dadduma ti biag. Gapu iti ayatna, rinugian ni Jehova ti nagparsua.​—Sal. 36:9; 1 Juan 4:19.

2. Ania ti narikna ni Jesus ken dagiti anghel maipapan kadagiti aramid ni Jehova?

² Umuna, nangparsua ni Jehova iti maysa a katrabahuanna. Kalpasanna, babaen dayta nga inauna nga Anakna, “naparsua ti amin a dadduma pay a bambanag,” a pakairamanan ti minilion nga anghel. (Col. 1:16) Nakaragragsak ni Jesus a nakipagtrabaho ken Amana. (Prov. 8:30) Adda met rason nga agragsak dagiti anghel nga annak ti Dios. Aktual a nakitada idi a ni Jehova ken ti Eksperto a Trabahadorna a ni Jesus inaramidda ti langit ken ti daga. Ania ti reaksion dagiti anghel? ‘Impukkawda ti ragsakda’ idi naparsua ti daga, ken sigurado nga intultuloyda ti naragsakan iti tunggal inaramid ni Jehova, a pakairamanan ti maudi nga obra maestrana, dagiti tattao. (Job 38:7; Prov. 8:31, ftn.) Makita iti tunggal maysa kadagitoy a parsua ti ayat ken sirib ni Jehova.​—Sal. 104:24; Roma 1:20.

3. Kas ipakita ti 1 Corinto 15:21, 22, ania ti nagbalin a posible gapu iti pangsubbot a daton ni Jesus?

³ Pinanggep ni Jehova nga agbiag nga agnanayon ti pamilia ti tao iti nagpintas a planeta a pinarsuana. Ngem idi nagrebelde  da Adan ken Eva iti naayat nga Amada, simrek ti basol ken ipapatay ditoy lubong. (Roma 5:12) Ania ti inaramid ni Jehova? Dagus nga imbagana no kasano nga isalakanna ti sangatauan. (Gen. 3:15) Pinanggep ni Jehova nga ipaay ti subbot tapno posible a mawayawayaan dagiti annak da Adan ken Eva manipud iti basol ken ipapatay. Maikkanna ngarud ti tunggal tao iti gundaway a mangikeddeng nga agserbi Kenkuana ken umawat iti biag nga agnanayon.​—Juan 3:16; Roma 6:23; basaen ti 1 Corinto 15:21, 22.

4. Ania dagiti saludsod nga usigentayo iti daytoy nga artikulo?

⁴ Adda dagiti saludsod a tumaud gapu iti kari ti Dios a panangpagungar kadagiti natay. Kas pagarigan, kasanonto ngata a mapasamak ti panagungar? Mailasintayto kadi dagiti ay-ayatentayo inton mapagungarda? Kadagiti ania a pamay-an a mangparagsak kadatayo ti panagungar? Ken ania ti isuro kadatayo ti panagungar maipapan iti ayat, sirib, ken kinaanus ni Jehova? Usigentayo ti tunggal maysa kadagita a saludsod.

5. Apay a rasonable a patientayo a mapagungarto dagiti tattao iti naurnos ken in-inut a pamay-an?

⁵ Inton pagungaren ni Jehova ti minilion a tattao babaen ti Anakna, mabalin nga ipapantayo a saanda nga aggigiddan nga agungar. Apay? Gapu ta no bigla nga umadu ti populasion ti daga, posible a tumaud ti riribuk. Saan a pulos mangaramid ni Jehova iti maysa a banag iti nariribuk wenno saan nga organisado a pamay-an. Ammona a tapno agpaut ti talna, masapul a mamantener ti urnos. (1 Cor. 14:33) Masirib ken naanus ni Jehova a Dios idi in-inut nga insaganana ti daga a kaduana ni Jesus sakbay a pinarsuana dagiti tattao. Inton agangay, ipakitanto met ni Jesus dagita a  kualidad bayat ti Sangaribu a Tawen a Turayna inton makipagtrabaho kadagiti nakalasat iti Armagedon bayat nga isagsaganada ti daga para kadagiti mapagungar.

6. Sigun iti Aramid 24:15, siasino dagiti karaman kadagiti pagungaren ni Jehova?

⁶ Kangrunaan iti amin, dagidiay makalasat iti Armagedon masapul nga isurodanto kadagiti mapagungar ti maipapan iti Pagarian ti Dios ken kadagiti pagannurotan ni Jehova. Apay? Gapu ta kaaduan kadagiti mapagungar ket karaman kadagiti “nakillo.” (Basaen ti Aramid 24:15.) Adu ti masapul a balbaliwanda tapno magunggonaanda iti subbot ni Kristo. Panunotem laengen ti trabaho a karaman iti panangisuro iti kinapudno maipapan iti Dios iti minilion a tattao nga awan ti ammoda maipapan ken Jehova. Maysanto kadi ti mangisuro iti tunggal mapagungar a kas iti pamay-an ti panangyadaltayo ita iti Biblia? Dagiti kadi mapagungar ket mai-assign-to kadagiti kongregasion ken masanayda a mangisuro kadagiti sumaruno a mapagungar? Saantayo pay nga ammo. Ngem ammotayo nga iti ngudo ti Sangaribu a Tawen a Turay ni Kristo, “sigurado a mapnonto ti daga iti pannakaammo maipapan ken Jehova.” (Isa. 11:9) Nagadunto la ketdi ti makaparagsak nga aramidentayo bayat dayta a sangaribu a tawen!

7. Apay a masapul nga agbalinto a mannakaawat dagiti agserserbi iti Dios bayat nga isursuroda dagiti mapagungar?

⁷ Bayat ti Sangaribu a Tawen a Turay ni Kristo, datayo amin nga agserserbi ken Jehova ditoy daga masapul nga itultuloytayo a pasayaaten ti personalidadtayo tapno maparagsaktayo isuna. Masapul ngarud nga agbalintayto a mannakaawat bayat a tultulongantayo dagiti mapagungar a manglaban iti tendensiada nga agbasol tapno masurotda dagiti pagalagadan ni Jehova. (1 Ped. 3:8) Sigurado a dagidiay mapagungar kayatdanto ti makikadua kadagiti napakumbaba nga agserserbi ken Jehova, a ‘mangikagkagumaan met a mangitrabaho iti bukodda a pannakaisalakan.’​—Fil. 2:12.

8. Apay a rasonable nga inanamaentayo a dagiti mangsarabo kadagiti mapagungar mailasindanto dagiti ay-ayatenda?

⁸ Adda dagiti rason a mainanamatayo a dagiti mangsarabo kadagiti mapagungar mailasindanto dagiti ay-ayatenda. Kas kadagiti napasamaken a panagungar, ekspektarentayo a parsuaento manen ni Jehova dagiti tattao tapno ti langa, panagsao, ken panagpampanunotda ket kas met laeng idi sakbay a natayda. Laglagipentayo nga inyarig ni Jesus ti ipapatay iti pannaturog ken ti panagungar iti panagriing. (Mat. 9:18, 24; Juan 11:11-13) No mariing dagiti matmaturog a tattao, ti langa ken panagsasaoda ket kas met laeng idi sakbay a maturogda, ken agtalinaed ti memoriada. Usigentayo ti napasamak ken Lazaro. Uppat idin nga aldaw a natay, isu a mangrugrugin a marunot ti bagina. Ngem idi pinagungar ni Jesus, dagus a nailasin dagiti kakabsatna ket nalawag a nailasin met ida ni Lazaro.​—Juan 11:38-44; 12:1, 2.

9. Apay a saanto a dagus a perpekto ti isip ken bagi dagiti mapagungar?

⁹ Inkari ni Jehova nga awanton ti iturayan ni Kristo a mangibaga: “Masakitak.” (Isa. 33:24; Roma 6:7) No kasta, dagiti mapagungar ket maparsuanto manen nga addaan iti nasalun-at a bagi. Ngem saandanto a dagus a perpekto. Ngamin no perpektodan, nalabit saan idan a mailasin dagiti ay-ayatenda. Agparang nga amin a tattao ket in-inutto nga agbalin a perpekto bayat ti Sangaribu a Tawen a Turay ni Kristo. Inton laeng ngudo ti sangaribu a tawen nga isubli ni Jesus ti Pagarian ken  Amana. Kalpasanna, naan-anayton a naileppas ti Pagarian ti trabahona, agraman ti panamagbalin iti sangatauan a perpekto.​—1 Cor. 15:24-28; Apoc. 20:1-3.

10. Anianto ti epekto kenka ti panagungar?

¹⁰ Panunotem ti tiempo inton sarabuemon dagiti ay-ayatem. Makakatawakanto kadi wenno makasangitka gapu iti rag-o? Agkantakanto kadi iti panangidaydayaw ken Jehova? Maysa a banag ti sigurado, umunegto la ketdi ti ayatmo iti nadungngo nga Amam ken iti nakaim-imbag nga Anakna gapu iti nagsayaat a sagut a panagungar.

11. Sigun iti imbaga ni Jesus iti Juan 5:28, 29, anianto ti mapasaran dagidiay mangsurot kadagiti pagalagadan ti Dios?

¹¹ Panunotem ti ragsak dagiti mapagungar bayat nga uk-uksobenda ti daan a personalidadda ken sursurotenda dagiti nalinteg a pagalagadan ti Dios. Dagidiay mapagungar a mangaramid kadagita a panagbalbaliw ket mapalubosanto nga agbiag nga agnanayon. Ngem dagidiay agrebelde iti Dios ket saanto a mapalubosan a mangdadael iti talna iti Paraiso.​—Isa. 65:20; basaen ti Juan 5:28, 29.

12. Kasanonto a bendisionan ni Jehova ti amin nga adda ditoy daga?

¹² Iti panangituray ti Pagarian, mapasaranto ti amin nga agserserbi iti Dios ti kinuna ti Proverbio 10:22: “Ti bendision ni Jehova ti mangpabaknang, ket saanna a nayonan iti rigat.” Gapu ta agtigtignayto ti espiritu ni Jehova kadagiti adipenna, bumaknangdanto iti naespirituan, kayatna a sawen, ad-addanto a matuladda ni Kristo ken agbalinda a perpekto. (Juan 13:15-17; Efe. 4:23, 24) Tunggal aldaw, agbalindanto a nasalsalun-at ken nasaysayaat a tattao. Nakaragragsakto la ketdi ti biag! (Job 33:25) Ngem kasano a makatulong kenka itan ti panangpampanunotmo iti panagungar?

13. Maitunos iti Salmo 139:1-4, kasano nga ipakita ti panagungar nga am-ammonatayo unay ni Jehova?

¹³ Kas napagsasaritaantayon, inton pagungaren ni Jehova dagiti tattao, isublinanto ti memoriada agraman dagiti ugali ken kababalin a pakabigbigan ti kinataoda. Panunotem laengen ti kaipapanan dayta. Kasta unay ti panagayat ni Jehova kenka nga uray la ammona ti amin a pampanunotem, marikriknam, ibagbagam, ken ar-aramidem. Isu a no bilang matayka ket pagungarennaka, nalakanto laeng nga isublina ti memoriam, kababalinmo, ken personalidadmo. Ammo ni Ari David nga interesado unay ni Jehova iti tunggal maysa kadatayo. (Basaen ti Salmo 139:1-4.) Ania ti mariknatayo no maawatantayo nga am-ammonatayo unay ni Jehova?

14. Ania ti epektona kadatayo no panunotentayo a naimbag nga am-ammonatayo unay ni Jehova?

¹⁴ No panunotentayo a naimbag nga am-ammonatayo unay ni Jehova, ditay madanagan. Apay? Laglagipentayo nga ipatpategnatayo unay ni Jehova. Napateg kenkuana dagiti naisangsangayan a kualidad ti tunggal maysa kadatayo. Pagaammona dagiti kapadasantayo iti biag a mangsuksukog iti kinataotayo. Talaga a makaliwliwa dayta! Ditay koma pulos marikna nga agmaymaysatayo. Adda ni Jehova iti sibaytayo iti tunggal kanito, ket kitkitaenna dagiti gundaway a matulongannatayo.​—2 Cron. 16:9.

15. Kasano a ti panagungar ket pakakitaan iti sirib ni Jehova?

¹⁵ Ti pangta ni patay ket nabileg nga armas. Us-usaren dayta dagiti tattao a kontrolado  ni Satanas tapno pilitenda ti sabsabali a mangtraidor iti gagayyemda wenno mangikompromiso kadagiti prinsipioda. Ngem saan nga epektibo kadatayo dayta a pangta. Ammotayo a no patayendatayo dagiti kabusor, pagungarennatayto ni Jehova. (Apoc. 2:10) Kombinsidotayo nga uray ania ti aramidenda, didatay pulos maisina ken Jehova. (Roma 8:35-39) Anian a naisangsangayan a sirib ti ipakpakita ni Jehova ta inikkannatayo iti namnama a panagungar! Babaen iti dayta, maikkatna ti maysa kadagiti kaepektibuan nga armas ni Satanas ken maarmasannatayo iti nagpaiduma a tured.

16. Ania dagiti masapul nga isaludsodmo iti bagim, ken kasano a makatulong kenka dagiti sungbatmo tapno maammuam ti kauneg ti panagtalekmo ken Jehova?

¹⁶ No ipangta dagiti kabusor ni Jehova a patayendaka, italekmo kadi ti biagmo ken Jehova? Kasanom a mapaneknekan? Ti maysa a pamay-an ket isaludsodmo iti bagim, ‘Dagiti kadi babassit a desisionko iti kada aldaw pampaneknekanda nga agtaltalekak ken Jehova?’ (Luc. 16:10) Ti sabali pay a saludsod ket, ‘Ipakpakita kadi ti estilo ti panagbiagko nga agtaltalekak iti kari ni Jehova nga ipaayna dagiti material a kasapulak no iyun-unak ti Pagarianna?’ (Mat. 6:31-33) No wen ti sungbatmo kadagita a saludsod, pampaneknekam ngarud nga agtaltalekka ken Jehova, ken nakasaganaka iti aniaman a suot a dumteng.​—Prov. 3:5, 6.

17. (a) Kasano nga ipakita ti panagungar a naanus ni Jehova? (b) Kasano a maipakitatayo nga ap-apresiarentayo ti kinaanus ni Jehova?

¹⁷ Adda aldaw ken oras nga inkeddeng ni Jehova a pagpatinggaenna daytoy daan a sistema. (Mat. 24:36) Saan a matektekan ken saan nga agtignay a nasapsapa ngem iti inkeddengna. Kailiwna a pagungaren dagiti natay, ngem agan-anus. (Job 14:14, 15) Agur-uray agingga iti naikeddeng a tiempo tapno pagungarenna ida. (Juan 5:28) Adda dagiti nasayaat a rason nga apresiarentayo ti kinaanus ni Jehova. Panunotem laengen: Gapu ta naanus ni Jehova, adu a tattao, a pakairamanantayo, ti naaddaan iti gundaway nga “agbabawi.” (2 Ped. 3:9) Kayat ni Jehova nga adu koma ti agbiag nga agnanayon, isu nga ipakitatayo koma nga ap-apresiarentayo ti kinaanusna. Kasano? Aramidentayo ti amin a kabaelantayo a mangbirok kadagidiay “addaan iti umiso a kababalin nga umawat iti agnanayon a biag” ken tulongantayo ida a mangayat ken agserbi ken Jehova. (Ara. 13:48) Iti kasta, kaduatayo ida a magunggonaan iti kinaanus ni Jehova.

18. Apay a masapul nga an-anusantayo ti sabsabali?

 ¹⁸ Siaanus nga urayen ni Jehova ti panagpatingga ti sangaribu a tawen inton agbalintayon a perpekto. Agingga a saan pay a dimteng dayta, sidadaan a pakawanen ni Jehova dagiti basoltayo. Nasayaat ngarud a kitaentayo dagiti naimbag a kualidad ti sabsabali ken an-anusantayo ida. Alaentayo a pagarigan ti maysa a kabsat nga adda sakit ni lakayna a nakaro a panagdandanag ken simmardeng payen a makigimong. “Nakarigrigat dayta para kaniak,” kinunana. “Bigla a nagbalbaliw ti biag ti pamiliami ket saanmin a maaramid dagiti planomi nga aramiden.” Ngem daytoy a nadungngo nga asawa inan-anusanna latta ni lakayna. Nagpannuray ken Jehova ket di pulos simmuko. Kas ken Jehova, saan a nagpokus iti problema no di ket iti nasayaat a maar-aramidan ni lakayna. Kinunana, “Adda dagiti nagsasayaat a kualidad ni lakayko, ken ikagkagumaanna a labanan ti panagdandanagna.” Nakapatpateg ngarud nga an-anusantayo dagiti kapamilia wenno kakongregasiontayo a mangikagkagumaan a mangdaer kadagiti narigat a kasasaad!

19. Ania koma ti determinasiontayo?

¹⁹ Naragsakan ni Jesus ken dagiti anghel idi naparsua ti daga. Ngem panunotem ti ragsakda inton makitada a mapno ti daga iti perpekto a tattao a mangay-ayat ken agserserbi ken Jehova. Panunotem ti rag-o dagidiay naggapu ditoy daga a makipagturay ken Kristo idiay langit bayat a makitkitada a magunggonaan ti sangatauan iti trabahoda. (Apoc. 4:4, 9-11; 5:9, 10) Panunotem met ti biagmo inton dagiti lulua gapu iti ut-ot ket masuktan iti lulua gapu iti ragsak inton agnanayon nga awanen ti sakit, panagladingit, ken ipapatay. (Apoc. 21:4) Determinadoka koma ngarud a mangtulad iti naayat, masirib, ken naanus nga Amam. No aramidem dayta, agtalinaedka a naragsak, aniaman a suot ti pakaipasanguam. (Sant. 1:2-4) Anian a yamantayo iti kari ni Jehova nga “agungarto” dagiti natay!​—Ara. 24:15.