1. Ania a narigat a situasion ti nakaipasanguan ni David?

 AGLIBLIBAS ni David tapno masalbarna ti biagna. Determinado ngamin ti mannakabalin nga ari ti Israel a ni Saul a mangpapatay kenkuana. Idi kasapulan ni David ti makan, napan iti siudad ti Nob tapno dumawat iti lima laeng a tinapay. (1 Sam. 21:1, 3) Kalpasanna, naglemmeng isuna ken dagiti tattaona iti maysa a kueba. (1 Sam. 22:1) Apay a naipasango ni David iti kasta a situasion?

2. Kasano a pinagpeligro ni Saul ti biagna? (1 Samuel 23:16, 17)

² Permi ti imon ni Saul ken David ta adu ti mangay-ayat kenkuana ken namin-adu a nangabak iti gubat. Ammo met ni Saul a gapu iti mismo a kinasukirna, isu ket inlaksid ni Jehova kas ari ti Israel ken pinili ni Jehova ni David a mangsukat kenkuana iti trono. (Basaen ti 1 Samuel 23:16, 17.) Ngem ari latta idi ni Saul iti Israel ken adu ti soldadona ken sumupsuporta kenkuana. Kasapulan ngarud nga aglibas ni David tapno masalbarna ti biagna. Impagarup kadi ni Saul a kabaelanna a lapdan ti imbagan ti Dios a panggepna para ken David? (Isa. 55:11) Saan nga ibaga ti Biblia. Ngem maysa a banag ti siguradotayo: Pagpelpeligruen ni Saul ti biagna. Kanayon a maabak dagiti bumusor iti Dios!

3. Ania ti narikna ni David iti laksid ti narigat a situasionna?

³ Saan nga ambisioso ni David. Saanna a pinili ti agbalin nga ari ti Israel. Ni Jehova ti nangpili kenkuana iti dayta nga akem. (1 Sam. 16:1, 12, 13) Imbilang ni Saul a mortal a kalabanna ni  David. Ngem saan a pinabasol ni David ni Jehova iti nakaipasanguanna a peggad. Saan met a nagreklamo gapu ta limitado ti suplay ti makanda ken kueba laeng ti paglemlemmenganda. Imbes ketdi, baka dita a kueba a pinutarna ti napintas a kanta ti panagdaydayaw a pakairamanan ti pannakatema a tekstotayo: “Saan nga agkurang iti aniaman a nasayaat dagidiay mangsapsapul ken Jehova.”​—Sal. 34:10.

4. Ania dagiti saludsod nga usigentayo, ken apay a napateg dagita?

⁴ Adu nga agserserbi ken Jehova ita ti agkurang no maminsan iti makan ken iti dadduma pay a kasapulan iti biag. * Talaga a mapaspasamak dayta nangruna iti nabiit pay a pandemia. Ken gapu ta asidegen ti “dakkel a rigat,” ekspektarentayo a narigrigatto pay dagiti mapasarantayo. (Mat. 24:21) Bayat a pampanunotentayo dagita a kinapudno, sungbatantayo ti uppat a saludsod: Kasano a ni David ket ‘saan a nagkurang iti aniaman a nasayaat’? Apay a masapul a sursuruentayo ti kinakontento? Apay a makapagtalektayo nga aywanannatayo ni Jehova? Ken kasanotayo a makapagsagana itan para iti masanguanan?

5-6. Kasano a makatulong ti Salmo 23:1-6 tapno maawatantayo ti kayat a sawen ni David idi imbagana a “saan nga agkurang iti aniaman a nasayaat” dagiti agserserbi iti Dios?

⁵ Ania ti kayat a sawen ni David idi imbagana a “saan nga agkurang iti aniaman a nasayaat” dagiti agserserbi ken Jehova? Makatulong kadatayo no kitaentayo ti kapadana a sasao iti Salmo 23. (Basaen ti Salmo 23:1-6.) Inrugi ni David dayta a salmo kadagitoy a sasao: “Ni Jehova ti Pastorko. Saanakto nga agkurang iti aniaman.” Iti dadduma a paset ti salmo, adda pay dinakamat ni David a talaga a manayon ti pategna​—ti aglaplapusanan a naespirituan a bendision a tagtagiragsakenna ta inawatna ni Jehova kas Pastorna. Iturturong ni Jehova ni David “kadagiti dalan ti kinalinteg,” ken simamatalek a sinuportaranna  kadagiti tiempo ti rigat ken nam-ay. Binigbig ni David a saan a gapu ta adda isuna iti “naraber a karuotan” ni Jehova, awanen ti problemana. No dadduma, mabalin a maupay ni David, a kasla magmagna iti ‘nakasipsipnget a pagnaan,’ ken adda dagiti bumusor kenkuana. Ngem gapu ta ni Jehova ti Pastor ni David, ‘awan ti pagbutnganna.’

⁶ Daytoy ngarud ti sungbat ti saludsodtayo a, Kasano a ni David ket ‘saan a nagkurang iti aniaman a nasayaat’? Iti naespirituan a pamay-an, adda kenkuana ti amin a kasapulanna. Saan a nakadepende ti kinaragsakna iti material a bambanag. Kontento ni David kadagiti ipapaay ni Jehova. Ti kapatgan kenkuana ket ti pamendision ken ti proteksion ti Diosna.

7. Sigun iti Lucas 21:20-24, ania a narigat a situasion ti nakaipasanguan dagiti Kristiano idi umuna a siglo idiay Judea?

⁷ Kadagiti sasao ni David, maawatantayo a saan koma a dagiti material a bambanag ti kapatgan kadatayo. Mabalintayo met ketdi a tagiragsaken ti aniaman a material a banag, ngem saan koma a dagita ti sentro ti biagtayo. Dayta a nagpateg a kinapudno ti naawatan dagiti Kristiano idi umuna a siglo nga agnanaed idiay Judea. (Basaen ti Lucas 21:20-24.) Pinakdaaran ida ni Jesus a dumtengto ti tiempo a ti siudad ti Jerusalem ket “palikmutan dagiti armada.” No mapasamak dayta, masapul nga “agkamangda koman iti kabambantayan.” Maisalakanda no pumanawda ngem masapul a dakkel ti isakripisioda. Kastoy ti imbaga Ti Pagwanawanan adun a tawen ti napalabas: “Pinanawanda dagiti talon ken pagtaenganda, a saanda pay ketdi nga intugot dagiti sanikuada nga adda kadagiti balayda. Gapu ta agtalekda iti pannalaknib ken pannarabay ni Jehova, inyun-unada ti panagdayaw kenkuana ngem ti aniaman a kasla napateg.”

8. Ania nga importante a leksion ti masursurotayo iti napasamak kadagiti Kristiano idi umuna a siglo nga agnanaed idiay Judea?

⁸ Ania nga importante a leksion ti masursurotayo iti napasamak kadagiti Kristiano idi umuna a siglo nga agnanaed idiay Judea? Imbaga ti isu met la a Pagwanawanan: “Mabalin nga addanto dagiti pakasuotan no kasano ti panangmatmattayo kadagiti material a banag; dagitoy aya ti kapatgan, wenno napatpateg ti pannakaisalakan dagiti amin nga adda iti dasig ti Dios? Wen, ti panagtalawtayo mabalin a ramanenna dagiti pakarigatan ken panagkurang kadagiti masapsapul iti biag. Nasken a nakasaganatayto a mangaramid iti aniaman a kasapulan, kas iti inaramid dagiti katupagtayo idi umuna a siglo, a pinanawanda ti Judea.” *

9. Ania a pammaregta ti maipaay kenka ti pammagbaga ni apostol Pablo kadagiti Hebreo?

⁹ Maimadyinyo kadi no kasano karigat para kadagidi a Kristiano a panawan ti dandani amin nga adda kadakuada ken mangabaruan? Masapul nga adda pammatida tapno makapagtalekda nga ipaay ni Jehova dagiti kangrunaan a kasapulanda. Ngem adda makatulong kadakuada. Lima a tawen sakbay a pinalikmutan dagiti Romano ti Jerusalem, kastoy ti nagpateg a pammagbaga ni apostol Pablo kadagiti Hebreo: “Iti panagbiagyo, saanyo nga ayaten ti kuarta, no di ket kontentokayo koman kadagiti agdama a bambanag. Ta imbagana: ‘Saankanto a pulos panawan ken saankanto a pulos baybay-an.’ Iti kasta, naturedtayo a mangibaga: ‘Ni Jehova ti tumultulong kaniak; saanakto nga agbuteng. Ania ti maaramidan kaniak ti tao?’” (Heb. 13:5, 6) Awan duadua a dagidiay nangipapuso iti pammagbaga ni Pablo sakbay ti iraraut dagiti Romano ket saan unay a narigatan a makibagay iti nasimsimple a biag iti baro a pagyananda. Siguradoda nga ipaay ni  Jehova dagiti kangrunaan a kasapulanda. Dagita a sasao ni Pablo ti mangipasigurado a kasta met ti aramiden ni Jehova kadatayo.

10. Ania a “sekreto” ti ibaga kadatayo ni Pablo?

¹⁰ Nangted met ni Pablo iti umasping a balakad ken Timoteo ken agaplikar met laeng kadatayo ita. Insuratna: “Gapuna, kontentotayo koman no adda taraon ken badotayo.” (1 Tim. 6:8) Kayat kadi a sawen dayta a saantayon a mabalin ti mangan iti naimas, agyan iti napintas a balay, wenno sagpaminsan a gumatang iti baro a bado? Saan a dayta ti punto ni Pablo. Ibagbaga ni Pablo a masapul nga agbalintayo a kontento iti aniaman nga adda kadatayo. (Fil. 4:12) Dayta ti “sekreto” ni Pablo. Ti kapatgan nga adda kadatayo ket ti relasiontayo iti Diostayo, saan nga iti aniaman a material a banag nga ik-ikutantayo.​—Hab. 3:17, 18.

11. Ania a leksion maipapan iti kinakontento ti masursurotayo iti imbaga ni Moises kadagiti Israelita?

¹¹ Mabalin a ti pampanunotentayo a kasapulantayo ket naiduma iti pampanunoten ni Jehova a kasapulantayo. Usigentayo ti imbaga ni Moises kadagiti Israelita kalpasan ti 40 a tawen a panagyanda iti let-ang: “Binendisionan ni Jehova a Diosyo ti amin nga inaramidyo. Ammona a magmagnakayo iti daytoy nalawa a let-ang. Adda kadakayo ni Jehova a Diosyo kadagitoy 40 a tawen, ket saankayo a nagkurang iti aniaman.” (Deut. 2:7) Bayat dagita nga 40 a tawen, tinaraonan ni Jehova dagiti Israelita iti manna. Ti badoda​—ti mismo a nakasuot kadakuada idi pimmanawda iti Egipto​—ket saan a pulos a narunot. (Deut. 8:3, 4)  Mabalin a pinanunot ti dadduma a kurang dagita a probision. Ngem impalagip ni Moises kadagiti Israelita a kompleto ti amin a kasapulanda. Maragsakan ni Jehova no masursurotayo ti agbalin a kontento​—apresiarentayo uray dagiti simple a probisionna. Ibilangtayo dagita kas bendision ken yamanentayo dagita.

12. Ania ti mangipakita a nagtalek ni David ken Jehova, saan nga iti bagina?

¹² Ammo ni David a napudno ni Jehova ken ay-aywananna a naimbag dagidiay mangay-ayat Kenkuana. Uray agpelpeligro idi ti biag ni David idi pinutarna ti maika-34 a Salmo, nakitana babaen ti mata ti pammatina nga isu ket “bambantayan ti anghel ni Jehova.” (Sal. 34:7) Mabalin nga inyarig ni David ti anghel ni Jehova iti maysa a soldado a mangbambantay iti tay-ak, a kanayon a mangsipsiput no adda kabusor. Uray no nabileg a mannakigubat ni David ken inkari ni Jehova kenkuana ti kinaari, saan a nagpannuray iti laingna nga agusar iti pallatibong wenno espada tapno maabakna ti kabusor. (1 Sam. 16:13; 24:12) Nagtalek ni David iti Dios ken adda kompiansana a ti anghel ni Jehova ‘isalakanna dagidiay agbuteng iti Dios.’ Siempre, ditay ekspektaren iti kaaldawantayo ti namilagruan a proteksion. Ngem ammotayo nga amin nga agtalek ken Jehova ket maaddaanto iti biag nga agnanayon uray no matayda ita.

13. Inton rumaut ni Gog iti Magog, apay a kasla awanto ti gawgawaytayo, ngem apay a ditay agbuteng? (Kitaen ti ladawan iti akkub.)

¹³ Dandanin masubok ti panagtalektayo iti pannakabalin ni Jehova a mangprotektar kadatayo. Inton ni Gog iti Magog, ti aliansa dagiti nasion, rautenda ti ili ti Dios, kaslanto agpelpeligro ti biagtayo. Masapul a kombinsidotayo a kabaelan ken talaga nga isalakannatayo ni Jehova. Para kadagiti nasion, kaslatayto kadagiti karnero nga awan gawgawayna ken awan ti mangprotprotektar kadatayo. (Ezek. 38:10-12) Awanto ti armastayo, ken saantayo a masanay a makilaban. Panunotento dagiti nasion a nalakadatayo laeng a puntiriaen. Saanda a makita ti makitkitatayo babaen ti mata ti pammatitayo​—ti nakaad-adu nga anghel a mangbambantay iti intero nga aglikmut ti ili ti Dios, a sisasagana a mangidepensa kadatayo. Kasano koma a makita ida dagiti nasion? Bulsekda iti naespirituan. Makigtotdanto la ketdi inton isalakandatayo dagiti nailangitan nga armada!​—Apoc. 19:11, 14, 15.

14. Ania dagiti aramidentayo itan tapno makapagsaganatayo para iti masanguanan?

¹⁴ Ania dagiti mabalin nga aramidentayo itan tapno makapagsaganatayo para iti masanguanan? Umuna iti amin, masapul nga umiso ti panangmatmattayo iti material a bambanag. Bigbigentayo nga addanto aldaw a masapul a panawantayo dagita. Masapul met nga agbalintayo a kontento ken ti relasiontayo ken ni Jehova ti kangrunaan a gubuayan ti ragsaktayo. No mas am-ammotayo ti Diostayo, mas kombinsidotayo iti pannakabalinna a mangprotektar kadatayo inton rumaut ni Gog iti Magog.

15. Ania dagiti kapadasan ni David idi ubing pay a nakasursuruanna a di pulos paayen isuna ni Jehova?

¹⁵ Usigentayo ti sabali pay a nakatulong ken David ken makatulong met kadatayo tapno masaganaantayo dagiti pannubok. Kinuna ni David: “Nanamenyo ken kitaenyo a ni Jehova ket naimbag; naragsak ti tao nga agkamang kenkuana.” (Sal. 34:8) Dagita a sasao ti mangilawlawag no apay nga ammo ni David a mapangnamnamaanna ti tulong ni Jehova. Masansan a nagpannuray ni David ken Jehova,  ken saan a pulos a pinaay ti Diosna. Idi ubing pay ni David, sinangona ti Filisteo a higante a ni Goliat ken imbagana iti dayta kasla di maabak a mannakigubat: “Ita nga aldaw, iyawatnakanto ni Jehova iti imak.” (1 Sam. 17:46) Idi agangay, nagserbi ni David iti ari a ni Saul, a namin-adu a nangpadas a mangpapatay kenkuana. Ngem “adda ni Jehova” ken David. (1 Sam. 18:12) Gapu ta napadasan ni David ti tulong ni Jehova iti napalabas, ammona a mapangnamnamaanna ti Diosna bayat dagiti agdama a pakasuotanna.

16. Kadagiti ania a pamay-an a ‘mananamtayo’ ti kinaimbag ni Jehova?

¹⁶ No ad-adda nga agpaidalantayo ken Jehova ita, ad-adda met nga agtalektayo iti pannakabalinna a mangisalakan kadatayo iti masanguanan. Pammati ken situtulok a panagpannuray ken Jehova ti kasapulan no agpakadatayo iti amotayo tapno makaatendertayo iti asamblea wenno kombension wenno no kiddawentayo a mabaliwan ti eskediultayo iti trabaho tapno maatenderantayo ti amin a gimong ken ad-adu ti orastayo iti ministerio. Ngem kasano ngay no saan nga aprobaran ti amotayo ti kiddawtayo ket masesantetayo? Adda kadi pammatitayo a dinatayo pulos panawan wenno baybay-an ni Jehova ken kanayon nga ipaayna dagiti kangrunaan a kasapulantayo? (Heb. 13:5) Adu nga adda iti amin-tiempo a serbisio ti makayestoria kadagiti kapadasan a mangipakita no kasano a tinulongan ida ni Jehova idi kasapulanda unay isuna. Matalek ni Jehova.

17. Ania ti tekstotayo iti tawen 2022, ken apay nga eksakto la unay dayta?

¹⁷ Adda ni Jehova iti dasigtayo, isu nga awan ti rason a pagbutngantayo dagiti mapasamak iti masanguanan. Dinatayo pulos baybay-an ti Diostayo, no la ket ta iyun-unatayo ti Pagarianna iti biagtayo. Tapno maipalagip kadatayo ti kinapateg ti panagsagana itan para kadagiti narigat a kasasaad iti masanguanan ken tapno agtalektayo a dinatay pulos baybay-an ni Jehova, pinili ti Bagi a Manarawidwid ti Salmo 34:10 kas tekstotayo iti tawen 2022: “Saan nga agkurang iti aniaman a nasayaat dagidiay mangsapsapul ken Jehova.”