1. Ania ti maimadyinmo no panunotem ni Jehova?

 NAPADASMO kadin nga imadyinen no ania ni Jehova? Ania ti mapanunotmo no agkarkararagka kenkuana? Nupay saantayo a makita ni Jehova, nagduduma ti panangdeskribir ti Biblia kenkuana. Naawagan ni Jehova kas ti “init ken kalasag” ken “mangibus nga apuy.” (Sal. 84:11; Heb. 12:29) Nailadawan ti presensiana a kasla safiro a bato, nakasilsileng a metal, ken nakarangrangrang a bullalayaw. (Ezek. 1:​26-28) Mabalin nga agamangatayo kadagitoy a panangiladawan maipapan ken Jehova wenno baka mariknatayo nga awan kaimudingantayo.

2. Ania dagiti mabalin a manglapped iti dadduma nga umasideg ken Jehova?

² Gapu ta saantayo a makita ni Jehova, mabalin a marigatantayo a mamati nga ay-ayatennatayo. Dadduma ti mangpampanunot a saan a pulos ida nga ayaten ni Jehova ta baka saanda a napadasan ti maayat. Baka dimmakkelda a saanda a narikna ti ayat ti maysa nga ama. Maawatan ni Jehova dagita a rikna ken ti epekto dagita kadatayo. Tapno matulongannatayo, us-usarenna ti Saona a mangyam-ammo iti makaay-ayo a personalidadna.

3. Apay a masapul nga adalentayo a naimbag ti ayat ni Jehova?

³ Ti sao a kasayaatan a mangiladawan ken Jehova ket ayat. Ibagbaga ti Biblia a ti Dios ket ayat. (1 Juan 4:8) Amin nga ar-aramiden ti Dios ket gapu iti ayat. Nakadungdungngo ti Dios ken nakabilbileg ti ayatna nga uray la ay-ayatenna dagiti saan a mangay-ayat kenkuana. (Mat. 5:​44, 45) Iti daytoy nga artikulo, adalentayo a naimbag ti maipapan ken Jehova ken ti ayatna. No ad-adda a maam-ammotayo ti Diostayo, lallalo nga ayatentayo isuna.

 AY-AYATENNATAYO UNAY NI JEHOVA

4. Ania ti mariknam gapu ta sidudungngo nga ay-ayatennaka ni Jehova? (Kitaen met ti ladawan.)

⁴ “Ni Jehova ket nadungngo unay.” (Sant. 5:11) Iti Biblia, inyarigna ti bagina iti maysa a nadungngo nga ina. (Isa. 66:​12, 13) Imadyinem ti maysa nga ina a sidudungngo a mangay-aywan iti bassit pay nga anakna. Saklotenna, ray-awenna, ken kasaritana iti nadungngo ken naalumamay a pamay-an. Asikasuenna a dagus no agsangit ti anakna wenno adda mariknana a nasakit. Kasta met a no masaksaktantayo, siguraduen ni Jehova nga ipariknana nga ay-ayatennatayo. Insurat ti salmista: “Idi immadu dagiti pakadanagak, liniwliwa ken pinaragsaknak.”—Sal. 94:19.

5. Para kenka, ania ti kaipapanan ti napudno nga ayat ni Jehova?

⁵ Napudno ni Jehova. (Sal. 103:8) Saan a mauma a mangayat kadatayo uray agkamalitayo. Namin-adu a sinaktan ti nasion ti Israel ti rikna ni Jehova. Ngem no agbabawida, ipasiguradona ti di agpatingga nga ayatna. Ibagana iti tunggal maysa kadakuada: “Nagbalinka a napateg kaniak, naibilangka a nadayaw, ket inayatka.” (Isa. 43:​4, 5) Saan nga agbalbaliw ti ayat ti Dios. Kanayon a mariknatayo dayta. Uray no makaaramidtayo kadagiti nadagsen a basol, saannatayo a baybay-an ni Jehova. No agbabawi ken agsublitayo ken Jehova, makitatayo nga ay-ayatennatayo latta. Ikarkarina a “naan-anayto a mangpakawan.” (Isa. 55:7) Deskribiren ti Biblia a dayta a pammakawan nga “ipaay ni Jehova” ket mangyeg iti “pannakabang-ar.”—Ara. 3:19.

6. Ania ti masursurotayo iti Zacarias 2:8 maipapan ken Jehova?

⁶ Basaen ti Zacarias 2:8. Impadanatayo ni Jehova iti alintatao ti matana. Ti mata ket sensitibo ken napateg a paset ti bagi. Isu a kas man la ibagbaga ni Jehova: ‘Asinoman a mangdangran kenka, dangdangranna ti ipatpategko.’ Gapu ta ay-ayatennatayo ni Jehova, ammona a dagus ti marikriknatayo ken magagaran a mangsalaknib kadatayo. Masaksaktan no masaksaktantayo, isu a masiguradotayo a sungbatanna no ikararagtayo: “Salaknibannak a kas iti alintatao ti matam.”—Sal. 17:8.

7. Apay a masapul a patibkerem ti panagtalekmo nga ay-ayatennaka ni Jehova?

⁷ Kayat ni Jehova a kombinsidoka nga ay-ayatennaka. Ngem ammona a gapu kadagiti  saan a nasayaat a kapadasam, mabalin a pagduaduaam nga ay-ayatennaka. Wenno baka maipaspasangoka kadagiti situasion a mangsubok iti panagtalekmo iti ayat ni Jehova. Ania ti mangpatibker iti panagtalekmo? Adalem no kasano nga ipakpakita ni Jehova ti ayatna ken Jesus, kadagiti dinutokan ti espiritu, ken kadatayo amin.

NO KASANO NGA IPAKPAKITA NI JEHOVA TI AYATNA

8. Apay a kombinsido ni Jesus nga ay-ayaten isuna ti Amana?

⁸ Saanen a mabilang a panawen nga agkadkadua da Jehova ken ti dungdungnguenna nga Anak isu a nakadekdekketda ken ay-ayatenda unay ti maysa ken maysa. Isuda ti kabayaganen nga agama iti intero nga uniberso. Nalawag nga inyebkas ni Jehova ti ayatna ken Jesus, kas mabasatayo iti Mateo 17:5. Mabalin nga imbaga latta koman ni Jehova, ‘Daytoy ti Anakko a pakaragsakak.’ Ngem kayatna a maammuantayo a kasta unay ti panagayatna ken Jesus isu nga inawaganna iti “Anakko a dungdungnguek.” Impagpannakkel ni Jehova ni Jesus nangruna ta situtulok nga impaayna ti biagna. (Efe. 1:7) Saan a nagduadua ni Jesus nga ay-ayaten isuna ti Amana. Napaypayso kenkuana ti ayat ni Jehova ta uray la nariknana dayta iti kaungganna. Maulit-ulit nga imbagana a sigurado nga ay-ayaten isuna ti Amana.—Juan 3:35; 10:17; 17:24.

9. Ania a sao ti mangipakita nga ay-ayaten ni Jehova dagiti dinutokan ti espiritu? Ilawlawag. (Roma 5:5)

⁹ Ipakpakita met ni Jehova ti ayatna kadagiti dinutokan ti espiritu. (Basaen ti Roma 5:5.) Kitaem ti sao nga “imbukbok.” Sigun iti maysa a reperensia, nadeskribir dayta kas ti “nagadu a danum a maibukbok kadatayo.” Talaga nga ipakita dayta nga ilustrasion nga aglaplapusanan ti ayat ni Jehova para kadagiti dinutokan ti espiritu! Ammoda “nga ay-ayaten [ida] ti Dios.” (Jud. 1) Inyebkas ni apostol Juan ti marikriknana idi insuratna: “Nagdakkel la ketdin ti ayat nga impakita kadatayo ti Ama! Inawagannatayo kas annakna ket agpayso nga annaknatayo ti Dios!” (1 Juan 3:1) Dagiti laeng kadi dinutokan ti espiritu ti ay-ayaten ni Jehova? Saan. Pampaneknekan ni Jehova nga ay-ayatennatayo amin.

10. Ania ti kapigsaan nga ebidensia nga ay-ayatennaka ni Jehova?

¹⁰ Ania ti kapigsaan nga ebidensia ti ayat ni Jehova? Ti subbot—ti kasayaatan nga ebkas ti ayat iti intero nga uniberso! (Juan 3:16; Roma 5:8) Inted ni Jehova ti ipatpategna nga Anak ken impalubosna a matay para iti amin a tattao tapno mapakawan dagiti basoltayo ken agbalintayo a gagayyemna. (1 Juan 4:10) No kanayon nga utobentayo ti gatad nga imbayad da Jehova ken Jesus, ad-adda a maawatantayo ti kadakkel ti ayatda iti tunggal maysa kadatayo. (Gal. 2:20) Ti subbot ket saan a naibayad tapno laeng masurot ti paglintegan ni Jehova para iti hustisia. Imbes ketdi, dayta ket regalo a maigapu iti ayat. Pinaneknekan ni Jehova nga ay-ayatenna ti tunggal maysa kadatayo idi insakripisiona ti kapatgan kenkuana—ni Jesus. Impalubos ni Jehova nga agrigat ken matay ti Anakna para kadatayo.

11. Ania ti masursurotayo iti Jeremias 31:3?

¹¹ Kas nakitatayon, saan laeng a basta marikna ni Jehova nga ay-ayatennatayo, no di ket ibagbagana nga ay-ayatennatayo unay. (Basaen ti Jeremias 31:3.) Inyasidegnatayo ni Jehova kenkuana gapu ta ay-ayatennatayo. (Idilig ti Deuteronomio 7:​7, 8.) Awan ti aniaman ken asinoman a makaisina kadatayo iti dayta nga ayat. (Roma 8:​38, 39) Ania ti epekto kenka daytoy nga ayat? Basaem ti Salmo 23, ken kitaem ti epekto ti ayat ken nadungngo a panangaywan ni Jehova ken ni David ken ti epekto dayta iti tunggal maysa kadatayo.

 ANIA TI EPEKTO KENKA TI AYAT NI JEHOVA?

12. Ania ti pakabuklan ti Salmo 23?

¹² Basaen ti Salmo 23:​1-6. Ti Salmo 23 ket maysa a kanta a mangyebkas iti panagtalek iti ayat ken nadungngo a panangaywan ni Jehova. Ni David ti nangisurat iti dayta a salmo a mangdeskribir iti nasinged a relasionna iti Pastorna a ni Jehova. Natalged ti rikna ni David ta ipalpalubosna a ni Jehova ti mangiturong kenkuana, ken naan-anay nga agpampannuray iti Diosna. Ammo ni David nga inaldaw nga ipakpakita ni Jehova ti ayatna kenkuana. Apay a kombinsido unay ni David?

13. Apay a kombinsido ni David nga aywanan isuna ni Jehova?

¹³ ”Saanakto nga agkurang iti aniaman.” Narikna ni David a nagsayaat ti pannakaaywanna ta kanayon nga ipapaay ni Jehova ti amin a kasapulanna. Ammo met ni David a gayyemna ni Jehova ken an-anamonganna. Isu nga aniaman ti mapasamak kenkuana, masiguradona a kanayon nga ipaay ni Jehova ti amin a kasapulanna. Naan-anay a nagtalek ni David iti nadungngo a panagayat ni Jehova isu a saan a nadanagan. Gapu iti dayta, nakaragragsak isuna ken kontento.—Sal. 16:11.

14. Ania dagiti mabalin nga aramiden ni Jehova tapno siaayat a maaywanannatayo?

¹⁴ Siaayat nga ay-aywanan ni Jehova ti tunggal maysa kadatayo, nangruna no adda dagiti nasaem a mapasamak iti biagtayo. Napaneknekan dayta ni Claire, a a nasurok a 20 a tawen a nagserbi iti Bethel. Dina ammo ti aramidenna idi nagsasaruno ti problema a dimteng iti pamiliana. Naistrok ni tatangna, nailaksid ti maysa a kabsatna, ken nalugi ti bassit a negosio ti pamiliada, sa innala pay ti banko ti  balayda. Kasano nga impakita ni Jehova ti naayat a panangaywanna kadakuada? Imbaga ni Claire: “Sinigurado ni Jehova a kanayon nga adda ti amin a kasapulan ti pamiliak iti kada aldaw. Masansan a sobra pay ketdi dayta ngem iti kasapulanmi! Kanayon a pinampanunotko dagiti kanito a nariknak ti nadungngo a panagayat ni Jehova, ket diakto pulos malipatan dagita. Nakatulong dagita tapno siraragsak a maitultuloyko ti agserbi aniaman dagiti suot a sumangbay iti biagko.”

15. Apay a narikna ni David a napabaro ti pigsana? (Kitaen met ti ladawan.)

¹⁵ “Ti pigsak pabaruenna.” Adda dagiti tiempo a narigatan unay ni David gapu iti amin a problema ken suot a napasaranna. (Sal. 18:​4-6) Ngem napabaro ti pigsana gapu iti nadungngo a panagayat ken panangaywan ni Jehova. Inturong ni Jehova ti napaksuyan a gayyemna “kadagiti naraber a karuotan” ken ‘iti igid ti dandanum a paginanaan.’ Kas resultana, pimmigsa manen ni David ken siraragsak a naitultuloyna ti agserbi ken Jehova.—Sal. 18:​28-32.

16. Kasano a napabaro ti pigsam gapu iti ayat ni Jehova?

¹⁶ Kasta met la ita, “gapu iti napudno nga ayat ni Jehova, saantayo pay a natay” uray maipaspasangotayo kadagiti pakasuotan ken rigat iti biag. (Un. 3:22; Col. 1:11) Kitaentayo ti kapadasan ni Rachel. Bayat ti COVID-19 pandemic, permi ti lidayna ta pinanawan ni lakayna ni Jehova, ken uray isuna. Ania ti inaramid ni Jehova para kenkuana? Imbaga ni Rachel: “Sinigurado ni Jehova a mariknak a maay-ayatak latta. Impaayannak iti nagadu a gagayyem a nangiwaya iti tiempo tapno makaduadak. Nangyegda iti makan, tinawagandak, ken tineksandak kadagiti makaparegta a teksto ken mensahe. Pinaragsakdak met ken kanayon nga impalagipda nga ay-aywanannak ni Jehova. Kanayon nga agyamyamanak ken Jehova ta inikkannak iti dakkel ken nadungngo a pamilia.”

17. Apay nga ‘awan ti pagbutngan’ ni David?

¹⁷ “Awan ti pagbutngak, ta sika ti kaduak.” Masansan a nagpeggad idi ti biag ni David ken nagadu dagiti nabileg a kabusorna. Ngem nariknana a natalged ken protektado isuna gapu ta ay-ayaten ni Jehova. Narikna ni David a kanayon a kaduana ni Jehova iti amin a situasion isu a kalmado ti riknana. Naikantana pay ketdi: “[Ni Jehova] inispalnak iti amin a pagbutbutngak.” (Sal. 34:4) Nupay adda dagiti tiempo a permi ti buteng ni David, naparmekna dayta. Ngamin, nariknana a nabilbileg ti ayat ni Jehova ngem kadagiti pagbutbutnganna.

18. Kasano a ti panangipasigurado ni Jehova nga ay-ayatennaka ti mangpabileg kenka no mabutbutengka?

¹⁸ Kasano a ti panangipasigurado ni Jehova  nga ay-ayatennatayo ti mangpabileg kadatayo no maipaspasangotayo kadagiti nakabutbuteng a situasion? Imbaga ti payunir a ni Susi ti nariknada ken lakayna idi nagpakamatay ti anakda: “No adda bigla a nakas-ang a mapasamak iti biagmo, mariknam a kakaasika ken awan gawgawaymo. Ngem gapu iti nadungngo a panagayat ni Jehova, nariknami a natalged ken protektadokami.” Malagip met ti nadakamaten a ni Rachel: “Maysa a rabii, permi ti liday, danag, ken butengko isu nga inyanug-ogko dayta ken Jehova. Kalpasanna, nariknak a liniwliwana ti pusok ken pinagkalmanak, kas iti ar-aramiden ti maysa nga ina iti anakna. Idi kuan, nakaturogak. Diakto pulos malipatan dayta a kanito.” Uppat a tawen a naibalud ti panglakayen a ni Tasos gapu ta dina kayat ti agsoldado. Kasano a nariknana ti ayat ken panangaywan ni Jehova? Imbagana: “Impaay ni Jehova ti amin a kasapulak ken ad-adu pay dayta ngem iti ninamnamak. Gapu iti dayta, lallalo a bimmileg ti panagtalekko kenkuana. Ken babaen ti espiritu ni Jehova, nagtalinaedak a naragsak nupay makapaliday ti kasasaad iti pagbaludan. Dayta ti nangipasigurado kaniak a no kanayonak a makipagtrabaho ken Jehova, lallalo a makitak ti kinaimbagna. Isu a nagregular payunirak bayat nga addaak iti pagbaludan.”

UMASIDEGKA ITI NADUNGNGO A DIOSMO

19. (a) Gapu ta ammotayo nga ay-ayatennatayo ti Dios, kasano ti panagkararagtayo? (b) Kadagiti nausar a mangiladawan iti ayat ni Jehova, ania ti magusgustuam unay? (Kitaen ti kahon a “ Dagiti Teksto a Mangiparikna Kadatayo nga Ay-ayatennatayo Unay ni Jehova.”)

¹⁹ Paneknekan dagiti napagsasaritaantayo a kapadasan a kaduatayo ni Jehova, “ti Dios ti ayat”! (2 Cor. 13:11) Interesado iti tunggal maysa kadatayo. Kombinsidotayo a “tagiragsaken[tayo] ti napudno nga ayatna.” (Sal. 32:10) No kanayon nga utobentayo no kasano nga ipakpakitana nga ay-ayatennatayo, lallalo a napaypayso isuna kadatayo ken nasingsingedtayo kenkuana. Saantayto a bumdeng nga agkararag kenkuana ken ibaga a kasapulantayo unay ti ayatna. Mabalintay met nga ibaga kenkuana ti amin a pagdandanagantayo, ta agtalektayo a maawatannatayo ken magagaran a tumulong kadatayo.—Sal. 145:​18, 19.

20. Kasano a lallalo a sumingedtayo ken Jehova gapu iti ayatna?

²⁰ No kasano a kayattayo ti aginudo no nalam-ek, kayattayo met ti umasideg ken Jehova ta nabara ti ayatna. Nakadungdungngo ni Jehova ken nakabilbileg ti ayatna. Isu nga agragsakka ta ay-ayatennaka unay ni Jehova. Ket sapay koma ta subadantayo ti ayatna babaen ti panangibagatayo: “Ay-ayatek ni Jehova”!—Sal. 116:1.