1. Kadagiti ania a pamay-an a makikaduatayo ken Jehova?

 MAGUSGUSTUANTAYO ti makikadua kadagiti ipatpategtayo. Iti naulimek a rabii, kaykayat unay dagiti agassawa ti agkadua nga is-isuda. Agen-enjoy met dagiti agtutubo no kaduada dagiti nadekket a gagayyemda. Ken tagipatgentayo amin ti oras a makikadua kadagiti kapammatiantayo. Ngem kangrunaan iti amin, maay-ayatantayo a mangiwaya iti oras tapno makikadua iti Diostayo. Maaramidtayo dayta no agkararagtayo kenkuana, basaentayo ti Saona, ken utobentayo ti panggepna ken dagiti nagpintas a kualidadna. Talaga a nakapatpateg ti orastayo a makikadua ken Jehova!​—Sal. 139:17.

2. Ania a karit ti pakaipaspasanguantayo?

² Nupay magusgustuantayo ti makikadua ken Jehova, adda karit a pakaipaspasanguantayo. Busy ken nakaad-adu ti ar-aramidentayo, isu a mabalin a marigatantayo a mangyeskediul iti orastayo para kadagiti naespirituan nga aktibidad. Gapu ta adu nga oras ti mausar para iti trabahotayo, responsabilidad iti pamilia, ken dadduma pay a napateg nga aktibidad, mabalin a mariknatayo a kasla awanen ti orastayo nga agkararag, agadal, wenno agutob.

3. Ania ti sabali pay a mangagaw iti orastayo?

³ Adda pay sabali a ditay madmadlaw a mangagaw iti orastayo. No ditay agannad, baka ipalpalubostayo a dagiti aktibidad a saan met ketdi a dakes ti mangagaw iti oras a mausartayo koma tapno agbalintayo a nadekdekket ken Jehova. Kas pagarigan, ti paglinglingayan. Pagimbagantayo amin ti sagpaminsan a panagrelaks. Ngem uray dagiti nasayaat a paglinglingayan ket mabalin a mangibus iti orastayo nga uray la bassiten ti  nabati para kadagiti naespirituan nga aktibidad. Masapul ngarud nga ammotayo ti umiso a lugar ti paglinglingayan iti biagtayo.​—Prov. 25:27; 1 Tim. 4:8.

4. Ania itan ti usigentayo?

⁴ Iti daytoy nga artikulo, usigentayo no apay a masapul a mangikeddengtayo kadagiti umiso a prioridad. Pagsasaritaantayo met no kasanotayo a mausar iti kasayaatan a pamay-an ti tiempotayo para ken Jehova ken no kasano a pagimbagantayo dayta.

5. Kasano a makatulong iti maysa nga agtutubo ti balakad iti Efeso 5:15-17 tapno mapilina ti kasayaatan pay laeng a biag?

⁵ Piliem ti kasayaatan pay laeng a biag. Masansan a pampanunoten dagiti agtutubo no ania ti kasayaatan a pangusaranda iti biagda. Mabalin nga impluensiaan ida dagiti titser ken di-Saksi a kapamiliada a mangalada iti nangatngato nga edukasion tapno maaddaanda iti matangtangad a karera iti lubong. Mangibus la ketdi dayta iti adu a tiempoda. Iti sabali a bangir, dagiti agtutubo ket mabalin a paregtaen dagiti nagannak ken gagayyemda iti kongregasion nga usarenda ti biagda nga agserbi ken Jehova. Ania ti makatulong iti maysa nga agtutubo a mangay-ayat ken Jehova a mangaramid iti kasayaatan a desision? Makatulong ti panangbasa ken panangutobna iti Efeso 5:15-17. (Basaen.) Kalpasan a nabasana dagita a bersikulo, mabalin nga isaludsodna iti bagina: ‘Ania “ti pagayatan ni Jehova”? Ania a desision ti mangparagsak kenkuana? Ania a desision ti piliek tapno makuna nga us-usarek ti tiempok iti kasayaatan a pamay-an?’ Laglagipentayo nga “agbibiagtayon kadagiti dakes nga aldaw,” ken dandanin agpatingga daytoy sistema nga iturturayan ni Satanas. Nainsiriban ngarud nga usarentayo ti biagtayo iti pamay-an nga agbalintayo a makaay-ayo ken Jehova.

6. Ania ti pinili ni Maria, ken apay a nainsiriban dayta?

⁶ Mangikeddeng kadagiti umiso a prioridad. No dadduma, tapno mausartayo ti tiempotayo iti kasayaatan a pamay-an, baka masapul a pilientayo no ania ti napatpateg manipud iti dua a banag a saan met ketdi a dakes. Maawatantayo dayta iti pagaammo a salaysay maipapan iti ibibisita ni Jesus iti balay da Maria ken Marta. Awan duadua a naragsakan ti managpadagus a ni Marta a mangsangaili ken Jesus, isu a nangisagana iti nagadu a makan. Ngem ginundawayan ni adingna a Maria dayta nga ibibisita ket nagtugaw iti asideg ti Apona tapno dumngeg iti panangisurona. Nasayaat met ketdi ti intension ni Marta, ngem naibaga a ti “kasayaatan a bingay ti pinili” ni Maria. (Luc. 10:38-42, ftn.) Idi agangay, mabalin a nalipatanen ni Maria dagiti naidasar a makan iti dayta nga okasion. Ngem masiguradotayo a dina pulos nalipatan dagiti nasursurona ken Jesus. No kasano nga impateg ni Maria dayta a tiempo a kaduana ni Jesus, ipatpategtayo met ti tiempo a makikadua ken Jehova. Kasanotayo a mausar dayta a tiempo iti kasayaatan a pamay-an?

7. Apay a nakapatpateg nga iwayaantayo ti panagkararag, panagadal, ken panagutob?

⁷ Bigbigentayo a paset iti panagdaydayawtayo ti panagkararag, panagadal, ken panagutob. No agkarkararagtayo, makisarsaritatayo iti nailangitan nga Amatayo, a mangdungdungngo unay kadatayo. (Sal. 5:7) No agad-adaltayo iti Biblia, agsaksakdotayo iti “pannakaammo maipapan iti Dios,” a Gubuayan ti amin a sirib. (Prov. 2:1-5) No agut-utobtayo,  pampanunotentayo ti makaay-ayo a personalidad ni Jehova agraman ti nakaskasdaaw a panggepna para iti sangaparsuaan ken no ania ti papeltayo iti dayta a panggepna. Adda pay kadi nasaysayaat a pangusaram iti tiempom? Ngem kasanotayo a naan-anay a magunggonaan iti limitado a tiempotayo?

8. Ania ti masursurotayo ken Jesus iti panangusarna iti tiempona idi adda iti let-ang?

⁸ No posible, mangpilika iti naulimek a lugar. Usigentayo ti ulidan ni Jesus. Sakbay a rinugianna ti ministeriona ditoy daga, nagtalinaed idiay let-ang iti 40 nga aldaw. (Luc. 4:1, 2) Iti dayta a naulimek a lugar, adda gundaway ni Jesus nga agkararag ken Jehova ken mangutob iti pagayatan ni Amana para kenkuana. Sigurado a dayta ti nangisagana ken Jesus para kadagiti pannubok a dandani idin maipasango kenkuana. Kasanom a matulad ni Jesus? No dakkel ti pamiliayo, mabalin a marigatanka no dadduma a mangbirok iti naulimek a lugar iti balayyo. No kasta, baka masapul nga agbirokka iti naulimek a lugar iti ruar. Kasta ti ar-aramiden ni Julie no kayatna ti mangiwaya iti oras tapno agkararag ken Jehova. Aggigianda ken lakayna iti bassit nga apartment idiay France, ket saan no kua a makapagmaymaysa ken makapagpokus. “Isu nga inaldaw a mapanak agpagnapagna iti parke,” inlawlawag ni Julie. “Sadiay a makapagmaymaysaak, makapagpokus, ken talaga a maibagak ti amin ken Jehova.”

9. Uray no okupado idi ni Jesus, kasano nga impakitana nga ipatpategna ti relasionna ken Jehova?

⁹ Okupado unay idi ni Jesus. Bayat ti ministeriona ditoy daga, sursuroten ti adu a tattao sadinoman ti papananna, ken kayatda amin nga asikasuenna ida. Naminsan, ‘ti intero a siudad inaribungbonganda ti ridaw ti maysa a balay’ tapno makitada isuna. Nupay kasta, sinigurado ni Jesus a kanayon nga adda tiempona a mangpatibker iti relasionna ken Jehova. Sakbay a sumingising ti init, nakasarak iti “lugar nga awan matataona” ket sadiay a nakapagmaymaysa a makikadua ken Amana.​—Mar. 1:32-35.

10-11. Sigun iti Mateo 26:40, 41, ania ti naintiempuan nga imbalakad ni Jesus kadagiti adalanna iti hardin ti Getsemani, ngem ania ti napasamak?

¹⁰ Iti maudi a rabii ti biag ni Jesus ditoy daga, ken dandanin agpatingga ti ministeriona, nagbirok manen iti naulimek a lugar tapno agutob ken agkararag. Dayta a lugar ket iti hardin ti Getsemani. (Mat. 26:36) Iti dayta a gundaway, adda naintiempuan nga imbalakad ni Jesus kadagiti adalanna maipapan iti kararag.

¹¹ Kitaentayo ti napasamak. Idi nakadanonda iti hardin ti Getsemani, nakarabrabiin, nalabit pasado alas dosen ti rabii. Kiniddaw ni Jesus kadagiti apostolna nga ‘agtultuloyda  nga agbantay,’ sa napan nagkararag. (Mat. 26:37-39) Ngem bayat nga agkarkararag, nakaturogda. Idi nadanon ida ni Jesus a matmaturog, binagbagaanna manen ida nga ‘itultuloyda ti agbantay ken itultuloyda ti agkararag.’ (Basaen ti Mateo 26:40, 41.) Ammona a mais-stress-da la unay ken nabambannogda. Nakipagrikna ni Jesus kadakuada ken binigbigna a “nakapuy ti lasag.” Ngem namindua pay a napan nagkararag ni Jesus, ket kada agsubli, nadanonna dagiti adalanna a matmaturog imbes nga agkarkararag.​—Mat. 26:42-45.

12. Ania ti maaramidantayo no marigatantayo nga agkararag gapu iti nakaro nga stress wenno bannog?

¹² Piliem ti kasayaatan nga oras. No dadduma, marigatantayo nga agkararag gapu iti nakaro nga stress wenno bannog. No kasta ti mapaspasaram, saanka nga agmaymaysa. Ania ti mabalinmo nga aramiden? Sigun iti dadduma a nairuam idi nga agkararag ken Jehova sakbayda a maturog, nakitada a nakatulong idi insapsapada bassit ti agkararag iti rabii a saanda unay a nabannog. Imbaga met ti dadduma a mas makapagpokusda nga agkararag no nasayaat ti posisionda, kas koma no nakatugaw wenno nakaparintumengda. Ngem kasano ngay no marigatanka nga agkararag gapu iti sobra a danag wenno pannakaupay? Ibagam ken Jehova ti marikriknam. Masiguradom a maawatannaka ti naasi nga Amatayo.​—Sal. 139:4.

13. Kasano a makaistorbo dagiti gadyet iti orastayo para ken Jehova?

¹³ Liklikam dagiti makaistorbo no agadalka. Saan laeng a ti panagkararag ti pamay-an a mangpatibker iti relasiontayo ken Jehova. Makatulong met ti panagadal iti Sao ti Dios ken pannakigimong tapno nadekdekkettayo iti Dios. Adda kadi aniaman a maaramidam tapno mausarmo iti kasayaatan a pamay-an ti tiempom nga agadal ken makigimong? Isaludsodmo iti bagim, ‘Ania ti mangdadael iti konsentrasionko a makigimong wenno agadal?’ Dagiti ngata tawag, email, wenno text iti selponmo wenno dadduma pay a gadyetmo? Binilion a tattao ita ti agus-usar kadagita a makatulong a gadyet. Sigun iti dadduma a researcher, kadagiti tiempo nga ikagkagumaantayo ti agpokus, ti laengen kaadda ti selpon iti abaytayo ket makaistorbon. “Saanmo a maisentro ti isipmo iti agdama nga ar-aramidem,”  kuna ti maysa a propesor iti psychology. “Agtawtawataw ti isipmo.” Sakbay a mangrugi dagiti asamblea ken kombension, masansan a maipalagip nga i-adjust-tayo dagiti gadyettayo iti setting a saan a mangistorbo iti sabsabali. Mabalintayo met kadi nga aramiden dayta no agmaymaysatayo tapno saan a makaistorbo kadatayo dagiti gadyet ken mangsinga iti orastayo para ken Jehova?

14. Sigun iti Filipos 4:6, 7, kasano a tulongannatayo ni Jehova nga agpokus?

¹⁴ Kiddawem ken Jehova a tulongannaka nga agpokus. No nadlawmo nga agtawtawataw ti isipmo bayat ti panagadalmo wenno ti gimong, agpatulongka ken Jehova. No maburburiboran wenno madandanaganka, mabalin a saan a kaskarina nga iwalinmo dagita a pampanunotem ken agpokuska kadagiti naespirituan a banag, ngem masapul nga aramidem dayta. Ikararagmo ti talna a mangsalaknib saan laeng nga iti pusom no di ket uray iti ‘isipmo.’​—Basaen ti Filipos 4:6, 7.

15. Ania ti maysa a pagimbagan ti orastayo a makikadua ken Jehova?

¹⁵ No iwayaam ti makisarita ken dumngeg ken Jehova, ken agpanunot maipapan kenkuana, adunto ti maitedna a pagimbagam. Kasano? Umuna, makaaramidka kadagiti nasaysayaat a desision. Ipasigurado kadatayo ti Biblia a “ti makikadkadua iti masirib agbalinto a masirib.” (Prov. 13:20) Agbalinka ngarud a nasirsirib no mangiwayaka iti oras a makikadua iti Gubuayan iti sirib, ni Jehova. Ad-adda a maawatam no kasanom a paragsaken isuna ken no kasanom a liklikan dagiti mangpaladingit kenkuana.

16. Kasano a sumayaat ti panangisurotayo no mangiwayatayo iti oras para ken Jehova?

¹⁶ Maikadua, agbalinka a nalalaing a mannursuro. No mangyad-adaltayo iti Biblia, ti maysa kadagiti kapatgan a kalattayo ket tulongan ti mayad-adalan a suminged ken Jehova. No ad-adda a makikomunikartayo iti nailangitan nga Amatayo, ad-adda nga umuneg ti ayattayo kenkuana ken agbalintayo a nalalaing a mangisuro iti iyad-adalantayo a mangayat ken Jehova. Kasta ti inyulidan ni Jesus. Dineskribirna ni Amana kadagiti makatukay-puso ken nadungngo a termino, isu a dagiti matalek a pasurotna inayatda met ni Jehova.​—Juan 17:25, 26.

17. Apay a mangpatibker iti pammatitayo ti panagkararag ken panagadal?

¹⁷ Maikatlo, lallalo a tumibker ti pammatim. Panunotem ti mapasamak no kiddawem iti Dios nga idalan, liwliwaen, wenno suportarannaka. Kada sungbatan ni Jehova dagita a kararagmo, lallalo a tumibker ti pammatim  kenkuana. (1 Juan 5:15) Ania pay ti mangpatibker iti pammatim? Ti personal a panagadal. Ngamin, “adda pammati gapu iti nangngeg.” (Roma 10:17) Ngem malaksid iti panagurnong iti pannakaammo, adda pay masapul nga aramidentayo tapno tumibker ti pammatitayo. Ania dayta?

18. Iyilustrar no apay a masapul nga agutobtayo.

¹⁸ Masapul nga utobentayo dagiti maad-adaltayo. Kitaentayo ti kapadasan ti nangisurat iti Salmo 77. Naburiboran gapu ta nariknana a napukawnan ken dagiti padana nga Israelita ti pabor ni Jehova. Saan a makaturog gapu iti napalalo a panagdandanagna. (Bersikulo 2-8) Ania ti inaramidna? Imbagana ken Jehova: “Utobekto ti amin nga aramidmo ken pampanunotekto a naimbag dagiti pannakilangenmo.” (Bersikulo 12) Siempre, pagaammo unay ti salmista dagiti inar-aramid idi ni Jehova para iti ilina, ngem pinampanunot daytoy madandanagan a lalaki: “Nalipatan ngatan ti Dios nga ipakita ti asina, wenno dinakami ngatan kaasian gapu iti pungtotna?” (Bersikulo 9) Inutob ti salmista dagiti inaramid ni Jehova ken no kasano nga impakitana idin ti asi ken ti pannakipagriknana. (Bersikulo 11) Ti resultana? Kombinsidon ti salmista a saan a baybay-an ni Jehova ti ilina. (Bersikulo 15) No kasta, dumakkel ti pammatim no utobem dagiti inaramiden ni Jehova para iti ilina ken para kenka.

19. Ania pay ti pagimbaganna no mangiwayatayo iti oras a makikadua ken Jehova?

¹⁹ Maikapat, ken kapatgan iti amin, lallalo nga umuneg ti panagayatmo ken Jehova. Iti amin a dadduma pay a kualidad, ti ayat ti mangtignay kenka nga agtulnog ken Jehova, agsakripisio tapno maparagsak isuna, ken mangibtur iti aniaman a pannubok. (Mat. 22:37-39; 1 Cor. 13:4, 7; 1 Juan 5:3) Awanen ti napatpateg pay ngem iti nadekket ken nadungngo a pannakigayyem ken Jehova!​—Sal. 63:1-8.

20. Kasano a masiguradom a kanayon nga adda orasmo a makikadua ken Jehova?

²⁰ Laglagipem a ti panagkararag, panagadal, ken panagutob ket paset ti panagdaydayawtayo. Kas ken Jesus, mangbirokka kadagiti naulimek a lugar tapno makikaduaka ken Jehova. Iwalinmo dagiti makaistorbo. Kiddawem ken Jehova a tulongannaka nga agpokus no ar-aramidem dagiti naespirituan nga aktibidad. No us-usarem itan ti tiempom iti kasayaatan a pamay-an, gunggonaannakanto ni Jehova a Dios iti biag nga agnanayon iti baro a lubongna.​—Mar. 4:24.