1-2. Ania dagiti situasion a mabalin nga agsangittayo?

 SIGURADO a napadasantayo aminen ti agsangit. No dadduma, agsangittayo gapu ta naragsaktayo. Mabalin met a nagsangitka gapu iti napateg wenno espesial a napasamak kenka—kas pagarigan idi naipasngay ti anakyo, idi adda makaparagsak a malagipmo, wenno idi nagkitakayo manen iti ipatpategmo a gayyem kalpasan ti adu a tawen.

² Ngem kaaduanna nga agsangittayo gapu ta nalidaytayo, wenno no agrigrigattayo. Kas pagarigan, baka agsangittayo gapu ta nasaktannatayo unay ti maysa nga ipatpategtayo. Wenno no agpapaut-ottayo gapu iti nakaro ken nabayagen a sakittayo, wenno no natayantayo iti ipatpateg iti biag. Kadagita a tiempo, mabalin a mariknatayo ti kas iti narikna ni propeta Jeremias idi dinadael dagiti Babilonio ti Jerusalem. Imbaga ni Jeremias: “Agar-arubos ti lulua iti matak . . . Kanayon nga agsangsangitak, saanak nga agsarsardeng.”—Un. 3:​48, 49.

3. Ania ti marikna ni Jehova no makitana nga agrigrigat dagiti adipenna? (Isaias 63:9)

³ Ammo ni Jehova no namin-anotayon a nagsangit gapu kadagiti narigat a situasiontayo. Ipaspasigurado ti Biblia nga ammona dagiti nasaem a mapaspasaran dagiti adipenna, ken dengdenggenna dagiti panagpakaasida iti tulongna. (Sal. 34:15) Ngem saan la a basta makitkita ken dengdenggennatayo ni Jehova. Isu ti Amatayo ken ay-ayatennatayo unay. Isu a no makitkitana nga agsangsangittayo, maladingitan met unay, ket dagus a tulongannatayo.—Basaen ti Isaias 63:9.

4. Siasino dagiti karakter iti Biblia nga usigentayo ken ania ti masursurotayo maipapan ken Jehova?

⁴ Ibagbaga ni Jehova iti Saona no ania ti nariknana idi nagsangit dagiti adipenna ken no kasano a tinulonganna ida. Kas pagarigan, makasursurotayo iti napasamak kada Hanna, David,  ken Ari Ezekias. Apay a nagsangitda? Kasano a tinulongan ida ni Jehova? Ken kasano a makaliwliwa kadatayo dagiti ulidanda no agsangittayo gapu iti nakaro a liday, pannakatraidor, wenno no maaw-awanantayon iti namnama?

NO AGSANGITTAYO GAPU ITI NAKARO A LIDAY

5. Ania ti narikna ni Hanna gapu iti situasionna?

⁵ Naipasango ni Hanna iti adu a problema isu a nagsangsangit gapu iti nakaro a liday. Maysa kadagita ket gapu ta adda pay sabali nga asawa ni lakayna, ni Penina. Kagurgura isuna ni Penina. Awan pay idi ti anak ni Hanna, idinto ta addan annak ni Penina. (1 Sam. 1:​1, 2) Kanayon nga in-insultuenna ni Hanna gapu ta lupes. No sika ni Hanna, ania ngata ti nariknam? Nakalidliday ni Hanna nga uray la ‘agsangsangit, saan a mangan, ken nasaem unay ti riknana.’—1 Sam. 1:​6, 7, 10.

6. Ania ti inaramid ni Hanna tapno maliwliwa?

⁶ Kasano a naliwliwa ni Hanna? Ti maysa a nakatulong kenkuana ket napan iti tabernakulo, ti sentro ti pudno a panagdaydayaw. Posible nga idi adda iti asideg ti pagserkan ti tabernakulo, “nagkararag ken Jehova ket nagsangit iti napalalo.” Impakaasina ken Jehova: “Kitaem ti pannakaparigat daytoy adipenmo ken lagipennak.” (1 Sam. 1:10b, 11) Imbukbok ni Hanna ken Jehova ti amin a marikriknana babaen ti kararag. Idi makita ni Jehova nga agan-anug-og ni Hanna, nalidayan unay. Ipatpategna ngamin unay ni Hanna ken kayatna a liwliwaen!

7. Ania ti narikna ni Hanna kalpasan nga imbagana ken Jehova ti amin a problemana?

⁷ Kalpasan nga imbaga ni Hanna ken Jehova ti amin a problemana, impasigurado ti Nangato a Padi a ni Eli a sungbatan ni Jehova ti kararagna. Ania ti nariknana kalpasan dayta? Ibaga ti salaysay: “Pimmanaw ni Hanna ket nangan ken saanen a naliday ti rupana.” (1 Sam. 1:​17, 18) Uray no saan pay a nagbalbaliw ti narigat a situasion ni Hanna, nabang-aran unayen. Impaawitna ken Jehova ti pakadagsenan ti pusona. Nakita ni Jehova ti rigatna, nangngegna ti panagsangsangitna, ken idi agangay, binendisionanna iti annak.—1 Sam. 1:​19, 20; 2:21.

8-9. Sigun iti Hebreo 10:​24, 25, apay a masapul nga ikagumaantayo ti makigimong? (Kitaen met ti ladawan.)

⁸ Dagiti maadaltayo. Maipaspasangoka kadi iti narigat a problema isu a napalalo ti lidaymo? Baka agladladingitka gapu ta natay ti maysa a kapamiliam wenno gayyemmo. Kadagita a tiempo, natural laeng a kayattayo no kua ti agmaymaysa. Ngem laglagipem ti ulidan ni Hanna. Napan idiay tabernakulo ket sadiay a liniwliwa ni Jehova. Kasta met, liwliwaen ken paregtaennaka ni Jehova no makigimongka, uray no mariknam a nabambannog ken malidlidayka. (Basaen ti Hebreo 10: 24, 25.) No mangmangngegtayo dagiti makaliwliwa a teksto iti Biblia kadagiti gimong, matulongannatayo ni Jehova a mangsukat kadagiti negatibo a pampanunottayo iti positibo. Makatulong dagita tapno makontroltayo ti emosiontayo, uray no saan a dagus a sumayaat ti situasiontayo.

⁹ Kadagiti gimongtayo, matagtagiragsaktayo ti makikadua kadagiti mannakipagrikna a kapammatiantayo. Maparparegtadatayo ken ipakpakitada nga ay-ayatendatayo, isu a sumayaat ti riknatayo no kaduatayo ida. (1 Tes. 5:​11, 14) Kitaentayo ti kapadasan ti maysa nga special pioneer a brother a natay ti baketna. Imbagana: “No dadduma, agsangitak latta. Agtugawak iti suli, saak agsangit. Ngem no mapanak makigimong, permi a maparparegtaak. Maliwliwaak kadagiti nagsasayaat nga ibagbaga kaniak dagiti kakabsat ken uray kadagiti komentoda. Uray no madandanagan wenno mariribukanak sakbay ti gimong, kanayon a sumayaat ti riknak kada agawidak.” No addatayo kadagiti gimong, mabalin nga usaren ni Jehova dagiti kakabsat a tumulong kadatayo.

10. Kasano a matuladtayo ti ulidan ni Hanna no nakaro ti lidaytayo?

¹⁰ Naliwliwa met ni Hanna idi imbukbokna ken Jehova ti amin a marikriknana babaen ti kararag. Kabaelam met nga ‘ipalladaw ken Jehova ti amin a pakadanagam,’ nga agtalekka a denggennaka. (1 Ped. 5:7) Adda sister a pinatay dagiti agtatakaw ti lakayna. Nalagipna: “Ti panagriknak idi ket kasla nabagsobagsol ti pusok ken saanen nga aglunit pay. Ngem mabang-aranak kada agkararagak iti nailangitan nga Amak a ni Jehova a mangay-ayat kaniak. No dadduma, diak mayebkas ti eksakto a marikriknak, ngem ammok a maaw-awatannak. No permi ti liday ken danagko, ikararagko kenkuana a pagkalmaennak. Isu a dagus a mariknak a bang-arannak ket maaramidko manen dagiti masapul nga aramidek iti dayta nga aldaw.” No agsangitka ken Jehova ken ibagam kenkuana no apay a nalidayka, malidayan met ni Jehova. Maawatanna ti eksakto a marikriknam. Uray no saan a dagus a masolbar ti problemam, maliwliwanaka ni Jehova ket tulongannaka tapno agbalinka a kalmado. (Sal. 94:19; Fil. 4:​6, 7) Bendisionannanto met ti kinamatalek ken panagibturmo.—Heb. 11:6.

NO AGSANGITTAYO GAPU ITI PANNAKATRAIDOR

11. Ania ti narikna ni David idi adda dagiti nangtraidor kenkuana?

¹¹ Iti intero a panagbiag ni David, namin-adu a nagsangit gapu kadagiti narigat a situasion a napadasanna. Adu ti nanggura kenkuana. Trinaidor pay ketdi ti dadduma a gagayyem ken kapamiliana. (1 Sam. 19:​10, 11; 2 Sam. 15:​10-14, 30) Bayat ti maysa kadagiti narigat a tiempo iti biagna, insuratna: “Nabannogakon nga agsensennaay; agpatpatnag a maslep ti iddak gapu iti panagarubos dagiti luak; malaylayus ti pagturogak gapu iti panagsangsangitko.” Apay a kasta ti narikna ni David? “Gapu iti amin a mangbusbusor kaniak,” imbagana. (Sal. 6:​6, 7) Nagrigat dagiti napasaran ni David isu a saanna a nalapdan ti panagarubos dagiti luana.

12. Kas ipakita ti Salmo 56:​8, iti ania a kombinsido ni David?

¹² Uray no nakarigrigat dagiti napasaran ni David, kombinsido nga ay-ayaten isuna ni Jehova. Insuratna: “Denggento ni Jehova dagiti saibbekko.” (Sal. 6:8) Iti sabali pay a gundaway, adda insurat ni David a nagpintas a sasao iti Salmo 56:8. (Basaen.) Iladawan ti sasaona ti nadungngo a panangaywan ni Jehova kadatayo. Narikna ni David a kasla ur-urnongen  ni Jehova dagiti luana iti lalat a pagkargaan wenno isursuratna ti maipapan kadagita iti librona. Sigurado ni David a nakita ken saan a malipatan ni Jehova dagiti saem a nariknana. Kombinsido ni David a saan laeng nga ammo ti naayat a nailangitan nga Amana dagiti narigat a napasaranna no di ket uray dagiti epekto dagita kenkuana.

13. Ania koma ti laglagipentayo no adda nangtraidor wenno nangliput kadatayo? (Kitaen met ti ladawan.)

¹³ Dagiti maadaltayo. Masaksaktanka kadi gapu ta trinaidor wenno liniputannaka ti maysa a pagtaltalkam? Baka nasaem ti riknam ta bigla nga insinanaka ti nobio wenno nobiam, wenno pinanawannaka ti asawam, wenno baka simmardengen nga agserbi ken Jehova ti maysa nga ipatpategmo. Kastoy ti imbaga ti brother a pinanawan ti nakikamalala a baketna: “Nakigtotak ken kasla diak maawat. Agkakanat ti riknak, maladladingitanak, makapungpungtotak, ken panagriknak awan ti serserbik.” No trinaidornaka ti maysa nga ipatpategmo wenno pinanawannaka, laglagipem a dinakanto pulos panawan ni Jehova. Imbaga ti brother: “Naamirisko a mabalin a traidoren wenno panawannatayo ti maysa nga ipatpategtayo iti biag. Ngem saan a kasta ni Jehova. Kanayon a mapagtalkantayo isuna. Aniaman ti mapasamak, kanayon a nakasagana a tumulong kadatayo. Dinanto pulos panawan dagiti napudno kenkuana.” (Sal. 37:28) Laglagipem met a dakdakkel ti panagayat kenka ni Jehova ngem ti asinoman a tao. Talaga a nasakit no traidoren wenno panawannaka ti maysa nga ipatpategmo. Ngem saanto a pulos nga agkupas ti panagayat kenka ni Jehova ta nakapatpategka kenkuana. (Roma 8:​38, 39) Ti punto? Kasanoman kasaem ti nariknam gapu iti inaramid kenka ti maysa a tao, ay-ayatennaka latta ti nailangitan nga Amam.

14. Ania ti ipasigurado kadatayo ti Salmo 34:18?

¹⁴ No natraidor wenno naliputanka, maliwliwaka la ketdi iti sasao ni David iti Salmo 34:18. (Basaen.) Kuna ti maysa a reperensia a dagidiay “nadudog ti espirituda” ket mabalin a tumukoy “kadagidiay awan namnamaenda a nasayaat a masakbayan.” Ania ti aramiden ni Jehova tapno tulonganna dagiti kasta ti marikriknada? Ni Jehova ket “asideg” kadatayo, a kas iti maysa nga ama wenno ina a mangubba ken mangliwliwa iti agsangsangit nga anakna. No masaksaktantayo gapu ta trinaidor wenno pinanawandatayo, marikrikna ni Jehova ti saem a marikriknatayo isu a dagus a tulongannatayo. Kayatna unay a liwliwaen ken bang-aran ti masaksaktan a pusotayo ken ti nadudog nga espiritutayo. Adu met dagiti padpadaanantayo  a karina a makatulong tapno maibturantayo dagiti agdama a pakasuotan.—Isa. 65:17.

NO AGSANGITTAYO GAPU TA MAAW-AWANANTAYO ITI NAMNAMA

15. Apay a nariribukan ken nagsangit idi ni Ezekias?

¹⁵ Idi 39 ti edad ni Ari Ezekias iti Juda, naammuanna nga adda saanen a maagasan a sakitna. Impaibaga ni Jehova ken propeta Isaias a matay ni Ezekias gapu iti sakitna. (2 Ar. 20:1) Kasla awanen ti namnama ni Ezekias. Permi ti ladingit ni Ezekias idi nangngegna dayta, isu a napalalo ti sangitna. Gapu iti dayta, sipapasnek a nagkararag ken Jehova.—2 Ar. 20:​2, 3.

16. Ania ti insungbat ni Jehova iti panagpakpakaasi ni Ezekias?

¹⁶ Nangngeg ni Jehova ti kararag ni Ezekias ken nakitana dagiti luluana isu a naasian. Imbagana: “Nangngegko ti kararagmo. Nakitak dagiti luam. Paimbagenka.” Babaen ken Isaias, siaasi nga inkari ni Jehova a paatiddogenna ti biag ni Ezekias ken isalakanna ti Jerusalem manipud kadagiti Asirio.—2 Ar. 20:​4-6.

17. Kasanonatayo a tulongan ni Jehova no adda grabe a sakittayo? (Salmo 41:3) (Kitaen met ti ladawan.)

¹⁷ Dagiti maadaltayo. Adda kadi nakaro a sakitmo a kasla saanen a maagasan? Ibagam ken Jehova ti marikriknam. Denggennaka uray no agsangsangitka bayat nga agkarkararagka. Ipasigurado kadatayo ti Biblia a “ti Ama a napnuan iti asi ken Dios ti amin a liwliwa” ti mangliwliwa kadatayo iti amin a pakasuotantayo. (2 Cor. 1:​3, 4) Saantayo a namnamaen nga ikkaten ni Jehova ti amin a problematayo ita. Ngem kanayon a makapagtalektayo a tulongannatayo. (Basaen ti Salmo 41:3.) Babaen ti nasantuan nga espirituna, ikkannatayo ni Jehova iti bileg, sirib, ken talna ti panunot tapno makapagibturtayo. (Prov. 18:14; Fil. 4:13) Maliwliwanatayo met babaen iti naibatay iti Biblia a namnama nga iti masanguanan, awanen ti agsakit.—Isa. 33:24.

18. Ania a teksto ti nakitam a makaliwliwa kenka no maipasangoka iti narigat a situasion? (Kitaen ti kahon a “ Dagiti Makapabang-ar a Sasao ni Jehova no Agsangsangittayo.”)

¹⁸ Naliwliwa ni Ezekias kadagiti sasao ni Jehova. Maliwliwanatayo met ti Sao ti Dios. Impaisurat ni Jehova dagiti makapabang-ar a sasao a mangpakalma iti riknatayo no maipasangotayo kadagiti narigat a situasion. (Roma 15:4) Nadayagnos nga adda kanser ti maysa a sister iti West Africa, isu a kanayon nga agsangit. Imbagana: “Ti maysa a teksto a talaga a makaliwliwa kaniak ket ti Isaias 26:3. Uray no saantayo a kanayon a makontrol dagiti pakasuotantayo, ipasigurado kaniak daytoy a teksto a maikkannak ni Jehova iti talna ti panunot tapno makontrolko ti reaksionko kadagitoy a pakasuotan.” Adda kadi malagipmo  a teksto a makaliwliwa kenka iti nakarigrigat a situasion, a kasla awanen ti solusionna?

19. Ania a nasayaat a masakbayan ti agur-uray kadatayo?

¹⁹ Asidegen nga agpatingga daytoy a sistema, isu a namnamaentayo nga umadu pay dagiti pakaigapuan ti panagsangittayo. Ngem kas iti naadaltayo iti ulidan da Hanna, David, ken Ari Ezekias, makitkita ni Jehova ti panagsangittayo ket maladladingitan met gapu iti dayta. Ipatpategna ti kinamatalektayo uray nasaem ti marikriknatayo ken dina malipatan dagiti panagsangittayo. Isu a no maipasangotayo kadagiti narigat a situasion, agkararagtayo ken Jehova ket ibagatayo kenkuana ti amin a marikriknatayo. Saantayo koma nga isinsina ti bagitayo kadagiti naayat a kakabsat iti kongregasion. Itultuloytay met koma a basaen ti Biblia tapno mabang-aran ken maliwliwatayo. Masiguradotayo a no itultuloytayo ti agibtur a simamatalek, bendisionannatayto ni Jehova. Karaman iti dayta ti nagsayaat a karina a punasennanto ti amin a lua gapu iti liday, pannakatraidor, ken kinaawan namnama. (Apoc. 21:4) Agluatayto man, ngem gapunto laengen iti ragsak.