Nayanakak idi 1954 idiay St. Paul, Minnesota, U.S.A. Katolikokami ken kalkalainganna ti biag ti pamiliami. Siak ti maikadua iti lima nga agkakabsat. Idi ubingak, nagadalak iti Katoliko nga eskuelaan, ket nagserbiak kas sakristan. Ngem awan unay ti ammok iti Biblia. Nupay mamatiak nga adda Dios a nangparsua iti amin a banag, awan pammatik iti relihionmi.

Iti umuna a tawenko iti William Mitchell College of Law, adda agassawa a Saksi ni Jehova nga immay iti balaymi. Madamaak idi nga aglablaba isu a sidadayaw nga imbagada nga agsublidanto laengen. Idi nagsublida, adda dua nga insaludsodko: “Apay a saan nga umas-asenso dagiti nasingpet a tattao ditoy lubong?” ken “Kasano ti agbalin a naragsak?” Inawatko ti libro a Ti Kinapudno a Mangiturong iti Biag nga Awan Inggana ken ti Baro a Lubong a Patarus ti Nasantuan a Kasuratan, a napintas a berde ti kolor ti akkubna. Immanamongak met a mayadalan iti Biblia. Nagadu ti baro a naammuak. Naragsakanak a nakaammo a ti Pagarian ti Dios gayam ti gobierno a mangiturayto ditoy daga. Nakitak a saan a pulos a naballigi ti panangituray ti tao gapu ta ti lubong ket napno iti saem, panagsagaba, kinaawan hustisia, ken trahedia.

 Indedikarko ti bagik ken Jehova iti nasapa a paset ti 1982 ken nabautisaranak iti dayta met la a tawen iti “Kingdom Truth” Convention a naangay iti St. Paul Civic Center iti Minnesota. Iti simmaruno a lawas, nagsubliak iti dayta a lugar para iti bar exam. Iti nasapa a paset ti Oktubre, naammuak a nakapasaak iti exam isu a maysaakon a lisensiado nga abogado.

Iti “Kingdom Truth” Convention, naam-ammok ni Mike Richardson, a maysa a Bethelite idiay Brooklyn. Imbagana nga adda legal office iti hedkuarter. Nalagipko ti imbaga ti Etiope a eunuko iti Aramid 8:36 isu nga insaludsodko iti bagik, ‘Ania ti makalapped kaniak nga agserbi iti Legal Office?’ Isu a nagaplayak nga agserbi iti Bethel.

Saan a naragsak dagiti nagannakko iti panagbalinko a Saksi ni Jehova. Dinamag ni tatangko no ania ti maitulong iti kinaabogadok ti panagtrabahok iti Watchtower. Inlawlawagko a mapanak agboluntario sadiay ken adda maawatko a $75 kada bulan, a dayta idi ti binulan nga allowance dagiti Bethelite.

Idi nakapag-resign-akon iti dati a trabahok, inrugik ti agserbi iti Bethel idiay Brooklyn, New York, idi 1984. Nagtrabahoak iti Legal Office ket nakatulong kaniak ti dati a kapadasak iti panagtrabahok iti korte.

Ti Stanley Theater idiay Jersey City, New Jersey, ket nagatang idi Nobiembre 1983. Impagna dagiti kakabsat dagiti permit tapno matarimaan dagiti tubo ken koriente ti building. Idi kinasarita dagiti kakabsat dagiti opisial ti siudad, inlawlawagda a mausar ti Stanley Theater kas pagkombensionan dagiti Saksi ni Jehova. Nagbalin a problema dayta ta sigun iti ordinansa ti siudad, dagiti kapilia ken simbaan ket masapul nga adda iti residential area. Ti Stanley Theater ket adda iti commercial area isu a saan a kayat dagiti opisial ti siudad ti mangted iti permit. Inyapelar dagiti kakabsat ti desision ngem naibasura dayta.

Iti umuna a lawasko idiay Bethel, nagdarum ti organisasion iti federal district court gapu ta saan a kayat dagiti opisial ti mangted iti permit. Kailepleppasko idi ti dua a tawen a panagtrabahok iti federal district court iti St. Paul, Minnesota, isu a pamiliarak unay kadagiti kasta a kaso. Imbaga ti maysa kadagiti abogadotayo a maus-usar ti Stanley Theater iti nadumaduma nga okasion ti publiko kas iti panagbuya kadagiti pelikula ken rock concert. Apay koma ngarud a saan a mausar dayta para iti narelihiosuan nga okasion? Inusig dayta ti federal district court ket imbagana a sinalungasing ti Jersey City ti narelihiosuan  a wayawayatayo. Imbilin ti korte kadagiti opisial ti siudad nga itedda dagiti kasapulan a permit, ket nangrugi a makitak no kasano a bembendisionan ni Jehova ti panangusar ti organisasionna kadagiti legal a pamay-an tapno rumang-ay ti trabahona. Nakaragragsakak ta adda naitulongko iti dayta.

Inrugi dagiti kakabsat ti dakkel a proyekto a panagtarimaan ket naangay ti panaggraduar ti maika-79 a klase ti Gilead iti Jersey City Assembly Hall idi Septiembre 8, 1985, awan pay makatawen kalpasan a nairugi ti panagtarimaan. Naragsakak ta pasetak ti legal team a tumultulong iti trabaho a mainaig iti Pagarian. Adayo a naragragsakak iti trabahok iti Bethel ngem iti trabahok idi iti korte. Diak pulos impagarup nga adu pay gayam a kaso ti pangusaran kaniak ni Jehova.

Kaaduan a doktor ken ospital idi 1980’s ti saan a mangraraem iti kiddaw ti adulto a Saksi a maagasan a di mayalisonan iti dara. Ad-adu ti problema dagiti masikog. Ngamin, para kadagiti hues, awan ti legal a kalintegan dagiti babbai nga agkedked a mayalisonan iti dara. No saan kano a mayalisonan ti ina, mabalin a matay isu a maulila ti anakna.

Idi Disiembre 29, 1988, nakaro ti panagpadara ni Sister Denise Nicoleau kalpasan ti panaganakna. Bimmaba iti 5.0 ti hemoglobin-na isu nga imbaga ti doktorna a mayalisonan iti dara ngem nagkedked. Kabigatanna, nagkiddaw ti ospital iti korte iti autorisasion a masapul a mayalisonan ni Sister Nicoleau iti dara. Ti hues inikkanna ti ospital iti autorisasion a mangyalison iti dara a dina man la inyuman wenno impakaammo dayta ken ni Sister Nicoleau wenno ken ni lakayna.

Idi Biernes, Disiembre 30, nayalisonan ni Sister Nicoleau iti dara nupay saan a kayat ni lakayna ken ti dadduma a kapamiliana nga adda idi iti sibayna. Iti dayta a rabii, naaresto ti dadduma a kapamiliana agraman ti maysa wenno dua a panglakayen gapu iti akusasion a pinalawlawanda ti idda ni Sister Nicoleau tapno saan a mayalisonan iti dara. Iti bigat ti Sabado, Disiembre 31, dayta a panangaresto ket impadamagen ti media iti uneg ken ruar ti New York City ken Long Island.

Iti bigat ti Lunes, kinasaritak ni Milton Mollen a hues iti nangatngato a korte. Indetalyek ti kaso, nga impaganetgetko a nangted ti hues iti bilin a panangyalison a dina man la dinengngeg ti kaso.  Kamalmanna, pinaayabannak ni Justice Mollen iti opisinana tapno pagsaritaanmi dagiti napasamak ken dagiti linteg nga agaplikar iti dayta a kaso. Kinuyognak ti overseer-ko a ni Philip Brumley a mapan iti opisina ni Justice Mollen iti dayta a rabii. Inawisna met ti abogado ti ospital tapno agsasaritakami. Nabara ti diskusion. Adda pay ketdi gundaway a nangted kaniak ni Brother Brumley iti papel nga insuratna iti dayta nga agkalmaak laeng. Nasayaat dayta a balakad ta nabaran ti pannakiargumentok iti abogado ti ospital.

Kalpasan ti agarup maysa nga oras, imbaga ni Justice Mollen a ti kasomi ti umuna a maasikaso kabigatanna. Bayat a rumrummuarkami iti opisinana, imbagana nga agsakitto la ketdi ti ulo ti abogado ti ospital kabigatanna, kayatna a sawen, marigatanto a mangidepensa iti kasona. Nariknak nga ipaspasigurado ni Jehova a napigsa ti kasomi. Natignayak nga agpakumbaba bayat a pampanunotek nga us-usarennakami ni Jehova a mangitungpal iti pagayatanna.

Impuypuyatanmi nga insagana ti argumentomi para iti sumaruno a bigat. Sumagmamano la a bloke ti kaadayo ti korte manipud iti Brooklyn Bethel, isu a kaaduan kadakami a naggapu iti Legal Office ti nagna a napan sadiay. Maysa a grupo a buklen ti uppat a hues ti nangdengngeg iti argumentomi. Kalpasan dayta, kinanselarda ti bilin a panangyalison. Nagdesision ti nangato a korte pabor ken Sister Nicoleau ken imbilinna a ti ar-aramiden ti kaaduan a panangala iti autorisasion a di ammo ti pasiente ket maisalungasing iti napateg a kalinteganna a nailanad iti konstitusion.

Di nagbayag, pinatalgedan ti Korte Suprema ti New York ti kalintegan ni Sister Nicoleau a maagasan a di mayalisonan iti dara. Dayta ti kaunaan iti uppat a desision dagiti nangato a korte ti nadumaduma nga estado ti U.S.A. maipapan kadagiti kaso mainaig iti dara, ket agyamanak iti pribilehiok a nangidepensa iti dayta. (Kitaen ti kahon a “ Dagiti Nangabak a Kasotayo iti Korte Suprema ti Nadumaduma nga Estado.”) Kaduak met ti dadduma pay nga abogado iti Bethel kadagiti kaso mainaig iti no asino ti rumbeng a mangaywan iti anak, diborsio, ken kadagiti linteg maipapan iti panangusar iti daga ken pasdek.

Idi naam-ammok ni Dawn a nagbalin nga asawak, isu ket diborsiada nga adda tallo nga annakna. Agtrabtrabaho ken agpaypayunir. Narigat ti napasaranna iti biag isu a bilibak unay iti determinasionna nga agserbi ken Jehova. Idi 1992, immatenderkami iti Kombension Distrito a “Dagiti Managawit iti Lawag” idiay New York City, ket inaremko ni Dawn. Makatawen kalpasanna, nagkasarkami. Maysa a sagut ni Jehova ti naespirituan ti panagpampanunotna ken managpakatawa nga asawak. Talaga a ginunggonaannak ni Dawn iti naimbag iti amin nga al-aldaw ti panagdennami kas agassawa.—Prov. 31:12.

Idi nagkasarkami, agtawen dagiti ubbing iti 11, 13, ken 16. Kayatko ti agbalin a nasayaat nga ama kadakuada isu a binasak a naimbag ken inyaplikarko ti amin a nasarakak kadagiti publikasiontayo maipapan iti panagbalin nga agsiuman. Adda dagiti problema iti simmaruno a tawtawen ngem maragsakanak ta inakseptardak dagiti ubbing kas talkenda a gayyem ken nadungngo nga amada. Nawaya nga umay idiay balay ti gagayyem dagiti ubbing ket maay-ayatankami iti kaadda dagitoy a nararagsak nga agtutubo.

Idi 2013, immakarkami ken Dawn idiay Wisconsin tapno aywananmi dagiti nataenganen a nagannakmi. Naragsakanak ta nagtultuloy latta ti panagserbik iti Bethel kas temporary volunteer iti Legal Department.

Idi Septiembre 2018, nadlawko nga agkarasig-amak ta masansan nga adda plema iti karabukobko. Nagpaeksamenak iti doktor iti lugarmi ngem dina naduktalan ti makagapu iti problemak. Idi agangay, insingasing ti sabali a doktor nga agpakitaak iti neurologist. Idi Enero 2019, nadayagnos ti neurologist nga adda karkarna a sakitko a mangap-apektar iti utekko a maawagan iti progressive supranuclear palsy (PSP).

Tallo nga aldaw kalpasanna, bayat ti panag-ice skating-ko, natumbaak ket natukkol ti kannawan a tulang ti pungupunguak. Inkakaubingak ti ag-ice skating ket pagay-ayatko dayta. Isu a naamirisko a diak unayen makontrol ti panaggaraw ti bagik. Naklaatak iti napartak nga ikakaro ti sakitko ket naapektaran payen ti panagsaok, panagkutik, ken panagtilmonko.

Yamanek unay ti pribilehio a mangusar iti kinaabogadok tapno adda maitulongko iti trabaho a mainaig iti Pagarian. Naaddaanak iti pribilehio a mangisurat iti adu nga artikulo kadagiti publikasion dagiti propesional. Nagdiskursoak met kadagiti seminar dagiti adda iti tay-ak ti medisina ken abogasia iti intero a lubong. Namin-adu nga indepensak ti kalintegan ti ili ni Jehova a mangpili kadagiti panangagas ken panagopera a di mausar ti dara. Nupay kasta, kayatko a buloden ti kuna ti Lucas 17:10: ‘Maysaak la nga adipen nga awan serserbina. Inaramidko laeng ti rumbeng nga aramidek.’