1-2. (a) Kaano a nangnangruna a malagiptayo ti maysa a natay nga ipatpategtayo? (b) Ania ti inrugi ni Jesus iti rabii sakbay ti ipapatayna?

 KASANO man kabayagen a natay dagiti ipatpategtayo iti biag, malaglagiptayo latta ida. Lallalo pay a malaglagiptayo ida iti anibersario ti ipapatayda.

² Kada tawen, karamantayo kadagiti minilion iti intero a lubong nga agtataripnong para iti anibersario ti ipapatay ti maysa nga ipatpategtayo unay​—ni Jesu-Kristo. (1 Ped. 1:8) Agkakaduatayo a manglaglagip iti daydiay nangted iti biagna kas subbot tapno maisalakantayo iti basol ken ipapatay. (Mat. 20:28) Kinapudnona, kayat ni Jesus a laglagipen dagiti pasurotna ti ipapatayna. Iti rabii sakbay ti ipapatayna, inrugina ti maysa nga espesial a pangrabii ken imbilinna: “Itultuloyyo nga aramiden daytoy kas panglaglagip kaniak.” *​—Luc. 22:19.

3. Ania ti adalentayo iti daytoy nga artikulo?

³ Bassit laeng kadagiti umatender iti Memorial ti ipapatay ni Kristo ti addaan iti nailangitan a namnama. Ngem umatender met ti minilion nga addaan iti naindagaan a namnama. Iti daytoy nga artikulo, usigentayo dagiti rason no apay a magagaran dagita a dua a grupo a maki-Memorial iti kada tawen. Kitaentayo met no kasano a pagimbagantayo dayta. Pagsasaritaantayo nga umuna ti dadduma a rason nga umatender dagiti dinutokan ti espiritu.

4. No Memorial, apay a mangan iti tinapay ken uminum iti arak dagiti dinutokan ti espiritu?

⁴ Kada tawen, segseggaan dagiti dinutokan ti espiritu ti umatender iti Memorial tapno makiraman kadagiti emblema. Apay a maitutop a manganda iti tinapay ken uminum iti arak? Tapno masungbatan dayta, usigentayo ti napasamak iti maudi a rabii iti biag ni Jesus ditoy daga. Kalpasan ti pannangan para iti Paskua, inrugi ni Jesus ti maaw-awagan itan kas ti Pangrabii ti Apo. Impasana ti tinapay ken ti arak iti 11 a matalek nga apostolna ken imbagana a mangan ken uminumda. Dinakamat ni Jesus kadakuada ti dua a tulag​—ti baro a tulag ken ti tulag ti Pagarian. * (Luc. 22:19, 20, 28-30) Gapu kadagitoy a tulag, posiblen nga agbalin nga ar-ari ken papadi idiay langit dagiti apostol ken ti limitado a bilang ti dadduma pay a Kristiano. (Apoc. 5:10; 14:1) Dagiti laeng natda a dinutokan ti espiritu, * a karaman kadagitoy a dua a tulag, ti mabalin a mangan iti tinapay ken uminum iti arak iti Memorial.

5. Ania ti ammo dagiti dinutokan ti espiritu maipapan iti namnama a naited kadakuada?

⁵ Daytoy ti sabali pay a rason a magagaran dagiti dinutokan ti espiritu nga umatender iti Memorial: Gapu iti daytoy a pananglaglagip, adda gundawayda a mangmennamenna iti namnamada. Inikkan ida ni Jehova iti nagpaiduma a namnama​—ti immortal ken di agrupsa a biag idiay langit, ti panagserbi a kadua ti naipadayagen a ni Jesu-Kristo ken ti dadduma pay a paset ti 144,000, ken kangrunaan iti amin, ti kaaddada iti mismo a sanguanan ni Jehova a Dios! (1 Cor. 15:51-53; 1 Juan 3:2) Ammo dagiti dinutokan ti espiritu a naawisda a mangtagiragsak kadagita a pribilehio idiay langit. Ngem tapno makapanda idiay langit, masapul nga agmatalekda agingga iti ipapatayda. (2 Tim. 4:7, 8) Maragsakan la ketdi unay dagiti dinutokan ti espiritu a mangutob iti nailangitan a namnamada. (Tito 2:13) Ti ngay ‘sabsabali a karnero’? (Juan 10:16) Ania ti dadduma a rason nga umatenderda iti Memorial?

6. Apay a tinawen a maki-Memorial ti sabsabali a karnero?

⁶ Umatender iti Memorial ti sabsabali a karnero, saan a tapno makiraman kadagiti emblema, no di ket tapno mangimatang iti okasion. Idi 1938, naawis iti damo a gundaway nga umatender iti Memorial dagiti naindagaan ti namnamada. Kinuna ti The Watchtower a March 1, 1938: “Umiso ken maitutop laeng nga umatender ti [sabsabali a karnero] iti kasta a taripnong tapno mangimatang iti okasion. . . . Naragsak dayta nga okasion isu a rumbeng laeng nga agragsakda met.” Kas kadagiti naawis a bisita a naragsak a mangimatang iti seremonia ti kasar, naragsak met ti sabsabali a karnero nga umatender tapno imatanganda ti Memorial.

7. Apay a padpadaanan ti sabsabali a karnero ti palawag ti Memorial?

⁷ Uray met ti sabsabali a karnero mennamennaenda ti namnamada. Padpadaananda ti palawag ti Memorial ta nangnangruna a nakapokus dayta kadagiti bendision nga awatento dagiti matalek a tattao bayat ti Sangaribu a Tawen a Panagturay ni Kristo ken ti  144,000 a kakaduana nga agari. Iti panangidaulo ti Arida a ni Jesu-Kristo, dagidiay a nailangitan nga agturay ti tumulongto iti panagbalin a paraiso ti daga ken panagbalin a perpekto dagiti natulnog a tattao. Para iti minilion a mangimatang iti Memorial, nagmayat la ketdin nga imadyinen ti pannakatungpalton dagiti padto ti Biblia, kas kadagiti mabasa iti Isaias 35:5, 6; 65:21-23; ken Apocalipsis 21:3, 4. Bayat nga iladladawanda iti isipda nga addadan idiay baro a lubong ken kaduada dagiti ipatpategda, bumilbileg met ti namnamada para iti masanguanan ken ti determinasionda nga agtultuloy nga agserbi ken Jehova.​—Mat. 24:13; Gal. 6:9.

8. Ania pay ti sabali a rason nga umatender ti sabsabali a karnero iti Memorial?

⁸ Adda pay sabali a rason nga umatender ti sabsabali a karnero iti Memorial. Kayatda nga ipakita ti ayat ken panangsuportada kadagiti dinutokan ti espiritu. Impakpakauna ti Sao ti Dios a maaddaan iti nadekket a relasion dagiti dinutokan ti espiritu ken dagiti naindagaan ti namnamada. Kasano? Kitaentayo ti dadduma a pagarigan.

9. Ania ti ipakita ti padto iti Zacarias 8:23 maipapan iti rikna ti sabsabali a karnero kadagiti dinutokan ti espiritu?

⁹ Basaen ti Zacarias 8:23. Nagpintas ti panangiladawan daytoy a padto maipapan iti rikna ti sabsabali a karnero kadagiti kakabsatda a lallaki ken babbai a dinutokan ti espiritu. Dagiti sasao a “maysa a Judio” ken “kadakayo” ket tumukoy iti isu met laeng a grupo​—dagiti natda a dinutokan ti espiritu. (Roma 2:28, 29) “Ti 10 a tattao manipud iti amin a lengguahe kadagiti nasion” irepresentarda ti sabsabali a karnero. “Kumpetdanto a naimbag” kadagiti dinutokan ti espiritu​—kayatna a sawen, simamatalek ken sisisinged a makikaduada kadakuada iti nadalus a panagdaydayaw. Natural laeng ngarud a maki-Memorial ti sabsabali a karnero tapno ipakitada ti kinasingedda kadagiti dinutokan ti espiritu.

10. Ania ti naaramidanen ni Jehova tapno matungpal ti padto iti Ezekiel 37:15-19, 24, 25?

¹⁰ Basaen ti Ezekiel 37:15-19, 24, 25. Kas kaitungpalan daytoy a padto, rineppet ni Jehova dagiti dinutokan ti espiritu ken ti sabsabali a karnero babaen ti di mapugsat a singgalut ti panagkaykaysa. Dinakamat ti padto ti dua a baston. Dagiti nailangitan ti namnamada ket kas iti baston “para ken Juda” (ti tribu a paggapuan dagiti napili nga ar-ari ti Israel), ken dagidiay naindagaan ti namnamada ket kas iti baston “ni Efraim.” * Pagkaykaysaen ni Jehova dagitoy dua a grupo tapno agbalinda a “maymaysa a baston.” Kayatna a sawen, sangsangkamaysa nga agserbida iti panangidaulo ti maymaysa nga Arida, ni Kristo Jesus. Kada tawen, maki-Memorial dagiti dinutokan ti espiritu ken ti sabsabali a karnero, saan a kas dua nga agsina a grupo, no di ket kas “maymaysa nga arban” nga ay-aywanan ti “maymaysa a pastor.”​—Juan 10:16.

11. Ania ti kangrunaan a pamay-an a maipakita “dagiti karnero” iti Mateo 25:31-36, 40 ti panangsuportada kadagiti kakabsat ni Kristo?

¹¹ Basaen ti Mateo 25:31-36, 40. “Dagiti karnero” iti daytoy nga ilustrasion irepresentarda dagiti nalinteg a tattao iti tiempo ti panungpalan nga addaan iti naindagaan a namnama; kayatna a sawen, ti sabsabali a karnero a sibibiag ita. Simamatalek a supsuportaranda dagiti natda a dinutokan ti espiritu a kakabsat ni Kristo. Ar-aramidenda dayta, kangrunaanna, babaen ti panangtulongda kadakuada a mangitungpal iti nagdakkel a responsabilidadda​—ti trabaho a panangasaba  ken panagaramid iti adalan iti intero a lubong.​—Mat. 24:14; 28:19, 20.

12-13. Ania pay ti dadduma a pamay-an a maipakita ti sabsabali a karnero ti suportada kadagiti kakabsat ni Kristo?

¹² Kada tawen, kadagiti lawas sakbay ti Memorial, ipakpakita ti sabsabali a karnero ti suportada kadagiti kakabsat ni Kristo. Naan-anay a makiramramanda iti sangalubongan a kampania a panagawis kadagiti interesado nga umatender iti Memorial. (Kitaen ti kahon nga “ Agsagsaganaka Kadi a Nasaksakbay Para iti Tiempo ti Memorial?”) Sigsiguraduenda met a maangay ti Memorial iti amin a kongregasion iti intero a lubong uray no awan ti makiraman kadagiti emblema iti kaaduan kadagita a kongregasion. Magagaran ti sabsabali a karnero a mangsuporta kadagiti kakabsat ni Kristo kadagiti kasta a pamay-an. Ammo dagitoy a karnero a ti ar-aramidenda para kadagiti dinutokan ti espiritu ket ibilang ni Jesus nga ar-aramidenda a mismo para kenkuana.​—Mat. 25:37-40.

¹³ Ania pay dagiti kanayonan a rason nga umatendertayo amin iti Memorial, aniaman ti namnamatayo?

14. Kasano nga impakita da Jehova ken Jesus ti nagdakkel nga ayatda kadatayo?

¹⁴ Agyamyamantayo iti ayat nga impakita da Jehova ken Jesus kadatayo. Adu ti pamay-an nga inyebkas ni Jehova ti ayatna kadatayo. Ngem adda maysa a naidumduma iti amin. Ti kasayaatan nga ebkas ti di agimbubukodan nga ayat ti Diostayo ket idi imbaonna ti nagpateg nga Anakna nga agsagaba ken matay para kadatayo. (Juan 3:16) Ammotayo nga impakita met ni Jesus ti nagdakkel nga ayatna idi situtulok nga intedna ti biagna para kadatayo. (Juan 15:13) Ditay pulos masubadan da Jehova ken Jesus gapu iti ayat nga impakitada kadatayo. Ngem maipakitatayo ti panagyaman babaen ti pamay-an ti panagbiagtayo iti kada aldaw. (Col. 3:15) Umatendertayo ngarud iti Memorial tapno lagipentayo ti ayatda kadatayo ken ipakita nga ay-ayatentayo ida.

15. Apay a ti sagut a subbot ket ipatpateg unay dagiti dinutokan ti espiritu ken ti sabsabali a karnero?

¹⁵ Ipatpategtayo unay ti sagut a subbot. (Mat. 20:28) Ti subbot ket ap-apresiaren unay dagiti dinutokan ti espiritu ta dayta ti namagbalin a posible iti nagsayaat a namnamada. Adda pammatida iti daton ni Kristo, isu nga indeklara ida ni Jehova a nalinteg ken inamponna ida kas annakna. (Roma 5:1; 8:15-17, 23) Yamanen met ti sabsabali a karnero ti subbot. Gapu iti pammatida iti naibukbok a dara ni Kristo, nadalus ti takderda iti sanguanan ti Dios, makaipaayda kenkuana iti sagrado a panagserbi, ken adda namnamada a makalasat “iti dakkel a rigat.” (Apoc. 7:13-15) Ti maysa a pamay-an nga agpada a maipakita dagiti dinutokan ti espiritu ken ti sabsabali a karnero ti panagyamanda iti subbot ket ti kaaddada iti Memorial iti kada tawen.

16. Ania pay ti maysa a rason nga umatendertayo iti Memorial?

¹⁶ Ti maysa pay a rason nga umatendertayo iti Memorial ket kayattayo ti agtulnog ken Jesus. Aniaman ti namnamatayo para iti masanguanan, kayat ti tunggal maysa kadatayo a suroten ti imbilin ni Jesus iti rabii nga inrugina ti Memorial: “Itultuloyyo nga aramiden daytoy kas panglaglagip kaniak.”​—1 Cor. 11:23, 24.

17. Kasano a makatulong ti Memorial tapno ad-adda nga umasidegtayo ken Jehova?

¹⁷ Ad-adda nga umasidegtayo ken Jehova. (Sant. 4:8) Kas naadaltayon, ikkannatayo ti Memorial iti gundaway a mangpanunot iti  namnama nga inted ni Jehova kadatayo ken mangutob iti nagdakkel nga ayat nga impakitana kadatayo. (Jer. 29:11; 1 Juan 4:8-10) No mennamennaentayo ti sigurado a namnamatayo iti masanguanan ken ti di agpatingga nga ayat ti Dios kadatayo, lallalo nga umuneg ti ayattayo ken Jehova ken tumibker ti relasiontayo kenkuana.​—Roma 8:38, 39.

18. No utobentayo ti ulidan ni Jesus, matignaytayo a mangaramid iti ania?

¹⁸ Matignaytayo a mangtulad iti ulidan ni Jesus. (1 Ped. 2:21) Kadagiti aldaw sakbay ti Memorial, agpokustayo kadagiti salaysay ti Biblia maipapan iti maudi a lawas ni Jesus ditoy daga, ti ipapatayna, ken ti panagungarna. Ket iti rabii ti Memorial, ti palawag ti mangipalagip iti ayat ni Jesus kadatayo. (Efe. 5:2; 1 Juan 3:16) Bayat a basbasaen ken ut-utobentayo ti panagsakripisio ni Jesus, magutugottayo la ketdi nga “agtultuloy a magna a kas iti pannagna[na].”​—1 Juan 2:6.

19. Kasanotayo nga agtalinaed iti ayat ti Dios?

¹⁹ Agbalintayo a mas determinado nga agtalinaed iti ayat ti Dios. (Jud. 20, 21) Tapno agtalinaedtayo iti ayat ti Dios, aramidentayo ti amin a kabaelantayo nga agtulnog kenkuana, mangsantipikar iti naganna, ken mangparagsak iti pusona. (Prov. 27:11; Mat. 6:9; 1 Juan 5:3) No selebrarantayo ti Memorial, agbalintayo a mas determinado nga agbiag iti kada aldaw iti pamay-an a kas man la ibagbagatayo ken Jehova, ‘Kayatko ti agtalinaed iti ayatmo iti agnanayon!’

20. Ania dagiti nagsayaat a rason nga umatendertayo iti Memorial?

²⁰ Idiay man langit wenno ditoy daga ti namnamatayo nga agbiag iti agnanayon, adda dagiti nagsayaat a rason nga umatendertayo iti Memorial. Kada tawen, no agtataripnongtayo iti dayta a petsa, malaglagiptayo ti ipapatay ti maysa nga ay-ayatentayo, ni Jesu-Kristo. Kangrunaan iti amin, malaglagiptayo ti kasayaatan nga ebkas ti ayat​—ti ayat nga impakita ni Jehova kadatayo idi intedna ti Anakna kas subbot. Ita a tawen, maangay ti Memorial iti rabii ti Biernes, Abril 15, 2022. Ay-ayatentayo ni Jehova ken ti Anakna, isu nga iti anibersario ti ipapatay ni Jesus, awanen ti napatpateg pay nga aramidentayo no di ti umatender iti Memorial.