Ti salaysay iti Deuteronomio 22:25-27 ket saan a nakapokus iti panangpaneknek a nakabasol ti lalaki, ta napaneknekanen a nakabasol. Imbes ketdi, nakapokus dayta a linteg iti panangpaneknek nga inosente ti babai. Usigentayo ti konteksto.

Dakamaten dagiti immuna a bersikulo ti maipapan iti lalaki a nangdenna “idiay siudad” iti maysa a babai a naitulagen a makiasawa. Nakabasol ti lalaki iti pannakikamalala, ta ti babai a naitulagen a makiasawa ket maibilangen nga adda asawana. Ti ngay babai? “Saan a nagriaw . . . idiay siudad.” No koma nagriaw, sigurado nga adda nakangngeg ken nangidepensa kenkuana. Ngem gapu ta saan a nagriaw, nagayatanna dayta isu nga agpada a nakabasolda iti pannakikamalala.​—Deut. 22:23, 24.

Isaruno ti Linteg ti naiduma a situasion: “Ngem no iti ruar ti nakasarakan ti lalaki iti babai a naitulagen a makiasawa ket puersaen ken ramesenna, ti laeng lalaki a nangrames ti mapapatay, ngem diyo an-anuen ti babai. Awan ti basolna a maikari iti ipapatay. Kastoy met laeng ti aramidenyo iti lalaki a mangdangran ken mangpapatay iti padana a tao. Ta nasarakanna iti ruar, ken nagriaw ti babai a naitulagen a makiasawa, ngem awan ti nangtulong kenkuana.”—Deut. 22:25-27.

Iti dayta a kaso, patien dagiti ukom ti babai. Apay? Impapanda ngamin a “nagriaw . . . , ngem awan ti nangtulong kenkuana.” Isu a saan a nakikamalala. Ngem nakabasol ti lalaki iti panangrames ken pannakikamalala ta ‘pinuersa’ ken dinennaanna ti babai a naitulagen a makiasawa.

Gapuna, uray no nakapokus daytoy a linteg iti kinainosente ti babai, siuumiso nga iladawan ti salaysay a nakabasol ti lalaki iti panangrames ken pannakikamalala. Makapagtalektayo nga ‘agimbestigar idi a naimbag’ dagiti ukom ken ipatawda ti desision maitunos iti pagalagadan a nalawag nga inulit-ulit ti Dios.—Deut. 13:14; 17:4; Ex. 20:14.