1-2. Kas ipakita ti kapadasan ni Angelito, ania ti masapul nga aramiden ti tunggal maysa kadatayo?

SAKSI ni Jehova kadi dagiti nagannakmo? No wen, laglagipem a saanmo a matawid kadakuada ti personal a relasionmo ken Jehova. Agserserbi man iti Dios dagiti nagannaktayo wenno saan, masapul a datayo a mismo ti agporsegi tapno agbalintayo a gayyem ni Jehova.

² Kitaem ti kapadasan ti kabsat nga agnagan Angelito. Dimmakkel iti Saksi a pamilia. Ngem idi agtutubo pay, saanna a narikna a nasinged iti Dios. Inaminna, “Agserserbiak laeng ken Jehova gapu ta kayatko nga aramiden ti ar-aramiden ti pamiliak.” Ngem nagdesision ni Angelito a nayonanna ti panawenna nga agbasa ken mangutob iti Sao ti Dios, ken kanayonen nga agkararag ken Jehova. Ti resultana? Imbagana, “Nasursurok a sumingedak laeng iti nadungngo nga Amak a ni Jehova no siak a mismo ti mangam-ammo kenkuana.” Gapu iti kapadasan ni Angelito, mapanunottayo dagitoy a napateg a saludsod: Ania ti nagdumaanna no ammom laeng ti sumagmamano a banag maipapan ken Jehova ken no talaga nga am-ammom? Ken ania ti aramidentayo tapno talaga a maam-ammotayo ni Jehova?

3. Ania ti nagdumaanna no ammom laeng ti sumagmamano a banag maipapan ken Jehova ken no talaga nga am-ammom?

³ No pamiliar ti maysa iti nagan ti Dios wenno kadagiti banag nga imbaga ken inaramidna, maibagatayo nga am-ammona ni Jehova. Ngem tapno talaga a maam-ammotayo ni Jehova,  adu pay ti masapul nga aramidentayo. Masapul nga iwayaantayo nga adalen ti maipapan ken Jehova ken kadagiti nagsasayaat a kualidadna. Iti kasta, matarusantayo ti rason no apay nga imbaga ken inaramidna ti maysa a banag. Makatulong dayta tapno mailasintayo no dagiti opinion, desision, ken ar-aramidtayo ket makaay-ayo kenkuana. No naawatantayon ti kayat ni Jehova nga aramidentayo, masapul a surotentayo dayta.

4. Ania ti maitulong kadatayo ti panangusig kadagiti pagarigan iti Biblia?

⁴ Mabalin nga uyawendatayo ti dadduma gapu ta kayattayo ti agserbi ken Jehova, ken mabalin nga ad-adda pay a busorendatayo no mangrugitayon a makigimong. Ngem no agtalektayo ken Jehova, saannatayo a pulos baybay-an. Mangibangbangontayo iti natibker a pundasion ti manayon a pannakigayyem iti Dios. Posible kadi a talaga dayta? Wen! Ipakita ti ulidan dagiti imperpekto a tattao, a kas kada Moises ken Ari David, a posible dayta. Bayat nga us-usigentayo dagiti inaramidda, adda dua a saludsod a sungbatantayo: Kasano a naam-ammoda ni Jehova? Ken ania ti maadaltayo iti ulidanda?

5. Ania ti pinili ni Moises nga aramiden?

⁵ Pinili ni Moises ti agserbi iti Dios. Idi agarup 40 ti tawen ni Moises, pinilina ti makikadua iti ili ti Dios—dagiti Hebreo, wenno Israelita—imbes a maawagan “anak ti balasang ni Faraon.” (Heb. 11:24) Tinallikudan ni Moises ti natan-ok a saadna. Idi sinuportaranna dagiti Israelita, nga ad-adipen idi idiay Egipto, ammona nga agpungtot ni Faraon, a nabileg nga agturay nga imbilang dagiti Egipcio kas dios. Anian a naisangsangayan a pammati! Nagtalek ni Moises ken Jehova. Dayta a panagtalek ti nagserbi a pundasion ti natibker a relasionna ken Jehova iti intero a panagbiagna.—Prov. 3:5.

6. Ania ti maadaltayo iti ulidan ni Moises?

⁶ Ania ti maadaltayo? Kas ken Moises, masapultayo amin ti agdesision: Pilientayo kadi ti agserbi iti Dios ken makikadua iti ilina? Mabalin nga adda dagiti masapul nga isakripisiotayo tapno makapagserbitayo iti Dios, ken mabalin a busorendatayo dagiti di makaam-ammo ken Jehova. Ngem no agtalektayo iti nailangitan nga Amatayo, manamnamatayo ti suportana!

7-8. Ania ti intultuloy ni Moises nga ammuen?

⁷ Intultuloy ni Moises nga ammuen dagiti kualidad ni Jehova ken aramiden ti pagayatanna. Kas pagarigan, idi nadutokan ni Moises a mangidaulo iti nasion ti Israel tapno mawayawayaanda idiay Egipto, kurang ti kompiansana iti bagina ken maulit-ulit nga imbagana ken Jehova a saan a kualipikado. Impakita ti Dios ti kinamanangngaasi ket tinulonganna ni Moises. (Ex. 4:10-16) Kas resultana, nabaelan ni Moises nga ibaga ken Faraon ti nadagsen a mensahe ti panangukom. Kalpasanna, nakita ni Moises nga inusar ni Jehova ti pannakabalinna idi insalakanna dagiti Israelita ngem dinadaelna ni Faraon ken ti armadana idiay Nalabaga a Baybay.—Ex. 14:26-31; Sal. 136:15.

⁸ Kalpasan nga inruar ni Moises dagiti Israelita manipud Egipto, kanayonda a nagrekreklamo. Nupay kasta, nakita ni Moises ti kasta unay a kinaanus ni Jehova iti panangtratona kadagiti tattao a winayawayaanna. (Sal. 78:40-43) Nakita met ni Moises ti nagpaiduma a kinapakumbaba ni Jehova idi binaliwanna ti desisionna kalpasan nga impakaasi ni Moises a saanna a dadaelen dagiti Israelita.—Ex. 32:9-14.

9. Sigun iti Hebreo 11:27, kasano kasinged ti relasion ni Moises ken Jehova?

 ⁹ Kalpasan a nawayawayaan dagiti Israelita, nagbalin a nakasingsinged ti relasion ni Moises ken Jehova a kasla makitkitana ti nailangitan nga Amana. (Basaen ti Hebreo 11:27.) Kastoy ti panangiladawan ti Biblia no kasano kasinged dayta a relasion: “Rupanrupa a nakisao ni Jehova ken Moises, kas iti panagtungtong ti dua a tao.”​—Ex. 33:11.

10. Ania ti aramidentayo tapno talaga a maam-ammotayo ni Jehova?

¹⁰ Ania ti maadaltayo? Tapno talaga a maam-ammotayo ni Jehova, saantayo laeng nga ammuen dagiti kualidadna no di ket aramidentayo met ti pagayatanna. Pagayatan ni Jehova a “maisalakan koma ti amin a kita ti tattao ken maaddaanda iti umiso a pannakaammo iti kinapudno.” (1 Tim. 2:3, 4) Ti maysa a pamay-an a maaramidtayo ti pagayatan ni Jehova ket ti panangisurotayo iti sabsabali maipapan kenkuana.

11. Kasano nga ad-adda a maam-ammotayo ni Jehova bayat nga isursurotayo ti sabsabali maipapan kenkuana?

¹¹ Ad-adda a maam-ammotayo ni Jehova no isurotayo ti sabsabali maipapan kenkuana. Kas pagarigan, makitatayo a mismo ti kinamanangngaasi ni Jehova no tulongannatayo a mangbirok kadagidiay nasingpet ti panagpuspusona. (Juan 6:44; Ara. 13:48) Makitatayo ti pannakabalin ti Sao ti Dios no isardengen dagiti iyad-adalantayo iti Biblia ti dakes nga ar-aramidda ken ikawesdan ti baro a personalidad. (Col. 3:9, 10) Ken makitatayo ti pammaneknek ti kinaanus ti Dios ta ik-ikkanna dagiti tattao iti teritoriatayo iti adu a gundaway a mangam-ammo kenkuana tapno maisalakanda.​—Roma 10:13-15.

12. Iti Exodo 33:13, ania ti kiniddaw ni Moises, ken apay?

¹² Impateg ni Moises ti relasionna ken Jehova. Uray inus-usar idin ti Dios ni Moises a mangaramid kadagiti milagro, siraraem latta a kiniddaw ni Moises nga ad-adda pay koma a maam-ammona ni Jehova. (Basaen ti Exodo 33:13.) Nasuroken nga 80 ni Moises idi kiniddawna dayta, ngem ammona nga adu pay ti masapul a sursuruenna maipapan iti naayat a nailangitan nga Amana.

13. Ania ti maysa a pamay-an a maipakitatayo nga ipatpategtayo ti relasiontayo iti Dios?

¹³ Ania ti maadaltayo? Kasanoman kabayagen nga agserserbitayo ken Jehova, ipategtayo koma ti relasiontayo kenkuana. Ti maysa a pamay-an a maipakitatayo dayta ket ti pannakisaritatayo kenkuana babaen ti kararag.

14. Apay a napateg ti kararag tapno ad-adda a maam-ammotayo ni Jehova?

¹⁴ Ti nasayaat a komunikasion ti pundasion ti natibker a relasion. No ngarud kayatmo ti agbalin a nasinged iti Dios, kanayonka nga agkararag ken saanka nga agpangadua a mangibaga iti pampanunotem ken marikriknam. (Efe. 6:18) Imbaga ni Krista a taga-Turkey: “Dumakdakkel ti ayat ken panagtalekko ken Jehova kada ikararagko kenkuana ti pampanunotek sa makitak a tulongannak. Ti pannakakitak a sungsungbatan ni Jehova dagiti kararagko ti timmulong kaniak a mangibilang ken Jehova kas Ama ken Gayyem.”

15. Kasano a dineskribir ni Jehova ni Ari David?

¹⁵ Nayanak ni Ari David iti nasion a dedikado ken Jehova a Dios. Ngem saan a basta sinurot ni David ti patpatien ti pamiliana. Isu ti nangpatanor iti personal a relasionna iti Dios, ket inay-ayat unay ni Jehova. Dineskribir a mismo ni Jehova ni David kas lalaki a “makaay-ayo iti puso[na].” (Ara. 13:22) Kasano a nagbalin a nakasingsinged ni David ken Jehova?

16. Ania ti nasursuro ni David maipapan ken Jehova iti panangpaliiwna kadagiti parsuana?

 ¹⁶ Nakasursuro ni David maipapan ken Jehova kadagiti pinarsuana. Idi ubing pay ni David, adu nga oras nga adda iti ruar a mangipaspastor kadagiti karnero ni amana. Mabalin a dita a nangrugi nga utobenna dagiti parsua ni Jehova. Kas pagarigan, no tumangad idi ni David iti langit iti rabii, saan laeng a ti rinibu a bituen ti makitana no di pay ket dagiti kualidad Daydiay nangaramid kadagita, isu nga insuratna: “Ipakpakaammo ti langit ti dayag ti Dios; iwarwaragawag ti tangatang dagiti aramid ti imana.” (Sal. 19:1, 2) Idi pinampanunot ni David ti nakaskasdaaw a pannakaaramid ti tao, nakitana ti naidumduma a sirib ni Jehova. (Sal. 139:14) Idi inutob ni David dagiti aramid ni Jehova, nabigbigna no kasano ti kabassitna no ikompara ken Jehova.—Sal. 139:6.

17. Ania ti maadaltayo no utobentayo dagiti parsua ti Dios?

¹⁷ Ania ti maadaltayo? Aginterestayo koma kadagiti parsua ti Dios. Iwayaantayo a kitaen daytoy nagpintas a daga a pinarsua ni Jehova, ket pagsiddaawantayo dayta! Inaldaw nga utobem no ania dagiti masursurom ken Jehova kadagiti parsua iti aglawlawmo—dagiti mula, animal, ken tattao. Iti kasta, adu ti masursurom maipapan iti naayat nga Amam iti panaglabas dagiti aldaw. (Roma 1:20) Ket inaldaw met a makitam nga umuneg ti panagayatmo kenkuana.

18. Kas ipakita ti Salmo 18, ania ti binigbig ni David?

¹⁸ Binigbig ni David a tultulongan ni Jehova. Kas pagarigan, idi insalakan ni David dagiti karnero ni amana manipud iti leon ken iti oso, binigbigna a ni Jehova ti timmulong kenkuana a mangpatay kadagita a naranggas nga animal. Idi inabak ni David ti higante a mannakigubat a ni Goliat, nalawag a nakitana a ni Jehova ti mangiwanwanwan kenkuana. (1 Sam. 17:37) Ket idi nakalibas ni David iti agim-imon a ni Ari Saul, binigbigna a ni Jehova ti nangisalakan kenkuana. (Sal. 18, superskripsion) No napannakkel ni David, pinanunotna koma a naaramidanna dagita iti bukodna a pigsa. Ngem napakumbaba ni David, isu a nabigbigna a tultulongan isuna ni Jehova.—Sal. 138:6.

19. Ania ti maadaltayo iti ulidan ni David?

¹⁹ Ania ti maadaltayo? Masapul a saantayo laeng a basta agkiddaw iti tulong ni Jehova. Kasapulan met a bigbigentayo no kasano ken kaano a tultulongannatayo. No sipapakumbaba a bigbigentayo dagiti limitasiontayo, nalawagto a makitatayo a ni Jehova ti mangpunno kadagiti pagkurangantayo. Ken kada makitatayo a tultulongannatayo ni Jehova, ad-adda a bumileg ti relasiontayo kenkuana. Napaneknekan a mismo dayta ni Isaac, maysa a kabsat a taga-Fiji a nabayagen nga agserserbi ken Jehova. Kinunana: “No lagipek ti napalabas, makitak no kasano a tinulongannak ni Jehova manipud idi nangrugiak nga agadal iti Biblia agingga ita. Isu a napaypayso unay itan ni Jehova kaniak.”

20. Ania ti maadaltayo iti relasion ni David iti Dios?

²⁰ Tinulad ni David dagiti kualidad ni Jehova. Pinarsuanatayo ni Jehova nga addaan iti abilidad a mangtulad kadagiti kualidadna. (Gen. 1:26) No ad-adu ti maammuantayo maipapan kadagiti kualidad ni Jehova, ad-adda met a matuladtayo. Talaga a naam-ammo ni David ti nailangitan nga Amana, isu a natuladna ti Dios iti panangtratona iti sabsabali. Kitaentayo ti maysa a pagarigan. Nagbasol ni David ken Jehova idi nakikamalala ken Bat-sheba sa impapatayna ti lakayna. (2 Sam. 11:1-4, 15) Ngem kinaasian ni Jehova ni David, a nangngaasi met iti sabsabali.  Gapu iti kasta a nasayaat a relasion ni David ken Jehova, impatpateg unay dagiti Israelita ken inusar ni Jehova a pagrukodan iti nasayaat nga ari para iti dadduma pay nga ari ti Israel.​—1 Ar. 15:11; 2 Ar. 14:1-3.

21. Maibatay iti Efeso 4:24 ken 5:1, ania ti resultana no “tuladen[tayo] ti Dios”?

²¹ Ania ti maadaltayo? Masapul a “tuladen[tayo] ti Dios.” No aramidentayo dayta, saantay laeng a mabenepisiaran no di ket ad-adda pay a maam-ammotayo isuna. No tuladentayo ti personalidadna, mapaneknekantayo met a datayo ket annakna.​—Basaen ti Efeso 4:24; 5:1.

22-23. Ania ti masiguradotayo no iyaplikartayo ti naammuantayo maipapan ken Jehova?

²² Kas nakitatayon, makasursurotayo maipapan ken Jehova babaen kadagiti parsuana ken iti Saona, ti Biblia. Dayta a nagpaiduma a libro ket napnuan iti ulidan dagiti matalek nga adipen ti Dios a mabalintayo a tuladen, kas kada Moises ken David. Inaramid ni Jehova ti pasetna. Aramidentayo met ti pasettayo—usarentayo ti mata, lapayag, ken pusotayo nga ad-adda a mangam-ammo iti Dios.

²³ Pulos a dinto agpatingga ti panangam-ammotayo ken Jehova. (Ecl. 3:11) Ti napateg ket saan a no kasano kaadu ti ammotayo maipapan kenkuana no di ket no ania ti ar-aramidentayo iti ammotayo. No iyaplikartayo ti maad-adaltayo ken ikagumaantayo a tuladen ti naayat nga Amatayo, ad-adda met nga umasideg kadatayo. (Sant. 4:8) Babaen ti Saona, impasiguradona kadatayo a dinanto pulos panawan dagidiay mangbirbirok kenkuana.