Binasayo kadin a naimbag dagiti ruar Ti Pagwanawanan ita a tawen? Kitaenyo no masungbatanyo dagitoy a saludsod:

Kasano ti rumbeng a panangtratotayo kadagiti napulotan a Kristiano?

Apresiarentayo ti pammatida; ngem saan koma a sobra ti atension nga ipaaytayo kadakuada. Liklikantayo ti sobra a ‘panangpadayaw kadagiti tattao.’ (Jud. 16, ftn.) Saantayo ida a saludsodan kadagiti personal a banag maipapan iti namnamada.—w20.01, p. 29.

Ania koma ti pakakombinsiram nga am-ammonaka ni Jehova?

Ipakita ti Biblia a nakitanakan sakbay pay a nayanakka. Dengdenggenna dagiti kararagmo. Ammona ti pampanunotem, ti adda iti pusom, ken adda epekto iti riknana ti ar-aramidem. (1 Cron. 28:9; Prov. 27:11) Inyasidegnaka ni Jehova kenkuana.—w20.02, p. 12.

Ania dagiti pagarigan no kaanotayo nga agsao ken agulimek?

Maragsakantayo nga agsao maipapan ken Jehova. Agsaotayo no adda am-ammotayo nga agar-aramid iti pakaisagmakanna. Agsao dagiti panglakayen tapno mangbalakadda no kasapulan. Ditay agsao tapno mangala (wenno mangted) iti impormasion maipapan iti aktibidadtayo kadagiti lugar a maiparit ti trabahotayo. Ditay ibaga dagiti kompidensial a banag.—w20.03, p. 20-21.

Kasano a naiduma dagiti dudon iti Joel kapitulo 2 kadagiti dudon iti Apocalipsis kapitulo 9?

Kuna ti Joel 2:20-29 a papanawen ti Dios dagiti dudon ken inkarina nga isublina dagiti dinadaelda. Kalpasan dayta, ibukbokna ti espirituna. Natungpal dagita idi rimmaut ti Babilonia iti Israel ken adu a tawen kalpasan dayta nga iraraut. Deskribiren ti Apocalipsis 9:1-11 dagiti arig dudon a napulotan iti kaaldawantayo bayat nga ipakpakaammoda dagiti panangukom ti Dios iti daytoy dakes a sistema, isu nga arigna matutuok dagiti mangsupsuporta iti dayta.—w20.04, p. 3-6.

Asino ti ari ti amianan ita?

Ti Russia ken dagiti kaaliadona. Dakkel ti impluensiada iti ili ti Dios ta iparparitda ti trabaho a panangasaba ken ipakpakitada a kagurgurada dagiti Saksi. Ti ari ti amianan ket makikomkompetensia iti ari ti abagatan.—w20.05, p. 13.

Dagiti laeng kadi kualidad a nadakamat iti Galacia 5:22, 23 ti karaman iti “bunga ti espiritu”?

Saan. Matulongannatayo ti nasantuan nga espiritu a mangpatanor iti dadduma pay a nagsayaat a kualidad, a kas iti kinalinteg. (Efe. 5:8, 9)—w20.06, p. 17.

Ania ti maysa a peggad ti panangi-post iti social media maipapan iti bagim?

Ti nai-post ket mabalin a mangted iti impresion nga agpangpangaska, a saanka a napakumbaba.—w20.07, p. 6-7.

Ania ti masursuro dagiti Kristiano kadagiti nalaing a mangngalap?

Agkalapda iti oras ken lugar a posible a pakasarakanda kadagiti ikan. Nasanayda a mangusar kadagiti umiso nga alikamen. Ken naturedda nga agkalap iti agbaliwbaliw a kasasaad. Mabalintayo met nga aramiden dayta iti ministeriotayo.—w20.09, p. 5.

Ania ti dadduma a pamay-an a matulongantayo dagiti iyad-adalantayo iti Biblia a mangpauneg iti ayatda ken Jehova?

Iparegtatayo nga inaldaw a basaenda ti Biblia, utobenda dagiti mabasbasada, ken isurotayo ida nga agkararag.—w20.11, p. 4.

Siasino ti karaman iti sasao nga: “Iti Kristo mapagbiagto ti amin”?—1 Cor. 15:22.

Saan nga ibagbaga ni apostol Pablo a mapagungar ti amin a tao. Tuktukoyenna dagiti napulotan a Kristiano a “nasantipikar a naikaykaysa ken Kristo Jesus.” (1 Cor. 1:2; 15:18)—w20.12, p. 5-6.

Anianto a trabaho ti pakiramanan dagiti napulotan kalpasan a ‘mabaliwanda iti apagkanito, iti panagkirem ti mata, kabayatan ti kamaudianan a trumpeta’?—1 Cor. 15:51-53.

Makiramandanto ken Kristo a mangipastor kadagiti tattao babaen ti sarukod a landok. (Apoc. 2:26, 27)—w20.12, p. 12-13.