1. Apay a nagtultuloy a nangnamnama ni Abraham a maaddaan iti anak?

 INKARI ni Jehova iti gayyemna a ni Abraham a babaen ti kaputotanna, mabendisionanto ti amin a nasion iti daga. (Gen. 15:5; 22:18) Gapu iti nauneg a pammati ni Abraham iti Dios, kombinsido a pumayso ti inkari kenkuana ti Dios. Uray no 100 idin ti tawen ni Abraham ken 90 ti tawen ni baketna, awan pay idi ti anak dagitoy a matalek nga agassawa. (Gen. 21:​1-7) Ngem kuna ti Biblia: “Gapu iti namnama, adda pammati [ni Abraham] nga isu ket agbalin nga ama ti adu a nasion sigun iti naibaga.” (Roma 4:18) Ammotayo a pimmayso ti ninamnama ni Abraham. Nagbalin nga ama ni Isaac, ti anak a nabayag a ninamnamana. Ania ti nakaibatayan ti panagtalek ni Abraham?

2. Apay a kombinsido ni Abraham a matungpal ti kari ni Jehova?

² Nasinged ti relasion ni Abraham ken Jehova, isu a “talaga a kombinsido a kabaelan ti Dios a tungpalen ti inkarina.” (Roma 4:21) Inanamongan ni Jehova ni Abraham ken imbilangna isuna kas nalinteg gapu iti pammatina. (Sant. 2:23) Kas ipakita ti Roma 4:​18, adda pammati ken namnama ni Abraham. Usigentayo ti imbaga ni apostol Pablo iti kapitulo 5 ti Roma maipapan iti namnama.

3. Ania ti inlawlawag ni Pablo maipapan iti namnama?

³ Inlawlawag ni Pablo no apay a masiguradotayo a “ti namnama[tayo] saannatayo a paayen.” (Roma 5:5) Impaawatna met no kasano a dumakkel ti Nakristianuan a namnamatayo. Bayat a pagsasaritaantayo ti proseso nga inlawlawag ni Pablo iti Roma 5:​1-5, panunotem ti bukodmo a kapadasan tapno  makitam no kasano a dumakdakkel ti Nakristianuan a namnamam iti panaglabas ti tiempo. Maammuantayo met no kasanotayo nga ad-adda pay a mapadakkel ti namnamatayo. Usigentayo nga umuna ti imbaga ni Pablo a saannatayo a paayen ti nagsayaat a namnamatayo.

4. Ania ti nailawlawag iti Roma 5:​1, 2?

⁴ Basaen ti Roma 5:​1, 2. Insurat ni Pablo dagita a sasao iti kongregasion idiay Roma. Naammuanen dagiti kakabsat sadiay ti maipapan kada Jehova ken Jesus, ipakpakitadan ti pammati, ken nagbalindan a Kristiano. Gapuna, ti Dios ‘indeklarana ida a nalinteg kas resulta ti pammatida,’ ken dinutokanna ida iti nasantuan nga espirituna. Wen, addaandan iti pudpudno ken nagsayaat a namnama.

5. Ania ti namnama dagiti Kristiano a dinutokan ti espiritu?

⁵ Idi agangay, insurat ni Pablo kadagiti Kristiano a dinutokan ti espiritu idiay Efeso ti maipapan iti namnama nga inted kadakuada ti Dios. Karaman iti dayta a namnama ti panangawatda iti “inkari [ti Dios] nga ipatawid kadagiti nasantuan.” (Efe. 1:18) Imbaga met ni Pablo kadagiti taga-Colosas no sadino a matungpal ti namnamada. Inawaganna dayta “iti namnama nga agur-uray kadakayo idiay langit.” (Col. 1:​4, 5) Ti ngarud namnama dagiti Kristiano a dinutokan ti espiritu ket mapagungarda tapno agbiagda nga agnanayon idiay langit, ken sadiay a makipagturayda ken Kristo.—1 Tes. 4:​13-17; Apoc. 20:6.

6. Ania ti imbaga ti maysa a brother a dinutokan ti espiritu maipapan iti namnamana?

⁶ Dagiti Kristiano a dinutokan ti espiritu ipatpategda dayta a namnama. Ti maysa kadakuada ket ni Brother Frederick Franz. Imbagana ti panagriknana maipapan iti dayta a namnama: “Sigurado ti inanamami, ket naan-anayto a maitungpal agingga kadagiti kauudian kadagiti 144,000 a kameng ti bassit nga ipastoran iti labes ti rukod a pinanunotmi.” Kalpasan ti dinekdekada a  simamatalek a panagserbi ni Brother Franz iti Dios, imbagana idi 1991: “Dimi napukaw ti panangtagipategmi iti dayta a namnama. . . . Ap-apresiarenmi dayta nga ad-adda bayat nga umat-atiddog ti panagur-uraymi iti dayta. Daytat’ maikari iti panaguray, uray pay kiddawenna ti maysa a riwriw a tawen. Ad-adda ngem idi ti panangipategko iti namnamami.”

7-8. Ania ti namnama ti kaaduan? (Roma 8:​20, 21)

⁷ Sabali ti namnama ti kaaduan nga agdaydayaw ken Jehova ita. Dayta ti ninamnama ni Abraham—agbiag nga agnanayon ditoy daga nga iturayan ti Pagarian ti Dios. (Heb. 11:​8-10, 13) Insurat ni Pablo ti maipapan iti nagsayaat a gunggona nga agur-uray kadagidiay addaan iti kasta a namnama. (Basaen ti Roma 8:​20, 21.) Idi damom a naammuan dagiti kari ti Biblia para iti masanguanan, ania ti nagustuam unay? Ti kadi aldaw nga agbalinkanton a perpekto ken saankanton nga agbasol? Wenno permi ti ragsakmo idi naammuam nga agbiagto manen iti paraiso a daga dagiti natayen nga ay-ayatem? Gapu iti dayta a “namnama,” nagadu ti nagsayaat a banag a padpadaanam.

⁸ Ti man namnamatayo ket agbiagtayo nga agnanayon idiay langit wenno ditoy daga, adda nagsayaat a namnama a mangparparagsak kadatayo. Dayta a naragsak a namnamatayo ket mabalin a dumakkel ken bumileg pay. Ilawlawag ti simmaruno nga insurat ni Pablo no kasano a mapasamak dayta a proseso. Pagsasaritaantayo ti insuratna maipapan iti namnamatayo. Iti kasta, ad-adda nga agtalektayo a ti namnamatayo ket agtultuloy a dumakkel ken saannatayo a pulos paayen.

9-10. Kas ipakita ti kapadasan ni Pablo, ania ti ekspektaren dagiti Kristiano? (Roma 5:3) (Kitaen met dagiti ladawan.)

⁹ Basaen ti Roma 5:3. Dinakamat ni Pablo a no agpasartayo iti rigat, makatulong dayta tapno dumakkel ti namnamatayo. Mabalin a masdaawka iti dayta. Kinaagpaysuanna, ekspektaren ti amin a pasurot ni Kristo nga agpasarda  iti rigat. Napadasan dayta ni Pablo. Imbagana kadagiti taga-Tesalonica: “Idi agkakaduatayo, kanayon nga impakpakaunami nga aglak-amtayo iti rigat. Ket . . . kasta ti napasamak.” (1 Tes. 3:4) Insuratna met kadagiti taga-Corinto: “Ta kayatmi a maammuanyo, kakabsat, ti rigat a napasaranmi . . . Dimi idi masigurado no malasatanmi wenno saan.”—2 Cor. 1:8; 11:​23-27.

¹⁰ Ekspektaren met dagiti Kristiano ita nga adda dagiti rigat a mapasaranda. (2 Tim. 3:12) Sika ngay met? Bayat nga itultuloymo ti mamati ken agtulnog ken Jesus, adda kadin dagiti rigat a napasaram? Mabalin nga uy-uyawendaka dagiti gagayyem wenno kakabagiam. Baka saan pay ketdi a nasayaat ti panangtratoda kenka. Adda kadi dagiti timmaud a problemam iti pagtrabahuan gapu ta ikagkagumaam ti agbalin a mapagtalkan iti amin a banag? (Heb. 13:18) Busbusorendaka kadi dagiti autoridad gapu iti panangasabam? Ngem aniaman a rigat ti mabalin a mapasarantayo, imbaga ni Pablo a masapul nga agragsaktayo. Apay?

11. Apay a masapul a determinadotayo nga agibtur iti aniaman a suot?

¹¹ Naragsaktayo latta uray no maipasangotayo iti rigat gapu ta makatulong dayta kadatayo. Kas kuna ti Roma 5:​3, “ti rigat ti makatulong kadatayo nga agibtur.” Maipasango iti rigat ti amin a Kristiano isu a masapul nga agibturtayo. Masapul a determinadotayo nga agibtur aniaman a suot ti pakaipasanguantayo. No aramidentayo dayta, makitatayo ti kaitungpalan ti namnamatayo. Saantayo a kayat ti agbalin a kas kadagidiay pampanunoten ni Jesus idi dinakamatna ti bin-i a nagdisso iti kabatuan. Idi damo, naragsakda a nangawat iti sao. Ngem idi adda ‘rigat wenno pannakaidadanes,’ saanda a nagtultuloy. (Mat. 13:​5, 6, 20, 21) Agpayso a narigat ti maipasango iti ibubusor wenno suot. Ngem adu ti pagsayaatanna no ibturantayo dagita. Kasano?

12. Kasano a pagsayaatantayo no ibturantayo dagiti suot?

¹² Intampok ni adalan a Santiago dagiti pagsayaatan ti panangibtur kadagiti suot. Insuratna: “Bay-anyo nga itungpal ti panagibtur ti panggepna, tapno agbalinkayo a naan-anay ken awan pakababalawanna iti amin a banag, nga awan ti aniaman a pagkuranganyo.” (Sant. 1:​2-4) Inladawan ni Santiago ti panagibtur a kas iti maysa a trabaho nga adda panggepna. Ania ti panggep ti panagibtur? Matulongannaka a lallalo a mangpasayaat kadagiti kualidad a kas iti panaganus, pammati, ken panagtalek iti Dios. Ngem saan la a dayta ti pagsayaatan ti panagibtur.

13-14. Ania ti maitulong kadatayo ti panagibtur, ken kasano a konektado dayta iti namnamatayo? (Roma 5:4)

¹³ Basaen ti Roma 5:4. Imbaga ni Pablo a makatulong ti panagibturtayo iti pananggun-od iti “anamong ti Dios.” Isu a no agib-ibturka, magun-odmo ti anamong ni Jehova. Ngem dina kayat a sawen dayta a maragragsakan ni Jehova no makapaspasarka kadagiti suot wenno problema. Imbes ketdi, maragragsakan ti Dios iti matalek a panagibturmo. Makaparegta a maammuan a no agib-ibturtayo, maparparagsaktayo ni Jehova!—Sal. 5:12.

¹⁴ Laglagipem a naibturan ni Abraham dagiti pakasuotan ket nagun-odna ti anamong ti Dios. Inawagan ni Jehova ni Abraham kas gayyemna ken imbilangna kas nalinteg. (Gen. 15:6; Roma 4:​13, 22) Magun-odtayo met ti anamong ti Dios. Saan nga ibatay ti Dios ti anamongna kadatayo iti kaadu ti trabaho wenno pribilehiotayo iti panagserbitayo kenkuana. Ibatayna ti anamongna iti matalek a panagibturtayo. Ken aniaman ti edad,  situasion, wenno abilidadtayo, kayatayo amin ti agibtur. Adda kadi suot a simamatalek nga ib-ibturam ita? No wen, sapay koma ta maliwliwaka iti kinapudno nga an-anamongannaka ti Dios. No nalawag kadatayo nga an-anamongannatayo ti Dios, sigurado a dakkel ti epektona kadatayo. Dayta ti mangpabileg iti namnamatayo.

15. Ania ti imbaga ni Pablo iti Roma 5:​4, 5, ket ania ti tumaud a saludsod?

¹⁵ Kas iti inlawlawag ni Pablo, magun-odtayo ti anamong ni Jehova babaen ti matalek a panagibturtayo kadagiti suot. Siputanyo ti intuloy nga imbaga ni Pablo: “Ti anamongna ti makatulong kadatayo a maaddaan iti namnama, ket ti namnama saannatayo a paayen.” (Roma 5:​4, 5) Mabalin a matikaw ti dadduma. Apay? Gapu ta imbagan ni Pablo iti Roma 5:2 nga addan namnama dagiti Kristiano idiay Roma, ti ‘namnama ti panangipadayag ti Dios.’ Isu a mabalin nga isaludsod ti dadduma, ‘Apay nga imbaga manen ni Pablo a maaddaanda iti namnama idinto ta addan namnama dagidi a Kristiano?’

16. Kasano a ti namnama ket mangrugi a dumakkel iti maysa a tao? (Kitaen met dagiti ladawan.)

¹⁶ Maawatantayo ti kayat a sawen ni Pablo no laglagipentayo a ti namnama ket maysa a banag a dumakkel. Kas panangyilustrar: Malagipmo kadi idi damo a naammuam ti nagsayaat a namnama nga isursuro ti Sao ti Dios? Baka impagarupmo idi nga imposible ti agbiag nga agnanayon iti paraiso a daga. Ngem bayat nga umad-adu ti pannakaammom maipapan ken Jehova ken kadagiti kari ti Biblia, lallalo a nakombinsirka a dayta a namnama ket matungpalto.

17. Kasano a ti namnamam ket agtultuloy a dumakkel kalpasan ti panagdedikar ken panagpabautisarmo?

¹⁷ Uray no dedikado ken bautisadokan, ti namnamam ket agtultuloy a dumakdakkel bayat nga umad-adu ti pannakaammom ken agmatmataenganka iti naespirituan. (Heb. 5:13–6:1) Mabalin a napadasam ti proseso  a nadakamat iti Roma 5:​2-4. Mabalin a nadumaduma a rigat ti nakaipasanguam. Ngem inibturam amin dagita ken nariknam nga an-anamongannaka ti Dios. Gapu ta ammom nga ay-ayatennaka ti Dios ken maragragsakan kenka, nabilbilegen ti panggapuam a talaga a maawatmo dagiti banag nga inkarina. Nabilbilegen ti namnamam ngem idi damo. Napaypayso ken napatpategen dayta kenka. Dakdakkelen ti epektona iti biagmo ta im-impluensiaanna ti amin a paset ti biagmo ken paspasayaatenna ti panangtratom iti pamiliam, panangaramidmo kadagiti desision, ken uray pay ti panangusarmo iti tiempom.

18. Ania a garantia ti inted ni Jehova?

¹⁸ Adda pay innayon ti apostol a nakapatpateg a punto maipapan iti namnama nga inted kenka ti Dios kalpasan a naawatmon ti anamongna. Impasigurado ni Pablo a matungpalto ti namnamam. Apay a masiguradom unay dayta? Ngamin, inraman ni Pablo daytoy a garantia ti Dios kadagiti Kristiano: “Ti namnama saannatayo a paayen; ta imbukbok ti Dios ti ayatna kadagiti pusotayo babaen ti nasantuan nga espiritu a naited kadatayo.” (Roma 5:5) Adda ngarud nabileg a rasonmo a sigurado dayta a namnama—ti namnamam.

19. Ania ti masiguradom maipapan iti namnamam?

¹⁹ Panunotem a naimbag ti kari ni Jehova ken Abraham ken no apay nga inanamongan isuna ti Dios ken imbilangna kas gayyemna. Saan a sayang ti panangnamnama ni Abraham. Kuna ti Biblia: “Kalpasan a nagan-anus ni Abraham, naawatna daytoy a kari.” (Heb. 6:15; 11:​9, 18; Roma 4:​20-22) Sigurado a saan a napaay. Kas ken Abraham, masiguradom met a no agtalinaedka a matalek, maawatmonto ti namnamaem. Napaypayso dayta a namnama; mangyeg iti ragsak, saan a pannakapaay! (Roma 12:12) Insurat ni Pablo: “Sapay koma ta ti Dios a mangted iti namnama punnuennakayo iti kasta unay a ragsak ken talna gapu ta nagtalekkayo kenkuana, tapno dumakkel ti namnamayo babaen ti pannakabalin ti nasantuan nga espiritu.”—Roma 15:13.