1. Ania ti mabalintayo nga isaludsod no pampanunotentayo ti amin a pinarsua ni Jehova?

NO PAMPANUNOTENTAYO ti nakalawlawa nga uniberso a pinarsua ni Jehova, mabalin a mariknatayo ti narikna ni salmista David, a nangikararag: “No tumangadak iti langit nga aramid dagiti imam, ti bulan ken dagiti bituen nga insaganam, ania koma ti tao tapno silalagipka kenkuana, ken ti anak ti tao tapno aywanam isuna?” (Sal. 8:3, 4) Kas ken David, mabalin a mapanunottayo a nakabasbassittayo no ikompara kadagiti bituen a pinarsua ni Jehova ken masdaawtayo ta silalagip isuna kadatayo. Ngem kas makitatayo, saan la nga inaywanan ni Jehova ti immuna a tattao, da Adan ken Eva, no di ket pinagbalinna pay ida a paset ti pamiliana.

2. Ania ti panggep ni Jehova kadagiti kaunaan nga annakna ditoy daga?

² Da Adan ken Eva ti kaunaan nga annak ni Jehova ditoy daga, ket ni Jehova ti naayat a nailangitan nga Amada. Namnamaenna a dagitoy nga agassawa ket agbalin a nabunga a miembro ti pamiliana. Kinuna ti Dios kadakuada: “Agpaadukayo ken punnuenyo ti daga ken kultibarenyo.” (Gen. 1:28) Kayatna a maaddaanda iti annak ken aywananda a naimbag ti daga a pagtaenganda. No nagtulnog da Adan ken Eva ken inaramidda ti pagayatan ni Jehova para kadakuada, nagtalinaedda koma ken dagiti annakda a miembro ti pamilia ti Dios iti agnanayon.

3. Apay a maikunatayo nga inikkan ni Jehova da Adan ken Eva iti napateg a lugar iti pamiliana?

³ Adda napateg a lugar da Adan ken Eva iti pamilia ni Jehova. Iti Salmo 8:5, imbaga ni David maipapan iti panangparsua ni Jehova iti tao: “Pinagbalinmo a nababbaba bassit ngem kadagiti anghel, ken kinoronaam iti dayag ken kinangayed.” Wen, ti pannakabalin, laing, ken abilidad a naited kadagiti tattao ket saan a kapada ti naited kadagiti anghel. (Sal. 103:20) Ngem dagiti  tattao ket “nababbaba bassit” ngem kadagiti nabileg nga espiritu a parsua. Agasem! Talaga nga inikkan ni Jehova dagiti immuna a nagannaktayo iti nagsayaat a pangrugian.

4. Ania ti napasamak iti lugar da Adan ken Eva iti pamilia ni Jehova, ken ania ti pagsasaritaantayo iti daytoy nga artikulo?

 ⁴ Makapaladingit ta napukaw da Adan ken Eva ti lugarda iti pamilia ni Jehova. Makadidigra dagiti epekto dayta kadagiti annakda, kas makitatayo iti maudi a paset daytoy nga artikulo. Ngem saan a nagbalbaliw ti panggep ni Jehova. Kayatna nga agbalin nga annakna iti agnanayon dagiti natulnog a tattao. Umuna, pagsasaritaantayo no kasano nga impakita ni Jehova a napategtayo kenkuana. Kalpasanna, pagsasaritaantayo dagiti maaramidantayo ita tapno maipakitatayo a kayattayo ti agbalin a paset ti pamilia ti Dios. Kamaudiananna, usigentayo dagiti bendision nga agnanayonto a tagiragsaken dagiti annak ni Jehova ditoy daga.

5. Kasano a maipakitatayo nga agyamyamantayo iti Dios gapu ta pinarsuanatayo a kaladladawanna?

⁵ Pinadayawannatayo ni Jehova ta pinarsuanatayo a kaladladawanna. (Gen. 1:26, 27) Gapu ta naparsuatayo a kaladladawan ti Dios, kabaelantayo a patanoren ken ipakita dagiti nagsasayaat a kualidadna kas iti panagbalin a naayat, naasi, napudno, ken nalinteg. (Sal. 86:15; 145:17) Bayat a patpatanorentayo dagita a kualidad, padpadayawantayo ni Jehova ken pampaneknekantayo nga agyamyamantayo kenkuana. (1 Ped. 1:14-16) No aramidentayo ti makaay-ayo iti nailangitan nga Amatayo, naragsak ken makapnek ti biagtayo. Gapu ta pinarsuanatayo ni Jehova a kaladladawanna, inikkannatayo iti abilidad nga agbalin a kita ti tattao a kayatna iti pamiliana.

6. Kasano a pinadayawan ni Jehova dagiti tattao idi insaganana ti daga?

⁶ Insaganaannatayo ni Jehova iti espesial a pagtaengan. Nabayagen sakbay pay a pinarsua ni Jehova ti immuna a tao, naisagananan ti daga para kadagiti tattao. (Job 38:4-6; Jer. 10:12) Gapu ta naimbag ken naparabur ni Jehova, impaayannatayo iti nakaad-adu a nasayaat a bambanag tapno naragsaktayo. (Sal. 104:14, 15, 24) Adda dagiti tiempo a pinaliiw ni Jehova dagiti parsuana ket ‘nakitana a nasayaat dagita.’ (Gen. 1:10, 12, 31) Pinadayawanna dagiti tattao babaen ti panangipaayna iti gundaway nga ‘iturayanda’ ti amin a nakaskasdaaw a parsuana ditoy daga. (Sal. 8:6) Panggep ti Dios nga agnanayon nga aywanan dagiti perpekto a tattao dagiti nakapimpintas a parsuana. Kanayon kadi nga agyamyamanka ken Jehova iti dayta a nagsayaat a karina?

7. Kasano nga ipakita ti Josue 24:15 nga adda wayawaya ti tao nga agpili?

⁷ Inikkannatayo ni Jehova iti sagut a wayawaya nga agdesision. Mabalintayo a pilien no ania a kita ti biag ti kayattayo. (Basaen ti Josue 24:15.) Ti abilidad nga agpili ket maawagan iti wayawaya nga agdesision. Maragsakan ti nadungngo a Diostayo no pilientayo ti agserbi kenkuana. (Sal. 84:11; Prov. 27:11) Adu ti nasayaat a pangusarantayo iti wayawayatayo nga agpili. Kitaentayo ti ulidan ni Jesus.

8. Ania ti maysa a pagarigan no kasano nga inusar ni Jesus ti wayawayana nga agpili?

⁸ Kas panangtulad iti ulidan ni Jesus, mabalintayo a pilien nga iyun-una ti pagimbagan ti sabsabali. Naminsan, nabambannog unay ni Jesus ken dagiti apostolna, isu a napanda iti naulimek a lugar tapno aginana. Ngem saan a kasta ti napasamak. Nakita ida ti adu a tattao, ket magagaranda nga agpaisuro ken Jesus. Ngem saan a nasuron ni Jesus no di ket naasian kadakuada. Isu nga ania ti inaramidna?  “Insurona ida iti adu a banag.” (Mar. 6:30-34) No tuladentayo ni Jesus a mangisakripisio iti tiempo ken pigsatayo a tumulong iti sabsabali, padpadayawantayo ti nailangitan nga Amatayo. (Mat. 5:14-16) Ken ipakpakitatayo met ken Jehova a kayattayo ti agbalin a paset ti pamiliana.

9. Ania ti masapul a laglagipen dagiti nagannak?

⁹ Inikkan ni Jehova dagiti tattao iti sagut nga agpataud iti annak ken iti responsabilidad a mangisuro kadakuada a mangayat ken agserbi kenkuana. No maysaka a nagannak, apresiarem kadi dayta nga espesial a sagut? Nupay inikkan ni Jehova dagiti anghel iti adu a nakaskasdaaw nga abilidad, saanna ida nga impaayan iti daytoy a pribilehio. Isu a no maysaka a nagannak, ipategmo ti pribilehiom a mangpadakkel iti annakmo. Naitalek kadagiti nagannak ti sagrado a responsabilidad a mangpadakkel iti annakda iti “disiplina ken pammagbaga ni Jehova.” (Efe. 6:4; Deut. 6:5-7; Sal. 127:3) Tapno matulongan dagiti nagannak, mangipapaay ti organisasion ti Dios iti adu a naibatay-Biblia nga alikamen, a kas kadagiti publikasion, video, musika, ken artikulo iti website. Nalawag a dagiti ubbing ket ay-ayaten ti nailangitan nga Amatayo ken ti Anakna. (Luc. 18:15-17) Maragsakan ni Jehova no agpannuray kenkuana dagiti nagannak ken aramidenda ti amin a kabaelanda a mangaywan iti nagpapateg nga annakda. Dagiti kasta a nagannak maikkanda dagiti annakda iti namnama nga agbalin nga agnanayon a paset ti pamilia ni Jehova!

10-11. Ania ti pinagbalin ni Jehova a posible para kadatayo babaen ti subbot?

¹⁰ Impaay ni Jehova ti kapatgan nga Anakna tapno agbalintayo manen a miembro ti pamiliana. Kas nadakamat iti  parapo 4, napukaw da Adan ken Eva ti lugarda iti pamilia ni Jehova, ken uray ti lugar para kadagiti annakda. (Roma 5:12) Sipapakinakem a nagsukir da Adan ken Eva iti Dios, isu a maikarida a maikkatan iti tawid. Ngem ania ti mapasamak iti annakda? Ay-ayaten ni Jehova dagiti tattao isu a nangaramid iti probision tapno maampon dagiti natulnog a tattao nga agbalin a miembro ti pamiliana. Inaramidna daytoy babaen ti daton ti bugbugtong nga Anakna a ni Jesu-Kristo. (Juan 3:16; Roma 5:19) Kas resulta ti daton ni Jesus, 144,000 a matalek a tattao ti naampon kas annak ti Dios.​—Roma 8:15-17; Apoc. 14:1.

¹¹ Kasta met, minilion a dadduma pay ti matalek nga agtultulnog iti pagayatan ti Dios. Adda namnamada nga agbalin a naan-anay a miembro ti pamilia ti Dios kalpasan ti maudi a pannubok iti ngudo ti Sangaribu a Tawen. (Sal. 25:14; Roma 8:20, 21) Gapu iti dayta a namnamada, uray pay itan, mabalindan nga awagan ni Jehova, ti Namarsua kadakuada, kas ‘Ama.’ (Mat. 6:9) Addanto met gundaway dagidiay mapagungar a mangammo kadagiti ekspektaren ni Jehova kadakuada. Dagiti agtulnog iti panangiwanwanna ket agbalinto met a miembro ti pamiliana.

12. Ania a saludsod ti sungbatantayo?

¹² Kas nakitatayon, adu ti inaramid ni Jehova a mangpadayaw kadagiti tattao. Inamponnan kas annakna dagidiay dinutokan ti espiritu, ken impaayanna ti “dakkel a bunggoy” iti namnama nga agbalin nga annakna iti baro a lubong. (Apoc. 7:9) Ania ti aramidentayo itan tapno maipakitatayo ken Jehova a kayattayo ti agbalin nga agnanayon a paset ti pamiliana?

13. Ania ti aramidentayo tapno agbalintayo a miembro ti pamilia ti Dios? (Marcos 12:30)

¹³ Ipakitam ti ayatmo ken Jehova babaen ti panagserbim iti amin a pusom. (Basaen ti Marcos 12:30.) Siaayat nga inikkannatayo ti  Dios iti adu a sagut. Ti maysa a kasayaatan kadagita ket ti abilidadtayo a mangidaydayaw kenkuana. Maipakitatayo nga ay-ayatentayo ni Jehova babaen ti ‘panangtungpaltayo kadagiti bilinna.’ (1 Juan 5:3) Sigun ken Jesus, ti maysa a bilin ni Amana ket mangaramidtayo kadagiti adalan ken bautisarantayo ida. (Mat. 28:19) Imbilinna met nga agiinnayattayo. (Juan 13:35) Pagbalinento ni Jehova dagiti natulnog a tattao kas miembro ti sangalubongan a pamilia dagiti agdaydayaw kenkuana.​—Sal. 15:1, 2.

14. Kasanotayo a maipakita nga ay-ayatentayo ti sabsabali? (Mateo 9:36-38; Roma 12:10)

¹⁴ Ipakitam ti ayat iti sabsabali. Ayat ti kangrunaan a galad ni Jehova. (1 Juan 4:8) Impakita ni Jehova nga ay-ayatennatayo sakbay pay a naam-ammotayo isuna. (1 Juan 4:9, 10) Matuladtayo isuna no ipakitatayo ti ayat iti sabsabali. (Efe. 5:1) Ti maysa a kasayaatan a pamay-an a maipakitatayo nga ay-ayatentayo dagiti tattao ket ti panangtulong kadakuada a mangam-ammo ken Jehova bayat nga adda pay tiempo. (Basaen ti Mateo 9:36-38.) No aramidentayo dayta, ik-ikkantayo ida iti gundaway nga agbalin a miembro ti pamilia ti Dios. Kalpasan a mabautisaran ti maysa a tao, masapul nga itultuloytayo nga ayaten ken respetuen isuna. (1 Juan 4:20, 21) Kasano? Ti maysa a pamay-an ket ditay pagduaduaan agingga a posible. Kas pagarigan, no adda inaramidna a ditay matarusan, ditay koma panunoten a dakes ti motibona. Imbes ketdi, padayawantayo ti kabsattayo, nga ibilangtayo a nangatngato ngem datayo.​—Basaen ti Roma 12:10; Fil. 2:3.

15. Siasino ti rumbeng a pangipakitaantayo iti asi ken kinaimbag?

¹⁵ Ipakitam ti asi ken kinaimbag iti amin a tattao. No kayattayo a maikaritayo a mangawag ken Jehova iti Amatayo iti agnanayon, masapul nga iyaplikartayo ti kuna ti Sao ti Dios. Kas pagarigan, insuro ni Jesus a masapul nga ipakitatayo ti asi ken kinaimbag iti amin a tattao, uray kadagiti kabusortayo. (Luc. 6:32-36) No dadduma, narigat nga aramiden dayta. Masapul ngarud a sursuruentayo ti agpanunot ken agtignay a kas ken Jesus. No ikagumaantayo ti agtulnog ken Jehova ken tuladen ni Jesus, ipakpakitatayo iti nailangitan nga Amatayo a kayattayo ti agbalin a miembro ti pamiliana iti agnanayon.

16. Kasanotayo a maprotektaran ti reputasion ti pamilia ni Jehova?

¹⁶ Protektaram ti reputasion ti pamilia ni Jehova. Iti literal a pamilia, gagangay a tuladen ti ub-ubing nga anak ti manongna. No iyap-aplikar ti manongna dagiti prinsipio ti Biblia, nasayaat isuna nga ulidan iti adingna. Ngem no agaramid iti dakes, mabalin a tuladen ti adingna. Kasta met laeng iti pamilia ni Jehova. No agbalin nga apostata, immoral, wenno dumakes ti maysa a dati a matalek a Kristiano, mabalin a tuladen isuna ti dadduma. Dagidiay mangar-aramid iti dayta daddadaelenda ti reputasion ti pamilia dagiti agdaydayaw ken Jehova. (1 Tes. 4:3-8) Masapul a ditay tuladen dagiti dakes nga ulidan ken ditay ipalubos nga adda aniaman a mangyadayo kadatayo iti naayat a nailangitan nga Amatayo.

17. Ania koma ti ditay panunoten, ken apay?

¹⁷ Agtalek ken Jehova imbes nga iti material a bambanag. Ikarkari ni Jehova nga ipaayannatayo iti taraon, kawes, ken pagtaengan no iyun-unatayo ti Pagarianna ken surotentayo dagiti nalinteg a pagalagadanna. (Sal. 55:22; Mat. 6:33) No agtalektayo iti dayta a kari, ditay panunoten a ti material a bambanag daytoy a lubong ti mangipaay kadatayo iti seguridad ken manayon a ragsak. Ammotayo a ti kakaisuna a pamay-an tapno natalna ti panunottayo ket aramidentayo ti pagayatan ni Jehova.  (Fil. 4:6, 7) Uray kabaelantayo ti gumatang iti adu a banag, masapul a panunotentayo no adda tiempo ken pigsatayo a mangusar ken mangaywan kadagita. Sobra kadi ti panangipategtayo kadagiti sanikuatayo? Laglagipentayo a namnamaen ti Dios nga adu ti magapuanantayo kas miembro ti pamiliana. Kayat a sawen ngarud dayta a ditay ipalubos a masingatayo. Sigurado a ditay kayat ti agbalin a kas iti agtutubo a lalaki a saan a nangawat iti pribilehio nga agserbi ken Jehova ken iti posibilidad a maampon kas maysa kadagiti annakna​—gapu laeng ta sobra ti panangipategna iti sumagmamano a sanikuana ditoy daga!​—Mar. 10:17-22.

18. Ania a natan-ok a dayaw ken bendision ti agnanayon a tagiragsaken dagiti natulnog a tattao?

¹⁸ Tagiragsakento dagiti natulnog a tattao ti katan-okan a dayaw​—ti pribilehio a mangayat ken agdaydayaw ken Jehova iti agnanayon! Naragsakto dagidiay addaan iti naindagaan a namnama a mangaywan iti daytoy napintas a planeta a perpekto a dinisenio ni Jehova a pagtaenganda. Asidegen a pabaruen ti Pagarian ti Dios ti intero a daga ken ti amin nga adda iti dayta. Ikkatento ni Jesus ti amin a problema a resulta ti panangilaksid da Adan ken Eva iti pamilia ti Dios. Minilion a tattao ti pagungarento ni Jehova ken ikkanna ida iti agnanayon a biag ken perpekto a salun-at iti paraiso a daga. (Luc. 23:42, 43) Bayat nga in-inut nga agbalin a perpekto ti naindagaan a paset ti pamilia dagiti agdaydayaw ken Jehova, mayanninawdanto ti “dayag ken kinangayed” nga insurat ni David.​—Sal. 8:5.

19. Ania ti masapul a laglagipentayo?

¹⁹ No karamanka iti “dakkel a bunggoy,” adda nagsayaat a namnamam. Ay-ayatennaka ti Dios ket kayatna nga agbalinka a miembro ti pamiliana. Isu nga aramidem ti amin a kabaelam tapno maparagsakmo isuna. Inaldaw a laglagipem ken ipapusom dagiti kari ti Dios. Apresiarem ti pribilehiom nga agdaydayaw iti patpatgentayo a nailangitan nga Amatayo, ken ipategmo ti namnama a mangidaydayaw kenkuana iti agnanayon!