1-2. Ania ti imbaga ti anghel kadagiti babbai a napan iti tanem ni Jesus, ken ania ti imbilin ni Jesus kadakuada?

AGSAPA idi ti Nisan 16, 33 C.E. Adda grupo dagiti managbuteng-Dios a babbai a maladladingitan a napan iti nakaitaneman ti bagi ni Apo Jesu-Kristo nasurok a 36 nga orasen ti napalabas. Kayatda koma a sapsapuan ti bagina kadagiti nabanglo a yerba ken nabanglo a lana. Ngem idi nakadanondan, nasdaawda ta awan nagyan ti tanem! Imbaga ti anghel kadagiti adalan a napagungaren ni Jesus, sa innayonna: “Mapmapanen [ni Jesus] idiay Galilea ket makitayonto sadiay.”​—Mat. 28:1-7; Luc. 23:56; 24:10.

² Idi nakapanawen dagiti babbai iti tanem, inasitgan ida a mismo ni Jesus ket intedna daytoy a bilin: “Inkay ipadamag daytoy kadagiti kakabsatko tapno mapanda idiay Galilea, ket makitadakto sadiay.” (Mat. 28:10) Adda la ketdi nakapatpateg nga instruksion nga ited ni Jesus kadagiti adalanna, ta daytoy a panagkikita ti kaunaan nga inyurnosna kalpasan ti panagungarna!

3-4. Apay a maibagatayo a ti bilin a nairekord iti Mateo 28:19, 20 ket saan laeng a naited kadagiti apostol? (Kitaen ti ladawan iti akkub.)

³ Basaen ti Mateo 28:16-20. Iti panagkikita nga inyurnos ni Jesus, imbagana ti napateg a trabaho nga aramiden dagiti adalan idi umuna a siglo​—ti isu met laeng a trabaho nga ar-aramidentayo ita. Imbaga ni Jesus: “Inkayo ngarud kadagiti tattao iti amin a nasion ket pagbalinenyo ida nga adalak, . . . ken isuroyo a tungpalenda ti amin nga imbilinko kadakayo.”

 ⁴ Kayat ni Jesus a mangasaba ti amin a pasurotna. Saan laeng a ti 11 a matalek nga apostol ti nangtedanna iti daytoy a bilin. Kasanotayo a masigurado dayta? Dagiti laeng kadi apostol ti adda idiay bantay ti Galilea idi intedna ti bilin a panagaramid iti ad-adalan? Laglagipentayo nga imbaga ti anghel kadagiti babbai: “Makitayonto [ni Jesus idiay Galilea].” Isu a sigurado nga adda met idi sadiay dagiti matalek a babbai. Ngem saan la nga isuda. Imbaga ni apostol Pablo a “nagparang [ni Jesus] iti nasurok a 500 a kakabsat iti maysa a gundaway.” (1 Cor. 15:6) Sadino?

5. Apay a patientayo a ti tuktukoyen ni Pablo iti 1 Corinto 15:6 ket ti panagkikita idiay Galilea?

⁵ Adda dagiti rason no apay a maibagatayo a ti tuktukoyen ni Pablo ket ti panagkikita idiay Galilea a nadeskribir iti Mateo kapitulo 28. Ania dagita? Umuna, kaaduan nga adalan ni Jesus ket taga-Galilea. Isu a maysa a bantay idiay Galilea imbes a maysa a pribado a balay idiay Jerusalem ti mas rasonable a lugar a pagkikitaan ti dakkel a grupo ti tattao. Maikadua, nalpasen a nagkikita ti napagungar a ni Jesus ken ti 11 nga apostolna iti maysa a balay idiay Jerusalem. No koma dagiti laeng apostol ti kayat a bilinen ni Jesus a mangasaba ken mangaramid iti ad-adalan, imbagana koma daytan idiay Jerusalem imbes a kiddawenna pay kadakuada a mapanda idiay Galilea, agraman dagiti babbai ken ti dadduma pay.​—Luc. 24:33, 36.

6. Kasano nga ipakita ti Mateo 28:20 nga agaplikar ita ti bilin a panagaramid iti ad-adalan, ken kasano ti panangtungpaltayo iti dayta?

⁶ Kitaem ti maikatlo a napateg a rason. Ti bilin ni Jesus a panagaramid iti ad-adalan ket saan laeng a para kadagiti Kristiano idi umuna a siglo. Kasanotayo nga ammo? Inleppas ni Jesus ti bilinna kadagiti pasurotna kadagitoy a sasao: “Addaak kadakayo iti amin nga al-aldaw agingga iti panungpalan daytoy a sistema ti bambanag.” (Mat. 28:20) Kas iti imbaga ni Jesus, nakaad-adu ita ti agar-aramid iti ad-adalan. Agasem, dandani 300,000 ti mababautisaran iti kada tawen kas Saksi ni Jehova ken agbalbalin nga adalan ni Jesu-Kristo!

7. Ania ti pagsasaritaantayo, ken apay?

⁷ Adu nga agad-adal iti Biblia ti rumang-ay ken agpabautisar. Ngem adda dagiti regular a makipagad-adal iti Biblia nga agpangadua nga agbalin nga adalan ni Kristo. Maragragsakanda a makipagadal, ngem saanda a rumangrang-ay ken agpabautisar. No adda iyad-adalam, sigurado a kayatmo a tulongan a mangyaplikar kadagiti masursurona ken agbalin nga adalan ni Kristo. Ilawlawag daytoy nga artikulo no kasanotayo a madanon ti puso ti iyad-adalantayo ken no kasanotayo a matulongan a rumang-ay iti naespirituan. Apay a masapul a pagsasaritaantayo daytoy? Gapu ta baka masapul nga agdesisiontayto no itultuloytayo nga iyadalan ida wenno saan.

8. Apay a narigat a danonen ti puso ti dadduma a mayad-adalan iti Biblia?

⁸ Kayat ni Jehova nga agserbi kenkuana dagiti tattao gapu ta ay-ayatenda. Ikagumaantayo ngarud a tulongan dagiti iyad-adalantayo a mangtarus nga ipatpateg unay ida ni Jehova kas indibidual. Kayattayo a tulongan ida a mangibilang ken Jehova kas “ama dagiti awanan ama ken mangsalsalaknib kadagiti balo a babbai.” (Sal. 68:5) No maapresiar dagiti iyad-adalam ti ayat ti Dios kadakuada, mabalin a matukay ti pusoda ket umuneg ti panagayatda kenkuana. Baka marigatan ti dadduma a mayad-adalan iti Biblia a mangibilang ken Jehova kas naayat nga Ama gapu  ta saanda a narikna ti ayat ken pammateg ti bukodda nga ama. (2 Tim. 3:1, 3) Bayat ngarud ti panagadalyo, ipaganetgetmo dagiti nagsasayaat a kualidad ni Jehova. Tulongam dagiti iyad-adalam a mangtarus a kayat ti naayat a Diostayo a magun-odda ti biag nga agnanayon, ken nakasagana a tumulong tapno magun-odda dayta. Ania pay ti mabalintayo nga aramiden?

9-10. Ania dagiti publikasion a masapul nga usarentayo a mangyadal iti Biblia, ken apay?

⁹ Usaren dagiti libro nga “Ania ti Isuro ti Biblia Kadatayo?” ken “No Kasano ti Agtalinaed iti Ayat ti Dios.” Nadisenio dagitoy a publikasion tapno madanontayo ti puso dagiti iyad-adalantayo. Kas pagarigan, sungbatan ti kapitulo 1 ti libro nga Isuro ti Biblia dagitoy a saludsod: Ipatpategnatayo kadi ti Dios wenno naulpit?, Ania ti marikna ti Dios no agsagsagaba dagiti tattao?, ken Mabalinmo kadi ti makigayyem ken Jehova? Ti ngay libro nga Agtalinaed iti Ayat ti Dios? Makatulong daytoy a publikasion tapno matarusan ti mayad-adalan a sumayaat ti biagna ken agbalin a nasingsinged  ken Jehova no iyaplikarna dagiti prinsipio ti Biblia. Uray no nayadalmo idin dagitoy a publikasion iti dadduma, agsaganaka latta a naimbag iti tunggal panagadal, ken ikabilangam dagiti espesipiko a kasapulan ti iyad-adalam.

¹⁰ Ngem ipapantayon nga interesado ti iyad-adalam iti topiko a nailawlawag iti publikasion nga awan iti Toolbox iti Panangisuro. Mabalinmo a paregtaen a basaennanto laengen dayta a publikasion tapno maituloyyo nga adalen ti maysa kadagiti nairekomenda a publikasion a nadakamat itay.

11. Kaano a masapul a mairugi ken maiserra ti panagadal iti kararag, ken kasanotayo nga ilawlawag a napateg dayta?

¹¹ Irugi ti panagadal iti kararag. Kaaduanna nga uray sumagmamano pay laeng a lawas a regular ti panagadal, nasayaat a mairugin ken maiserra dayta iti kararag. Masapul a tulongantayo ti iyad-adalantayo a mangbigbig a maawatantayo laeng ti Sao ti Dios iti tulong ti espiritu ti Dios. Us-usaren ti dadduma a mangyad-adal iti Biblia ti Santiago 1:5 tapno ilawlawagda ti kinapateg ti panagkararag. Kunana: “No agkurang iti sirib ti asinoman kadakayo, agtultuloy koma nga agdawat iti Dios.” Kalpasanna, mabalin nga isaludsod ti mangyad-adal, “Kasanotayo a dumawat iti sirib iti Dios?” Posible nga umanamong ti mayad-adalan a masapul nga agkararagtayo iti Dios.

12. Kasanom nga usaren ti Salmo 139:2-4 tapno matulongam ti iyad-adalam a mangpasayaat iti kualidad dagiti kararagna?

¹² Isurom ti iyad-adalam no kasano ti agkararag. Ipasiguradom a kayat ni Jehova a denggen dagiti naimpusuan a kararagna. Ilawlawagmo nga iti pribado a kararagtayo, mabalintayo nga ibaga ken Jehova ti linaon ti pusotayo ken ti bambanag a mabalin a ditay kayat nga ibaga iti asinoman. Laglagipentayo nga ammo ni Jehova ti pampanunot ken rikriknatayo. (Basaen ti Salmo 139:2-4.) Mabalintayo met a paregtaen ti iyad-adalantayo nga agpatulong iti Dios tapno mabalbaliwanna ti dakes a pampanunot ken malabananna ti dakes nga ugali. Ipapantayon a magusgustuan ti maysa a medio nabayagen nga agad-adal ti maysa a pinapagano a selebrasion. Ammona a dakes dayta, ngem adda banag a magusgustuanna iti dayta. Paregtaem nga ibagana ken Jehova ti talaga a marikriknana ken ipakaasina a tulonganna a mangayat laeng kadagiti banag a kayat ti Dios.—Sal. 97:10.

13. (a) Apay a masapul nga awisentayo a dagus dagiti iyad-adalantayo a makigimong? (b) Ania ti aramidem tapno matulongam ti iyad-adalam nga agbalin a mas komportable ti riknana inton makigimong?

¹³ Awisem a dagus ti iyad-adalam a makigimong. Mabalin a matukay ti pusona iti mangngegan ken maobserbaranna kadagiti gimong ken makatulong dagita iti panagrang-ayna. Ipabuyam ti video nga Ania ti Maar-aramid iti Kingdom Hall? ken sibabara nga awisem a kumuyog kenka. No posible, ibagam a dagasem. Nasayaat no agduduma a kakabsat ti itugotmo iti panagadalyo. Iti kasta, maam-ammo ti iyad-adalam ti dadduma a kakabsat iti kongregasion, ket mas komportablento ti riknana inton makigimong.

14. Ania ti mabalin a mangtignay iti mayad-adalan iti Biblia a rumang-ay iti naespirituan?

¹⁴ Kalattayo a tulongan ti iyad-adalantayo a rumang-ay iti naespirituan. (Efe. 4:13) Mabalin a ti kangrunaan a paginteresan ti maysa a mayat nga agpayadal iti Biblia ket ti personal a magunggonana. Ngem bayat nga umun-uneg ti panagayatna ken Jehova, mabalin a panunotenna no kasano a matulonganna ti sabsabali, a pakairamanan dagiti kakabsat iti kongregasion. (Mat. 22:37-39) Iti umiso a  tiempo, dika koma bumdeng a mangibaga nga adda pribilehiotayo a mangipaay iti pinansial a suporta iti trabaho ti Pagarian.

15. Kasanotayo a matulongan ti maysa a mayad-adalan iti Biblia a mangsolbar kadagiti tumaud a problema?

¹⁵ Isurom ti aramiden ti iyad-adalam no adda problemana. Ipapantayon nga imbaga kenka ti iyad-adalam iti Biblia, a maysan a di bautisado nga agibumbunannag, a nasaktan ti riknana gapu iti maysa a kabsat iti kongregasion. Imbes nga adda dasigam, apay a dimo ilawlawag dagiti ibaga ti Biblia a mabalinna nga aramiden? Mabalinna a pakawanen ti kabsat wenno, no saanna a mapalabas dayta, mabalinna ti siaalumamay ken siaayat nga umasideg tapno ‘matulonganna ti kabsat.’ (Idilig ti Mateo 18:15.) Tulongam ti iyad-adalam nga agsagana no ania ti ibagana. Ipakitam no kasanona nga usaren ti JW Library^® app, ti Giya iti Panagsukimat Para Kadagiti Saksi ni Jehova, ken ti jw.org^® tapno maammuanna dagiti praktikal a pamay-an a mangsolbar iti dayta a problema. No masanay a naimbag sakbay nga agbautisar, nalalaingto a makibagay kadagiti kakabsat iti kongregasion.

16. Ania dagiti makitam a pagsayaatanna no agawiska iti sabali a kabsat no mangyadalka?

¹⁶ Awisem a makikadua iti panagadal ti dadduma a kakongregasionmo wenno ti manangaywan iti sirkito bayat ti ibibisitana. Apay? Malaksid kadagiti rason a nadakamaten, mabalin nga adda maitulong ti dadduma a kakabsat a saanmo a maipaay iti iyad-adalam. Ipapantayo a namin-adu a pinadas ti iyad-adalam nga isardeng ti agsigarilio ngem dina latta maisardeng. Awisem a makikadua iti panagadal ti maysa a kabsat a nakaisardeng iti dayta a bisio, nalabit kalpasan ti namin-adu a panangpadasna. Mabalin nga adda praktikal a balakad ti kabsat a kasapulan a mangngeg ti iyad-adalam. No saanka a komportable a mangikondukta iti panagadal iti sango ti eksperiensiado a kabsat, kiddawem nga isu ti mangikondukta iti dayta a gundaway. Aniaman ti kasasaad, dakkel ti maitulong ti kapadasan ti dadduma. Laglagipem a ti kalattayo ket tulongan ti iyad-adalantayo a rumang-ay iti naespirituan.

17-18. Ania ti ikabilangam no agdesisionka a mangisardeng iti panagadal?

¹⁷ No saan a rumangrang-ay ti iyad-adalam iti Biblia, baka masapulto nga isaludsodmo iti bagim, ‘Masapul kadi nga isardengkon nga iyadalan?’ Sakbay nga agdesisionka, masapul nga ikabilangam ti abilidad ti iyad-adalam. Adda dagiti nabaybayag ti panagrang-ayna. Isaludsodmo iti bagim: ‘Rasonable kadi ti panagrang-ay ti iyad-adalak sigun iti situasionna?’ ‘Tungtungpalenna kadi, wenno iyap-aplikarna dagiti banag a nasursurona?’ (Mat. 28:20) Mabalin a nabayag ti panagrang-ay ti maysa a mayad-adalan, ngem masapul nga adda koma makita nga in-inut a panagbalbaliwna.

 ¹⁸ Ngem kasanon no ti nabayagen nga iyad-adalantayo ket awan ti pakakitaan nga ipatpategna ti panagadalna? Panunotem daytoy a pagarigan: Nalpasen ti iyad-adalam ti libro nga Isuro ti Biblia ken nalabit nairugina payen ti libro nga Agtalinaed iti Ayat ti Dios, ngem saan pay a pulos immatender iti gimong, uray iti Memorial! Ken kanayon a kanselarenna ti panagadalyo uray saan a napateg ti rasonna. No kasta ti iyad-adalam, nasayaat no prangka a kasaritam. *

19. Ania ti mabalin nga ibagam iti iyad-adalam a kasla saan a mangipatpateg iti panagadalna, ken ania ti masapul nga ikabilangam?

¹⁹ Mabalinmo nga irugi ti panagsaritayo iti daytoy a saludsod: ‘Panagkunam, ania ngata ti kadakkelan a lapped iti panagbalinmo a Saksi ni Jehova?’ Baka isungbat ti iyad-adalam, ‘Okey lang kaniak ti agadal iti Biblia, ngem diak kayat ti agbalin a Saksi ni Jehova!’ No kasta ti ibagana uray nabayagen nga agad-adal, adda kadi pay rason nga itultuloymo nga iyadalan? Iti sabali a bangir, baka maibagana kenka iti umuna a gundaway ti agpayso a manglaplapped kenkuana. Kas pagarigan, baka panagriknana ket dina kabaelan ti mangasaba iti binalaybalay. No ammom ti rikriknana, nalaklakamto a matulongan.

20. Kasano a makatulong kadatayo ti Aramid 13:48 nga agdesision no isardengtayon wenno saan ti panagadal?

²⁰ Makapaladingit ta dadduma nga iyad-adalantayo ket kas kadagiti Israelita idi tiempo ni Ezekiel. Maipapan kadakuada, imbaga ni Jehova ken Ezekiel: “Ibilbilangdaka a kas romantiko a kanta ti ayat, a maikankanta iti napintas a timek ken nasayaat ti pannakatokarna iti dekuerdas nga instrumento. Mangngegdanto ti ibagam, ngem awanto ti mangaramid kadagita.” (Ezek. 33:32) Mabalin a marigatantayo a mangibaga iti iyad-adalantayo nga isardengtayon nga iyadalan. Ngem “ababan ti nabati a tiempo.” (1 Cor. 7:29) Imbes a sayangentayo ti tiempotayo iti saan a rumangrang-ay nga iyad-adalantayo, agbiroktayo ketdi iti mangipakita nga “addaan iti umiso a kababalin nga umawat iti agnanayon a biag.”—Basaen ti Aramid 13:48.

21. Ania ti tekstotayo iti tawen 2020, ken ania ti maitulongna kadatayo?

²¹ Tulongannatayo ti teksto iti tawen 2020 a mangpasayaat iti kualidad ti panagaramidtayo iti ad-adalan. Itampokna ti dadduma nga imbaga ni Jesus iti nakallalagip a panagkikita iti maysa a bantay idiay Galilea: “Inkayo ngarud kadagiti tattao . . . ket pagbalinenyo ida nga adalak, ken bautisaranyo ida.”​—Mat. 28:19.