1. Ania dagiti nasayaat a naaramidanen ti adu nga agtutubo?

 KADA TAWEN, rinibu nga agtutubo a Kristiano ti mababautisaran. Bautisadoka kadin? No wen, maragsakan dagiti kapammatiam ken uray ni Jehova! (Prov. 27:11) Panunotem biit ti adun a nasayaat a naaramidam. Nakagaggagetka a nangadal iti Biblia, nalabit iti sumagmamano a tawen. Gapu iti dayta, nakombinsirka a ti Biblia ket Sao ti Dios. Nupay kasta, ti napatpateg ngem iti dayta ket naam-ammom ken inayatmo ti Autor dayta a sagrado a libro. Dimmakkel ti panagayatmo ken Jehova isu a maysaka itan a dedikado ken bautisado nga adipenna. Nagsayaat ti inaramidmo a desision!

2. Ania dagiti pagsasaritaantayo iti daytoy nga artikulo?

 ² Sakbay a nagpabautisarka, sigurado a naipasangokan iti adu a problema a nangsubok iti pammatim. Ngem bayat a tumataenganka, maipasangokanto manen iti nadumaduma a pannubok. Padasento ni Satanas a pabaawen ti ayatmo ken Jehova ken pasardengen ti panagserbim Kenkuana. (Efe. 4:14) Dimo itulok a mapasamak dayta! Ania ti makatulong tapno agtalinaedka a matalek ken Jehova ken maitungpalmo ti inkarim idi nagdedikarka? Masapul nga ‘itultuloymo ti rumang-ay’ iti Nakristianuan a kinanataengan. (Heb. 6:1) Ngem kasano a maaramidmo dayta?

3. Ania ti masapul nga aramiden ti amin a Kristiano uray bautisadodan?

³ Uray bautisadotayon, masapul a surotentayo amin ti imbalakad ni apostol Pablo kadagiti kapammatianna idiay Efeso. Imparegtana nga ‘agbalinda a nataengan’ a Kristiano. (Efe.  4:13) Iti sabali a pannao, ‘Itultuloyda ti rumang-ay.’ Maawatantayo ti kayat a sawen ni Pablo idi inkomparana ti naespirituan nga irarang-ay iti pisikal a panagdakkel ti maysa nga ubing. Ay-ayaten ken ipagpannakkel dagiti nagannak ti kayyanak a maladagada. Ngem saan nga agnanayon a matagibi. Inton agangay, masapul nga isardengnan “dagiti kababalin ti maysa nga ubing.” (1 Cor. 13:11) Kasta met laeng kadagiti Kristiano. Uray bautisadotayon, masapul nga itultuloytayo ti rumang-ay. Pagsasaritaantayo ti dadduma a suhestion a makatulong tapno maaramidtayo dayta.

4. Ania a kualidad ti makatulong kenka a rumang-ay iti naespirituan? Ilawlawag. (Filipos 1:9)

⁴ Padakkelem ti ayatmo ken Jehova. Ay-ayatem unayen ni Jehova. Ngem mapadakkelmo pay dayta nga ayatmo. Kasano? Insuro ni apostol Pablo ti maysa a pamay-an a nadakamat iti Filipos 1:9. (Basaen.) Inkararag ni Pablo nga “ad-adda pay koma nga umadu” ti ayat dagiti taga-Filipos. Mabalintayo ngarud a padakkelen ti ayattayo. Maaramidtayo dayta no gun-odentayo ti “umiso a pannakaammo ken naan-anay a pannakatarus.” No mas maam-ammotayo ni Jehova, lallalo met nga ayatentayo ken apresiarentayo ti personalidadna ken dagiti ar-aramidenna. Ad-adda pay a kayattayo a paragsaken ken ditay pulos kayat ti mangaramid iti aniaman a mangpaladingit kenkuana. Ikagumaantayo nga ammuen ti pagayatanna ken no kasanotayo nga aramiden dayta.

5-6. Ania ti aramidentayo tapno dumakkel ti panagayattayo ken Jehova? Ilawlawag.

⁵ Dumakkel ti panagayattayo ken Jehova no ammuentayo ti ad-adu pay maipapan iti Anakna a perpekto a nangtulad iti personalidad ni Amana. (Heb. 1:3) Ti kasayaatan a pamay-an a maam-ammotayo ni Jesus ket ti panangadal kadagiti salaysay ti uppat nga Ebanghelio. No dimo pay nayugali a basaen ti Biblia iti kada aldaw, rugiam koman dayta a makatulong a rutina. Bayat a basbasaem dagiti salaysay maipapan ken Jesus, isentrom ti isipmo kadagiti kualidadna. Nalaka a maas-asitgan; sidudungngo nga inubbana dagiti babassit pay nga ubbing. (Mar. 10:13-16) Nalag-an ti rikna kenkuana dagiti adalanna; maibagada latta ti pampanunoten ken rikriknada. (Mat. 16:22) Talaga a natulad ni Jesus ti nailangitan nga Amana. Naglaka met a maas-asitgan ni Jehova. Makaasidegtayo kenkuana iti kararag. No agkararagtayo, maibagatayo ti amin a linaon ti pusotayo. Agtalektayo a dinatayo husgaran. Ay-ayaten ken ipatpategnatayo.​—1 Ped. 5:7.

⁶ Naasian ni Jesus kadagiti tattao. Impadamag ni apostol Mateo: “Naasian kadagiti tattao idi nakitana ida, ta nalalatan ken naiwarawarada a kasla karnero nga awanan pastor.” (Mat. 9:36) Ania ngay ti narikna ni Jehova? Imbaga ni Jesus: “Saan a kayat ni Amak idiay langit a mayaw-awan ti uray maysa laeng kadagitoy a nanumo.” (Mat. 18:14) Talaga ngarud nga ay-ayatennatayo unay ni Jehova! Bayat a mas maam-ammotayo ni Jesus, dumakdakkel met ti panagayattayo ken Jehova.

7. Ania ti maitulong kenka ti pannakikaduam kadagiti Kristiano a nataengan iti naespirituan?

⁷ Masursurom met a padakkelen ti panagayatmo ken Jehova ken rumang-ayka kas maysa a Kristiano no kanayon a makikaduaka kadagiti kakongregasionmo a nataengan iti naespirituan. Paliiwem ti kasta unay a kinaragsakda. Dida pagbabawyan ti desisionda nga agserbi ken Jehova. Ipayestoriam dagiti kapadasanda iti panagserbida ken Jehova. No mangaramidka iti napateg a desision, agpabalakadka kadakuada. Ngamin, “adda balligi no adu ti mamalbalakad.”​—Prov. 11:14.

8. Ania ti mabalinmo nga aramiden no adda dagiti pagduaduaam nga isursuro ti Biblia?

 ⁸ Parutem dagiti pagduaduaam. Kas nadakamat iti  parapo 2, padasento ni Satanas a lapdan ti panagrang-aymo iti naespirituan. Ti maysa a pamay-anna ket mulaanna ti isipmo kadagiti panagduadua maipapan iti dadduma a pannursuro ti Biblia. Kas pagarigan, mabalin nga ita wenno inton agangay, adda dagiti mangkombinsir kenka a saannatayo a pinarsua ti Dios no di ket timmaudtayo lattan gapu iti ebolusion. Idi ubingka, baka di man la simrek dayta iti panunotmo. Ngem ita ta dakkelkan, baka daytan ti maisursuro kenka idiay eskuelaan. Mabalin a kasla lohikal ken kasla agpayso ti isursuro dagiti titsermo maipapan iti ebolusion. Ngem posible a dida man la pulos pinadas nga inadal ti ebidensia a talaga nga adda Namarsua. Laglagipem ti prinsipio iti Proverbio 18:17: “Kasla umiso ti umuna a mangibaga iti dasigna, agingga a palutpoten ti mangak-akusar kenkuana.” Imbes a mamatika lattan kadagiti maisursuro kenka idiay eskuelaan, adalem a naimbag dagiti kinapudno nga isursuro ti Biblia a Sao ti Dios. Ag-research-ka kadagiti publikasiontayo. Makisaritaka kadagiti kapammatiam a dati a mamati iti ebolusion. Damagem no ania ti nakakombinsiranda nga adda Namarsua a mangay-ayat kadatayo. Makatulong kenka ti kasta a makaparegta a tungtongan tapno maammuam ti ebidensia a talaga nga adda Namarsua.

9. Ania dagiti masursurom iti kapadasan ni Melissa?

⁹ Nakatulong unay ken Melissa ti panag-research-na maipapan iti panamarsua. * Imbagana: “Idiay eskuelaanmi, maisursuro a talaga nga agpayso kano ti ebolusion. Idi damo, diak kayat ti ag-research. Ngamin, mabutengak di la ket ta adda makitak a pakakombinsirak a husto ti ebolusion. Ngem napanunotko a saan a kayat ni Jehova a basta mamatitayo lattan kenkuana. Isu a nag-research-ak. Binasak ti libro nga Is There a Creator Who Cares About You? ken dagiti broshur a Naparsua Kadi ti Biag? ken The Origin of Life—Five Questions Worth Asking. Dayta ti eksakto a kasapulak. Idi pay koma nga inaramidko dayta.”

10-11. Ania ti makatulong kenka nga agtalinaed a nadalus iti moral? (1 Tesalonica 4:3, 4)

¹⁰ Adaywam dagiti dakes nga aramid. No tin-edyerka, nakapigpigsa ti tarigagaymo a makiseks,  ken baka adda dagiti mangsulisog kenka a mangaramid iti seksual nga immoralidad. Kayat ni Satanas a tumulokka kadagiti tarigagaymo. Ania ti makatulong kenka nga agtalinaed a nadalus iti moral? (Basaen ti 1 Tesalonica 4:3, 4.) Kadagiti personal a kararagmo, ibagam ken Jehova dagiti talaga a marikriknam ken kiddawem a papigsaenna ti pakinakemmo. (Mat. 6:13) Laglagipem a kayatnaka a tulongan ni Jehova ken dinaka husgaran. (Sal. 103:13, 14) Mabalinmo met ti agpatulong iti Sao ti Dios. Narigatan idi ti nadakamaten a ni Melissa a manglaban iti narugit a panagpampanunotna. Imbagana: “Nakatulong ti inaldaw a panagbasak iti Biblia tapno saanak a sumuko. Dayta ti nangipalagip a ni Jehova ti makinkukua kaniak ket kayatko ti agserbi kenkuana.”​—Sal. 119:9.

¹¹ Dimo solsoluen dagiti problemam. Ibagam dagita kadagiti nagannakmo. Siempre, saan a nalaka nga ibaga dagiti kasta a personal a banag. Ngem masapul nga aramidem dayta. Kinuna ni Melissa: “Inkararagko ken Jehova a paturedennak, sa imbagak ken Papang ti problemak. Kalpasan dayta, limmag-anen ti riknak. Ammok nga ipagpannakkelnak ni Jehova.”

12. Kasanoka a makaaramid kadagiti nasayaat a desision?

¹² Agpaidalanka kadagiti prinsipio ti Biblia. Bayat a dumakdakkelka, in-inut met nga ikkandaka dagiti nagannakmo iti ad-adu a wayawaya nga agdesision. Ngem kurang pay dagiti kapadasam iti biag. Kasano ngarud a maliklikam ti makaaramid kadagiti kamali a mangdadael iti pannakigayyemmo ken Jehova? (Prov. 22:3) Imbaga ti sister a ni Kari ti nakatulong kenkuana a mangaramid kadagiti nasaysayaat a desision. Nabigbigna a para kadagiti Kristiano a nataengan iti naespirituan, saan a kasapulan nga adda linteg a masurot iti kada situasion. Imbagana: “Masapul a maawatak dagiti prinsipio ti Biblia, saan laeng a dagiti linteg.” No agbasbasaka iti Biblia, isaludsodmo iti bagim: ‘Ania ti ibaga kaniak daytoy a teksto maipapan iti panagpampanunot ni Jehova? Adda kadi dagiti prinsipio nga isurona a makatulong kaniak a mangaramid iti umiso? No wen, kasano a pagsayaatak no iyaplikarko dagita?’ (Sal. 19:7; Isa. 48:17, 18) No basaem ti Biblia ken panunotem dagiti prinsipiona, nalaklakakanto a makaaramid kadagiti desision a mangparagsak ken Jehova. Bayat nga itultuloymo ti rumang-ay, makitamto a saanmo gayam a kasapulan ti linteg para iti tunggal situasion ta maawatamon ti panagpampanunot ni Jehova kadagiti bambanag.

13. Ania ti maitulong kenka dagiti nasayaat a gagayyem? (Proverbio 13:20)

¹³ Piliem a gagayyem dagidiay mangay-ayat ken Jehova. Kas nadakamaten, dagiti piliem a gagayyem dakkel ti epektoda iti irarang-aymo kas maysa a Kristiano. (Basaen ti Proverbio 13:20.) Adda idi tiempo a maaw-awanen ti ragsak ti sister a ni Sara. Ngem adda nakatulong kenkuana isu a rimmagsak manen. Inyestoriana: “Naaddaanak kadagiti nasayaat a gagayyem iti tiempo a kasapulak unay ida. Kada lawas a kaduak ti maysa nga agtutubo a sister a mangisagana a nasaksakbay iti maadal nga artikulo Ti Pagwanawanan. Tinulongannak met ti maysa pay a gayyemko a sister nga agkomento kadagiti gimong. Gapu iti nasayaat nga impluensia dagiti gagayyemko, ad-adda nga impasnekko ti personal a panagadal ken panagkararag. Timmibker ti relasionko ken Jehova, ket rimmagsakak manen.”

14. Kasano a naaddaan ni Julien iti nasayaat a gagayyem?

¹⁴ Kasanoka a maaddaan iti gagayyem a  nasayaat ti impluensiada kenka? Imbaga ni Julien a maysa itan a panglakayen: “Idi ubingak pay, nakigayyemak kadagiti nakadkaduak iti ministerio. Nakaregregtada ken tinulongandak a mangkita no kasano karagsak ti ministerio. Gapu iti dayta, pinagbalinko a kalat ti agpayunir. Naamirisko met nga isu gayam nga awan unay dagiti nasayaat ken makapainteres a gagayyemko ta dagiti laeng kaedadko idi ti pakigaygayyemak. Idi agangay, naaddaanak met kadagiti nasayaat a gagayyem iti Bethel. Gapu iti ulidanda, simmayaat ti panagpilik iti paglinglingayan isu a simmingedak ken Jehova.”

15. Ania ti impakdaar ni Pablo ken Timoteo maipapan iti pannakigayyem? (2 Timoteo 2:20-22)

¹⁵ Ania ti aramidem no naamirismo a ti pannakikaduam iti maysa a kakongregasionmo ket posible a makadadael iti relasionmo ken Jehova? Ammo idi ni Pablo a ti dadduma a kakabsat iti kongregasion Kristiano idi umuna a siglo ket saan nga agpampanunot wenno agtigtignay kas pudno a Kristiano, isu nga impakdaarna ken Timoteo nga adaywanna ida. (Basaen ti 2 Timoteo 2:20-22.) Nakapatpateg ti pannakigayyemtayo ken Jehova. Nagporsegitayo a nakigayyem iti nailangitan nga Amatayo isu a ditay koma ipalubos nga adda asinoman a mangdadael iti relasiontayo Kenkuana.​—Sal. 26:4.

16. Ania dagiti kalat a masapul nga ikeddengmo?

¹⁶ Mangikeddengka kadagiti nasayaat a kalat. Mangpilika kadagiti kalat a mangpatibker iti pammatim ken mangpasayaat iti kinataom. (Efe. 3:16) Kas pagarigan, mabalin nga ikeddengmo a pagbalinem a regular ti personal a panagadalmo ken panagbasam iti Biblia. (Sal. 1:2, 3) Wenno makitam a baka masapul a sansanem ti agkararag ken pasayaatem ti kalidad dagiti kararagmo. Nalabit kasapulan nga ad-adda a disiplinaem ti bagim iti panagpilim iti paglinglingayan ken iti panangusarmo iti orasmo. (Efe. 5:15, 16) No makita ni Jehova nga ikagkagumaam ti rumang-ay, sigurado a maragsakan.

17. Kasano a pagsayaatam no tumulongka?

¹⁷ Agbalinka nga ad-adda a nataengan iti naespirituan no tumulongka. Imbaga ni Jesus:  “Naragragsak ti mangted ngem ti umawat.” (Ara. 20:35) Dakkel ti magunggonam no usarem ti dadduma nga orasmo ken pigsam a tumulong. Kas pagarigan, pagbalinem a kalat a tulongan dagiti kakongregasionmo a nataenganen ken limitadon ti maaramidanda. Baka kayatmo ti agboluntario a mapan gumatang iti masapsapulda wenno tulongam ida nga agkudit wenno mangusar iti gadyetda. No maysaka a brother, aramidem a kalat ti agbalin a ministerial nga adipen. Iti kasta, makapagserbika kadagiti kakabsat. (Fil. 2:4) Maipakitam met ti ayat kadagiti saanmo pay a kapammatian no ikasabam ti naimbag a damag maipapan iti Pagarian. (Mat. 9:36, 37) No posible, aramidem a kalat ti sumrek iti amin-tiempo a ministerio.

18. Kasano a makatulong iti naespirituan nga irarang-aymo ti amin-tiempo a panagserbi?

¹⁸ No agserserbika iti amin-tiempo a ministerio, adu ti gundawaymo a rumang-ay iti naespirituan. No payunirka, mabalinmo ti ageskuela iti School for Kingdom Evangelizers. Baka mabalinmo pay ti agserbi iti Bethel wenno kadagiti proyekto a panagibangon kadagiti pasilidad ti organisasion. Imbaga ti agtutubo a payunir a ni Kaitlyn: “Dakkel ti naitulong ti pannakikaduak kadagiti eksperiensiado a kakabsat isu a rimmang-ayak iti naespirituan kalpasan ti bautismok. Gapu iti ulidanda, naparegtaak nga ad-adda pay a mangadal iti Biblia ken mangasa iti abilidadko a mangisuro.”

19. Ania dagiti maawatmo a bendision no itultuloymo ti rumang-ay iti naespirituan?

¹⁹ Bayat nga itultuloymo ti rumang-ay iti naespirituan, adunto ti maawatmo a bendision. Saanto a masayang ti kinaagtutubom kadagiti awan serserbina a kalat. (1 Juan 2:17) Maliklikamto met ti saem a resulta ti panagaramid kadagiti kamali a desision. Imbes ketdi, talaga nga agballigi ken naragsakkanto. (Prov. 16:3) Ti nasayaat nga ulidanmo ti mangparegtanto met kadagiti kapammatiam, ubbing man wenno nataengan. (1 Tim. 4:12) Ken kangrunaan iti amin, natalgedto ti riknam ken agbalinka a kontento gapu ta maparparagsakmo ni Jehova ken nadekketka a gayyemna.​—Prov. 23:15, 16.