Binasayo kadin a naimbag dagiti ruar Ti Pagwanawanan ita a tawen? Kitaenyo no masungbatanyo dagitoy a saludsod:

Ania ti inyulidan ni Jehova maipapan iti panangtrato kadagiti babbai?

Patas ti panangtratona kadakuada. Saanna a mas pabpaboran dagiti lallaki ngem kadagiti babbai. Dengdenggenna ida. Interesado ni Jehova kadagiti marikrikna ken pakaseknanda. Pagtaltalkanna met ida a mangitungpal iti trabahona.—w24.01, p. 15-16.

Kasanotayo a mayaplikar daytoy nga ibagbaga ti Efeso 5:7: “Diyo tultuladen ida”?

Pinakdaarannatayo ni apostol Pablo a ditay makikadua kadagiti tattao a saan a mangsursurot kadagiti estandarte ti Dios nga isu ti mangparigat kadatayo nga agtulnog kadagita. Dagiti dakes a kakadua ket saan laeng a dagiti kakaduatayo iti personal no di ket uray pay iti social media.—w24.03, p. 22-23.

Ania dagiti ulbod nga estoria a masapul a pagannadantayo?

Masapul nga agannadtayo kadagiti iyestoria dagiti kakabsat a ditay sigurado ti naggapuanna, kadagiti email a naggapu kadagiti ditay am-ammo, ken apostata nga agpampammarang nga interesado iti kinapudno.—w24.04, p. 12.

Ania ti ammo ken saantayo nga ammo maipapan iti panangukom ni Jehova ken Ari Solomon ken kadagiti nadadael iti Sodoma ken Gomorra ken iti Layus?

Ditay masigurado no sinentensiaanen ida ni Jehova iti agnanayon a pannakadadael. Ngem ti ammotayo ket ammona ti amin ken nagdakkel ti asina.—w24.05, p. 3-4.

Gapu ta ti Dios ket “Dakkel a Bato,” ania ti masiguradotayo? (Deut. 32:4)

Mabalintayo ti agkamang ken Jehova. Isu ket mapangnamnamaan ta kanayon a tungpalenna dagiti karina. Natibker met isuna ta saan nga agbalbaliw ti personalidad ken ti panggepna.—w24.06, p. 26-28.

Ania ti makatulong kenka nga ag-adjust iti baro a kongregasionmo?

Agpannurayka ken Jehova. Tulongannaka kas iti panangtulongna idi kadagiti adipenna. Saanmo nga ikompara ti dati a kongregasionmo iti baro a kongregasionmo. Agbalinka a busy iti baro a kongregasionmo, ken agbirokka iti baro a gagayyem.—w24.07, p. 26-28.

Ania dagiti masursurotayo iti tallo nga ilustrasion a mabasa iti Mateo kapitulo 25?

Ti ilustrasion maipapan kadagiti karnero ken kalding ipaganetgetna ti kinapateg ti panagbalin a matalek ken napudno. Ti ilustrasion maipapan kadagiti masirib ken maag a birhen ipaganetgetna a masapul a nakasagana ken alertotayo. Ken ti ilustrasion maipapan kadagiti talento, itampokna a napateg ti kinagaget ken kinaregta.—w24.09, p. 20-24.

Kasano kangato ti beranda iti templo ni Solomon?

Iti 2 Cronicas 3:​4, mabasa iti dadduma a nagkauna a manuskrito a ti beranda ket “120 a kasiko,” wenno 53 a metro (175 a pie) ti kangatona. Ngem mabasa iti dadduma a mapagtalkan a manuskrito a ti kangato ti beranda ket “20 a kasiko” wenno 9 a metro (30 a pie). Mas maitutop daytoy a kangato ta kayana a suportaran ti kapuskol dagiti pader ti templo.—w24.10, p. 31.

Ania ti kaipapananna a ti maysa a ministerial nga adipen ket “asawa koma ti maymaysa a babai”? (1 Tim. 3:12)

Kaipapananna a maysa laeng a babai ti asawana ken saan nga agar-aramid iti seksual nga immoralidad. Kasta met, saan a pulos a mangted iti di maitutop nga atension iti sabali a babbai.—w24.11, p. 19.

Apay a maibagatayo a ti Juan 6:53 ket saan a pagtuladan wenno padron para iti Pangrabii ti Apo?

Iti Juan 6:​53, ibagbaga ni Jesus a masapul a kanenda ti lasag ken inumenda ti darana. Imbagana dayta idi 32 C.E. idiay Galilea kadagiti Judio nga awan pay pammatida kenkuana. Nupay kasta, agarup makatawen pay ti napalabas sakbay nga inrugina ti Pangrabii ti Apo idiay Jerusalem. Ti kasarsarita idi ni Jesus sadiay ket dagiti kakaduana nga agturay idiay langit.—w24.12, p. 10-11.