1. Apay a kiniddaw ni Jesus a bantayan ni Jehova dagiti pasurotna?

 ITI rabii sakbay ti ipapatay ni Jesus, adda espesial a kiniddawna iti nailangitan nga Amana. Kiniddawna ken Jehova a bantayanna dagiti pasurotna. (Juan 17:15, 20) Siempre, kanayon a bambantayan, ay-aywanan, ken protprotektaran ni Jehova dagiti adipenna. Ngem ammo ni Jesus a maipasango dagiti pasurotna iti nakaro nga ibubusor ni Satanas. Ammo met ni Jesus a kasapulanda ti tulong ni Jehova tapno malabananda dagiti dakes a taktika ti Diablo.

2. Sigun iti Salmo 33:18-20, apay a masapul a ditay agbuteng no maipasangotayo iti rigat wenno suot?

² Gabgabsuonan ti sistema ni Satanas iti adu a problema dagiti pudno a Kristiano ita. Maipaspasangotayo kadagiti rigat wenno suot a mangupay ken mangsubok pay ketdi iti kinamatalektayo ken Jehova. Ngem kas makitatayto iti daytoy nga artikulo, awan a pulos ti rumbeng a pagbutngantayo. Bambantayannatayo ni Jehova​—makitkitana dagiti mapaspasarantayo a rigat wenno suot, ken kanayon a sisasagana a tumulong. Usigentayo ti dua a pagarigan iti Biblia a mangipakita no kasano a ni Jehova ti “mangbambantay kadagidiay agbuteng kenkuana.”​—Basaen ti Salmo 33:18-20.

3. Ania dagiti kanito a mabalin a mariknatayo nga agmaymaysatayo?

³ Uray no pasettayo ti dakkel a pamilia dagiti agdaydayaw ken Jehova, mabalin nga adda tiempo a mariknatayo nga agmaymaysatayo. Kas pagarigan, mabalin a marikna dagiti ubbing wenno agtutubo nga agmaymaysada no umakarda iti sabali a kongregasion wenno mariknada nga awan ti tumulong kadakuada no ilawlawagda dagiti patpatienda kadagiti kaklaseda. No naliday, maup-upay, madepdepres, wenno negatibo ti panagrikna ti dadduma kadatayo, ipagaruptayo a masapul a solsoluentayo lattan nga ibturan dagita. Baka ditay kayat nga ibaga iti sabsabali ti marikriknatayo amangan  no didatay met la maawatan. No dadduma, ipapantayo pay ketdi nga awan sa met a talaga ti mangipatpateg kadatayo. No mariknatayo nga agmaymaysatayo​—aniaman ti rason​—mabalin a madanagantayo ken mariknatayo a kakaasi wenno nakapimpimantayo. Saan a pulos a kayat ni Jehova a kasta ti mariknatayo. Apay a maibagatayo dayta?

4. Apay nga imbaga ni propeta Elias: ‘Siak laengen ti natedda’?

⁴ Alaentayo a pagarigan ti napasamak iti matalek a lalaki a ni Elias. Porsegido ni Jezebel a mangpatay kenkuana isu a nasurok nga 40 nga aldawen nga agliblibas tapno maispal ti biagna. (1 Ar. 19:1-9) Idi agmaymaysan ni Elias iti kueba, imbagana ken Jehova: ‘Siak laengen ti natedda’ a propeta. (1 Ar. 19:10) Adda pay idi dadduma a propeta iti daga; nairemedio ni Abdias nga ilemmeng ti 100 a propeta iti panggep ni Jezebel a mangpapatay kadakuada. (1 Ar. 18:7, 13) Apay ngarud a narikna ni Elias nga isu ket agmaymaysa? Impapanna ngata a natayen ti amin a propeta nga inlemmeng ni Abdias? Nariknana ngata nga agmaymaysa gapu ta awan ti nakikadua kenkuana nga agserbi ken Jehova kalpasan a napaneknekan a saan a pudno a Dios ni Baal idiay Bantay Carmelo? Nariknana ngata nga awan ti makaammo no kasano kapeggad ti situasionna, wenno awan man la ti mangisakit kenkuana? Saan a nailawlawag iti salaysay ti amin a narikna ni Elias. Ngem masiguradotayo a naawatan ni Jehova no apay a narikna ni Elias nga agmaymaysa. Ammo met ni Jehova ti eksakto a tulong a kasapulan ni Elias.

5. Kasano nga impasigurado ni Jehova ken Elias a saan nga agmaymaysa isuna?

⁵ Tinulongan ni Jehova ni Elias iti nadumaduma a pamay-an. Pinaregtana ni Elias nga agsao. Namindua a dinamagna ken Elias: “Ania ti ar-aramidem ditoy?” (1 Ar. 19:9, 13) Kadagita a gundaway, dimngeg ni Jehova bayat nga inyebkas ni Elias ti amin a linaon ti pusona. Simmungbat ni Jehova babaen ti panangipakitana ken Elias iti kaaddana ken iti kinamannakabalinna. Impasiguradona met ken Elias nga adu pay ti padana nga agdaydayaw. (1 Ar. 19:11, 12, 18) Sigurado a limmag-an ti barukong ni Elias idi nayebkasnan ken Jehova ti amin a linaon ti pusona ken idi nangngegna ti sungbat ti Diosna. Inikkan ni Jehova ni Elias iti sumagmamano a napateg nga  annongen wenno asaynment. Kiniddawna a dutokanna ni Hazael kas ari iti Siria, ni Jehu kas ari iti Israel, ken ni Eliseo kas propeta. (1 Ar. 19:15, 16) Inted ni Jehova dagita nga asaynment ken Elias tapno matulonganna nga agpokus kadagiti positibo a bambanag. Impaay met ti Dios kenkuana ni Eliseo a nagbalin a nasinged a kaduana. Kasanom a maawat ti tulong ni Jehova no mariknam nga agmaymaysaka?

6. Ania dagiti mabalinmo nga ikararag no mariknam nga agmaymaysaka? (Salmo 62:8)

⁶ Aw-awisennaka ni Jehova nga agkararag kenkuana. Makitkitana dagiti problemam ken ipasiguradona a denggennaka kada agkararagka. (1 Tes. 5:17) Maragsakan a dumngeg kadagiti kararag dagiti agdaydayaw kenkuana. (Prov. 15:8) Ania dagiti mabalinmo nga ikararag no mariknam nga agmaymaysaka? Iyebkasmo ken Jehova ti amin a linaon ti pusom a kas iti inaramid idi ni Elias. (Basaen ti Salmo 62:8.) Ibagam dagiti pakadanagam ken no ania ti mariknam kadagita. No mariknam nga agmaymaysaka, agpatulongka ken Jehova nga isurona no ania ti aramidem. Kas pagarigan, no mariknam nga agmaymaysaka ken mabutengka a mangasaba idiay eskuelaan, kiddawem ken Jehova a paturedennaka nga agsao. Mabalinmo pay ketdi ti agdawat iti sirib tapno sitataktika a mailawlawagmo ti patpatiem. (Luc. 21:14, 15) No madepres wenno maupayka, kiddawem ken Jehova a tulongannaka a makisarita iti maysa a Kristiano a nataengan iti naespirituan a pangibagaam iti problemam. Ipakaasim ken Jehova a tulonganna daydiay pangibagaam a mangtarus iti riknam. Iyebkasmo ken Jehova ti amin a linaon ti pusom, siputam no kasanona a sungsungbatan ti kararagmo, ken akseptarem ti tulong ti dadduma. Iti kasta, dimonto unayen marikna nga agmaymaysaka.

7. Ania dagiti masursurom iti kapadasan ni Mauricio?

⁷ Inikkannatayo amin ni Jehova iti makaparagsak a trabaho. Makapagtalekka a makitkita ken ap-apresiarenna ti amin nga ar-aramidem a mangitungpal kadagiti asaynmentmo iti kongregasion ken iti ministerio. (Sal. 110:3) Kasano a ti panagtalinaed nga okupado kadagita a trabaho ket makatulong kenka no mariknam nga agmaymaysaka? Kitaentayo ti kapadasan ti agtutubo a kabsat nga agnagan iti Mauricio. * Di nagbayag kalpasan a nagpabautisar, maysa kadagiti kasingedan a gayyemna ti in-inut a nangpanaw iti kinapudno. “Idi nakitak nga ad-adaywannan ni Jehova, kimmapuy ti kompiansak iti bagik,” imbaga ni Mauricio. “Pinampanunotko no matungpalko met la ngata ti dedikasionko ken makapagtalinaedak a paset ti pamilia ni Jehova. Nariknak idi nga agmaymaysaak ken awan ti makaawat iti riknak.” Ania ti nakatulong ken Mauricio? “Pinalawak ti ministeriok,” imbagana. “Dayta ti nakatulong tapno saanko a sangkapanunot ti bagik ken dagiti negatibo a riknak. Rimmagsakak ken diak unayen narikna nga agmaymaysaak bayat ti pannakikaduak kadagiti  kakabsat iti ministerio.” Kinapudnona, uray no ditay makapangasaba a kadua dagiti kapammatiantayo iti pisikal a pamay-an, maparparegtatayo no makikaduatayo kadakuada iti virtual a pamay-an kadagiti aktibidad kas iti panagaramid iti surat ken panangasaba babaen ti telepono wenno selpon. Ania pay ti nakatulong ken Mauricio? Imbagana pay: “Adu met ti ar-aramidek para iti kongregasion. Isagsaganak a naimbag dagiti pasetko ken iparangko dagita iti kasayaatan a pamay-an. Gapu kadagita nga asaynment, mariknak a napategak ken Jehova ken kadagiti kakabsat.”

8. Ania ti mariknatayo no maipasangotayo kadagiti nakaro a suot?

⁸ Ekspektarentayo a masuottayo kadagitoy maudi nga al-aldaw. (2 Tim. 3:1) Ngem baka bigla a dumteng dagita iti biagtayo. Kas pagarigan, baka kellaat nga agproblematayo iti pinansial, agsakittayo iti nakaro, wenno matay ti maysa nga ipatpategtayo. No mapasamak dagita, mabalin nga agaburidotayo ken ditay pay ketdin ammo ti kudkodentayo, aglalo no kasla agtutupatop wenno aggigiddan pay ketdi dagita. Ngem laglagipentayo a bambantayannatayo ni Jehova ken paturedennatayo a mangsango iti aniaman a suot.

9. Deskribirem ti dadduma a suot a napasaran ni Job.

⁹ Panunotentayo no kasano a tinulongan ni Jehova ti matalek a ni Job. Agsasaruno dagiti napasaranna a nakaro a suot. Iti maysa la nga aldaw, naammuan ni Job dagiti naranggas ken makapaseggar a pasamak a nakaigapuan ti pannakapukaw dagiti tarakenna, ipapatay dagiti adipenna, ken nakarkaro pay, dagiti dungdungnguenna nga annak. (Job 1:13-19) Di nagbayag, bayat nga agpaspasanaang pay laeng ni Job iti nakaro a ladingitna, naaddaan iti naut-ot ken mangpalaad a sakit. (Job 2:7) Nagkaro ti situasion ni Job isu a naibagana: “Kagurak ti biagko; diak kayaten ti agbiag.”​—Job 7:16.

10. Kasano nga impaay ni Jehova dagiti kasapulan ni Job tapno maibturanna dagiti pakasuotanna? (Kitaen ti ladawan iti akkub.)

¹⁰ Bambantayan idi ni Jehova ni Job. Gapu ta ay-ayaten ni Jehova ni Job, impaayna dagiti kasapulanna tapno maibturanna dagiti pakasuotanna ket makapagtalinaed a matalek. Nakisarita ni Jehova ken Job. Impalagipna ti di aggibus a siribna ken ti naayat a panangaywanna kadagiti parsuana. Dinakamatna ti adu a nakaskasdaaw ken makapaamanga nga animal. (Job 38:1, 2; 39:9, 13, 19, 27; 40:15; 41:1, 2) Inusar met ni Jehova ti matalek ken agkabannuag a ni Elihu tapno pabilgen ken liwliwaenna ni Job. Impasigurado ni Elihu a kanayon a bendisionan ni Jehova ti panagibtur dagiti agdaydayaw Kenkuana. Ngem tinignay met ni Jehova ni Elihu a mangted iti nadungngo a pammagbaga ken Job. Tinulongan ni Elihu ni Job nga agpokus iti kapatgan nga isyu. Impalagipna kenkuana ti kasasaadna no ikompara ken Jehova, ti Namarsua iti uniberso. (Job 37:14) Adda met impaaramid ni Jehova ken Job; ikararaganna ti tallo a nakabasol a kakaduana. (Job 42:8-10) Kasanonatayo a tultulongan ita ni Jehova no mapasarantayo dagiti nakaro a suot?

11. Ania a liwliwa ti ipaay ti Biblia bayat dagiti pakasuotantayo?

¹¹ Saanen a direkta a makisarita kadatayo ni Jehova a kas iti inaramidna idi ken Job. Ngem makisarsarita ita kadatayo babaen ti Saona, ti Biblia. (Roma 15:4) Tapno maliwliwanatayo, impaayannatayo iti namnama iti masanguanan. Kitaentayo ti sumagmamano a teksto iti Biblia a mangliwliwa kadatayo no maipasangotayo kadagiti suot. Ipasigurado kadatayo ni Jehova nga awan a pulos​—uray dagiti nakaro a pakasuotan​—ti ‘makaisina kadatayo iti ayatna.’ (Roma 8:38, 39) Impanamnamana pay nga isu ket “asideg . . . iti amin nga umaw-awag kenkuana” iti kararag. (Sal. 145:18) Ibagbaga kadatayo ni Jehova a no agpannuraytayo kenkuana, maibturantayo ti aniaman a suot ken naragsaktay latta uray agsagsagabatayo. (1 Cor. 10:13; Sant. 1: 2, 12) Ipalagip met ti Sao ti Dios a temporario ken apagbiit dagiti pakasuotantayo no idilig iti agnanayon a gunggona nga ipaayna kadatayo. (2 Cor. 4:16-18) Inikkannatayo ni Jehova iti sigurado a namnama a pukawennanto ti ramut ti amin a pakasuotantayo​—ni Satanas a Diablo ken dagidiay managdakdakes a kas kenkuana. (Sal. 37:10) Adda kadin dagiti naikabesam a makaliwliwa a teksto iti Biblia a makatulong tapno maibturam dagiti suot iti masanguanan?

12. Ania ti ekspektaren ni Jehova nga aramidentayo tapno naan-anay a mabenepisiarantayo iti Saona?

¹² Ekspektaren ni Jehova a mangyeskediultayo iti oras tapno regular nga adalentayo ti Biblia ken panunoten a naimbag dagiti mabasbasatayo. No iyaplikartayo dagiti masursurotayo, tumibker ti pammatitayo ken nasingsingedtayo iti nailangitan nga Amatayo. Kas resultana, kayatayo nga ibturan dagiti suot. Ipapaay met ni Jehova ti nasantuan nga espirituna kadagidiay agpampannuray iti Saona. Dayta nga espiritu ti mangted iti “bileg a nalablabes ngem iti gagangay” tapno maibturantayo ti aniaman a suot.​—2 Cor. 4:7-10.

13. Kasano a makatulong ti naespirituan a taraon nga ipapaay “ti matalek ken masirib nga adipen” tapno maibturantayo dagiti suot?

¹³ Iti tulong ni Jehova, mangipapaay “ti matalek ken masirib nga adipen” iti nagadu nga artikulo, video, ken musika tapno bumileg ti pammatitayo ken agtalinaedtayo nga alerto iti naespirituan. (Mat. 24:45) Masapul nga aprobetsarentayo dagita a naintiempuan a probision. Nabiit pay nga imbaga ti maysa a sister a taga-United States nga agyamyaman unay gapu iti amin a naespirituan a taraon. Kinunana: “Bayat ti 40 a tawen a panagserbik ken Jehova, namin-adun a nasubok ti integridadko.” Nagkaro dagiti pannubok a nakaipasanguanna​—natay ni lolona ta dinungpar ti maysa a nabartek a drayber, natay dagiti nagannakna gapu iti nakaro a sakit, ken namindua a nagkanser. Ania ti nakatulong kenkuana nga agibtur? Inlawlawagna: “Kanayon nga ay-aywanannak ni Jehova. Dagiti naespirituan a taraon nga ipapaayna babaen ti matalek ken masirib nga adipen ti nakatulong kaniak nga agibtur. Gapu iti dayta, maibagak met ti naibaga ni Job: ‘Agingga a matayak, agtalinaedak nga awan pagkuranganna!’”​—Job 27:5.

14. Kasano nga us-usaren ni Jehova dagiti kapammatiantayo a tumulong bayat dagiti pakasuotantayo? (1 Tesalonica 4:9)

¹⁴ Sansanayen ni Jehova dagiti adipenna nga agiinnayat ken aglilinniwa bayat dagiti narigat a tiempo. (2 Cor. 1:3, 4; basaen ti 1 Tesalonica 4:9.) Kas ken Elihu, magagaran dagiti kakabsat a tumulong kadatayo nga agtalinaed a matalek  no maipasangotayo kadagiti pakarigatan. (Ara. 14:22) Kas pagarigan, kitaentayo no kasano a ni Diane ket pinaregta ken tinulongan dagiti kakongregasionna tapno agtalinaed a nabileg ti espiritualidadna kalpasan a nagsakit iti grabe ni lakayna. Imbagana: “Talaga a nagrigat. Ngem nariknami ti nairut ken nadungngo nga arakup ni Jehova kadagidi a bulan a problemadokami. Nagadu ti inaramid ti kongregasionmi a tumulong kadakami. Binisita, tinawagan, ken inarakupdakami tapno makapagibturkami. Gapu ta diak ammo ti agmaneho, adda no kua dagiti kakabsat a mangdagas kaniak tapno makagimongak ken makapangasabaak.” Talaga a bendision ti agbalin a paset ti kasta a nadungngo a naespirituan a pamilia!

15. Apay a kombinsidotayo a maibturantayo dagiti suot?

¹⁵ Addanto nga adda ti pakasuotan ti tunggal maysa kadatayo. Ngem kas naadaltayon, saantayo a pulos nga agmaymaysa a mangsango kadagita. Kanayon a bambantayannatayo ni Jehova kas nadungngo nga Ama. Adda iti sibaytayo a kanayon a nakasagana a dumngeg kadagiti pakaasitayo ken magagaran a tumulong kadatayo. (Isa. 43:2) Kombinsidotayo a maibturantayo dagiti pakasuotan ta sipaparabur nga ipapaayna ti amin a kasapulan tapno makapagibturtayo. Impaayna ti sagut a panagkararag, ti Biblia, ti nabuslon a naespirituan a taraon, ken ti nadungngo a kakabsattayo a tumulong kadagiti oras a kasapulantayo ida.

16. Ania dagiti aramidentayo tapno kanayon a sidudungngo nga aywanannatayo ni Jehova?

¹⁶ Agyamantayo unay ta addaantayo iti nailangitan nga Ama a mangbambantay kadatayo! “Agragsaktayo gapu kenkuana.” (Sal. 33:21) Maipakitatayo nga ap-apresiarentayo ti nadungngo a panangaywan ni Jehova no aprobetsarentayo ti amin a probisionna a tumulong kadatayo. Masapul nga aramidentayo met ti pasettayo tapno kanayon nga aywanannatayo ti Dios. Iti sabali a pannao, no itultuloytayo nga aramiden ti amin a kabaelantayo nga agtulnog ken Jehova ken aramiden ti umiso iti imatangna, agnanayon a bantayannatayo!​—1 Ped. 3:12.