Agparang a saan. Saan nga imbaga ti Diablo ken Eva a no mangan iti bunga nga iparparit ti Dios, agparang laeng a matay ngem adda di makita a paset ti bagina (ti maibagbaga ita nga immortal a kararua) nga agtultuloy nga agbiag iti sabali a lugar. Inusar ni Satanas ti uleg a mangibaga ken Eva a no mangan iti bunga dayta a kayo, ‘sigurado a saanto a matay.’ Impamatmatna nga agtultuloy nga agbiag ni Eva ken tagiragsakenna ti nasaysayaat a biag ditoy daga a saanen a kasapulan nga agdepende iti Dios.—Gen. 2:17; 3:3-5.

No saan a nangrugi idiay Eden ti ulbod a sursuro maipapan iti immortal a kararua, kaano ngarud a nangrugi? Saantay a masigurado. Ammotayo a napukaw ti amin nga ulbod a panagdaydayaw iti Layus idi panawen ni Noe. Awan ti nakalasat nga ulbod a narelihiosuan nga ideya gapu ta ni laeng Noe ken ti pamiliana a pudno nga agdaydayaw iti Dios ti nakalasat iti Layus.

Ti ngarud sursuro ita nga immortal a kararua ket nangrugi kalpasan ti Layus. Idi riniribuk ti Dios ti lengguahe dagiti tattao idiay Babel ket naiwarawarada “iti intero a daga,” awan duadua nga intugotda ti ideya nga adda immortal a kararua ti tao. (Gen. 11:8, 9) Kaanoman a nangrugi dayta nga ulbod nga ideya, masiguradotayo a ti “ama ti kinaulbod” a ni Satanas a Diablo ti adda iti likudan dayta ket maay-ayatan a makakita a maisaksaknap dayta.​—Juan 8:44.