ANIA ti mariknam no makaawatka iti makaparegta a surat ti nasayaat a gayyemmo? Ti Kristiano nga adalan a ni Timoteo ket nakaawat iti kasta a surat manipud ken apostol Pablo. Dayta a surat ket pagaammotayo ita kas ti 2 Timoteo a libro ti Biblia. Sigurado a magagaran idi ni Timoteo a mangbirok iti naulimek a lugar tapno mabasana ti surat ti patpatgenna a gayyem. Nalabit pampanunoten idi ni Timoteo: ‘Komusta ngatan ni Pablo a gayyemko? Adda ngata balakadna kaniak a makatulong kadagiti annongek? Makatulong ngata ti suratna tapno nasaysayaat ti panangasaba ken panangisurok?’ Kas makitatayto, nasungbatan dagita a saludsod ni Timoteo ken adu pay ti naammuanna iti daytoy napateg a surat. Ngem kitaentayo nga umuna ti dadduma a makatulong a balakad iti daytoy a surat.

Idi rinugian ni Timoteo a basaen ti surat, dagus a nariknana a nasinged ni Pablo kenkuana. Sidudungngo nga inawagan ni Pablo iti “patpatgek nga anak.” (2 Tim. 1:2) Nupay mabalin a nasurok a 30 ti tawen ni Timoteo idi naawatna ti surat idi agarup 65 C.E., eksperiensiado idin a panglakayen. Nasurok a 10 a tawen a nakikadkadua ken Pablo ket adun ti nasursurona.

Naparegta la ketdi ni Timoteo a nakaammo a simamatalek nga ib-ibturan ni Pablo dagiti pakarigatan. Nakakawar idi ni Pablo a nakabalud idiay Roma, nga agur-uray a mapapatay. (2 Tim. 1:15, 16; 4:6-8) Narikna ni Timoteo ti kinatured ni Pablo idi imbagana: “Itultuloyko nga ibturan ti amin a banag.” (2 Tim. 2:8-13) Kas ken Timoteo, mapabilegtayo met iti naisangsangayan a panagibtur ni Pablo.

Imparegta ni Pablo ken Timoteo nga ibilangna a nakapatpateg ti annongenna nga agserbi iti Dios. Kayat ni Pablo a ‘parangrangen ni Timoteo a kas apuy ti sagut ti Dios’ nga adda kenkuana. (2 Tim. 1:6) Ti Griego a sao a khaʹri·sma nga inusar ni Pablo ditoy ket naipatarus kas “sagut.” Tumukoy dayta iti libre ken di kaikarian a sagut, banag a maited iti maysa a tao a dina matrabahuan ken dina pakaikarian. Naawat ni Timoteo daytoy a sagut idi napili nga agserbi iti kongregasion iti naisangsangayan a pamay-an.—1 Tim. 4:14.

Ania ti maiparparegta ken Timoteo nga aramidenna iti dayta a sagut? Bayat a basbasaenna ti sasao a “parangrangem a kas apuy,” mabalin a napanunotna ti apuy iti paginuduan nga agbalin  laengen a beggang inton agangay. Mabalin a parangrangen dagita a beggang tapno dumarang ken ad-adda a pumudot. Sigun iti maysa a diksionario, ti Griego a sao (a·na·zo·py·reʹo) nga inusar ni Pablo kaipapananna ti “pasgedan, biagen, paypayan tapno rumangrang.” Kaipapanan ngarud dayta ti kinagagar ken kinaregta iti maysa a trabaho. Arigna ibalbalakad ni Pablo ken Timoteo: ‘Aramidem ti amin a kabaelam iti annongem!’ Masapul a kasta met ti aramidentayo ita—agbalintayo a naregta iti panagserbitayo.

Bayat nga itultuloy ni Timoteo a basaen ti surat ti patpatgenna a gayyem, nabasana ti sabali pay a sasao a makatulong tapno agballigi ti ministeriona. Insurat ni Pablo: “Salaknibam daytoy napateg a banag a naitalek kenka babaen ti nasantuan nga espiritu, nga adda kadatayo.” (2 Tim. 1:14) Ania dayta a naitalek? Ania ti napateg a banag a naitalek ken Timoteo? Iti bersikulo 13, dinakamat ni Pablo ti “nasayaat a sasao,” ti kinapudno a masarakan iti Kasuratan. (2 Tim. 1:13) Kas Kristiano a ministro, masapul nga isuro ni Timoteo ti kinapudno kadagiti kakabsat iti kongregasion ken ikasabana dayta kadagiti tattao iti teritoriana. (2 Tim. 4:1-5) Kasta met, nadutokan idin ni Timoteo kas panglakayen a mangipastor iti arban ti Dios. (1 Ped. 5:2) Masalakniban ni Timoteo ti naitalek kenkuana—ti kinapudno nga isurona—babaen ti panagpannurayna iti nasantuan nga espiritu ken iti Sao ni Jehova.—2 Tim. 3:14-17.

Ita, naitalek met kadatayo ti kinapudno nga isursurotayo. (Mat. 28:19, 20) Agtalinaed ti apresasiontayo iti daytoy nagsayaat a naitalek kadatayo no kanayon nga agkararagtayo ken regular nga adalentayo ti Sao ti Dios. (Roma 12:11, 12; 1 Tim. 4:13, 15, 16) Mabalin nga addaantay met iti annongen nga agserbi kas panglakayen wenno amin-tiempo a ministro. Ti kasta a naitalek kadatayo ti mamagpakumbaba koma kadatayo ken tumulong tapno kanayon nga agpannuraytayo iti Dios. No kasta, masalakniban wenno maprotektarantayo ti naitalek kadatayo babaen ti panangipategtayo iti dayta ken panagpannuray iti tulong ni Jehova a mangibaklay iti dayta.

Dagiti annongen a naawat ni Timoteo ket saan laeng a para iti bagina no di ket para met iti sabsabali. Dayta ti makagapu nga imparegta ni Pablo ken Timoteo: “Ti bambanag a nangngegmo kaniak . . . , isurom . . . kadagiti matalek a lallaki, nga agbalinto met a kualipikado a mangisuro iti sabsabali.” (2 Tim. 2:2) Wen, masapul nga isuro ni Timoteo kadagiti kakabsat a lallaki dagiti naadalna. Napateg nga ikagumaan ti tunggal manangaywan ita iti kongregasion nga aramiden ti kasta. Ti naimbag a manangaywan saanna nga iyimut ti ammona maipapan iti maysa a trabaho. Imbes ketdi, isurona ti sabsabali tapno kabaelandanto met nga aramiden dayta. Saan a madanagan a baka ad-adunton ti ammoda wenno nalalaingdanton ngem isuna. Saan laeng ngarud a dagiti simple a pamay-an ti panangaramid iti maysa a trabaho ti isurona. Kayatna a tulongan dagidiay sansanayenna a mangpasayaat iti abilidadda nga agdesision ken maaddaan iti nauneg a pannakaawat tapno rumang-ayda iti naespirituan. Iti kasta, dagiti “matalek a lallaki” nga isursurona ad-adunto ti maitulongda iti kongregasion.

Sigurado nga impateg ni Timoteo ti makaparegta a surat ni Pablo kenkuana. Maulit-ulit la ketdi a binasana ti napateg a balakad dayta a surat ken pinampanunotna no kasano ti kasayaatan a panangyaplikarna iti dayta kadagiti annongenna.

Kayattayo met nga iyaplikar dayta a balakad. Kasano? Ikagumaantayo a parangrangen a kas apuy ti naisagut kadatayo, salaknibantayo ti naitalek kadatayo, ken isurotayo iti sabsabali ti amin nga ammotayo. Iti kasta, kas iti insurat ni Pablo ken ni Timoteo, ‘naan-anay a maitungpaltayo ti ministeriotayo.’—2 Tim. 4:5.