1-2. Sigun iti Salmo 34:8, kasanotayo a maammuan ti maipapan iti kinaimbag ni Jehova?

PANUNOTEM a nayawis kenka a padasem ti maysa a makan a saanmo pay a naramramanan. Mabalin a maammuam ti maipapan iti dayta no kitaem, angotem, damagem ti recipe-na, wenno damagem ti makuna ti dadduma maipapan iti dayta. Ngem sa la maammuam a kayatmo dayta no ramanam.

² Maammuantayo met a naimbag ni Jehova no basaentayo ti Biblia ken dagiti publikasiontayo, ken no dumngegtayo iti estoria ti dadduma maipapan kadagiti bendision kadakuada ni Jehova. Ngem pudpudno laeng a maawatantayo ti kinaimbag ni Jehova no ‘nanamentayo’ a mismo ti kinaimbagna. (Basaen ti Salmo 34:8.) Iyilustrartayo iti maysa a pamay-an no kasanotayo a maaramid dayta. Ipapantayo a kayattayo ti agpayunir. Ngem tapno maragpattayo dayta a kalat, masapul a pasimplientayo ti biagtayo. Mabalin a masansan a mabasatayo ti kari ni Jesus nga ipaay ni Jehova ti bambanag a talaga a kasapulantayo no iyun-unatayo ti Pagarian. Ngem ditay pay napadasan a natungpal kadatayo dayta a kari. (Mat. 6:33) Nupay kasta, gapu iti pammatitayo iti kari ni Jesus, kinissayantayo ti paggastuantayo ken oras a panagtrabahotayo, ket nagpokustayo iti ministerio. Bayat nga ar-aramidentayo dayta, mapaneknekantayo nga ipaay a talaga ni Jehova dagiti kasapulantayo. Personal a ‘nannanamentayo’ ti kinaimbag ni Jehova.

3. Maitunos iti Salmo 16:1, 2, siasino dagiti umawat iti kinaimbag ni Jehova?

³ Ni Jehova ket “naimbag iti amin,” uray kadagidiay saan a makaam-ammo kenkuana. (Sal. 145:9; Mat. 5:45) Ngem dagidiay mangay-ayat ken Jehova ken amin-kararua nga agserserbi kenkuana ti kangrunaan a makaawat iti adu a bendisionna.  (Basaen ti Salmo 16:1, 2.) Kitaentayo ti dadduma a pamay-an a magunggonaantayo iti kinaimbag ni Jehova.

4. Kasano nga ipakita ni Jehova ti kinaimbagna kadagidiay mangrugrugi a suminged kenkuana?

⁴ Kada iyaplikartayo dagiti masursurotayo ken Jehova, makitatayo dagiti nasayaat nga epekto dagita iti biagtayo. Idi naam-ammotayo isuna ken inayattayo, tinulongannatayo a mangbalbaliw iti pampanunot ken ar-aramid a nangyadayo idi kadatayo kenkuana. (Col. 1:21) Ket idi indedikartayo ti biagtayo ken Jehova ken nagbautisartayo, lalo a napadasantayo ti kinaimbagna ta inikkannatayo iti nasayaat a konsiensia ken pribilehio nga agbalin a nasinged a gagayyemna.​—1 Ped. 3:21.

5. Kasanotayo a mapadasan ti kinaimbag ni Jehova iti ministeriotayo?

⁵ Agtultuloy a mapadasantayo ti kinaimbag ni Jehova bayat a makiramramantayo iti ministerio. Managbabainka kadi? Adu nga adipen ni Jehova ti kasta. Nalabit sakbay a nagbalinka a Saksi, dimo pulos impagarup nga agtuktokka iti ridaw ti dimo am-ammo ken iranudmo ti mensahe ti Biblia. Ngem ita, regularen nga ar-aramidem dayta. Ket iti tulong ni Jehova, maragragsakanka a mangasaba! Nariknam ti tulong ni Jehova iti adu a pamay-an. Tinulongannaka nga agtalinaed a kalmado idi naipasangoka iti maysa a bumusbusor. Impalagipna met kenka ti umiso a teksto nga ibasam iti maysa nga interesado. Ken pinabilegnaka nga agtultuloy a mangasaba uray no adu ti saan nga interesado iti teritoriayo.​—Jer. 20:7-9.

6. Kasano a ti panangsanay nga ipapaay ni Jehova ket ebidensia ti kinaimbagna?

⁶ Impakita met ni Jehova ti kinaimbagna babaen ti panangsanayna kadatayo iti ministerio. (Juan 6:45) Kadagiti gimongtayo iti tengnga ti lawas, makabuyatayo kadagiti praktikal a pagtuladan iti pannakisarita ken maiparegta nga usarentayo dagita iti ministerio. Iti damo, mabalin nga agpangaduatayo a mangpadas iti baro a pamay-an ti panangasaba. Ngem idi inaramidtayo dayta, nakitatayo nga epektibo dayta iti teritoriatayo. Maiparparegta met kadagiti gimong ken kombension nga aramidentayo ti ditay pay napadpadasan. Kaipapanan manen dayta nga aramidentayo ti ditay nakairuaman. Ngem no padasentayo dayta, ik-ikkantayo ni Jehova iti rason a mangbendision kadatayo. Usigentayo ti dadduma a bendision no mangbiroktayo kadagiti baro a pamay-an a maipaaytayo ken Jehova ti kasayaatantayo aniaman ti kasasaadtayo. Kalpasanna, pagsasaritaantayo dagiti pamay-an no kasanotayo a mapalawa ti ministeriotayo.

7. Ania a bendision ti maawattayo no ikagumaantayo a palawaen ti ministeriotayo?

⁷ Ad-adda a sumingedtayo ken Jehova. Usigentayo ti kapadasan ti panglakayen nga agnagan Samuel, * nga agserserbi idiay Colombia a kaduana ni baketna. Maragragsakanda idin nga agpaypayunir iti kongregasionda, ngem kayatda a palawaen ti ministerioda babaen ti panangtulongda iti kongregasion a dakdakkel ti panagkasapulanna. Tapno maragpatda dayta, masapul nga adda dagiti isakripisioda. “Inyaplikarmi ti Mateo 6:33 ken saankamin a gimmatang kadagiti saanmi a kasapulan,” imbaga ni Samuel. “Ngem ti karirigatan nga inaramidmi ket ti panangpanawmi iti apartmentmi. Nadisenio dayta para kadakami, ken awan ti baybayadanmi nga utang para iti dayta.” Nakitada a makapagbiagda met gayam iti apagkanem (1/6) laeng iti dati a sueldoda. “Nakitami no kasano nga  iwanwanwannakami ni Jehova ken sungsungbatanna dagiti kararagmi,” imbaga ni Samuel. “Marikriknami ti ragsak ken ayatna iti pamay-an a dimi pay napadpadasan.” Kabaelam met kadi a palawaen ti ministeriom iti sabali a pamay-an? No wen, masiguradom nga ad-adda a sumingedka ken Jehova ken ipaayna dagiti kasapulam.​—Sal. 18:25.

8. Ania ti masursurom iti imbaga da Ivan ken Viktoria?

⁸ Naragsak ti panagserbitayo. Kitaentayo ti imbaga ti agassawa a da Ivan ken Viktoria, nga agserserbi kas payunir idiay Kyrgyzstan. Pinagtalinaedda a simple ti biagda tapno makapagboluntarioda iti aniaman nga asaynment, a pakairamanan dagiti proyekto a panagibangon. Imbaga ni Ivan: “Ar-aramidenmi ti amin a kabaelanmi iti tunggal proyekto. Uray nabambannogkami iti agmalem, naragsak ken kontentokami ta ammomi nga inusarmi ti pigsami iti trabaho ti Pagarian. Nakaragragsakkami met ta naaddaankami iti baro a gagayyem ken naragsak a kapkapadasan.”​—Mar. 10:29, 30.

9. Ania ti inaramid ti maysa a kabsat tapno mapalawana ti ministeriona uray narigat ti situasionna, ken ania ti resultana?

⁹ Maragsakantayo nga agserbi ken Jehova uray narigat ti situasiontayo. Kas pagarigan, ti baket a balo a ni Mirreh a taga-West Africa ket nagretiro iti kinadoktorna ken nangrugi nga agpayunir. Nakaro ti arthritis-na ken maysa la nga oras ti kabaelanna a mangasaba iti binalaybalay. Ngem ad-adu nga oras ti us-usarenna iti panangasaba iti publiko. Adu ti sarsarungkaran ken iyad-adalanna iti Biblia, a dadduma kadakuada ti kasarsaritana iti telepono. Apay nga ar-aramiden dayta ni Mirreh? “Ay-ayatek unay ni Jehova ken ni Kristo Jesus. Kanayon met nga ikarkararagko ken Jehova a tulongannak a mangaramid iti amin a kabaelak nga agserbi kenkuana.”​—Mat. 22:36, 37.

10. Kas mabasa iti 1 Pedro 5:10, ania ti ipaay ni Jehova kadagidiay rumagragpat?

¹⁰ Umaw-awattayo iti kanayonan a panangsanay ni Jehova. Napaneknekan dayta ti payunir a ni Kenny nga agserserbi idiay Mauritius. Idi naammuanna ti kinapudno, nagsardeng nga ageskuela iti unibersidad, nagpabautisar, sa nagpayunir. Kinunana, “Ikagkagumaak a tuladen ni propeta Isaias, a nangibaga: ‘Adtoyak! Ibaonnak!’” (Isa. 6:8) Nagboluntario ni Kenny iti adu a proyekto ti panagibangon ken timmulong met a nangipatarus kadagiti naibatay-Biblia a publikasion iti lengguahena. “Immawatak iti pannakasanay a nakasursuruak kadagiti abilidad a kasapulak tapno maaramidko dagiti asaynmentko,” imbaga ni Kenny. Ngem saan la a dagiti teknikal nga aspeto ti nasursurona. Innayonna, “Naammuak no ania dagiti limitasionko ken dagiti kualidad a masapul a parang-ayek tapno agbalinak a nasaysayaat nga adipen ni Jehova.” (Basaen ti 1 Pedro 5:10.) Mabalinmo kadi nga usigen ti kasasaadmo tapno makitam no mabalin nga ikkannaka ni Jehova iti kanayonan a panangsanay?

11. Ania ti inaramid dagiti kakabsat a babbai idiay South Korea tapno makapangasabada, ken ania ti resultana? (Kitaen ti ladawan iti akkub.)

¹¹ Uray dagiti nabayagen a Saksi ket magunggonaan kadagiti panangsanay no padasenda ti baro a pamay-an ti panangasaba. Bayat ti COVID-19 pandemic, insurat dagiti panglakayen iti maysa a kongregasion iti South Korea: “Impagarup ti dadduma a dida idin makaruar a mangasaba gapu ta adda problema ti salun-atda ngem makapangasabada itan babaen ti videoconferencing. Tallo a kakabsat a babbai a nasuroken nga 80 ti tawenda ti nagsursuro iti baro a teknolohia ket dandanin inaldaw a makipaspasetda iti kasta a panangasaba.” (Sal. 92:14, 15) Kayatmo kadi a  palawaen ti ministeriom ken ad-adda pay a nanamem ti kinaimbag ni Jehova? Usigem ti dadduma a pamay-an a makatulong kenka a mangragpat iti dayta a kalat.

12. Ania ti kari ni Jehova kadagidiay agtaltalek kenkuana?

¹² Sursuruem ti agtalek ken Jehova. Inkarina a bendisionannatayo no agtalektayo kenkuana ken ipaaytayo ti kasayaatantayo. (Mal. 3:10) Ni Fabiola, a maysa a kabsat a babai a taga-Colombia, nakitana a tinungpal kenkuana ni Jehova dayta a karina. Kayatna ti ag-regular pioneer kalpasan unay a nagbautisar. Ngem agdepdepende ni lakayna ken ti tallo nga annakna iti sueldona. Isu nga idi mabalinnan ti agretiro, sipapasnek a nagpatulong ken Jehova. Imbagana: “Gagangay a nabayag a maiproseso ti pension ngem naaprobaran ti pensionko makabulan laeng kalpasan nga impagnak ti panagretirok. Kasla milagro dayta!” Dua a bulan kalpasanna, nagpayunir. Nasurok itan a 70 ti tawenna ken nasuroken a 20 a tawen a payunir. Bayat dayta a tiempo, walo a tattao ti natulonganna nga agpabautisar. Kinunana: “Uray no mariknak a nakapuyak no dadduma, inaldaw a tultulongannak ni Jehova tapno masurotko ti eskediulko.”

13-14. Ania dagiti ulidan a makatulong kadatayo nga agtalek ken Jehova ken rumagpat?

¹³ Agsursuroka iti ulidan dagidiay nagtalek ken Jehova. Napno ti Biblia iti ulidan dagidiay inkagumaanda ti agserbi ken Jehova. Kaaduanna nga adda umuna nga inaramid dagita nga adipen ni Jehova sakbay a nakaawatda  iti espesial a pamendisionna. Kas pagarigan, sa la binendisionan ni Jehova ni Abraham kalpasan a pimmanaw iti pagtaenganna​—“uray dina ammo ti papananna.” (Heb. 11:8) Sa la nakaawat ni Jacob iti espesial a bendision kalpasan a nakigabbo iti anghel. (Gen. 32:24-30) Idi dandanin sumrek ti nasion ti Israel iti Naikari a Daga, sa la nakaballasiw dagiti tattao kalpasan a nakatapog dagiti papadi iti agliplippias a Karayan Jordan.​—Jos. 3:14-16.

¹⁴ Makasursuroka met iti ulidan dagiti Saksi iti kaaldawantayo a nagtalek ken Jehova ken rimmagpat iti kalatda. Kas pagarigan, ti kabsat nga agnagan Payton ken ni baketna a Diana magusgustuanda ti agbasa iti kapadasan dagiti kakabsat a nangpalawa iti panagserbida ken Jehova, kas kadagidiay naisalaysay iti serye a “Situtulok nga Agsaksakripisioda.” * Imbaga ni Payton: “Idi basbasaenmi ti kapadasanda, kasla buybuyaenmi ti maysa a tao a naimas ti pannanganna. Bayat a buybuyaenmi, ad-adda met a kayatmi a ‘nanamen ken kitaen a ni Jehova ket naimbag.’” Idi agangay, immakar da Payton ken Diana iti lugar a dakdakkel ti panagkasapulanna. Nabasam kadin daytoy a serye? Ken nabuyam kadin dagiti video a Panangasaba iti Adayo a Teritoria—Australia ken Panangasaba iti Adayo a Teritoria—Ireland a nairuar iti jw.org? Makatulong dagitoy tapno makabirokka kadagiti pamay-an a mapalawam ti panagserbim.

15. Kasano a makatulong kadatayo ti umiso a kakadua?

¹⁵ Mangpilika iti umiso a kakadua. Ad-adda a kayattayo a ramanan ti baro a putahe no makikaduatayo kadagidiay makimpaborito iti dayta. Umasping iti dayta, no makikaduatayo kadagidiay mangyun-una iti panagserbida ken Jehova, maparegtatayo a mangbirok kadagiti pamay-an a mangpalawa iti panagserbitayo iti Dios. Napaneknekan dayta ti agassawa a da Kent ken Veronica. “Pinaregtadakami dagiti gagayyem ken kapamiliami a mangpadas iti baro a pamay-an ti panagserbi,” imbaga ni Kent. “Nariknami nga idi nakikaduakami kadagidiay nangyun-una iti Pagarian, pimmigsa ti pakinakemmi a mangpadas iti baro a pamay-an.” Special pioneer itan da Kent ken Veronica idiay Serbia.

16. Kas ipakita ti ilustrasion ni Jesus iti Lucas 12:16-21, apay a masapul a situtuloktayo nga agsakripisio?

¹⁶ Agsakripisioka para ken Jehova. Saan met ketdi a kasapulan nga isakripisiotayo ti amin a pagnam-ayantayo tapno maparagsaktayo ni Jehova. (Ecl. 5:19, 20) Ngem no agkedkedtayo a mangaramid iti ad-adu pay iti panagserbitayo iti Dios tapno laeng maliklikantayo ti agsakripisio, mabalin a matuladtayo ti kamali ti lalaki iti ilustrasion ni Jesus a nagbannog tapno maaddaan iti nanam-ay a biag ngem dina inkabkabilangan ti Dios. (Basaen ti Lucas 12:16-21.) Imbaga ti kabsat nga agnagan Christian a taga-France, “Saanko idi nga ipapaay ken Jehova ken iti pamiliak ti kasayaatan a tiempo ken pigsak.” Nagdesisionda ken baketna nga agpayunir. Ngem tapno maragpatda dayta, masapul nga umikkatda iti trabahoda. Tapno masuportaranda ti bagbagida, nagtrabahoda laengen kas paradalus kadagiti balay ken opisina, ken nasursuroda ti agbalin a kontento uray bassit ti kuartada. Sayang kadi ti panagsakripisioda? Kinuna ni Christian, “Naragragsak itan ti ministeriomi ken maay-ayatankami a makakita kadagiti iyad-adalanmi iti Biblia ken kadagiti sarsarungkaranmi nga agsursuro maipapan ken Jehova.”

17. Ania ti mabalin a manglapped kadatayo a mangpadas iti baro a pamay-an ti panangasaba?

 ¹⁷ Situtulokka a mangpadas kadagiti baro a pamay-an ti panagserbi. (Ara. 17:16, 17; 20:20, 21) Ti payunir a ni Shirley a taga-United States masapul nga i-adjust-na ti ministeriona bayat ti COVID-19 pandemic. Idi damo, nagkedked a mangpadas iti panangasaba babaen ti telepono. Ngem idi nasanay bayat ti ibibisita ti manangaywan iti sirkito, regularen a makiramraman iti kasta a panangasaba. Kinunana: “Madanaganak idi damo ngem maen-enjoy-ko dayta itan. Ad-adu itan ti makasaritami ngem idi agbalaybalaykami!”

18. Ania ti makatulong no maipasangotayo kadagiti karit bayat nga ikagkagumaantayo a palawaen ti ministeriotayo?

¹⁸ Agplanoka ken surotem dayta. No maipasangotayo kadagiti karit, agkararagtayo ken usarentayo ti abilidadtayo nga agpanunot tapno maiplanotayo ti aramidentayo. (Prov. 3:21) Imbaga ni Sonia a regular pioneer iti Romany ti lengguahena a grupo idiay Europe: “Isursuratko iti papel dagiti planok ket ikabilko dayta iti lugar a makitkitak. Nagdrowingak iti dua a dalan a nagduma ti direksionda sa impigketko dayta iti aparadorko. No agaramidak iti desision, kitaek dayta a drowing ken panunotek no ania a direksion ti pangiturongan kaniak ti desisionko.” Ikagkagumaan ni Sonia ti agtalinaed a positibo iti laksid dagiti karit a pakaipaspasanguanna. Imbagana: “Ti tunggal baro a situasion ket posible nga agbalin a kasla pader a mangbangen kaniak wenno rangtay a makatulong kaniak​—depende no kasano ti panangkitak iti dayta.”

19. Ania koma ti determinasiontayo?

¹⁹ Bembendisionannatayo ni Jehova iti adu a pamay-an. Maipakitatayo nga ap-apresiarentayo dagiti bendisionna no aramidentayo ti amin a kabaelantayo a mangidaydayaw kenkuana. (Heb. 13:15) Mabalin a karaman iti dayta ti panangpadastayo kadagiti baro a pamay-an tapno mapalawatayo ti ministeriotayo. Kas resultana, ad-adda pay a bendisionannatayo ni Jehova. Kada aldaw, mangbiroktayo kadagiti pamay-an tapno ‘mananam ken makitatayo a ni Jehova ket naimbag.’ Iti kasta, matuladtayo ni Jesus a nangibaga: “Ti taraonko ket ti panangaramid iti pagayatan daydiay nangibaon kaniak ken ti panangileppasko iti trabaho nga intedna.”​—Juan 4:34.