1-3. Ania dagiti rason nga aglua dagiti agserserbi ken Jehova?

 KAANO ti naudi a panagsangitmo? No dadduma, makaluatayo gapu iti ragsak. Ngem masansan nga agsangittayo gapu iti panagasug ti pusotayo. Kas pagarigan, agsangittayo no matay ti maysa nga ipatpategtayo iti biag. Insurat ti kabsat a ni Lorilei a taga-United States: “Adda dagiti tiempo a kasta unay ti ladingitko no malagipko ti natay a balasangko. Kasla awan ti makaep-ep iti dayta a nagkaro a riknak. Pampanunotek no kua no agtultuloy pay ngata nga agpitik ti nasaktan ken nadudog a pusok.” *

² Adda pay dadduma a rason a makaluatayo. Imbaga ti sister a ni Hiromi a payunir idiay Japan: “No dadduma, maupayak iti kinaawan-interes dagiti tattao iti pangasabaan. Makasangitak no kua nga agpakaasi ken Jehova a tulongannak koma a makasarak iti maysa nga agbirbirok iti kinapudno.”

³ Napadasam kadin dagita? Adun ti nakapadas kadagita. (1 Ped. 5:9) Kayattayo ti ‘agserbi ken Jehova a siraragsak,’ ngem mabalin nga agluluatayo nga agserserbi kenkuana gapu iti ladingit, pannakaupay, wenno pakaburiboran a mangsubok no napudnotayo iti Dios. (Sal. 6:6; 100:2) Ania ti aramidentayo no malapunostayo kadagita a rikna?

4. Ania ti usigentayo iti daytoy nga artikulo?

⁴ Adda dagiti masursurotayo iti ulidan ni Jesus. Adda dagiti gundaway a “nagsangit” met gapu iti nasaem a rikna. (Juan 11:35; Luc. 19:41; 22:44; Heb. 5:7) Subliantayo dagita a pasamak ken kitaentayo dagiti masursurotayo. Ammuentayo met dagiti praktikal a pamay-an no kasanotayo a sanguen dagiti situasion a mamaglua kadatayo.

5. Ania ti masursurotayo ken Jesus iti salaysay ti Juan 11:32-36?

⁵ Idi tiempo ti lam-ek ti 32 C.E., nagsakit ken natay ni Lazaro a nadekket a gayyem ni Jesus. (Juan 11:3, 14) Adda dua a kakabsat a babbai ni Lazaro, da Maria ken Marta, ket inay-ayat unay ni Jesus daytoy a pamilia. Kasla nagtupak ti langit kadagitoy a babbai idi natay ti dungdungnguenda a kabsat. Kalpasan a natay ni Lazaro, napan ni Jesus iti purok ti Betania, a pagnanaedan da Maria ken Marta. Idi naammuan ni Marta nga um-umay ni Jesus, nagdardaras a simmabat kenkuana. Imadyinem ti nakasasaem a nariknana idi imbagana: “Apo, no addaka koma idi ditoy, saan koma a natay ti kabsatko.” (Juan 11:21) Di nagbayag, idi nakita ni Jesus ni Maria ken ti dadduma nga agan-anug-og, “nagsangit” isuna.​—Basaen ti Juan 11:32-36.

6. Apay a nagsangit ni Jesus iti dayta a situasion?

⁶ Apay a nagsangit ni Jesus iti dayta a situasion? Kastoy ti sungbat ti Pannakatarus iti Kasuratan: “Ti ipapatay ti gayyemna a ni Lazaro ken ti imbungana a ladingit iti kakabsat a babbai ni Lazaro ti makagapu a ‘nagsennaay ken nagarubos dagiti lua’ ni Jesus.” * Mabalin a pampanunoten ni Jesus ti ut-ot a narikna ti patpatgenna a gayyem a ni Lazaro idi agsaksakit ken idi mauy-uyosen ti biagna. Sigurado a nakasangit met ni Jesus idi nakitana nga agsensennaay da Maria ken Marta gapu iti ipapatay ti kabsatda. No natayanka iti nadekket a gayyem wenno kapamilia, awan duadua a nariknam metten ti kasta nga emosion. Kitaem ti tallo a leksion a masursurom iti daytoy a pasamak.

7. Ania ti masursurotayo maipapan ken Jehova iti panagsangit ni Jesus gapu iti panangisakitna kadagiti gagayyemna?

⁷ Maawatan ni Jehova ti marikriknam. Ni Jesus “ti eksakto a ladawan” ni Amana. (Heb. 1:3) Idi nagsangit ni Jesus, inyanninawna ti marikrikna ni Amana. (Juan 14:9) No natayanka iti maysa nga ipatpategmo, masiguradom a saan laeng a makitkita ni Jehova ti  panagladingitmo no di ket marikriknana met ti marikriknam. Kayatna a paimbagen ti nasaktan a pusom.​—Sal. 34:18; 147:3.

8. Apay a masiguradotayo a pagungarento ni Jesus dagiti patpatgentayo?

⁸ Kayat ni Jesus a pagungaren dagiti ipatpategmo. Sakbay la unay a nagsangit ni Jesus, impasiguradona ken Marta: “Agbiagto ti kabsatmo.” Namati ni Marta ken Jesus. (Juan 11:23-27) Kas matalek nga agdaydayaw ken Jehova, awan duadua nga ammo ni Marta dagiti panangpagungar nga inaramid da propeta Elias ken Eliseo adu a siglo sakbayna. (1 Ar. 17:17-24; 2 Ar. 4:32-37) Posible a nangngegna met dagiti panangpagungar nga inaramid ni Jesus. (Luc. 7:11-15; 8:41, 42, 49-56) Masiguradom met a makitamto manen dagiti natayen nga ipatpategmo. Dagiti lua ni Jesus bayat ti panangliwliwana kadagiti agledleddaang a gagayyemna ket ebidensia a talaga nga amin-puso a kayatna ti mangpagungar!

9. Kas ken Jesus, kasanom a saranayen dagiti agladladingit? Mangted iti pagarigan.

⁹ Mabalinmo ti mangsaranay kadagiti agladladingit. Saan laeng a nakipagsangit ni Jesus kada Marta ken Maria no di ket dinengngegna met ken liniwliwana ida. Mabalintayo met nga aramiden dayta kadagiti agladladingit. Imbaga ni Dan a maysa a panglakayen idiay Australia: “Idi natay ni baketko, kasapulak unay ti mangsaranay kaniak. Adda dagiti agassawa a nangiwaya iti tiempoda tapno dumngeg kaniak iti aldaw ken rabii. Imbagada nga iruarko laeng ti marikriknak ken diak mabain nga agsangit. Tinulongandak met iti praktikal a pamay-an kas iti panagdalus iti luganko, panag-grocery, ken panagluto idi nariknak a diak kaya nga aramiden dagita. Ken masansan met a nakipagkararagda kaniak. Talaga a pudnoda a gagayyem ken kakabsat a ‘mapangnamnamaan no adda rigat.’”​—Prov. 17:17.

10. Deskribirem ti pasamak a mabasa iti Lucas 19:36-40.

¹⁰ Simmangpet ni Jesus idiay Jerusalem idi Nisan 9, 33 C.E. Bayat a sumsumrek iti siudad, naguummong dagiti tattao ken inyaplagda dagiti badoda iti dalan a pagnaanna kas panangbigbigda nga isu ti Arida. Talaga a naragsak idi dayta nga aldaw. (Basaen ti Lucas 19:36-40.) Isu a mabalin a saan a ninamnama dagiti adalanna ti simmaruno a napasamak. “Idi asidegen [ni Jesus], kinitana ti siudad ket sinangitanna.” Bayat nga aglulua ni Jesus, impadtona ti nagkas-ang a pasamak nga agur-uray kadagiti agnanaed iti Jerusalem.​—Luc. 19:41-44.

11. Apay a sinangitan ni Jesus dagiti agnanaed iti Jerusalem?

¹¹ Nasaktan ti puso ni Jesus gapu ta ammona nga uray no nabara ti panangawat dagiti tattao kenkuana, kaaduan kadagiti kailianna ti nangipakita a saanda a kayat ti dumngeg iti mensahe ti Pagarian. Kas resultana, madadael ti Jerusalem ken maadipen ti asinoman a Judio a makalasat. (Luc. 21:20-24) Nakalkaldaang ta kas iti imbaga ni Jesus, linaksid isuna ti kaaduan a tattao. Ania ti reaksion ti kaaduan a tattao iti lugaryo iti mensahe ti Pagarian? No manmano ti aginteres uray ikagkagumaam nga isuro kadakuada ti kinapudno, ania ti maadalmo iti panagsangit ni Jesus? Usigem ti tallo pay a leksion.

12. Ania ti masursurotayo maipapan ken Jehova iti panagsangit ni Jesus gapu iti panangisakitna iti padana a tao?

¹² Ipatpateg ni Jehova dagiti tattao. Ipalagip kadatayo ti panagsangit ni Jesus nga ipatpateg unay ni Jehova dagiti tattao. “Saanna a kayat a madadael ti asinoman no di ket kayatna nga agbabawi ti amin.” (2 Ped. 3:9) Ipakpakitatayo ita nga ay-ayatentayo dagiti  kaarrubatayo ta agporporsegi ken agsaksakripisiotayo tapno maidanon iti pusoda ti naimbag a damag.​—Mat. 22:39. *

13-14. Kasano nga impakita ni Jesus ti pannakipagriknana kadagiti tattao, ken kasanotayo a matulad dayta a kualidad?

¹³ Nagaget ni Jesus iti ministerio. Impakitana nga ay-ayatenna dagiti tattao ta intultuloyna ida a sinuruan iti tunggal gundaway. (Luc. 19:47, 48) Apay? Nakipagrikna ni Jesus kadakuada. Adda pay ketdi dagiti gundaway a nagadu ti mayat a dumngeg ken Jesus nga uray la “saanna payen a masango ken dagiti adalanna ti mangan.” (Mar. 3:20) Ken idi adda mayat a makisarita kenkuana iti rabii​—inwayaanna dayta. (Juan 3:1, 2) Kaaduan kadagiti dimngeg ken Jesus ti saan a nagbalin nga adalanna. Ngem amin a dimngeg kenkuana ket naipaayan iti naan-anay a panangsaksi. Kayattayo met ita nga ikkan ti amin iti tsansa a dumngeg iti naimbag a damag. (Ara. 10:42) Tapno maaramidtayo dayta, baka kasapulantayo nga i-adjust ti pamay-antayo a mangasaba.

¹⁴ Situtulokka koma nga ag-adjust no kasapulan. No ditay baliwbaliwan ti oras ti panangasabatayo, mabalin a ditay makasarita dagidiay interesado iti naimbag a damag. Imbaga ti payunir a ni Matilda: “Ikagkagumaanmi ken lakayko a kasabaan dagiti tattao iti nagduduma nga oras. Iti bigbigat, mangasabakami iti lugar ti negosio. Iti met pangngaldaw nga adu ti adda iti ruar, agus-usarkami kadagiti literature cart. No met mumalmalemen, nakitami nga epektibo ti panagbalaybalay.” Imbes a mangasabatayo iti oras a kombiniente kadatayo, situtuloktayo koma a mangi-adjust iti eskediultayo tapno ad-adu ti makasabaantayo. No aramidentayo dayta, sigurado a maparagsaktayo ni Jehova.

15. Ania ti napasamak iti maudi a rabii sakbay ti ipapatay ni Jesus, kas mabasa iti Lucas 22:39-44?

¹⁵ Idi adalemen ti rabii ti Nisan 14, 33 C.E., napan ni Jesus iti hardin ti Getsemani. Sadiay nga imbukbokna ken Jehova ti linaon ti pusona. (Basaen ti Lucas 22:39-44.) Iti dayta a narigat a tiempo, ni Jesus ket “namin-adu a  nagpakaasi . . . a napakuyogan iti napigsa a sangsangit ken lulua.” (Heb. 5:7) Ania ti inkararag ni Jesus iti maudi a rabii sakbay ti ipapatayna? Dimmawat iti bileg tapno agtalinaed a napudno ken Jehova ken maaramidna ti pagayatan ni Amana. Nangngeg ni Jehova ti panagasug ti Anakna, isu a nangibaon iti anghel a mangpabileg kenkuana.

16. Apay a maburiboran ni Jesus idi agkarkararag idiay hardin ti Getsemani?

¹⁶ Sigurado a nagsangit ni Jesus bayat nga agkarkararag iti hardin ti Getsemani gapu ta maburiboran iti pannakaibilangna kas managtabbaaw wenno agsasao maibusor iti Dios. Ammona met ti nadagsen a responsabilidad a naipabaklay kenkuana​—ti pannakaalangon ti nagan ni Amana. No maipaspasangoka iti mangburibor a situasion a mangsubok no napudnoka ken Jehova, ania ti masursurom iti panagsangit ni Jesus? Kitaem ti tallo pay a masursurom.

17. Ania ti masursurotayo maipapan ken Jehova iti sungbatna kadagiti napasnek a kararag ni Jesus?

¹⁷ Dengdenggen ni Jehova dagiti panagpakaasim. Impangag ni Jehova dagiti napasnek a kiddaw ni Jesus. Apay? Gapu ta ti kangrunaan a pakaseknan ni Jesus ket ti panagtalinaedna a napudno ken ti pannakaalangon ti nagan ni Amana. No ti panagtalinaed a napudno ken Jehova ken ti pannakaalangon ti naganna ti kangrunaan met a pakaseknantayo, sigurado a sungbatanna dagiti kararag ken panagpatulongtayo.​—Sal. 145:18, 19.

18. Kasano a ni Jesus ket kas iti mannakisimpatia a gayyem?

¹⁸ Makisimpatia ni Jesus iti marikriknam. Uray no madagdagsenantayo, anian a ragsaktayo no liwliwaennatayo ti maysa a mannakisimpatia a gayyem, nangruna no napadasanna metten dagiti suot a nakaipasanguantayo. Kasta a gayyem ni Jesus. Ammona ti rikna ti nakapuy ken agkasapulan iti tulong. Maawatanna ti pakabuklantayo, ken siguraduenna a maawattayo ti tulong a kasapulantayo “iti umiso a tiempo.” (Heb. 4:15, 16) Inawat ni Jesus ti tulong ti maysa nga anghel iti hardin ti Getsemani. Masapul met ngarud a situtulok nga awatentayo ti tulong ni Jehova babaen man ti maysa a publikasion, video, palawag, wenno makaparegta nga ibibisita ti maysa a  panglakayen wenno gayyem a nataengan iti naespirituan.

19. Kasano a maaddaanka iti bileg no masubok ti panagbalinmo a napudno iti Dios? Mangted iti pagarigan.

¹⁹ Ipaay ni Jehova kenka “ti talna ti Dios.” Kasanonatayo a pabilgen ni Jehova? No agkararagtayo, maawattayo “ti talna ti Dios a mangartap iti amin a pannakaawat.” (Fil. 4:6, 7) Ti talna ni Jehova ti mangpakalma iti puso ken isiptayo. Napadasan a mismo dayta ti kabsat nga agnagan iti Luz. Kinunana: “Lablabanak ti kanayon a pannakariknak iti liday. No dadduma, mapanunotko payen a saannak nga ay-ayaten ni Jehova. Ngem no mapasamak dayta, dagus nga ibagak ken Jehova ti marikriknak. Gapu iti kararag, makontrolko manen ti riknak.” Kas makita iti kapadasanna, maaddaantayo iti talna iti tulong ti kararag.

20. Ania dagiti masursurotayo iti panagsangit ni Jesus?

²⁰ Talaga a makaliwliwa ken makatulong dagiti masursurotayo iti panagsangit ni Jesus! Naipalagip kadatayo a saranayentayo dagiti agladladingit a gagayyemtayo ken agtalektayo a tulongannatayo ni Jehova ken ni Jesus no matay ti maysa nga ipatpategtayo. Matignaytayo a mangasaba ken mangisuro nga addaan pannakipagrikna ta ipakpakita da Jehova a Dios ken ni Jesu-Kristo daytoy nagsayaat a kualidad. Ken maliwliwatayo met ta ammotayo a maawatan ni Jehova ken ti dungdungnguenna nga Anak ti marikriknatayo, makisimpatiada kadagiti pagkapuyantayo, ken kayatdatayo a tulongan nga agibtur. Itultuloytayo koma nga iyaplikar dagiti nasursurotayo agingga a tungpalen ni Jehova ti makatukay-puso a karina a “punasennanto ti amin a lua kadagiti mata[tayo]”!​—Apoc. 21:4.