1. Kas ipakita ti 3 Juan 3, 4, ania ti makaparagsak kadatayo?

MAILADAWAM kadi no kasano karagsak ni apostol Juan idi nadamagna nga agtultuloy a simamatalek nga agserserbi ken Jehova dagidiay natulonganna a mangammo iti kinapudno? Naipasangoda iti adu a problema, isu nga inkagumaan ni Juan a patibkeren ti pammati dagita a matalek a Kristiano nga imbilangna kas naespirituan nga annak. Kasta met, maragsakantayo no dagiti annaktayo wenno dagiti iyad-adalantayo iti Biblia idedikarda ti biagda ken Jehova ken itultuloyda ti agserbi kenkuana.—Basaen ti 3 Juan 3, 4.

2. Ania ti panggep dagiti surat ni Juan?

² Idi 98 C.E., posible nga agnanaed ni Juan idiay Efeso wenno iti asideg dayta. Mabalin nga immakar sadiay kalpasan a nawayawayaan iti pannakaibaludna iti isla ti Patmos. Agarup iti dayta a tiempo, tinignay ti nasantuan nga espiritu ni Jehova a mangaramid iti tallo a surat. Panggep dagita a surat a paregtaen dagiti matalek a Kristiano a pagtalinaedenda ti pammatida ken Jesus ken agtultuloyda a magna iti kinapudno.

3. Ania dagiti saludsod a sungbatantayo?

³ Ni Juan la idin ti sibibiag kadagiti apostol, ket madanagan iti dakes nga impluensia dagiti ulbod a mannursuro kadagiti kongregasion. * (1 Juan 2:18, 19, 26) Ibagbaga dagidiay nga apostata nga am-ammoda ti Dios, ngem saanda nga agtultulnog kadagiti bilin ni Jehova. Usigentayo ti imbalakad ni Juan babaen ti panangiwanwan ti Dios. Bayat nga us-usigentayo dayta,  sungbatantayo dagitoy tallo a saludsod: Ania ti kaipapanan ti pannagna iti kinapudno? Ania dagiti lapped a pakaipaspasanguantayo? Ken kasanotayo nga agtitinnulong tapno agtalinaedtayo iti kinapudno?

4. Sigun iti 1 Juan 2:3-6 ken 2 Juan 4, 6, ania ti masapul nga aramidentayo tapno makapagnatayo iti kinapudno?

⁴ Tapno makapagnatayo iti kinapudno, masapul nga ammuentayo ti kinapudno a masarakan iti Sao ti Dios, ti Biblia. Masapul met a ‘tungpalentayo dagiti bilin’ ni Jehova, kayatna a sawen, masapul a pagtulnogantayo dagita. (Basaen ti 1 Juan 2:3-6; 2 Juan 4, 6.) Impakita ni Jesus ti perpekto nga ulidan iti panagtulnog ken Jehova. No kasta, ti maysa a napateg a pamay-an a makapagtulnogtayo ken Jehova ket ti panangikagumaantayo a mangsurot a naimbag kadagiti addang ni Jesus.—Juan 8:29; 1 Ped. 2:21.

5. Masapul a kombinsidotayo kadagiti ania a banag?

⁵ Tapno makapagtultuloytayo a magna iti kinapudno, masapul a kombinsidotayo a ni Jehova ket Dios ti kinapudno, a pudno ti amin nga imbagana iti Saona a ti Biblia. Masapul met a kombinsidotayo a ni Jesus ti naikari a Mesias. Adu ita ti agduadua a ni Jesus ti nadutokan nga Ari ti Pagarian ti Dios. Impakdaar ni Juan nga ‘adunto ti manangallilaw,’ a mangyaw-awan kadagidiay saan a nakasagana a mangidepensa iti kinapudno maipapan ken Jehova ken ni Jesus. (2 Juan 7-11) Insurat ni Juan: “Asino ti naulbod no di daydiay mangilibak a ni Jesus ti Kristo?” (1 Juan 2:22) Ti laeng pamay-an a saantayo a maallilaw ket ti panangadaltayo iti Sao ti Dios. Iti kasta, maam-ammotayo ni Jehova ken ni Jesus. (Juan 17:3) Agbalintayo met a kombinsido nga adda kadatayo ti kinapudno.

6. Ania a lapped ti pakaipaspasanguan dagiti agtutubo a Kristiano?

⁶ Masapul nga agannad ti amin a Kristiano tapno saanda a maallilaw iti pilosopia ti tao. (1 Juan 2:26) Dagiti agtutubo a Kristiano ti nangnangruna a masapul nga agannad iti daytoy a silo. Kuna ti 25 ti tawenna a kabsat a ni Alexia * a taga-France: “Idi ages-eskuelaak pay, naadalko ti ebolusion ken ti dadduma pay a pilosopia ti tao, isu a pinagduaduaak ti  kinapudno. No dadduma, magustuak dagita. Ngem napanunotko a saan a rumbeng a patiek lattan ti amin a maisursuro idiay eskuelaan ket laksidekon ti isursuro ni Jehova.” Inadal ni Alexia ti libro a Life—How Did It Get Here? By Evolution or by Creation? Iti sumagmamano la a lawas, napukawen dagiti panagduaduana. Kinuna ni Alexia: “Pinaneknekak iti bagik a pudno ti linaon ti Biblia, ket nabigbigko a naragsakak ken natalna ti panunotko no surotek dagiti pagalagadanna.”

7. Ania ti masapul a liklikantayo, ken apay?

⁷ Amin a Kristiano, agtutubo ken nataenganen, masapul a liklikanda ti doble kara a panagbiag. Imbaga ni Juan a saantayo a mapaggiddan ti pannagna iti kinapudno ken ti immoral a panagbiag. (1 Juan 1:6) No kayattayo nga anamongannatayo ti Dios ita ken iti masanguanan, masapul a laglagipentayo nga adda makakitkita iti amin nga ar-aramidentayo. Uray saan a makitkita dagiti tattao ti sililimed nga ar-aramidentayo, makita ni Jehova ti amin nga ar-aramidentayo.—Heb. 4:13.

8. Ania ti masapul a laksidentayo?

⁸ Masapul a laksidentayo ti panangmatmat ti lubong maipapan iti basol. Insurat ni apostol Juan: “No ibagbagatayo, ‘Awan ti basoltayo,’ loklokuentayo ti bagitayo.” (1 Juan 1:8) Idi kaaldawan ni Juan, ibagbaga dagiti apostata a gayyem latta ti Dios ti maysa a tao uray igaggagarana ti agbasol. Kasta met laeng ti panangmatmat ita dagiti tattao iti aglawlawtayo. Ibagbaga ti adu a mamatida iti Dios, ngem dida kayat ti panangmatmat ni Jehova iti basol, nangruna no maipapan dayta iti seks. Para kadakuada, ti ibilang ni Jehova a di umiso, wenno basol, ket sabali laeng nga estilo ti panagbiag, wenno personal a pili.

9. Apay a pagsayaatan dagiti agtutubo no surotenda dagiti prinsipioda a naibatay iti Biblia?

⁹ Dagiti agtutubo a Kristiano ti mabalin a nangnangruna a makarikna a mapilitanda a  mangtulad iti panangmatmat dagiti kaklase wenno katrabahuanda maipapan iti immoral nga aramid. Kasta idi ti napasamak ken Aleksandar. Malagipna: “Pinadas ti dadduma a kaeskuelaak a babbai a pilitendak a makiseks kadakuada. Imbagada a baklaak kano ta awan girlfriend-ko.” No kasta met ti mapaspasaram, laglagipem a no saanmo nga ikompromiso dagiti prinsipiom a naibatay iti Biblia, masalaknibam ti salun-atmo ken ti emosionmo, ken mapagtalinaedmo ti respetom iti bagim ken ti relasionmo ken Jehova. Ket tunggal malabanam ti sulisog, nalaklakamton nga aramiden ti umiso. Laglagipem met a ni Satanas ti naggapuan ti tiritir a panangmatmat daytoy a lubong maipapan iti seks. Isu a no saanmo a tultuladen ti panangmatmat ti lubong, ‘parparmekem daydiay managdakdakes.’—1 Juan 2:14.

10. Kasano a makatulong ti 1 Juan 1:9 tapno makapagserbitayo ken Jehova a nadalus ti konsiensiatayo?

¹⁰ Ammotayo nga adda kalintegan ni Jehova a mangibaga no ania ti makuna a basol. Ar-aramidentayo ti amin a kabaelantayo tapno saantayo nga agbasol. Ngem no makabasoltayo, ipudnotayo dayta ken Jehova iti kararag. (Basaen ti 1 Juan 1:9.) Ket no makaaramidtayo iti nadagsen a basol, agpatulongtayo kadagiti panglakayen, a dinutokan ni Jehova a mangaywan kadatayo. (Sant. 5:14-16) Ngem ditay koma sangkapanunot dagiti dakes a naaramidantayo iti napalabas. Apay? Gapu ta impaay ti naayat nga Amatayo ti daton a pangsubbot ti Anakna tapno mapakawan dagiti basoltayo. No imbaga ni Jehova a pakawanenna dagiti agbabbabawi a nakabasol, talaga nga aramidenna dayta. Isu nga awan ti makalapped kadatayo nga agserbi ken Jehova a nadalus ti konsiensiatayo.—1 Juan 2:1, 2, 12; 3:19, 20.

11. Kasanotayo a maprotektaran ti panunottayo kadagiti sursuro a makadadael iti pammatitayo?

¹¹ Masapul a laksidentayo dagiti sursuro dagiti apostata. Sipud panangrugi ti kongregasion  Kristiano, us-usarenen ti Diablo ti adu a manangallilaw tapno mangimula kadagiti panagduadua iti panunot dagiti matalek nga adipen ti Dios. Masapul ngarud nga ammuentayo ti nagdumaan ti pudno ken kinaulbod. * Mabalin nga usaren dagiti kabusortayo ti Internet wenno social media tapno pakapuyenda ti panagtalektayo ken Jehova ken pabaawenda ti panagayattayo kadagiti kakabsat. Laglagipentayo no asino ti adda iti likudan ti kasta a propaganda, ket laksidentayo dayta!—1 Juan 4:1, 6; Apoc. 12:9.

12. Apay a masapul a patibkerentayo ti pammatitayo kadagiti naadaltayo a kinapudno?

¹² Tapno malabanantayo dagiti iyaatake ni Satanas, masapul a paunegentayo ti panagtalektayo ken Jesus ken iti akemna iti panggep ti Dios. Masapul met nga agtalektayo iti kakaisuna nga us-usaren ni Jehova a mangiturong ita iti organisasionna. (Mat. 24:45-47) Mapaunegtayo ti panagtalektayo no regular nga adalentayo ti Sao ti Dios. Iti kasta, ti pammatitayo ket kaslanto iti kayo a nauneg ti pannakairamutna. Dayta ti punto ni Pablo idi sinuratanna ti kongregasion idiay Colosas. Kinunana: “Gapu ta inakseptaryon ni Kristo Jesus nga Apo, itultuloyyo ngarud ti agbiag a naikaykaysa kenkuana. . . . Masapul a nairamut ken naibangonkayo kenkuana, ken masapul a natibker ti pammatiyo.” (Col. 2:6, 7) No pabpabilgen ti maysa a Kristiano ti pammatina, saan a mapakapuy dayta ni Satanas wenno dagidiay naimpluensiaanna.—2 Juan 8, 9.

13. Ania ti masapul nga ekspektarentayo, ken apay?

¹³ Masapul nga ekspektarentayo a guraennatayo ti lubong. (1 Juan 3:13) Impalagip kadatayo ni Juan a “ti intero a lubong ket adda iti pannakabalin daydiay managdakdakes.” (1 Juan 5:19) Bayat nga umas-asideg ti panungpalan daytoy a sistema, kumarkaro ti pungtot ni Satanas. (Apoc. 12:12) Saan la a dagiti di madmadlaw a panangatake ti us-usarenna, a kas iti immoralidad wenno kinaulbod dagiti apostata. Us-usarenna met ti direkta a panangatake. Ammo ni Satanas nga ababan ti nabati a tiempona a mangpasardeng iti trabahotayo a panangasaba wenno mangdadael iti pammatitayo. Di ngarud pakasdaawan nga adda restriksion wenno maiparparit ti trabahotayo iti dadduma a pagilian. Nupay kasta, agib-ibtur dagiti kakabsat kadagita a lugar. Pampaneknekanda nga aniaman ti aramiden kadatayo ni Satanas, makapagballigitayo!

14. Ania ti maysa a pamay-an a matulongantayo dagiti kakabsattayo nga agtalinaed iti kinapudno?

¹⁴ Tapno matulongantayo dagiti kakabsattayo nga agtalinaed iti kinapudno, masapul a makipagriknatayo kadakuada. (1 Juan 3:10, 11, 16-18) Masapul nga agiinnayattayo saan laeng a no nasayaat dagiti kasasaad no di ket uray no adda dagiti problema. Kas pagarigan, adda kadi am-ammom a natayan iti ipatpateg ken agkasapulan iti liwliwa wenno praktikal a tulong? Wenno adda kadi nadamagmo a kakabsattayo a napukawan gapu iti natural a didigra ken agkasapulan iti tulong a mangibangon manen kadagiti Kingdom Hall wenno balayda? Ipakitatayo ti nauneg nga ayat ken pannakipagriknatayo kadagiti kakabsattayo saan laeng nga iti ibagatayo no di ket kangrunaanna iti aramidentayo.

15. Sigun iti 1 Juan 4:7, 8, ania ti masapul nga aramidentayo?

¹⁵ Tultuladentayo ti naayat a nailangitan nga Amatayo no ipakitatayo ti ayat iti maysa ken maysa. (Basaen ti 1 Juan 4:7, 8.) Ti napateg a pamay-an a maipakitatayo ti ayat ket ti panagpipinnakawan. Kas pagarigan, nalabit adda nakasair kadatayo ngem nagpadispensar.  Ipakpakitatayo ti ayat no pakawanentayo ken lipatentayon ti naaramidna. (Col. 3:13) Napasaran dayta ti maysa a kabsat nga agnagan Aldo idi nangngegna ti maysa a kabsat a raraemenna a nanguyaw iti pulina. Kuna ni Aldo: “Inkarkararagko ken Jehova a tulongannak a saan nga agsakit ti nakemko iti dayta a kabsat.” Ngem adda sabali pay nga inaramid ni Aldo. Kiniddawna iti kabsat nga agkaduada a mangasaba. Bayat ti panagkaduada, inlawlawag ni Aldo ti nariknana iti imbaga ti kabsat. “Idi naammuan ti kabsat a nasairak iti imbagana, dimmawat iti pammakawan. Nariknak iti tono ti bosesna ti kasta unay a babawina. Kalpasan dayta, nagbalinkami manen a nasayaat nga aggayyem ket linipatmin ti napasamak.”

16-17. Ania koma ti determinasiontayo?

¹⁶ Kasta unay ti naayat a pannakaseknan ni apostol Juan iti naespirituan a pagimbagan dagiti kakabsatna, ket nalawag dayta a riknana iti balakadna a nailanad iti tallo a suratna. Anian a makaparegta a maammuan a dagiti babbai ken lallaki a kas kenkuana ket nadutokan a makipagturay ken Kristo!—1 Juan 2:27.

¹⁷ Ipapusotayo koma ti balakad a napagsasaritaantayo iti daytoy nga artikulo. Determinadotayo koma a magna iti kinapudno ken agtulnog ken Jehova iti amin nga ar-aramidentayo. Adalem ti Saona ken agtalekka iti dayta. Pabilgem ti pammatim ken Jesus. Laksidem dagiti pilosopia ti tao ken ti sursuro dagiti apostata. Liklikam ti doble kara a panagbiag ket dika tumulok nga agbasol. Surotem dagiti nangato a pagalagadan ni Jehova. Ken tulongantayo koma dagiti kakabsattayo nga agtalinaed a natibker ti pammatida babaen ti panangpakawantayo kadagiti nakasair kadatayo ken panangtulongtayo kadagiti agkasapulan. Iti kasta, makapagtultuloytayo a magna iti kinapudno iti laksid ti adu a pakarigatan.