Masungbatam kadi dagitoy a saludsod sigun kadagiti napalabas a ruar Ti Pagwanawanan iti 2019?

Ania ti kaipapanan ti kari ti Dios a “Saanto nga agballigi ti aniaman nga armas a naaramid maibusor kenka”? (Isa. 54:17)

Makapagtalektayo a protektarannatayo ti Dios kadagiti makadadael a puersa a kas iti “pug-aw dagiti manangirurumen.” (Isa. 25:4, 5) Saanto a pulos agballigi dagiti kabusortayo a manglapped iti pananggun-odtayo iti biag nga agnanayon.—w19.01, p. 6-7.

Kasano a makita ti kinahustisia ti Dios iti pannakilangenna kadagiti Canaanita ken kadagiti nasukir nga Israelita?

Dinusa ti Dios dagidiay agar-aramid iti narugit a seksual nga aramid wenno mangbikbiktima kadagiti babbai ken ubbing. Binendisionanna dagidiay natulnog kenkuana ken dagidiay patas ti panangtratoda iti sabsabali.​—w19.02, p. 22-23.

Ania ti masapul nga aramidentayo no nairana nga addatayo bayat ti panangikararag ti maysa a di manamati?

Mabalintayo ti agtalinaed a naulimek ken managraem ngem saantayo nga ibaga ti “amen” wenno makiinniggem iti ima. Mabalintayo ti siuulimek nga agkararag.—w19.03, p. 31.

Kasano kadagsen ti panangabuso iti ubing?

Ti panangabuso iti ubing ket basol iti biktima, iti kongregasion, iti sekular nga autoridad, ken iti Dios. Kadagiti lugar nga adda linteg a maireport dagiti akusasion a panangabuso, masapul a suroten dayta dagiti panglakayen.—w19.05, p. 9-10.

Kasanom a mabaliwan wenno mapasayaat ti puersa a mangiturturong iti panunotmo?

Makatulong dagitoy: Makisaritaka ken Jehova iti kararag. Agutobka tapno usigem ti bagim. Piliem dagiti nasayaat a kakadua.—w19.06, p. 11.

Ania ti aramidentayo itan tapno makapagsaganatayo iti pannakaidadanes?

Masapul a pabilgentayo ti relasiontayo ken Jehova. Agtalektayo nga ay-ayatennatayo ken saannatayo a pulos baybay-an. Basaentayo ti Biblia iti inaldaw, ken agkararagtayo a regular. Kombinsidotayo koma a matungpal dagiti bendision ti Pagarian. Ikabesatayo dagiti paboritotayo a teksto ken kanta a mangidaydayaw ken Jehova.​—w19.07, p. 2-4.

Ania ti aramidentayo tapno matulongantayo a maisalakan dagiti kabagiantayo?

Napateg nga ipakitatayo ti empatia, nasayaat a kababalin, kinaanus, ken kinataktika.—w19.08, p. 15-17.

Kasano a magin-awaantayo, kas inkari ni Jesus iti Mateo 11:28?

Adda kadatayo dagiti naayat a Kristiano a manangaywan, dagiti kasayaatan a kakadua, ken ti kasayaatan a trabaho.​—w19.09, p. 23.

Kasano a maipaay kadatayo ti Dios ti tarigagay ken pannakabalin nga agtignay? (Fil. 2:13)

Bayat a basbasaen ken ut-utobentayo ti Sao ti Dios, mapabilegnatayo ti Dios, ta ipaayna kadatayo ti tarigagay a mangaramid iti pagayatanna ken ti pannakabalin nga agtignay. Pasayaaten ti espirituna dagiti abilidadtayo.—w19.10, p. 21.

Ania dagiti nainsiriban nga addang a surotentayo sakbay a mangaramidtayo iti napateg a desision?

Dagitoy ti lima nga addang: Agsukimat a naimbag. Ikararag ti sirib. Panunotem ti motibom. Maaddaan iti espesipiko a kalat. Agbalin a realistiko.—w19.11, p. 27-29.

Ti kadi ideya maipapan iti immortal a kararua ket nangrugi iti imbaga ni Satanas ken Eva?

Agparang a saan. Imbaga ni Satanas ken Eva a saanto a matay; saanna nga imbaga a kasla laeng matay. Awan ti aniaman nga ulbod a narelihiosuan nga ideya a nakalasat iti Layus. Ti panamati iti immortal a kararua ket nalabit timmaud sakbay nga inwarawara ti Dios dagiti tattao a nangbangon iti torre ti Babel.—w19.12, p. 15.