1. Ania ti aramidentayo tapno maparagsaktayo ni Jehova?

 IMADYINEM nga inikkam ti maysa nga ipatpategmo iti espesial a regalo a saan la a napintas no di ket mausarna pay. Madismayaka la ketdi no naammuam a basta indulinna lattan dayta ken saannan nga impateg! Ngem sigurado a maragsakanka no makitam nga us-usarenna dayta ken agyamyaman kenka. Ania ti punto? Inted ni Jehova ti Anakna para kadatayo. Maragsakan la ketdi ni Jehova no ipakitatayo nga agyamyamantayo kenkuana gapu iti dayta a nagpateg a regalona ken iti ayatna a nangtignay kenkuana a mangipaay iti subbot!—Juan 3:16; Roma 5:​7, 8.

2. Ania ti pagsasaritaantayo iti daytoy nga artikulo?

² Ngem iti panaglabas dagiti tawen, baka mangrugin a bumaaw ti apresasiontayo iti subbot. No mapasamak dayta, kas man la indulintayo lattan ti nagpintas a regalo ti Dios kadatayo isu a ditayon makita wenno malagip pay dayta. Tapno saan a mapasamak dayta, masapul a regular a panunotentayo ti inaramid ti Dios ken ni Kristo para kadatayo. Matulongannatayo daytoy nga artikulo tapno maaramidtayo dayta. Pagsasaritaantayo no kasanotayo a magunggonaan iti subbot ita ken iti masanguanan. Pagsasaritaantayo met no kasanotayo a maipakita nga ap-apresiarentayo ti ayat ni Jehova, nangnangruna bayat ti tiempo ti Memorial.

NO KASANOTAYO A MAGUNGGONAAN ITA

3. Ania ti maysa a pamay-an a magunggonaantayo iti subbot ita?

³ Uray ita, magunggonaantayon iti subbot nga impaay ni Kristo. Kas pagarigan, gapu iti subbot, pakpakawanen ni Jehova dagiti  basoltayo. Saan nga obligado a mangaramid iti dayta, ngem kayatna. Inkanta ti agyamyaman a salmista: “Ta naimbagka ken sisasaganaka a mangpakawan, O Jehova.”—Sal. 86:5; 103:​3, 10-13.

4. Siasino ti nangipaayan ni Jehova iti subbot? (Lucas 5:32; 1 Timoteo 1:15)

⁴ Baka marikna ti dadduma a saanda a maikari iti pammakawan ni Jehova. Ti agpayso, awan kadatayo ti maikari. Nabigbig ni apostol Pablo nga isu ket ‘saan a maikari a maawagan iti apostol.’ Nupay kasta, imbagana: “Ngem gapu iti nagpaiduma a kinaimbag ti Dios, maysaak nga apostol.” (1 Cor. 15:​9, 10) Pakawanennatayo ni Jehova no pagbabawyantayo dagiti basoltayo. Apay? Saan a gapu ta maikaritayo iti dayta, no di ket gapu ta ay-ayatennatayo. No mariknam a saanka a maikari, laglagipem nga impaay ni Jehova ti subbot, saan a para kadagiti perpekto a tattao, no di ket para kadagiti agbabbabawi a managbasol.—Basaen ti Lucas 5:32; 1 Timoteo 1:15.

5. Obligado kadi ni Jehova a mangipakita iti asi kadatayo? Ilawlawag.

⁵ Awan koma kadatayo ti makarikna a maikaritayo iti pammakawan ni Jehova gapu laeng ta nabayagen nga agserserbitayo kenkuana. Siempre, ipatpateg ni Jehova ti kinamatalektayo. (Heb. 6:10) Ngem intedna ti Anakna kas sagut nga awan bayadna, saan ketdi a kas bayad iti panagserbitayo kenkuana. Isu a kamali no panunotentayo a maikaritayo iti pammakawan ni Jehova gapu iti kaadu ti maar-aramidantayo para kenkuana. No kasta ti marikriknatayo, kas man la ibagbagatayo a saantayo a kasapulan ti subbot nga impaay ni Kristo.—Idilig ti Galacia 2:21.

6. Apay a nakaregregta idi ni Pablo iti panagserbina ken Jehova?

⁶ Ammo ni Pablo a saan a maikari iti pammakawan ni Jehova, uray no kasano kaadu ti ar-aramidenna iti panagserbina ken Jehova a Dios. Apay ngarud a nakaregregta latta? Saan a tapno paneknekanna a maikari isuna, no di ket tapno ipakitana nga ap-apresiarenna ti nagpaiduma a kinaimbag ni Jehova. (Efe. 3:7) Kas ken Pablo, itultuloytayo ti sireregta nga agserbi ken Jehova, saan a tapno magun-odantayo ti asina, no di ket tapno ipakitatayo nga ap-apresiarentayo dayta.

7. Ania ti sabali pay a pamay-an a magunggonaantayo iti subbot ita? (Roma 5:1; Santiago 2:23)

⁷ Ti maysa pay a magunggonatayo iti subbot ita ket maaddaantayo iti nadekket a personal a relasion ken Jehova. a Kas nadakamat iti napalabas nga artikulo, sipud nayanaktayo, awan pay ti relasiontayo iti Dios. Ngem gapu iti subbot, “naikappiatayon iti Dios,” isu a posiblen nga agbalintayo a gayyemna.—Basaen ti Roma 5:1; Santiago 2:23.

8. Apay a masapul nga agyamantayo ken Jehova gapu iti pribilehiotayo nga agkararag?

⁸ Ti panagkararag ken Jehova ket maysa a nakaes-espesial a banag a maaramidtayo gapu iti nasinged a relasiontayo kenkuana. Dengdenggen ni Jehova saan laeng a dagiti kararag dagiti tattao iti publiko no agtataripnongda, no di ket uray pay dagiti pribado a kararag ti tunggal maysa kadatayo. Gapu iti kararag, agkalma ti pusotayo ken maaddaantayo iti talna ti panunot. Ngem adda pay sabali a pagsayaatan ti kararag. Mapalagdana ti pannakigayyemtayo iti Dios. (Sal. 65:2; Sant. 4:8; 1 Juan 5:14) Idi adda ni Jesus ditoy daga, masansan a nagkarkararag ta ammona a dumdumngeg ni Jehova ken mapabileg ti relasionna iti Amana no aramidenna dayta. (Luc. 5:16) Anian a yamantayo ta gapu iti subbot ni Jesus, agbalintayo a gayyem ni Jehova ken makasaritatayo isuna iti kararag!

 NO KASANOTAYO A MAGUNGGONAAN ITI MASANGUANAN

9. Gapu iti subbot, kasano a magunggonaan dagiti matalek nga agdaydayaw iti Dios iti masanguanan?

⁹ Gapu iti subbot, kasano a magunggonaan dagiti matalek nga agdaydayaw iti Dios iti masanguanan? Ipaayanto ida ni Jehova iti biag nga agnanayon. Adu ti mangpampanunot a kasla imposible dayta gapu ta rinibun a tawen a matmatay dagiti tattao. Nupay kasta, ti orihinal a panggep ni Jehova ket agbiag dagiti tattao iti agnanayon. No saan koma a nagbasol ni Adan, awan koma ti mangipagarup nga imposible ti agbiag nga agnanayon. Ngem uray no kasla nagrigat pay laeng nga imadyinen ita ti biag nga agnanayon, patientayo dayta. Ngamin, ammotayo nga imbayad ni Jehova ti kadakkelan a gatad—ti biag ti mismo nga Anakna tapno laeng agbalin a posible dayta.—Roma 8:32.

10. Ania ti padpadaanan dagiti dinutokan ti espiritu ken ti sabsabali a karnero?

¹⁰ Uray no iti masanguanan pay a mapasamak ti biag nga agnanayon, kayat ni Jehova a seggaantayon dayta ita. Para kadagiti dinutokan ti espiritu, segseggaanda ti makapnek a biag idiay langit inton makikaduada ken Kristo a mangituray iti daga. (Apoc. 20:6) Magagaran met ti sabsabali a karnero nga agbiag iti paraiso a daga nga awanen ti ut-ot ken panagladingit. (Apoc. 21:​3, 4) Maysaka kadi kadagiti sabsabali a karnero a mangnamnama nga agbiag nga agnanayon ditoy daga? Dayta ket saan a pakonsuelo wenno nababbaba a premio! Pinarsua ni Jehova dagiti tattao nga agbiag nga agnanayon ditoy daga. Isu a sigurado a nakaragragsaktayto.

11-12. Ania ti dadduma a bendision idiay Paraiso a kayattayo la unayen a matagiragsak? (Kitaen met dagiti ladawan.)

¹¹ Imadyinem ti biagmo inton Paraison ti daga. Saankanton a madanagan di la ket ta agsakit wenno matayka. (Isa. 25:8; 33:24) Penkenton ni Jehova ti amin nga umiso a tarigagaymo. Ania dagiti kayatmonto nga adalen? Physics? Chemistry? Music? Art? Sigurado a kasapulantayonto dagiti architect a mangdisenio kadagiti balbalay ken pasdek, ken dagiti mangibangon  kadagita, agraman dagiti agmula ken mangisagana iti makan, mangaramid kadagiti remienta, ken mangpapintas ken mangmantener iti aglawlaw. (Isa. 35:1; 65:21) Gapu ta agbiagkanton iti agnanayon, addanton tiempom nga agsursuro iti aniaman a paglaingan a kayatmo.

¹² Sigurado a nakaragragsaktayto inton sabatentayo dagiti napagungaren nga ay-ayatentayo! (Ara. 24:15) Panunotem met ti ragsakmo a mangammo iti ad-adu pay maipapan ken Jehova babaen ti panangadalmo iti nakaad-adu a pinarsuana. (Sal. 104:24; Isa. 11:9) Kangrunaan iti amin, saankanton a makaaramid iti aniaman a basol isu a makapagserbikanton ken Jehova a saanmon a kasapulan a kiddawen ti pammakawanna! Isukatmo kadi dagita a bendision iti masanguanan para laeng iti ‘temporario a ragsak nga ipaay ti basol’? (Heb. 11:25) Sigurado a saan! Adayo a nasaysayaat dagiti bendision a magun-odantayto ngem iti aniaman nga isakripisiotayo ita. Laglagipem, ti Paraiso a daga ket saanto laengen a basta namnama no di ket agpaypaysonton. Nagbalin amin a posible dayta gapu ta kasta la unay ti panagayat ni Jehova kadatayo isu nga intedna ti Anakna kas regalona kadatayo!

IPAKITAM NGA AGYAMYAMANKA ITI AYAT NI JEHOVA

13. Kasanotayo a maipakita nga ap-apresiarentayo ti ayat ni Jehova? (2 Corinto 6:1)

¹³ Kasanotayo a maipakita nga ap-apresiarentayo ni Jehova gapu iti panangipaayna iti subbot? No pagbalinentayo a kapatgan iti biagtayo ti panagserbi kenkuana. (Mat. 6:33) Nainkalintegan dayta ta natay ni Jesus “tapno dagidiay agbiag saanda koman nga agbiag para iti bagida, no di ket para kenkuana a natay maigapu kadakuada ken napagungar.” (2 Cor. 5:15) Sigurado a kayattayo nga ipakita nga agyamyamantayo iti nagpaiduma a kinaimbag ni Jehova.—Basaen ti 2 Corinto 6:1.

14. Kasanotayo a maipakita nga agtaltalektayo iti panangiwanwan ni Jehova?

¹⁴ Maipakitatayo nga ay-ayatentayo ni Jehova no agtalektayo iti panangiwanwanna. Kasano? No agar-aramidtayo kadagiti desision, kas no mangalatayo pay iti nangatngato nga edukasion wenno no ania a klase ti trabaho ti serkantayo, masapul nga ikabilangantayo no ania ti kayat ni Jehova nga aramidentayo. (1 Cor. 10:31; 2 Cor. 5:7) No agtalektayo iti panangiwanwan ni Jehova bayat nga agar-aramidtayo kadagiti desision, bumileg ti pammatitayo ken ad-adda pay a lumagda ti pannakigayyemtayo kenkuana. Agbalin met a napaypayso kadatayo ti namnamatayo nga agbiag nga agnanayon.—Roma 5:​3-5; Sant. 2:​21, 22.

15. Bayat ti tiempo ti Memorial, kasanotayo a maipakita nga ap-apresiarentayo ti ayat ni Jehova?

¹⁵ Adda pay sabali a pamay-an tapno maipakitatayo nga ap-apresiarentayo ti ayat ni Jehova. Ania dayta? Bayat ti tiempo ti Memorial, aramidentayo ti amin a kabaelantayo a mangipakita ken Jehova nga agyamyamantayo gapu iti  subbot. Malaksid iti panagplanotayo nga umatender iti Memorial, kayattayo met nga awisen ti dadduma. (1 Tim. 2:4) Ilawlawagtayo kadakuada no ania ti mapasamak iti Memorial. Makatulong no ipabuyam kadakuada dagiti video iti jw.org nga Apay a Natay ni Jesus? ken Laglagipenyo ti Ipapatay ni Jesus. Masapul a siguraduen dagiti panglakayen a maawis dagiti di aktibo. Imadyinem ti rag-o idiay langit ken ditoy daga no adda dagiti napukaw a karnero ni Jehova nga agsubli iti arbanna! (Luc. 15:​4-7) Iti Memorial, ikagumaantayo a kablaawan saan laeng a dagiti kakabsat no di ket nangnangruna pay dagiti kabbaro wenno dagiti nabayagen a saan nga immatender. Kayattayo nga iparikna kadakuada a maragsakantayo iti kaaddada!—Roma 12:13.

16. Apay a masapul a panunotentayo no kayatayo a nayonan pay ti maaramidantayo iti ministerio bayat ti tiempo ti Memorial?

¹⁶ Kayam kadi a nayonan pay ti maaramidam iti ministerio kadagiti lawas sakbay ken kalpasan ti Memorial? Nagsayaat dayta a pamay-an tapno maipakitam nga agyamyamanka iti inaramid da Jehova ken Jesus para kenka. No ad-adu ti tiempotayo iti ministerio, ad-adda met a makitatayo ti tulong ni Jehova isu a mas tumibker pay ti panagtalektayo kenkuana. (1 Cor. 3:9) Kasta met, siguraduem a masurotmo ti eskediul ti panagbasa iti Biblia bayat ti tiempo ti Memorial a makita iti Panangsukimat iti Kasuratan iti Inaldaw wenno iti tsart iti workbook-tayo iti gimong iti tengnga ti lawas. Baka kayatmo pay ketdi a pagbalinen dagita a teksto kas study project-mo.

17. Ania ti mangparagsak ken Jehova? (Kitaen met ti kahon a “ Dagiti Pamay-an Tapno Maipakitatayo nga Agyamyamantayo iti Ayat ni Jehova.”)

¹⁷ Siempre, mabalin a saan nga ipalubos ti kasasaadmo a maaramidmo ti amin a suhestion iti daytoy nga artikulo. Ngem laglagipem a saan nga ikomkompara ni Jehova ti maar-aramidam iti maar-aramidan ti dadduma; mabasbasana ti pusom. Maragsakan isuna no makitkitana ti naimpusuan a panagyamanmo iti nagpateg a regalona, ti subbot.—1 Sam. 16:7; Mar. 12:​41-44.

18. Apay nga agyamyamantayo ken Jehova a Dios ken ni Jesu-Kristo?

¹⁸ Babaen laeng iti subbot, posiblen a mapakawan dagiti basoltayo, maaddaantayo iti nasinged a relasion ken Jehova, ken adda namnamatayo nga agbiag nga agnanayon. Sapay koma ta kanayon nga ipakitatayo ti panagyamantayo iti ayat ni Jehova—ti nangtignay kenkuana a mangipaay kadatayo kadagita a bendision. (1 Juan 4:19) Ipakitatayo met koma nga ap-apresiarentayo ni Jesus gapu ta ay-ayatennatayo unay isu a natay para kadatayo!—Juan 15:13.