1-2. (a) Ania dagiti mabalin a mariknatayo no utobentayo ti biag ken ministerio ni Jesus? (b) Ania ti pagsasaritaantayo iti daytoy nga artikulo?

 NO NATAY ti maysa nga ipatpategtayo iti biag, kailiwtayo unay! Iti damo, mabalin a naladingittayo unay a mangpampanunot kadagiti maudi a kanito ti biagna, nangruna no nagsagaba sakbay a natay. Ngem iti panaglabas dagiti aldaw, mabalin a rumagsaktayo manen no panunotentayo dagiti insuro ken inaramidna wenno imbagana kadatayo a mangparegta wenno mangpaisem kadatayo.

² Maladingitantayo met no mabasatayo ti maipapan iti panagsagaba ken ipapatay ni Jesus. Bayat ti tiempo ti Memorial, nangnangruna nga iwayaantayo nga utoben ti kinapateg ti pangsubbotna a daton. (1 Cor. 11:24, 25) Ngem maragsakantayo no utobentayo ti amin nga imbaga ken inaramidna idi adda ditoy daga. Maparegtatayo met no panunotentayo dagiti ar-aramidenna ita ken dagiti aramidennanto pay iti masanguanan. No utobentayo dagita ken ti ayatna para kadatayo, matignaytayo a mangipakita iti apresasiontayo kadagiti praktikal a pamay-an kas kadagiti maammuantayo iti daytoy nga artikulo.

3. Ania dagiti rason nga agyamantayo gapu iti subbot?

³ Matignaytayo nga agyaman no utobentayo ti biag ken ipapatay ni Jesus. Iti intero a ministerio ni Jesus ditoy daga, insurona kadagiti tattao dagiti bendision nga iyeg ti Pagarian ti Dios. Ap-apresiarentayo unay dagita a kinapudno maipapan iti Pagarian. Agyamantayo gapu iti subbot ta addaantayo iti gundaway nga agbalin a nasinged a gagayyem da Jehova ken Jesus. Dagidiay mangipakpakita iti pammati ken Jesus ket addaan met iti namnama nga agbiag nga agnanayon ken makitadanto  manen dagiti natayen nga ipatpategda iti biag. (Juan 5:28, 29; Roma 6:23) Awan ti inaramidtayo tapno maikaritayo kadagita a bendision. Ditay met pulos makabayad iti Dios ken ni Kristo gapu kadagiti inaramidda para kadatayo. (Roma 5:8, 20, 21) Ngem mabalintayo nga ipakita a talaga nga agyamyamantayo kadakuada. Kasano?

4. Kasano nga impakita ni Maria Magdalena ti panagyamanna iti inaramid ni Jesus para kenkuana? (Kitaen ti ladawan.)

⁴ Kitaentayo ti ulidan ti Judio a babai a ni Maria Magdalena. Nagpakarigat unay idi gapu ta linuganan ti pito a demonio. Sigurado a pinampanunotna nga awanen ti namnamana. Isu nga imadyinentayo ti kasta unay a panagyamanna idi pinaruar ni Jesus dagidi a demonio a nanglugan kenkuana! Gapu iti panagyamanna, nagbalin a pasurot ni Jesus. Inusarna met ti tiempo, pigsa, ken sanikuana tapno suportaranna ti ministerio ni Jesus. (Luc. 8:1-3) Kasta la unay ti panangapresiar ni Maria iti inaramid ni Jesus para kenkuana, ngem mabalin a dina pay idi ammo nga adda pay kadakkelan a sagut nga ipaayto ni Jesus. Ited ni Jesus ti biagna para iti sangatauan, tapno agbiag nga agnanayon ti “asinoman a mangipakita iti pammati kenkuana.” (Juan 3:16) Kaskasdi a nagtalinaed ni Maria a matalek ken Jesus kas panangipakitana iti panagyamanna. Idi adda ni Jesus iti kayo a pagtutuokan, adda ni Maria iti asidegna tapno liwliwaenna ni Jesus ken ti dadduma. (Juan 19:25) Idi natayen ni Jesus, napan ni Maria ken ti dua pay a babbai iti tanemna ket nangitugotda kadagiti nabanglo a yerba nga isapsapoda iti bangkayna. (Mar. 16:1, 2) Talaga a nabendisionan ti kinamatalek ni Maria. Naragsakan idi nakita ken nakasaritana ti napagungaren a ni Jesus—pribilehio a saan a napadasan ti kaaduan nga adalan.—Juan 20:11-18.

5. Kasanotayo a maipakita nga agyamantayo iti amin nga inaramid da Jehova ken Jesus para kadatayo?

⁵ Maipakitatayo met nga agyamyamantayo iti amin nga inaramid da Jehova ken Jesus para kadatayo no usarentayo ti tiempo, pigsa,  ken kuartatayo iti trabaho para iti Pagarian. Kas pagarigan, mabalintayo ti agboluntario a tumulong iti panagibangon ken panagmantener kadagiti pasdek para iti nadalus a panagdaydayaw.

6. Apay a maibagatayo a ti subbot ket sagut para iti tunggal maysa kadatayo?

⁶ No panunotentayo ti kasta unay a panagayat da Jehova ken Jesus kadatayo, matignaytayo met a mangayat kadakuada. (1 Juan 4:10, 19) Lallalo pay nga ayatentayo ida no lagipentayo a natay ni Jesus para iti tunggal maysa kadatayo. Iti surat ni apostol Pablo kadagiti taga-Galacia, binigbigna dayta, ket kas apresasion, imbagana: “Agbibiagakon maitunos iti pammatik iti Anak ti Dios a nangayat kaniak ken nangisakripisio iti biagna para kaniak.” (Gal. 2:20) Gapu iti subbot, inyasidegnaka ni Jehova kenkuana tapno agbalinka a gayyemna. (Juan 6:44) Saanka kadi a maragsakan a makaammo nga adda nasayaat a nakita ni Jehova kenka isu a ti kanginginaan a gatad ti imbayadna tapno agbalinka a gayyemna? Saan kadi a dayta ti rason tapno lallalo nga ayatem da Jehova ken Jesus? Nasayaat nga isaludsodtayo iti bagitayo, ‘Gapu iti dayta nga ayat, matignayak a mangaramid iti ania?’

7. Kas makita iti ladawan, kasanotayo amin a maipakita ti ayattayo kada Jehova ken Jesus? (2 Corinto 5:14, 15; 6:1, 2)

⁷ Ti ayattayo iti Dios ken iti Kristo ti mangtignay kadatayo a mangipakita iti ayat kadagiti tattao. (Basaen ti 2 Corinto 5:14, 15; 6:1, 2.) Ti maysa a pamay-an a maipakitatayo ti ayat ket no sireregta a makipasettayo iti trabaho a panangasaba. Kasaritatayo ti amin. Ditay pilpilien dagiti kasaritatayo, aniaman ti puli, tribu, kasasaadda iti pinansial wenno iti  kagimongan. Iti kasta, maaramidtayo ti pagayatan ni Jehova ta kayatna a “maisalakan koma ti amin a kita ti tattao ken maaddaanda iti umiso a pannakaammo iti kinapudno.”—1 Tim. 2:4.

8. Kasanotayo a maipakita nga ay-ayatentayo dagiti kakabsat?

⁸ Maipakitatayo met nga ay-ayatentayo ti Dios ken ti Kristo no ayatentayo dagiti kakabsat. (1 Juan 4:21) Isakit ken tulongantayo ida no adda dagiti problemada. Liwliwaentayo ida no natayanda iti ipatpategda iti biag, bisitaentayo ida no masakitda, ken ikagumaantayo ida a paregtaen no maup-upayda. (2 Cor. 1:3-7; 1 Tes. 5:11, 14) Itultuloytayo ida nga ikararagan, ta ammotayo a “ti panagpakaasi ti nalinteg a tao ket nabileg ti epektona.”—Sant. 5:16.

9. Ania ti maysa pay a pamay-an a maipakitatayo nga ay-ayatentayo dagiti kakabsat?

⁹ Maipakitatayo met nga ay-ayatentayo dagiti kakabsat no ikagumaantayo a pagtalinaeden ti natalna a relasion kadakuada. Pagreggetantayo a tuladen ti kinamanangpakawan ni Jehova. No situtulok nga impalubos ni Jehova a matay ti Anakna tapno masubbot dagiti basoltayo, saan kadi a masapul met a sisasaganatayo a mangpakawan kadagiti kakabsat no nakabasolda kadatayo? Ditay kayat a tuladen ti dakes nga adipen a dinakamat ni Jesus iti maysa kadagiti ilustrasionna. Uray no kinanselar ti apona ti nakadakdakkel nga utangna, saan a pinakawan dayta nga adipen ti padana nga adipen nga adayo a basbassit ti utangna. (Mat. 18:23-35) No adda diyo nagkinnaawatan iti maysa a kakongregasionmo, mabalin kadi a sika ti umuna a makikappia sakbay ti Memorial? (Mat. 5:23, 24) No aramidem dayta, ipakpakitam a nauneg ti panagayatmo kada Jehova ken Jesus.

10-11. Kasano a maipakita dagiti panglakayen nga ay-ayatenda da Jehova ken Jesus? (1 Pedro 5:1, 2)

¹⁰ Kasano a maipakita dagiti panglakayen nga ay-ayatenda da Jehova ken Jesus? Ti maysa a napateg a pamay-an ket ti panangasikasoda kadagiti kasapulan dagiti karnero ni Jesus. (Basaen ti 1 Pedro 5:1, 2.) Pinagminar dayta ni Jesus ken apostol Pedro. Kalpasan a namitlo nga inlibakna ni Jesus, kayat la unay ni Pedro a paneknekan nga ay-ayatenna ni Jesus. Idi napagungaren ni Jesus, insaludsodna ken Pedro: “Simon nga anak ni Juan, ay-ayatennak kadi?” Masiguradotayo nga aramiden ni Pedro ti amin tapno paneknekanna nga ay-ayatenna ti Apona. Imbaga ni Jesus ken Pedro: “Ipastoram dagiti babassit a karnerok.” (Juan 21:15-17) Ket iti nabatbati a tawtawen iti biag ni Pedro, sidudungngo nga inaywananna dagiti karnero ti Apona, ket pinaneknekanna nga ay-ayatenna ni Jesus.

¹¹ Papanglakayen, iti tiempo ti Memorial, kasanoyo a mapaneknekan a napateg kadakayo dagiti imbaga ni Jesus ken Pedro? Maipakitayo nga ay-ayatenyo unay da Jehova ken Jesus no regular nga ipastoranyo dagiti kakabsat ken no ikagumaanyo a tulongan dagiti di aktibo nga agsubli ken Jehova. (Ezek. 34:11, 12) Mabalinyo met a paregtaen dagiti mayad-adalan iti Biblia ken dagidiay damoda ti umatender iti Memorial. Kayattayo nga iparikna a maragsakantayo unay iti iyaatenderda ta namnamaentayo nga agbalindanto met nga adalan ni Jesus.

12. Apay nga agbalintayo a natured no panunotentayo dagiti imbaga ni Jesus iti rabii sakbay ti ipapatayna? (Juan 16:32, 33)

¹² Iti rabii sakbay ti ipapatay ni Jesus, imbagana kadagiti adalanna: “Agrigatkayto ditoy  lubong, ngem patibkerenyo ti pakinakemyo! Naparmekko ti lubong.” (Basaen ti Juan 16:32, 33.) Ania ti nakatulong ken Jesus tapno situtured a masangona dagiti bumusbusor kenkuana ken agtalinaed a matalek agingga iti ipapatayna? Nagtalek ken Jehova. Ammo ni Jesus a maipasango dagiti pasurotna kadagiti kasta a suot, isu a kiniddawna ken Jehova nga aywananna ida. (Juan 17:11) Apay a mangpatured dayta kadatayo? Ngamin, adayo a nabilbileg ni Jehova ngem kadagiti bumusbusor kadatayo. (1 Juan 4:4) Makitkitana ti amin. Kombinsidotayo a no agtalektayo ken Jehova, tulongannatayo a manglaban kadagiti pagbutbutngantayo ket tumuredtayo.

13. Kasano nga impakita ni Jose a taga-Arimatea ti kinatured?

¹³ Kitaentayo ti ulidan ni Jose a taga-Arimatea. Raraemen unay dagiti Judio. Maysa isuna a miembro ti Sanhedrin, ti korte suprema dagiti Judio. Ngem bayat ti ministerio ni Jesus ditoy daga, saan a natured ni Jose. Imbaga ni Juan a ni Jose ket “adalan ni Jesus ngem inlimedna dayta ta mabuteng kadagiti Judio.” (Juan 19:38) Uray no interesado ni Jose iti mensahe ti Pagarian, inlimedna iti sabsabali nga adda pammatina ken Jesus. Mabuteng a mapukawna ti mararaem a posisionna iti kagimongan. Ngem idi natayen ni Jesus, kastoy ti ibaga ti Biblia nga inaramid ni Jose: “Inturturedna ti napan ken Pilato ket kiniddawna ti bangkay ni Jesus.” (Mar. 15:42, 43) Impakaammo met laengen ni Jose a maysa isuna kadagiti adalan ni Jesus.

14. Ania ti masapul nga aramidem no adda panagbutengmo iti tao?

¹⁴ Mabutengka met kadi iti tao a kas idi ken Jose? Iti eskuelaan wenno iti trabaho, mabainka kadi no dadduma a mangyam-ammo iti bagim a maysaka kadagiti Saksi ni Jehova? Agpangpangaduaka kadi nga agbalin nga agibumbunannag wenno agpabautisar gapu ta madanaganka no anianto ti panunoten ti dadduma maipapan kenka? Dimo ipalubos a dagita a rikna ti manglapped kenka a mangaramid iti umiso. Sipapasnek nga agkararagka ken Jehova. Kiddawem a paturedennaka a mangaramid iti pagayatanna. Bayat a makitkitam a sungsungbatan ni Jehova dagiti kararagmo, lallalo a pumigsa ti pakinakemmo ken agbalinka a naturtured.—Isa. 41:10, 13.

15. Kalpasan a nagparang ni Jesus kadagiti adalanna, ania ti inaramidda gapu iti ragsakda? (Lucas 24:52, 53)

¹⁵ Nakalidliday dagiti adalan idi natay ni Jesus. Imadyinem nga addaka iti situasionda.  Natayanda iti ipatpateg a gayyem ken nariknada a kasla awanen ti namnamada. (Luc. 24:17-21) Ngem idi nagparang kadakuada ni Jesus, impaawatna kadakuada ti papelna iti pannakatungpal dagiti padto ti Biblia. Inikkanna met ida iti nagpateg a trabaho. (Luc. 24:26, 27, 45-48) Idi umulin idiay langit ni Jesus 40 nga aldaw kalpasanna, rimmagsaken dagiti naliday idi nga adalan. Nakaragragsakda ta ammoda a sibibiag ti Apoda ken nakasagana a tumulong kadakuada a mangaramid iti baro nga annongenda. Gapu iti rag-oda, natignayda nga agtultuloy a mangidaydayaw ken Jehova.—Basaen ti Lucas 24:52, 53; Aramid 5:42.

16. Kasanotayo a matulad dagiti adalan ni Jesus?

¹⁶ Kasanotayo a matulad dagiti adalan ni Jesus? Maragsakantayo nga agdaydayaw ken Jehova saan laeng a bayat ti tiempo ti Memorial no di ket iti intero a tawen. Maaramidtayo dayta no iyun-unatayo ti Pagarian ti Dios iti biagtayo. Kas pagarigan, adu ti nangbalbaliw iti eskediul ti trabahoda tapno makiramanda iti ministerio, makaatenderda kadagiti gimong, ken regular a maangayda ti Panagdaydayaw ti Pamilia. Adda pay ketdi dagidiay saan a gimmatang kadagiti banag nga ibilang ti dadduma a kasapulan tapno ad-adda a makatulongda iti kongregasion wenno makapagserbida iti lugar nga addaan iti dakdakkel a panagkasapulan kadagiti agibumbunannag iti Pagarian. Masapul nga agibturtayo tapno makapagtultuloytayo nga agserbi ken Jehova. Ngem ikarkarina a sibabaknang a bendisionannatayo no iyun-unatayo dagiti interes ti Pagarian iti biagtayo.—Prov. 10:22; Mat. 6:32, 33.

17. Ania dagiti kayatmo nga aramiden iti tiempo ti Memorial? (Kitaen ti ladawan.)

¹⁷ Magagarantayo unayen a mangselebrar iti Memorial inton Martes, Abril 4. Ngem saanmon nga urayen dayta nga aldaw sakbay nga utobem ti biag ken ipapatay ni Jesus ken ti ayat nga impakitana kadatayo agraman ti panagayat ni Jehova kadatayo. Aprobetsarem ti tunggal gundaway bayat ti intero a tiempo ti Memorial a mangaramid iti dayta. Kas pagarigan, mangiwayaka iti tiempo a mangbasa ken mangutob kadagiti pasamak a makita iti tsart a “Ti Maudi a Lawas ti Biag ni Jesus Ditoy Daga” iti Apendise B12 ti Baro a Lubong a Patarus. Bayat nga ar-aramidem dayta, kitaem dagiti teksto ti Biblia a makatulong tapno lallalo a maipakitam ti panagyaman, ayat, tured, ken ragsakmo. Kalpasanna, panunotem dagiti espesipiko a pamay-an a maipakitam ti naimpusuan nga apresasionmo. Masiguradom nga apresiarento ni Jesus ti amin nga ar-aramidem a manglaglagip kenkuana bayat daytoy tiempo ti Memorial.—Apoc. 2:19.