1-2. (a) Kasano ti panangmatmat ni Jehova kadagiti mangigaggagara nga agbasol? (b) Ania ti namnamaen ni Jehova nga aramiden dagiti nakabasol?

 SAAN a napanuynoy a Dios ni Jehova. Kagurana ti basol. (Sal. 5:​4-6) Namnamaenna a surotentayo dagiti nalinteg a pagalagadanna iti Biblia. Siempre, ammo ni Jehova nga imperpektotayo, isu a saantayo a naan-anay a makapagtulnog Kenkuana. (Sal. 130:​3, 4) Kasta met, saanna a konsintiren dagiti ‘dakes a tattao a pagpampambarda ti nagpaiduma a kinaimbag ti Dios para iti nakaal-alas a kababalinda.’ (Jud. 4) Imbes ketdi, ibagbaga ti Biblia a ‘madadaelto dagiti dakes’ inton Armagedon a gubat ti Dios.—2 Ped. 3:7; Apoc. 16:16.

² Nupay kasta, saan a kayat ni Jehova a madadael ti asinoman. Kas napagsasaritaantayon kadagiti napalabas nga artikulo iti daytoy a serye, nalawag nga ibagbaga ti Biblia a “kayatna nga agbabawi ti amin.” (2 Ped. 3:9) Matulad dagiti panglakayen ni Apo Jehova no siaanus a tulonganda dagiti nakabasol nga agbalbaliw ken agbalin manen a nasinged Kenkuana. Ngem no dadduma, adda dagiti nakabasol a saan nga agbabawi. (Isa. 6:9) Itultuloyda latta dagiti dakes nga ar-aramidenda uray no mamin-adun a sinarungkaran dagiti panglakayen tapno tulonganda nga agbabawi. Ania ti masapul nga aramiden dagiti panglakayen iti kasta a situasion?

 “IKKATENYO TI DAKES A TAO”

3. (a) Ania ti ibaga ti Biblia a masapul a maaramid kadagiti di agbabbabawi a nakabasol? (b) No saan nga agbabawi ti maysa, apay a maibagatayo nga isu a mismo ti nagdesision a maikkat iti kongregasion?

³ No saan nga agbabawi ti nakabasol, masapul a suroten dagiti panglakayen ti bilin iti 1 Corinto 5:13: “Ikkatenyo ti dakes a tao iti tengngayo.” Ammo ti nakabasol a no saan nga agbabawi, maikkat iti kongregasion. Kas man la isunan a mismo ti nagdesision iti pannakaikkatna iti kongregasion. Ap-apitenna ti immulana. (Gal. 6:7) Apay a maibagatayo a kasta? Gapu ta saan a nagbalbaliw uray no mamin-adu a tinulongan dagiti panglakayen nga agbabawi. (2 Ar. 17:​12-15) Ipakita dagiti aramidna a pinilina ti saan nga agtulnog kadagiti bilin ni Jehova.—Deut. 30:​19, 20.

4. Apay a masapul a maipakaammo iti kongregasion a naikkat ti saan nga agbabbabawi a nakabasol?

⁴ No naikkat iti kongregasion ti saan nga agbabbabawi a nakabasol, masapul nga adda maaramid a pakaammo iti kongregasion nga isu ket saanen a maysa kadagiti Saksi ni Jehova. a Ti panggep dayta a pakaammo ket saan a tapno maibabain ti nakabasol, no di ket tapno masurot dagiti kakabsat ti bilin ti Biblia nga ‘isardengda ti makikadkadua’ iti dayta a tao, “uray makipangan man la” kenkuana. (1 Cor. 5:​9-11) Adda nasayaat a rason nga inted ni Jehova dayta a bilin. Insurat ni apostol Pablo: “Ti bassit a lebadura paalsaenna ti intero a masa.” (1 Cor. 5:6) No saan a maikkat iti kongregasion dagiti di agbabbabawi a nakabasol, mabalin a kumapuy ti determinasion dagidiay mangikagkagumaan a mangsurot kadagiti nalinteg a pagalagadan ni Jehova.—Prov. 13:20; 1 Cor. 15:33.

5. Ania koma ti mariknatayo no naikkat ti maysa a kabsat iti kongregasion, ken apay?

⁵ Ania ngarud koma ti panangmatmattayo no naikkat ti maysa a kapammatiantayo iti kongregasion? Nupay ditay kalangen, masapul nga ibilangtayo latta kas karnero a napukaw nga adda pay namnamana. No pumanaw ti karnero, mabalin a makasubli pay iti arban. Laglagipentayo a dayta a napukaw a karnero indedikarna idi ti biagna ken Jehova. Ngem makapaladingit ta saanna a tungtungpalen ti karina nga agtalinaed a matalek ken Jehova iti agdama, isu a napeggad ti kasasaadna. (Ezek. 18:31) Nupay kasta, bayat nga adda pay tiempo ken agingga a kayat ni Jehova nga ipakita ti asina, adda namnama dayta a tao a makapagsubli. Kasano a matulongan dagiti panglakayen ti nakabasol a naikkat iti kongregasion?

KASANO A MATULONGAN DAGITI PANGLAKAYEN DAGITI NAIKKAT?

6. Ania dagiti addang nga aramiden dagiti panglakayen tapno matulonganda ti naikkat iti kongregasion?

⁶ No naikkat ti maysa iti kongregasion, kayatna kadi a sawen nga isardeng metten dagiti panglakayen ti panangtulong kenkuana nga agsubli ken Jehova? Saan a pulos! No ibaga ti komite dagiti panglakayen iti di agbabbabawi a nakabasol a maikkat isuna iti kongregasion, ibagada met kenkuana ti masapul nga aramidenna tapno makapagsubli. Ngem adda pay ti masapul nga aramiden dagiti panglakayen. Kaaduanna, ibagada iti nakabasol a kayatdanto manen a kasarita kalpasan ti sumagmamano a bulan tapno makitada no nagbalbaliwen. No kayat ti nakabasol ti makisarita manen kadakuada, paregtaen dagiti panglakayen nga agbabawi ken agsublin. No saan pay a nagbalbaliw iti dayta a tiempo, ikagumaan dagiti panglakayen ti  makisarita manen kenkuana iti masanguanan ken kiddawenda nga agbabawin.

7. No maikkat ti maysa iti kongregasion, kasano a matulad dagiti panglakayen ti asi ni Jehova? (Jeremias 3:12)

⁷ No maikkat ti maysa iti kongregasion, ikagumaan dagiti panglakayen a tuladen ti asi ni Jehova. Kas pagarigan, saanen nga inuray ni Jehova nga agbabawi dagiti nasukir nga adipenna iti nagkauna nga Israel sakbay pay a tulonganna ida. Imbes ketdi, isu ti nangaramid iti umuna nga addang babaen ti panangibaonna kadagiti propetana kadakuada sakbay pay nga agbabawida. Kas nakitatayo iti maikadua nga artikulo iti daytoy a serye, impakita ni Jehova ti asina babaen ti panangibagana ken propeta Oseas nga uray no agbasbasol pay laeng ti asawana, pakawanenna ken makisinnublian. (Os. 3:1; Mal. 3:7) Kas panangtulad dagiti panglakayen ken Jehova, talaga a kayatda nga agsubli ti nakabasol, ken mangaramidda kadagiti pamay-an tapno nalaklaka nga aramidenna dayta.—Basaen ti Jeremias 3:12.

8. Kasano a makatulong kadatayo ti ilustrasion ni Jesus maipapan iti napukaw nga anak tapno mas maawatantayo ti asi ni Jehova? (Lucas 15:7)

⁸ Subliantayo ti ilustrasion ni Jesus maipapan iti napukaw nga anak, kas napagsasaritaantayo iti maikadua nga artikulo iti daytoy a serye. Apaman a nakita ti ama ti anakna nga agaw-awiden iti balayda, “timmaray a simmabat. Inarakupna ti anakna ket sidudungngo nga inagkanna.” (Luc. 15:20) Siputanyo ta saanen nga inuray ti ama nga agpakaasi pay ti anakna a pakawanenna. Imbes ketdi, isu ti immuna a nagtaray a nangsabat iti anakna, a kas iti natural nga aramiden ti asinoman a nadungngo nga ama. Kasta ti marikrikna ni Jehova kadagidiay immadayo kenkuana, ket dayta met ti kayat a tuladen dagiti naayat a panglakayen. Kayatda nga ‘agawiden’ dagitoy a napukaw a karnero. (Luc. 15:​22-24, 32) No agsubli ti nakabasol, maragsakan unay da Jehova, ni Jesus, dagiti anghel, ken ti intero a kongregasion!—Basaen ti Lucas 15:7.

9. Kasano a sidudungngo a kidkiddawen ni Jehova nga agbabawi dagiti nakabasol?

⁹ Kas napagsasaritaantayon, nalawag a saan a panuynoyan ni Jehova dagiti saan nga agbabbabawi a nakabasol. Ngem saanna a kayat a sawen a tinallikudanna idan. Kayatna nga agsublida. Ipakita ti Oseas 14:4 ti marikrikna ni Jehova kadagidiay agbabbabawi a nakabasol. Kunana: “Paimbagekto ida, ket didakton tallikudan. Situtulok nga ayatekto ida, ta bimmaawen ti pungtotko.” Gapu ta ammo dagiti panglakayen ti marikrikna ni Jehova, ikagumaanda a kitaen ti aniaman a pagilasinan a mangrugrugin nga agbabawi ti nakabasol. Dagita met a sasao ti mangipasigurado iti asinoman a nangpanaw ken Jehova nga ay-ayatenna latta ida, isu a dida koman baybayagen ti agsubli.

10-11. Kasano a matulongan dagiti panglakayen dagiti nabayagen a naikkat iti kongregasion?

¹⁰ Dagiti ngay naikkat iti kongregasion, nalabit adu a tawenen ti napalabas? Mabalin a saandan nga ar-aramiden ti basol a nakaikkatanda. Iti sumagmamano a kaso, mabalin a nalipatan pay ketdin dagiti nabayagen a naikkat no apay a naikkatda. Aniaman ti situasion, ikagumaan dagiti panglakayen a biroken ken bisitaen dagitoy nga indibidual. Kadagita a panagbisita, mabalin nga ikararagan dagiti panglakayen ti naikkat ken sidudungngo a kiddawenda nga agbabawi ken agsublin iti kongregasion. Siempre, no nabayagen a saan a makikadkadua iti kongregasion ti indibidual, nakakapkapuy la ketdin ti espiritualidadna. Isu a no ibagana a kayatnan ti agsubli iti kongregasion, mabalin nga iyurnos  dagiti panglakayen nga adda mangyadal kenkuana iti Biblia, uray sakbay pay a maisubli. Iti amin a kaso, dagiti laeng panglakayen ti mangyurnos iti kasta a panangyadal.

¹¹ Kas panangtulad iti asi ni Jehova, ikagumaan dagiti panglakayen a biroken dagidiay immadayo ken Jehova agingga a posible tapno maammuanda a nakalukat pay laeng ti ridaw para kadakuada nga agsubli. No mangipakita iti panagbabawi ti nakabasol ken isardengnan dagiti dakes nga ar-aramidenna, mabalin a saanen a maitantan ti pannakaisublina.—2 Cor. 2:​6-8.

12. (a) Ania koma ti ad-adda pagannadan dagiti panglakayen? (b) Apay a saantayo koma a marikna nga imposible a maipakitaan iti asi ni Jehova ti dadduma a nakaaramid iti nadagsen a basol? (Kitaen met ti footnote.)

¹² Iti dadduma a kaso, masapul nga ad-adda  nga agannad dagiti panglakayen sakbay nga isublida ti maysa a naikkat. Kas pagarigan, no ti nakaikkatan ti maysa ket gapu iti panangabuso iti ubing, apostasia, wenno inggagara a panamagpatingga iti panagasawa, masapul a siguraduen dagiti panglakayen a talaga nga agbabbabawin. (Mal. 2:14; 2 Tim. 3:6) Masapul a protektaranda ti arban. Nupay kasta, bigbigentayo koma nga awaten ni Jehova ti asinoman a nakabasol a talaga nga agbabbabawin ken insardengnan dagiti dakes nga ar-aramidenna. Isu nga uray no kayat dagiti panglakayen a siguraduen a talaga nga agbabbabawin dagidiay nangallilaw iti dadduma, saanda koma a panunoten a saanen a pulos a maikari dagiti kasta a nakabasol a maipakitaan iti asi ni Jehova. b—1 Ped. 2:10.

TI MAARAMIDAN TI KONGREGASION

13. Ania ti nakaidumaan ti panangtratotayo kadagiti natubngar kadagiti naikkat iti kongregasion?

¹³ Napagsasaritaantayo iti napalabas nga artikulo a no dadduma, maipakaammo a natubngar ti maysa a kabsat. Iti kasta a kaso, mabalintayo latta ti makilangen kenkuana gapu ta nagbabawin ken insardengnan ti dakes nga ar-aramidenna. (1 Tim. 5:20) Paset latta isuna iti kongregasion ken kasapulanna ti pammaregta babaen ti pannakikaduana kadagiti kapammatianna. (Heb. 10:​24, 25) Nupay kasta, adda nakaidumaanna no naikkat ti maysa iti kongregasion. ‘Isardengtayo ti makikadkadua’, “uray makipangan man la koma iti kasta a tao.”—1 Cor. 5:11.

14. Kasano nga usaren dagiti Kristiano ti konsiensiada a sinanay ti Biblia no makilangenda kadagiti naikkat iti kongregasion? (Kitaen met ti ladawan.)

¹⁴ Ti kadi instruksion iti 1 Corinto 5:11 kayatna a sawen a naan-anay a liklikantayo ti maysa a naikkat iti kongregasion? Saan met. Siempre, saantayo a kalangen isuna. Ngem mabalin nga usaren dagiti Kristiano ti konsiensiada a sinanay ti Biblia no agdesisionda no awisenda a makigimong ti maysa a naikkat iti kongregasion a nalabit kabagianda wenno dati a nasinged a gayyemda. No ngay makigimong? Idi, saantayo a kablaawan ti kasta a tao. Ngem ita, masapul nga usaren ti tunggal  Kristiano ti konsiensiana a sinanay ti Biblia maipapan iti daytoy a banag. Baka kayat ti dadduma a kablaawan wenno abrasaen dayta a tao no makigimong. Nupay kasta, saantayo koma a makiinnestoria wenno makilangen kenkuana.

15. Ania a klase dagiti managbasol ti tuktukoyen ti 2 Juan 9-11? (Kitaen met ti kahon nga “ Agpada Kadi a Kita ti Basol ti Tuktukoyen da Juan ken Pablo?”)

¹⁵ Mabalin a mapanunot ti dadduma, ‘Saan kadi nga ibagbaga ti Biblia a no kablaawantayo ti maysa a di agbabbabawi a nakabasol ket makiramramantayon kadagiti dakes nga aramidna?’ (Basaen ti 2 Juan 9-11.) Ipakita ti konteksto dagitoy a bersikulo a ti tuktukoyen daytoy a bilin ket dagiti apostata ken dagidiay mangim-impluensia iti dadduma nga agbasol. (Apoc. 2:20) Isu a no ti maysa ket mangitantandudo iti sursuro dagiti apostata ken im-impluensiaanna ti dadduma nga agaramid iti dakes, saan nga iyurnos dagiti panglakayen ti panangbisita kenkuana. Siempre, mangnamnamada latta nga agbalbaliwto. Ngem agingga a saan pay a nagbalbaliw, saantayo a kablaawan wenno awisen a makigimong.

PANANGTULAD ITI ASI NI JEHOVA

16-17. (a) Ania ti kayat ni Jehova nga aramiden dagiti nakabasol? (Ezekiel 18:32) (b) Kasano a makipagtrabaho dagiti panglakayen ken Jehova bayat a tultulonganda dagiti nakabasol?

¹⁶ Ania ti nasursurotayo iti daytoy a lima ti artikulona a serye? Saan a kayat ni Jehova a madadael ti asinoman! (Basaen ti Ezekiel 18:32.) Kayatna a maikappia kenkuana dagiti nakabasol. (2 Cor. 5:20) Kas ipakita ti pakasaritaan, maulit-ulit a kiniddaw ni Jehova kadagiti adipenna a nangpanaw kenkuana—ken uray kadagiti nasukir nga indibidual—nga agbabawi ken agsublida kenkuana. Pribilehio dagiti panglakayen ti makipagtrabaho ken Jehova bayat nga ikagkagumaanda a tulongan dagiti nakabasol nga agbabawi.—Roma 2:4; 1 Cor. 3:9.

¹⁷ Panunotenyo ti rag-o idiay langit no agbabawi dagiti nakabasol! Maragragsakan a mismo ti nailangitan nga Amatayo a ni Jehova kada adda agsubli iti kongregasion a napukaw a karnerona. Umuneg nga umuneg ti ayattayo ken Jehova no ut-utobentayo ti asi ken ti nagpaiduma a kinaimbagna.—Luc. 1:78.