1-2. Apay nga umatendertayo iti Memorial kada tawen?

 DANDANI 2,000 a tawenen ti napalabas, inted ni Jesus ti biagna para kadatayo, isu a nailukat kadatayo ti gundaway a maaddaan iti biag nga agnanayon. Iti rabii sakbay ti ipapatay ni Jesus, imbilinna kadagiti pasurotna a laglagipenda ti naayat a panagsakripisiona babaen ti simple a seremonia nga addaan iti tinapay ken arak.—1 Cor. 11:23-26.

² Agtultulnogtayo iti bilin ni Jesus ta ay-ayatentayo unay isuna. (Juan 14:15) Kada tawen, bayat ti tiempo ti Memorial, maipakitatayo nga ap-apresiarentayo ti inaramidna no iwayaantayo nga utoben a napakuyogan iti kararag ti kaipapanan ti ipapatayna. Maragsakantayo met no kakaaduentayo ti orastayo iti ministerio, ken adu ti awisentayo agingga a posible a makipagselebrar kadatayo iti dayta nga espesial nga okasion. Ken siempre, determinadotayo a ditay ipalubos nga adda aniaman a manglapped kadatayo nga umatender iti Memorial.

3. Ania ti usigentayo iti daytoy nga artikulo?

³ Iti daytoy nga artikulo, usigentayo ti tallo a pamay-an nga ar-aramiden dagiti agserserbi ken Jehova ti amin a kabaelanda a manglaglagip iti ipapatay ni Jesus: (1) babaen ti panangselebrar iti Memorial iti pamay-an nga insuro ni Jesus,  (2) babaen ti panangawis iti dadduma nga umatender iti Memorial, ken (3) babaen ti panangselebrar iti Memorial iti laksid dagiti narigat a kasasaad.

4. Bayat ti Memorial kada tawen, ania dagiti saludsod a masungbatan, ken apay a masapul nga ipategtayo dagita a kinapudno? (Lucas 22:19, 20)

⁴ Bayat ti Memorial kada tawen, makangngegtayo iti naibatay-Biblia a palawag a nalawag a mangsungbat iti sumagmamano a saludsod. Maammuantayo no apay a kasapulan ti sangatauan ti subbot, ken no kasano a ti ipapatay ti maysa a tao masubbotna ti basol ti adu a tattao. Maipalagip kadatayo ti irepresentar ti tinapay ken arak ken no siasino dagiti rumbeng a mangan ken uminum kadagita. (Basaen ti Lucas 22:19, 20.) Utobentayo met dagiti bendision a magun-odan dagidiay mangnamnama nga agbiag nga agnanayon ditoy daga. (Isa. 35:5, 6; 65:17, 21-23) Masapul nga ipategtayo dagita a kinapudno. Saan nga ammo dayta ti binilion a tattao ken saanda a maawatan ti kasta unay a kinapateg ti sakripisio ni Jesus. Saanda met a selselebraran ti Memorial ti ipapatayna iti pamay-an nga insurona. Apay?

5. Kalpasan a natay ti kaaduan nga apostol, ania ti napasamak iti pamay-an nga insuro ni Jesus?

⁵ Kalpasan a natay ti kaaduan nga apostol ni Jesus, nakastrek iti kongregasion dagiti sinsinan Kristiano. (Mat. 13:24-27, 37-39) Inwarasda dagiti “tiritir a sursuro tapno mapasurotda dagiti adalan.” (Ara. 20:29, 30) Maysa kadagiti “tiritir” nga insuro dagita a sinsinan Kristiano ket saan kano a “naminsan laeng” nga indaton ni Jesus ti bagina “tapno awitenna dagiti basol ti adu a tattao,” kas iti ibagbaga ti Biblia, no di ket masapul a maulit-ulit a maaramid dayta. (Heb. 9:27, 28) Adu a tattao ita ti mamati iti dayta nga ulbod a sursuro. Linawas a makimisada—wenno inaldaw pay ketdi no dadduma—tapno aramidenda ti maaw-awagan iti “the Sacrifice of the Mass.” b Adda met dagiti relihion a manmanoda a selebraran ti ipapatay ni Jesus. Ngem saan met a talaga a maawatan ti kaaduan a miembroda ti kaipapanan ti sakripisio ni Jesus. Baka maisaludsod ti dadduma, ‘Talaga ngata a mapakawan dagiti basolko babaen ti ipapatay ni Jesus?’ Apay nga isalsaludsodda dayta? Naimpluensiaanda ngamin kadagidiay agduadua a posible a mapakawan dagiti basol babaen ti sakripisio ni Jesus. Ania ti inaramid dagiti pudno a pasurot ni Jesus tapno matulonganda dagiti tattao a mangammo iti sungbat dayta a saludsod?

6. Idi 1872, ania ti naawatan ti maysa a grupo dagiti agad-adal iti Biblia?

⁶ Idi maudi a paset ti maika-19 a siglo, ti maysa a grupo dagiti agad-adal iti Biblia nga indauluan ni Charles Taze Russell rinugiandan nga adalen a naimbag ti Kasuratan. Kayatda a maammuan ti kinapateg ti sakripisio ni Jesus ken no kasano ti rumbeng a panangselebrar iti ipapatayna. Idi 1872, naawatanda nga impaay a talaga ni Jesus ti subbot para iti sangatauan. Saanda a binukbukodan dagiti naadalda. Impakaammoda dayta babaen kadagiti libro, diario, ken magasin. Ket di nagbayag, rinugiandan ti agtataripnong maminsan iti kada tawen tapno selebraranda ti Memorial kas panangtuladda kadagiti Kristiano idi umuna a siglo.

7. Ania ti maitulong kadatayo ti panag-research dagiti immun-una a nangadal iti Biblia?

 ⁷ Dakkel ti maitulong kadatayo ita ti panag-research dagidi a napasnek a Kristiano adu a tawenen ti napalabas. Kasano? Iti tulong ni Jehova, naawatantayo ti kaipapanan ti sakripisio ni Jesus ken no ania ti maaramidan dayta para kadatayo. (1 Juan 2:1, 2) Naammuantayo met iti Biblia nga adda dua a namnama nga ipaay ti Dios kadagiti tattao a mangparparagsak kenkuana—immortal a biag idiay langit para iti sumagmamano ken biag nga agnanayon ditoy daga para iti minilion a dadduma pay. Ad-adda a sumingedtayo ken Jehova no utobentayo ti kasta unay a panagayatna kadatayo ken no kasano a magunggonaan ti tunggal maysa kadatayo iti sakripisio ni Jesus. (1 Ped. 3:18; 1 Juan 4:9) Isu a kas kadagiti matalek a kakabsattayo iti napalabas, awisentayo ti dadduma a makipagselebrar kadatayo iti Memorial iti pamay-an nga insuro ni Jesus.

8. Ania ti inaramiden dagiti agserserbi ken Jehova tapno mayawisda ti Memorial? (Kitaen ti ladawan.)

⁸ Adun a tawen nga iyaw-awis dagiti agserserbi ken Jehova ti Memorial. Manipud pay idi 1881, maaw-awisen dagiti kakabsat idiay United States nga agtataripnong iti maysa a pribado a balay idiay Allegheny, Pennsylvania, para iti daytoy nga espesial nga okasion. Idi agangay, ti Memorial ket selselebraranen ti tunggal kongregasion. Idi Marso 1940, naipakaammo kadagiti agibumbunannag a mabalinda nga awisen dagiti interesado iti teritoriada. Iti damo a gundaway idi 1960, nangipatulod ti Bethel kadagiti kongregasion  kadagiti nayimprenta nga imbitasion. Manipud idin, binilionen nga imbitasion ti Memorial ti maiwarwaras. Apay nga ikagkagumaantayo unay ti agimbitar?

9-10. Siasino dagiti matulongan no agreggettayo a mangyawis iti Memorial? (Juan 3:16)

⁹ Ti maysa a rason nga iyaw-awistayo ti Memorial ket tapno dagidiay damoda ti umatender maammuanda ti kinapudno maipapan kadagiti inaramid ni Jehova ken ni Jesus para kadatayo amin. (Basaen ti Juan 3:16.) Mangnamnamatayo a dagiti makita ken mangngegda iti Memorial ti mangtignay kadakuada a mangammo iti ad-adu pay tapno agbalinda nga adipen ni Jehova. Ngem saan la nga isuda ti matulongan.

¹⁰ Aw-awisentayo met dagiti simmardeng nga agserbi ken Jehova tapno ipalagiptayo nga ay-ayaten latta ida ti Dios. Adu kadakuada ti umatender ket maragsakantayo unay a makakita kadakuada. Ti pannaki-Memorial-da ti mangipalagip iti kasta la unay a ragsakda idi agserserbida pay ken Jehova. Kitaentayo ti kapadasan ni Monica. c Bayat ti COVID-19 pandemic, nagbalin manen nga aktibo nga agibumbunannag. Kalpasan a naki-Memorial idi 2021, imbagana: “Espesial unay kaniak daytoy a Memorial. Iti damo a gundaway iti 20 a tawen, nakapangasabaak manen ken nayawisko ti Memorial. Talaga nga inaramidko ti amin ta agyamanak unay iti inaramid ni Jehova ken ni Jesus para kaniak.” (Sal. 103:1-4) Umatender man wenno saan dagiti imbitarantayo, ikagumaantayo latta nga iyawis ti Memorial ta ammotayo nga ap-apresiaren ni Jehova dagiti panagreggettayo.

11. Kasano a binendisionan ni Jehova dagiti panagreggettayo a mangyawis iti Memorial? (Haggeo 2:7)

¹¹ Talaga a binendisionan ni Jehova dagiti panagreggettayo a mangyawis iti Memorial. Idi 2021, adda 21,367,603 nga immatender iti Memorial uray no adda dagiti restriksion gapu iti COVID-19 pandemic. Nasurok a doble dayta iti bilang dagiti Saksi ni Jehova iti intero a lubong. Ngem siempre, saan laeng nga interesado ni Jehova iti bilang. Interesado met iti tunggal maysa kadatayo. (Luc. 15:7; 1 Tim. 2:3, 4) Masiguradotayo a no iyawistayo ti Memorial, tulongannatayo ni Jehova a mangbirok kadagiti nasingpet a tattao.—Basaen ti Haggeo 2:7.

12. Ania dagiti pakaipasanguantayo a kasasaad isu a marigatantayo a mangselebrar iti Memorial? (Kitaen ti ladawan.)

¹² Impakpakauna ni Jesus a kadagiti maudi nga al-aldaw, maipasangotayo iti adu a rigat—ibubusor ti pamilia, pannakaidadanes, gubat, makaakar a saksakit, ken dadduma pay. (Mat. 10:36; Mar. 13:9; Luc. 21:10, 11) Gapu kadagita, marigatantayo no dadduma a mangselebrar iti ipapatay ni Jesus. Ania ti inaramid dagiti kakabsat tapno mapagballigianda dagita a narigat a kasasaad, ken kasano a tinulongan ida ni Jehova?

13. Kasano a binendisionan ni Jehova ti tured ken determinasion ni Artem a mangselebrar iti Memorial bayat a nakabalud?

¹³ Pannakaibalud. Adda dagiti kakabsat a naibalud gapu iti pammatida. Ngem ar-aramidenda ti amin a kabaelanda tapno maselebraranda ti ipapatay ni Jesus. Kitaentayo ti kapadasan ni Artem. Iti Memorial idi 2020, naipupok iti selda a 17-metro-kuadrado (183-sq-ft). Umanay iti dayta ti agingga iti lima a balud. Uray nakabalud, nakaala latta kadagiti emblema para iti Memorial. Planona met ti agpalawag tapno magunggonaan iti  Memorial. Ngem kanayon nga agsigsigarilio ken agsasao iti dakes dagiti padana a balud iti selda. Ania ti inaramidna? Impakpakaasina a saanda pay laeng nga agsigsigarilio ken agsao iti dakes iti maysa la nga oras. Nasdaaw ni Artem ta nagwenda a dida agsigarilio ken agsao iti dakes bayat ti Memorial. Imbaga ni Artem, “Pinadasko nga iyestoria kadakuada ti maipapan iti Memorial.” Dida kayat. Ngem kalpasan a nakita ken nangngegda no kasano a sinelebraran ni Artem ti Memorial, nagsaludsodda met laeng kenkuana maipapan iti dayta.

14. Ania dagiti inaramid ti ili ni Jehova tapno maselebraranda ti Memorial uray adda ti COVID-19 pandemic?

¹⁴ COVID-19 pandemic. Gapu iti daytoy a pandemic, saan a nakapag-Memorial iti face-to-face dagiti agserserbi ken Jehova. Ngem saan a dayta ti nanglapped kadakuada a mangselebrar iti Memorial. d Dagiti kongregasion nga addaan iti Internet ket nag-Memorial babaen ti videoconference. Dagiti ngay minilion nga awanan iti Internet? Iti dadduma a pagilian, nayurnos a ti palawag ket maibrodkas iti  TV wenno iti radio. Ti palawag ket inrekord met dagiti sangay iti nasurok a 500 a lengguahe tapno makapag-Memorial latta dagiti adda kadagiti nasulinek a lugar. Inyurnos met dagiti matalek a kakabsat a ti nairekord a palawag ket maideliber kadagita a lugar.

15. Ania dagiti masursurom iti kapadasan ti mayad-adalan iti Biblia a ni Sue?

¹⁵ Ibubusor ti pamilia. Para iti dadduma, ti ibubusor ti pamilia ti kadakkelan a problemada iti panagatender iti Memorial. Kitaentayo ti kapadasan ti mayad-adalan iti Biblia a ni Sue. Idi 2021, maysa nga aldaw sakbay ti Memorial, imbaga ni Sue iti mangyad-adal kenkuana iti Biblia a gapu ta busbusoren dagiti kapamiliana, saan a makaatender iti Memorial. Imbasa ti mangyad-adal kenkuana ti Lucas 22:44. Kalpasanna, inlawlawagna a no mapasarantayo dagiti pakarigatan, masapul a tuladentayo ti ulidan ni Jesus. Agkararagtayo ken Jehova ken naan-anay nga agtalektayo kenkuana. Kabigatanna, insagana ni Sue dagiti emblema ken binuyana ti espesial a programa ti Panagdaydayaw iti Agsapa iti jw.org. Karabiyanna, idi maymaysanan iti kuartona, nagkonek iti Memorial babaen ti selponna. Kalpasanna, insurat ni Sue iti mangyad-adal kenkuana iti Biblia: “Apresiarek unay ti panangparegtam kaniak idi kalman. Inaramidko ti amin a kabaelak tapno maatenderak ti Memorial, ket talaga a tinulongannak ni Jehova. Kurang ti sasao a mangyebkas iti kasta unay a ragsak ken panagyamanko kenkuana!” Panagkunam, matulongannaka kadi met ni Jehova no maipasangoka iti kasta a situasion?

16. Apay a masiguradotayo a bendisionan ni Jehova dagiti panagreggettayo nga umatender iti Memorial? (Roma 8:31, 32)

¹⁶ Ap-apresiaren unay ni Jehova dagiti panagreggettayo a mangselebrar iti ipapatay ni Jesus. Masiguradotayo a bendisionannatayo no ipakitatayo nga ap-apresiarentayo dagiti inaramidnan para kadatayo. (Basaen ti Roma 8:31, 32.) Determinadotayo ngarud koma nga umatender iti Memorial ita a tawen ken aramidentayo ti amin a kabaelantayo ken kakaaduentayo ti orastayo a makiraman kadagiti naespirituan nga aktibidad bayat ti tiempo ti Memorial.