Dadduma ti dimmakkel kadagiti kultura nga ibilang ti adu a lallaki a nababbaba dagiti babbai. Kas pagarigan, imbaga ni Hans a maysa a manangaywan iti sirkito idiay Bolivia a dadduma a lallaki ti napadakkel iti kultura a mangiparparegta kadagiti lallaki nga ipagpannakkelda ti kinalalakida. Patien dagitoy a lallaki a nangatngatoda ngem kadagiti babbai ken masansan a saanda a resrespetuen ida. Imbaga met ti maysa a panglakayen idiay Taiwan a ni Sheingxian: “Idiay lugarmi, pampanunoten ti adu a lallaki a saan ida a masapul a pakibiangan dagiti babbai. No dakamaten ti maysa a lalaki iti padana a lallaki ti opinion ti maysa a babai, mabalin nga ibilangda isuna a nakapuy.” Saan met nga ipadlaw ti dadduma a lallaki ti panangtagibassitda iti babbai. Kas pagarigan, mabalin a pagaangawanda dagiti babbai.

Imbag laengen ta mabalin a makapagbalbaliw ti maysa a lalaki, aniaman a kultura ti dimmakkelanna. Kabaelan a pagballigian dagiti lallaki ti riknada a nangatngatoda ngem kadagiti babbai. (Efe. 4:​22-24) Maaramidda dayta no tuladenda ti ulidan ni Jehova. Iti daytoy nga artikulo, pagsasaritaantayo no kasano ti panangtrato ni Jehova kadagiti babbai, no kasano a matulad dagiti brother ti panangtrato ni Jehova kadagiti babbai, ken no kasano nga agbalin nga ulidan dagiti panglakayen iti panangrespeto kadagiti sister.

KASANO TI PANANGTRATO NI JEHOVA KADAGITI BABBAI?

Nangipakita ni Jehova iti perpekto nga ulidan iti panangtrato kadagiti babbai. Kas mannakipagrikna nga Ama, ay-ayatenna ti amin a tattao. (Juan 3:16) Ibilangna met dagiti matalek a babbai  kas napapateg nga annakna. Usigentayo ti dadduma a pamay-an no kasano nga ipakpakita ni Jehova nga ay-ayaten ken raraemenna dagiti babbai.

Patas ti panangtratona kadakuada. Pinarsua ni Jehova dagiti lallaki ken babbai a kaladladawanna. (Gen. 1:27) Saanna nga inaramid dagiti lallaki a nalalaing wenno ad-adu ti abilidadda ngem kadagiti babbai; wenno saanna met a kaykayat dagiti lallaki ngem kadagiti babbai. (2 Cron. 19:7) Pinarsuana nga agpada dagiti lallaki ken babbai nga addaan iti abilidad a mangtarus kadagiti kinapudno iti Biblia ken mangtulad kadagiti nagsayaat a kualidadna. Ap-apresiaren met ni Jehova agpadpada dagiti lallaki ken babbai nga addaan iti pammati kenkuana. Inikkanna ida iti namnama nga agbiag nga agnanayon iti paraiso a daga wenno agserbi kas ar-ari ken papadi idiay langit. (2 Ped. 1:​1, ftn.) Nalawag a saan a tagtagibassiten ni Jehova dagiti babbai.

Dengdenggenna ida. Interesado ni Jehova kadagiti marikrikna ken pakaseknan dagiti babbai. Kas pagarigan, dinengngeg ken pinatganna dagiti kararag da Raquel ken Hanna. (Gen. 30:22; 1 Sam. 1:​10, 11, 19, 20) Inwanwan met ni Jehova dagiti mannurat ti Biblia a mangiraman kadagiti salaysay maipapan kadagiti lallaki a dimngeg kadagiti babbai. Kas pagarigan, sinurot ni Abraham ti instruksion ni Jehova a denggenna ni baketna a Sara. (Gen. 21:​12-14) Dimngeg ni Ari David ken Abigail. Kinapudnona, nariknana a ni Jehova ti nangibaon ken Abigail a makisarita kenkuana. (1 Sam. 25:​32-35) Ni Jesus, a naan-anay a nangtulad kadagiti kualidad ni Amana, ket dimngeg iti nanangna a ni Maria. (Juan 2:​3-10) Ania ti ipakita dagita a pagarigan? Ti maysa a pamay-an nga ipakpakita ni Jehova a raraemenna dagiti babbai ket babaen ti panangdengngegna kadakuada.

Pagtaltalkanna ida. Kas pagarigan, pinagtalkan ni Jehova ni Eva a tumulong a mangaywan iti intero a daga. (Gen. 1:28) Iti panangaramidna iti dayta, impakitana nga ibilbilangna ni Eva a saan a nababbaba ngem iti asawana a ni Adan, no di ket kas kaparehana. Pinagtalkan met ni Jehova da propeta Debora ken Hulda a mangbalakad iti ilina, agraman iti maysa nga ukom ken ari. (Uk. 4:​4-9; 2 Ar. 22:​14-20) Ita, pagtaltalkan ni Jehova dagiti Kristiano a babbai a mangitungpal iti trabahona. Dagitoy a matalek a sister ket agserserbi kas agibumbunannag, payunir, ken misionera. Tumultulongda iti panagdisenio, panagibangon, ken panangmantener kadagiti Kingdom Hall ken pasilidad ti sangay. Dadduma ti agserserbi iti Bethel ken kadagiti remote translation office. Dagitoy a sister ket kas iti dakkel nga armada nga us-usaren ni Jehova a mangaramid iti pagayatanna. (Sal. 68:11) Nalawag a saan a matmatmatan ni Jehova dagiti babbai kas nakapuy wenno saan a makabael.

KASANO A MASURSURO DAGITI BROTHER TI PANANGTRATO NI JEHOVA KADAGITI BABBAI?

Datayo a brother, tapno maammuantayo no tultuladentayo ti panangtrato ni Jehova kadagiti Kristiano a sister, masapul nga usigentayo ti panagpampanunot ken tigtignaytayo. Tapno maaramidtayo dayta, kasapulantayo ti tulong. Agusar ti maysa a doktor iti X-ray tapno maammuanna no adda problema ti puso ti maysa a tao. Kasta met, makatulong ti nasayaat a gayyem ken ti Sao ti Dios tapno maammuantayo no negatibo ti riknatayo kadagiti babbai. Ania ti mabalintayo nga aramiden tapno maawattayo dayta a tulong?

Agdamag iti nasayaat a gayyem. (Prov. 18:17) Mabalintayo ti agpatulong iti maysa a gayyem a pagtaltalkantayo ken pagaammo a naimbag ken nainkalintegan. Isaludsodtayo: “Ania ti makitkitam a panangtratok kadagiti sister? Maibagada kadi a resrespetuek ida? Adda kadi pay maaramidak tapno sumayaat ti panangtratok kadakuada?” No ibaga ti gayyemmo dagiti masapul a balbaliwam, saanmo koma nga irasonan ti bagim. Ikagumaam ketdi ti agbalbaliw.

Adalen ti Sao ti Dios. Ti kasayaatan a pamay-an tapno maammuantayo no nasayaat ti panangtratotayo kadagiti sister ket ti panangusartayo iti Sao ti Dios a tumulong kadatayo a mangusig iti panagpampanunot ken tigtignaytayo. (Heb. 4:12) Bayat nga ad-adalentayo ti Biblia, maam-ammotayo dagiti lallaki a nasayaat ti panangtratoda kadagiti babbai ken dagiti lallaki a dakes ti panangtratoda kadakuada. Mabalintayo nga ikompara dagiti inaramidda kadagiti ar-aramidentayo. Kasta met, no pagdidiligentayo dagiti bersikulo ti Biblia, maliklikantayo ti agkamali no maipapan iti pannakaawattayo kadagiti teksto a kas man la mangibagbaga a nababbaba dagiti babbai. Kas pagarigan, sigun iti 1 Pedro 3:​7, ti asawa a babai ket ‘mapadayawan ta nakapkapuyda  a kas iti narasi a pagkargaan.’ b Kayat kadi a sawen dayta a nababbaba dagiti babbai—ket nalalaing wenno mas makabael—dagiti lallaki? Saan! Ikomparatayo ti 1 Pedro 3:7 iti Galacia 3:​26-29, a mangibagbaga a pinili ni Jehova agpadpada dagiti lallaki ken babbai a makipagturayto ken Jesus idiay langit. No adalentayo ngarud ti Sao ti Dios ken agdamagtayo iti nasayaat a gayyem, maammuantayo no umiso ti panangtratotayo kadagiti sister.

KASANO A MAIPAKITA DAGITI PANGLAKAYEN TI RESPETO KADAGITI SISTER?

Masursuro dagiti brother iti kongregasion ti nadayaw a panangtrato kadagiti sister no tuladenda ti ulidan dagiti naayat a panglakayen. Kasano a mayulidan dagiti panglakayen ti panangipakita iti respeto kadagiti sister? Usigentayo ti dadduma nga espesipiko a pamay-an.

Komendaranda dagiti sister. Nangipaay ni apostol Pablo iti nasayaat a pagtuladan para kadagiti panglakayen. Iti suratna iti kongregasion iti Roma, kinomendaranna ti sumagmamano a sister. (Roma 16:12) Maimadyinmo kadi ti ragsak dagidiay a sister idi naibasa ti surat ni Pablo iti kongregasion? Kasta met, sipaparabur a komkomendaran dagiti panglakayen dagiti sister gapu kadagiti nagsasayaat a kualidadda ken iti maar-aramidanda para ken Jehova. Makatulong dayta tapno marikna dagiti sister a maresrespeto ken maipatpategda iti kongregasion. Ti makaparegta a sasao ti maysa a panglakayen ti mabalin nga eksakto a kasapulan dagita a sister tapno maitultuloyda ti simamatalek a panagserbida ken Jehova.—Prov. 15:23.

No komendaran dagiti panglakayen dagiti sister, naimpusuan ken espesipiko koma. Apay? Kuna ti sister a ni Jessica: “Nagsayaat no ibaga dagiti brother iti maysa a sister, ‘Mayat ti inaramidmo.’  Ngem mas maapresiarmi no komendarandakami dagiti brother gapu iti espesipiko nga inaramidmi, kas iti panangisuromi kadagiti annakmi nga agtalnada kadagiti gimong wenno no dagasenmi ti mayad-adalan iti Biblia a makigimong.” No espesipiko ti komendasion dagiti panglakayen kadagiti sister, maipariknada kadakuada a maipatpategda ken kasapulan ida ti kongregasion.

Dumngegda kadagiti sister. Bigbigen dagiti napakumbaba a panglakayen a dagiti sister ket addaan kadagiti nasayaat nga ideya. Dagiti kasta a panglakayen dawatenda dagiti suhestion dagiti sister ken dumngegda a naimbag. Dagiti panglakayen maparegtada dagiti sister ken uray isuda ket makasursuro met. Kasano? Kuna ti panglakayen a ni Gerardo nga agserserbi iti Bethel: “Nakitak a nasaysayaat dagiti maaramidko no dawatek ti opinion dagiti sister. Masansan a nabaybayagdan iti dayta a trabaho ngem iti kaaduan a brother.” Iti kongregasion, adu a sister ti agserserbi kas payunir, isu a kabesadoda dagiti tattao iti teritoria. Kuna ni Bryan a maysa a panglakayen: “Nagadu ti maar-aramidan dagiti sister para iti organisasion isu nga agsursurotayo kadagiti kapadasanda!”

Masirib dagiti panglakayen no saanda a dagus a laksiden dagiti suhestion dagiti sister. Apay? “Ti opinion ken kapadasan ti maysa a sister ket mabalin a makatulong iti maysa a brother a mangpalawa iti kapanunotanna iti maysa a banag ken tapno ad-adda a maawatanna ti rikrikna ti dadduma,” kuna ti panglakayen a ni Edward. (Prov. 1:5) Ken uray no saan a masurot ti suhestion ti sister, mabalin latta nga agyaman ti panglakayen iti obserbasion ti sister ken iti panangiranudna kadagiti opinionna.

Sanayenda dagiti sister. Masirib dagiti panglakayen no mangbirokda kadagiti gundaway a mangsanay kadagiti sister. Kas pagarigan, mabalinda nga isuro dagiti sister a mangidaulo kadagiti taripnong sakbay ti panangasaba no awan ti presente a bautisado a brother. Mabalinda a suruan ida nga agusar kadagiti tool wenno machine tapno makatulongda iti trabaho a panagibangon ken panangmantener kadagiti proyekto ti organisasion. Iti Bethel, dagiti overseer ket nangsanay kadagiti sister a mangasikaso iti nadumaduma a mai-assign a trabaho kas iti maintenance, purchasing, accounting, computer programming, ken dadduma pay. No sanayen dagiti panglakayen dagiti sister, maipariknada nga ibilbilangda ida a makabael ken mapagtalkan.

Us-usaren ti adu a sister dagiti nasursuroda kadagiti panglakayen a tumulong iti dadduma. Kas pagarigan, dadduma a sister ti mangus-usar kadagiti nasursuroda iti konstruksion a tumulong iti sabsabali a mangibangon kadagiti balbalayda kalpasan ti didigra. Dadduma a sister ti mangus-usar kadagiti abilidad a nasursuroda iti panangasaba iti publiko a tumulong a mangsanay iti adu a sister a makiraman iti kasta a panangasaba. Ania ti makuna dagiti sister maipapan kadagiti panglakayen a nangsanay kadakuada? Kuna ni Jennifer: “Idi nakipagtrabahoak iti maysa a proyekto a panagibangon iti Kingdom Hall, inan-anusannak a sinanay ti maysa nga overseer. Naapresiarna ti inaramidko isu a kinomendarannak. Naragsakanak a nakipagtrabaho kenkuana ta nariknak nga adda serserbik ken pagtaltalkannak.”

DAGITI PAGIMBAGAN TI PANANGTRATO KADAGITI SISTER KAS KAPAMILIA

Kas ken Jehova, ay-ayatentayo dagiti matalek a sister! Isu a tratuentayo ida kas kapamilia. (1 Tim. 5:​1, 2) Pribilehiotayo ken ipagpannakkeltayo a makadua ida iti panagserbi. Maragragsakantayo met no mariknada ti ayat ken suportatayo. Kuna ti sister a ni Vanessa: “Agyamyamanak unay ken Jehova ta pasetak ti organisasionna a napno kadagiti brother a talaga a mangpabpabileg kaniak.” Kuna ti maysa sister a taga-Taiwan: “Permi ti yamanko ken Jehova ken iti organisasionna ta ipatpategda unay dagiti babbai ken ti riknami. Dayta ti mangpabpabileg iti pammatik ken lallalo a maap-apresiarko ti pribilehio nga agbalin a paset ti organisasion ni Jehova.”

Maragragsakan la ketdi ni Jehova no makitana dagiti matalek a Kristiano a lallaki a mangikagkagumaan a mangtulad iti panangmatmat ken panangtratona kadagiti babbai! (Prov. 27:11) “Nakababbaba ti panangmatmat ti lubong kadagiti babbai,” kuna ni Benjamin a maysa a panglakayen idiay Scotland. “Isu a no adda iti Kingdom Hall dagiti sister, kayattayo a mariknada a maipatpateg ken maresrespetoda.” Ikagumaantayo koma amin a tuladen ni Jehova babaen ti panangtratotayo kadagiti ipatpategtayo a sister buyogen ti ayat ken respeto a pakaikarianda.—Roma 12:10.