Binasayo kadin a naimbag dagiti ruar Ti Pagwanawanan ita a tawen? Kitaenyo no masungbatanyo dagitoy a saludsod:

Ania ti kaipapanan ti “panangbalbaliwyo iti panunotyo”? (Roma 12:2)

Saan laeng a ti panangaramidyo iti sumagmamano a nasayaat ti kaipapananna. Masapul a sukimatentayo ti kinataotayo ken mangaramidtayo kadagiti kasapulan a panagbalbaliw tapno agbiagtayo a maitunos kadagiti pagalagadan ni Jehova, agingga a posible.—w23.01, p. 8-9.

Kasanotayo nga agbalin a balanse bayat a sipsiputantayo dagiti pasamak iti lubong?

Interesadotayo no kasano a dagiti agdama a pasamak iti lubong ipakitana a matungtungpalen dagiti padto ti Biblia. Ngem saantayo a kayat ti mangibaga iti aniaman a mamagsisina iti kongregasion, no di ket ibataytayo ti pagsasaritaantayo kadagiti impablaak ti organisasion ni Jehova. (1 Cor. 1:10)—w23.02, p. 16.

Kasano a naiduma ti bautismo ni Jesus iti bautismo dagiti pasurotna?

Saan a kasapulan ni Jesus nga idedikar ti bagina ken Jehova, ta nayanak iti nasion a dedikadon iti Dios. Saanna a kasapulan a pagbabawyan ti aniaman a basol ta perpekto isuna a tao ken saan a nagbasol.—w23.03, p. 5.

Ania dagiti mabalin nga aramidentayo tapno ad-adu ti agkomento?

Kanayon nga agkomentotayo iti ababa, tapno ad-adu ti makapagkomento. Saantayo a mangdakamat iti adu unay a punto. Iti kasta, adda mabati a komentuan ti dadduma.—w23.04, p. 23.

Ania ti tuktukoyen ti “Dalan ti Kinasanto” a nadakamat iti Isaias 35:8?

Idi damo, daytoy a simboliko a dalan ket tumukoy iti dalan a nagdaliasatan dagiti Judio manipud Babilonia agingga iti Israel. Iti ngay met kaaldawantayo? Ginasut a tawen sakbay ti 1919, naaramid ti trabaho a panagsagana—kas iti panagipatarus ken panagimprenta kadagiti Biblia. Magmagna ti ili ti Dios iti “Dalan ti Kinasanto” nga agturong iti naespirituan a paraiso, a mangyeg kadagiti bendision ti Pagarian.—w23.05, p. 15-19.

Iti Proverbio kapitulo 9, siasino ti dua a simboliko a babbai nga agaw-awis, ken ania ti pagtungpalan dagiti awisda?

Dakamaten ti Proverbio ti “babai a maag” a ti awisna ket agturong iti “Tanem.” Dakamatenna pay ti “pudno a sirib” a nairepresentar kas maysa a babai, a ti awisna ket agturong iti “dalan ti pannakaawat” ken iti biag. (Prov. 9:​1, 6, 13, 18)—w23.06, p. 22-24.

Kasano a makita ti kinapakumbaba ken kinanainkalintegan ti Dios iti pannakilangenna ken Lot?

Imbilin ni Jehova ken Lot a pumanaw iti Sodoma ket mapan agkamang iti kabambantayan. Ngem nagpakaasi ni Lot nga agkamang iti Zoar, ket pinatgan ti Dios ti kiddawna.—w23.07, p. 21.

Ania ti mabalin nga aramiden ti asawa a babai no agbuybuya ni lakayna iti pornograpia?

Masapul a laglagipenna a saanna a basol ti ar-aramiden ni lakayna. Ikagumaanna ketdi ti agpokus iti relasionna ken Jehova ken utobenna dagiti salaysay iti Biblia maipapan kadagiti problemado a babbai a liniwliwa ni Jehova. Matulonganna met ni lakayna a mangliklik kadagiti makasulisog a situasion.—w23.08, p. 14-17.

No adda mangkuestionar kadagiti patpatientayo, kasano a makatulong ti pannakatarus tapno agbalintayo a naalumamay?

Makatulong no ibilangtayo ti saludsod ti maysa a tao kas pamay-an tapno maammuantayo ti pampanunotenna wenno ti napateg kenkuana. No aramidentayo dayta, naalumamay wenno nasingpet ti panagsungbattayo.—w23.09, p. 17.

Ania ti masursurotayo ken Maria maipapan iti panagpatulong iti sabsabali tapno mapabilegtayo?

Idi naammuan ni Maria nga agbalinto nga ina ti Mesias, nagpatulong iti sabsabali tapno mapabileg. Nangipaay da Gabriel ken Elisabet iti Nainkasuratan a pammaregta ken Maria. Mapabilegdatayo met dagiti kapammatiantayo.—w23.10, p. 15.

Kasano ti mabalin a panangsungbat ni Jehova kadagiti kararagtayo?

Ikarkari ni Jehova a denggenna dagiti kararagtayo ken ikabilanganna no maitunos dagita iti panggepna. (Jer. 29:12) Mabalin nga agduduma ti pamay-anna a mangsungbat kadagiti agpapada a kiddaw, ngem kanayon a tulongannatayo.—w23.11, p. 21-22.

Dinakamaten ti Roma 5:2 ti “namnama,” isu nga apay a nadakamat manen dayta iti bersikulo 4?

Apaman a maammuan ti maysa a tao ti naimbag a damag, mabalin a maaddaan iti namnama nga agbiag nga agnanayon iti paraiso a daga. Ngem bayat a mapaspasaranna dagiti rigat, ib-ibturanna dagita, ken marikriknana nga an-anamongan ti Dios, sigurado a bumilbileg ti namnamana. Napaypayso ken napatpategen dayta kenkuana.—w23.12, p. 12-13.