Saan a kanayon a nalaka a lagipen dagiti maad-adaltayo. Ngem nadlawmo kadi a nalaka a lagipen ti adu kadagiti insuro ni Jesus kadatayo? Ngamin, masansan a nagusar kadagiti ilustrasion. Mailadawantayo iti panunottayo dagiti imbaga ni Jesus ket makatulong dayta tapno malagiptayo dagiti insurona. Kasta met, nalaklakam a malagip dagiti maad-adalmo no imadyinem ti basbasaem. Ti maysa a pamay-an a maaramidmo dayta ket babaen ti panangidrowingmo kadagiti maad-adalmo.

Dagiti mangidrowdrowing kadagiti baro a naadalda kaaduanna a mas malagipda dagiti nasursuroda. Nakitada a makatulong kadakuada ti panagdrowing tapno mas maawatanda, saan laeng a dagiti sasao, no di ket uray dagiti kangrunaan a punto nga ad-adalenda. Saan a masapul a komplikado dagiti drowingda. Uray simple laeng. Ipakita met dagiti ebidensia a ti panagdrowing ket ad-adda a makatulong kadagiti nataengan tapno malagipda dagiti maad-adalda.

Inton sumaruno nga agadalka, padasem nga idrowing dagiti nasursurom. Baka masdaawkanto iti kaadu ti malagipmo!