1. Sigun iti Filipos 2:3, apay a nasayaat ti relasiontayo iti sabsabali no napakumbabatayo?

SIPAPAKUMBABA nga agtulnogtayo kadagiti pagalagadan ni Jehova, ta bigbigentayo a kanayon nga ammona ti kasayaatan para kadatayo. (Efe. 4:22-24) No napakumbabatayo, iyun-unatayo ti pagayatan ni Jehova ken ibilangtayo a natantan-ok ti sabsabali. Iti kasta, nasayaat ti relasiontayo ken Jehova ken kadagiti kapammatiantayo.—Basaen ti Filipos 2:3.

2. Ania ti binigbig ni apostol Pablo, ken ania ti mausig iti daytoy nga artikulo?

² Ngem no ditay agannad, mabalin nga impluensiaandatayo dagiti napannakkel ken managimbubukodan * iti sistema ni Satanas. Nalawag a naimpluensiaan iti dayta ti dadduma idi umuna a siglo C.E., ta insurat ni apostol Pablo kadagiti taga-Roma: “Ibagak kadakayo amin dita a saankayo nga agpanunot iti nalablabes maipapan iti bagiyo ngem iti maiparbeng a panunotenyo. Ipakitayo ketdi a nasimbeng ti panunotyo.” (Roma 12:3) Binigbig ni Pablo a masapul nga adda kompiansatayo iti bagitayo. Ngem tulongannatayo ti kinapakumbaba tapno kanayon a balanse ti panangmatmattayo iti bagitayo. Mausig iti daytoy nga artikulo ti tallo a kasasaad a makatulong ti kinapakumbaba tapno saan a sobra ti panangpanunottayo iti bagitayo. Dagita ket ti (1) panagasawa, (2) pribilehio iti panagserbi, ken (3) panagusar iti social media.

3. Apay nga adda latta di pagkinnaawatan ti agassawa, ket ania a solusion ti mapanunot ti dadduma?

³ Inyurnos ni Jehova a naragsak ti panagkadua ti agassawa. Ngem awan ti perpekto, isu nga adda latta dida pagkinnaawatan. Kinapudnona, insurat ni Pablo nga ekspektaren dagiti makiasawa a makapasarda iti rigat. (1 Cor. 7:28) Adda dagiti agassawa a kanayon nga agriri, isu a mabalin a panunotenda a saanda a para iti maysa ken maysa. No naimpluensiaan ida ti lubong, dagus a panunotenda a panagsina wenno diborsio ti solusion. Ti laeng bagida ti pampanunotenda ket ipagarupda a naragsakdanto laeng no makisina wenno makidiborsioda.

4. Ania ti masapul a ditay panunoten?

⁴ Masapul a ditay panunoten a saan a naballigi ti panagasawatayo. Ammotayo a ti kakaisuna a Nainkasuratan a pakaibatayan ti diborsio ket seksual nga immoralidad. (Mat. 5:32) Isu a no mapasarantayo ti rigat nga insurat ni Pablo, ditay ipalubos a ti panagpannakkel ti makagapu nga isaludsodtayo: ‘Maipapaay kadi ti asawak ti amin a kasapulak? Maipapaay kadi kaniak ti ayat a pakaikariak? Naragragsakakto kadi iti denna ti sabali?’ No kasta ti mapampanunotmo, ti la bagim ti pampanunotem. Isursuro ti lubong a surotem ti pusom ken aramidem no ania ti mangparagsak kenka, uray no kaipapananna nga agsinakayon nga agassawa. Kuna ti Biblia a masapul a “sapulenyo dagiti pagimbagan ti dadduma, saan la a dagiti bukodyo a pagimbagan.” (Fil. 2:4) Kayat ni Jehova nga agtalinaedkayo nga agassawa imbes nga agsinakayo. (Mat. 19:6) Kayatna nga Isu ti umuna a panunotem, saan a ti bagim.

5. Sigun iti Efeso 5:33, kasano ti masapul a panangtrato ti agassawa iti maysa ken maysa?

⁵ Masapul nga aginnayat ken agrinnespeto ti agassawa. (Basaen ti Efeso 5:33.) Isursuro ti Biblia nga ipangpangrunatayo ti panangted  ngem ti panangawat. (Ara. 20:35) Ania a kualidad ti makatulong iti agassawa tapno maipakitada ti ayat ken respeto? Kinapakumbaba. Dagiti napakumbaba nga agassawa saan a ti bukodda a pagimbagan ti sapulenda no di ket ti pagimbagan ti “sabali,” kayatna a sawen, ti asawada.—1 Cor. 10:24.

6. Ania ti masursurom iti imbaga da Steven ken Stephanie?

⁶ Nakatulong ti kinapakumbaba iti adu a Kristiano a pagassawaan tapno agbalinda a naragragsak. Kas pagarigan, imbaga ti asawa a lalaki a ni Steven: “No maysakayo a team, agtinnulongkayo nangruna no adda dagiti problema. Imbes a panunotem, ‘ania ti kasayaatan para kaniak?’ panunotem ketdi, ‘ania ti kasayaatan para kadakami?’” Kasta met la ti rikna ni baketna nga Stephanie. “Awan ti mayat a makikabbalay iti maysa a kalaban,” kinunana. “No adda dimi pagkinnaawatan, ammuenmi ti makagapu sa agkararagkami, ag-research, ken pagsaritaanmi dayta. Ti problema ti labananmi, saan a ti maysa ken maysa.” Naragragsak ti agassawa no dida agpanunot iti nalablabes maipapan iti bagida ngem iti maiparbeng.

7. Ania koma ti kababalin ti maysa a kabsat a lalaki no makaawat iti espesial a pribilehio?

⁷ Ibilangtayo a pribilehio ti agserbi ken Jehova iti aniaman a maaramidantayo. (Sal. 27:4; 84:10) No situtulok ti maysa a kabsat a lalaki nga umawat iti espesial a pribilehio, makomendaran dayta. Kinapudnona, kuna ti Biblia: “No ikagkagumaan ti maysa a lalaki ti agbalin a manangaywan, kayatna ti makiraman iti nasayaat nga aramid.” (1 Tim. 3:1) Nupay kasta, no makaawat iti annongen, saan koma nga agpanunot iti nalablabes maipapan iti bagina ngem iti maiparbeng. (Luc. 17:7-10) Ti koma kalatna ket sipapakumbaba nga agserbi iti sabsabali.—2 Cor. 12:15.

8. Ania ti masursurotayo kada Diotrefes, Uzias, ken Absalom?

⁸ Dakamaten ti Biblia ti sumagmamano a tattao a nalabes unay ti panangpanunotda iti bagida ket agserbi dagita a pakdaar kadatayo. Kas pagarigan, saan a naemma ni Diotrefes ta inkagumaanna ti agbalin a “kangatuan” iti kongregasion. (3 Juan 9) Sipapannakkel a pinadas ni Uzias nga aramiden ti annongen a saan nga inted kenkuana ni Jehova. (2 Cron. 26:16-21) Sisisikap nga inkagumaan ni Absalom nga agawen ti suporta ti publiko ta kayatna ti agbalin nga ari. (2 Sam. 15:2-6) Nalawag nga ipakita dagita a salaysay iti Biblia a saan a maragsakan ni Jehova kadagidiay mangbirbirok iti bukodda a dayaw. (Prov. 25:27) Inton agangay, ti kinapannakkel ken ambision ket agtungpal laeng iti didigra.—Prov. 16:18.

9. Ania nga ulidan ti impakita ni Jesus?

⁹ Naiduma kadakuada ni Jesus ta “nupay kas iti Dios, dina pulos pinanunot nga agawen ti posision ti Dios, kayatna a sawen, a makipada koma iti Dios.” (Fil. 2:6) Nupay ni Jehova laeng ti nabilbileg ngem isuna, dina pinanunot ti nalablabes maipapan iti bagina ngem iti maiparbeng. Imbagana kadagiti adalanna: “Ti agbalin a nanumnumo kadakayo, isu ti natan-ok.” (Luc. 9:48) Talaga a bendision ti agserbi a kadua dagiti payunir, ministerial nga adipen, panglakayen, ken manangaywan iti sirkito, a mangtultulad iti kinapakumbaba ni Jesus! Tumultulong dagiti napakumbaba nga adipen ni Jehova a mangipakita iti ayat a pakabigbigan ti organisasion ti Dios.—Juan 13:35.

10. Ania ti masapul nga aramidem no adda problema iti kongregasion nga ipagarupmo a saan nga umiso ti pannakatamingna?

¹⁰ No ngay adda dagiti problema iti kongregasion nga ipagarupmo a saan nga umiso  ti pannakatamingda? Imbes nga agreklamoka, maipakitam a napakumbabaka no suportaram dagiti mangidadaulo. (Heb. 13:17) Tapno maaramidmo dayta, isaludsodmo iti bagim: ‘Talaga kadi a nadagsen unay dagiti makitkitak a problema tapno masapul a makorehir? Ita kadi ti umiso a tiempo tapno makorehir dagita? Adda kadi autoridadko a mangkorehir kadagita? Talaga kadi nga ikagkagumaak nga itandudo ti panagkaykaysa iti kongregasion, wenno padpadasek nga itan-ok ti bagik?’

11. Sigun iti Efeso 4:2, 3, kasano a magunggonaan ti kongregasion no sipapakumbaba nga agserbitayo ken Jehova?

¹¹ Napatpateg ken Jehova ti kinapakumbaba ngem iti abilidad ken ti panagkaykaysa ngem iti kaadu ti magapuanan. Aramidem ngarud ti amin a kabaelam a sipapakumbaba nga agserbi ken Jehova tapno maitandudom ti panagkaykaysa iti kongregasion. (Basaen ti Efeso 4:2, 3.) Kadagiti ania a pamay-an a maipakitam ti kinapakumbaba? Aktiboka koma iti ministerio. Mangpanunotka kadagiti pamay-an a makapagserbika iti dadduma babaen ti panangaramidmo iti nasayaat para kadakuada. Managpadaguska koma iti amin, uray kadagidiay awan ti annongenda iti kongregasion. (Mat. 6:1-4; Luc. 14:12-14) Bayat a sipapakumbaba a makipagtrabtrabahoka iti kongregasion, saan laeng a ti abilidadmo ti makita ti dadduma no di ket uray ti kinapakumbabam.

12. Iparparegta kadi ti Biblia a maaddaantayo iti gagayyem? Ilawlawag.

¹² Kayat ni Jehova a matagiragsaktayo ti panaglalangentayo nga aggagayyem ken agkakapamilia. (Sal. 133:1) Naaddaan ni Jesus iti nasayaat a gagayyem. (Juan 15:15) Deskribiren  ti Biblia dagiti pagsayaatan ti kaadda ti pudno a gagayyem. (Prov. 17:17; 18:24) Ibagana pay a pagdaksantayo no isinsinatayo ti bagitayo. (Prov. 18:1) Para iti adu, ti social media ti pamay-an tapno maaddaanda iti adu a gagayyem ken saanda nga agbalin a naliday. Ngem masapul nga agannadtayo iti panangusar iti daytoy a pamay-an ti pannakikomunikar.

13. Apay nga agbalin a naliday ken madepres ti dadduma nga agus-usar iti social media?

¹³ Ipakita dagiti panagadal a dagidiay adu nga oras nga agbasbasa ken agbuybuya kadagiti nai-post iti social media ket agbalinto a naliday ken madepres. Apay? Ti maysa a posible a rason ket masansan nga agi-post dagiti tattao iti social media kadagiti ladawan ti napapateg a pasamak iti biagda—a mangipakita laeng kadagiti kasayaatan a retratoda, retrato ti gagayyemda, ken dagiti nagpipintas a lugar a napnapananda. Ti mangbuya kadagita nalabit ikomparana ti kasasaadna iti kasasaadda ket panunotennan a kakaasi wenno saan a naragsak ti biagna. “Umapalak no makitak ti dadduma a nakaragragsak iti weekend idinto ta addaak la iti balay a mabor-boring,” inamin ti 19 ti tawenna a kabsat a babai.

14. Kasano a matulongannatayo ti balakad ti Biblia iti 1 Pedro 3:8 maipapan iti panagusar iti social media?

¹⁴ Siempre, adda nasayaat a pakausaran ti social media kas iti pannakikomunikar kadagiti kapamilia ken gagayyem. Ngem napaliiwyo kadi a ti dadduma nga ipo-post dagiti tattao iti social media ket nadisenio a mangipannakkel iti mismo a bagida? Kasla ibagbagada, “Kitaendak.” Adda pay ketdi dagiti agi-post iti bastos ken naalas a komento iti bukodda a piktiur wenno iti piktiur nga im-post ti sabali. Saan a maitunos dayta iti kinapakumbaba ken simpatia a maiparparegta a patanoren dagiti Kristiano.—Basaen ti 1 Pedro 3:8.

15. Kasano a matulongannatayo ti Biblia tapno saantayo nga itan-ok ti bagitayo?

¹⁵ No agus-usarka iti social media, isaludsodmo iti bagim: ‘Dagiti kadi komento, piktiur, wenno video nga ipo-post-ko ket mangted iti impresion nga agpangpangasak? Matignayko kadi ti dadduma nga umapal?’ Kuna ti Biblia: “Amin a banag iti lubong—ti tarigagay ti lasag ken ti tarigagay dagiti mata ken ti panangiparammag  iti sanikua a pagbiag ti maysa—ket saan nga agtaud iti Ama, no di ket iti lubong.” (1 Juan 2:16) Impatarus ti maysa a bersion ti Biblia ti sasao a “panangiparammag iti sanikua a pagbiag ti maysa” kas “panagtarigagay a maitan-ok.” Saan a kasapulan nga itan-ok dagiti Kristiano ti bagbagida. Sursurotenda daytoy a balakad ti Biblia: “Ditay koma agbalin a napangas, ditay irugrugi ti panagkokompetensia, ken ditay agiinnapal.” (Gal. 5:26) No napakumbabatayo, ditay tuladen dagiti tattao iti lubong a mangitantan-ok iti bagida.

16. Apay a masapul a liklikantayo ti agpannakkel?

¹⁶ Masapul a patanorentayo ti kinapakumbaba gapu ta saan a ‘nasimbeng ti panunot’ dagidiay napannakkel. (Roma 12:3) Napangas ken mannakiapa dagiti napannakkel. Ti panagpampanunot ken tigtignayda ket masansan a pakadangranda ken ti sabsabali. No saanda a baliwan ti panagpampanunotda, bulseken ken sabidongan ni Satanas ti isipda. (2 Cor. 4:4; 11:3) Iti sabali a bangir, nasimbeng ti panunot ti napakumbaba a tao. Balanse ken nainkalintegan ti panangmatmatna iti bagina, nga ibilangna a nangatngato ti sabsabali iti adu a pamay-an. (Fil. 2:3) Ammona met a “busoren ti Dios dagidiay natangsit, ngem ikkanna iti nagpaiduma a kinaimbag dagidiay napakumbaba.” (1 Ped. 5:5) Saan a kayat dagidiay nasimbeng ti panunotda nga agbalinda a kalaban ni Jehova.

17. Ania ti masapul nga aramidentayo tapno agtalinaedtayo a napakumbaba?

¹⁷ Tapno agtalinaedtayo a napakumbaba, masapul nga iyaplikartayo daytoy a balakad ti Biblia: “Uksobenyo ti daan a personalidad agraman dagiti aramidna, ket ikawesyo ti baro a personalidad.” Agkasapulan dayta iti panagregget. Masapul nga adalentayo ti ulidan ni Jesus ken ikagumaantayo a tuladen agingga a posible. (Col. 3:9, 10; 1 Ped. 2:21) Ngem saan a sayang dayta a panagregget. No itultuloytayo nga ipakita ti kinapakumbaba, naragragsak ti pamiliatayo, maitandudotayo ti panagkaykaysa iti kongregasion, ken ditay usaren ti social media a mangitan-ok iti bagitayo. Kangrunaan iti amin, magun-odantayo ti bendision ken pabor ni Jehova.