Ipakita ti ebidensia a nagbalin ni Jesus a Nangato a Padi idi nabautisaran idi 29 C.E. Ania dayta nga ebidensia? Idi nabautisaran ni Jesus, indatagna ti bagina kas daton iti simboliko nga altar a mangirepresentar iti “pagayatan ti Dios.” (Gal. 1:4; Heb. 10:5-10) Gapu ta addan dayta a simboliko nga altar manipud nabautisaran ni Jesus nga agpatpatuloy, adda la ketdi idin ti naindaklan a naespirituan a templo—a mangirepresentar iti urnos para iti nadalus a panagdaydayaw ken Jehova maibatay iti subbot. Dayta nga altar ket nagpateg a paset ti naespirituan a templo.—Mat. 3:16, 17; Heb. 5:4-6.

Ti naindaklan a naespirituan a templo ket agkasapulan iti nangato a padi. Gapu iti dayta, napulotan ni Jesus iti “nasantuan nga espiritu ken pannakabalin.” (Ara. 10:37, 38; Mar. 1:9-11) Ngem kasanotayo a masigurado a nadutokan ni Jesus kas Nangato a Padi sakbay ti ipapatay ken panagungarna? Maammuantayo ti sungbat no usigentayo ti ulidan ni Aaron ken dagiti simmaruno a nagserbi kas nangato a padi iti sidong ti Mosaiko a Linteg.

Sigun iti Linteg, ti laeng nangato a padi ti makastrek iti Kasasantuan a paset ti tabernakulo ken, idi agangay, iti Kasasantuan a paset ti templo. Adda kortina a namagsina iti Kasasantuan ken iti Nasantuan. Iti laeng Aldaw ti Panangabbong a sumrek ti nangato a padi iti Kasasantuan. (Heb. 9:1-3, 6, 7) No kasano a napulotan ni Aaron ken dagiti simmaruno kas nangato a padi sakbay a simrekda iti literal a “kortina” ti tabernakulo, sigurado a nadutokanen ni Jesus kas Nangato a Padi iti naindaklan a naespirituan a templo ni Jehova sakbay a natay ken ‘limmasat iti kortina, kayatna a sawen, ti lasagna’ tapno agbiag idiay langit. (Heb. 10:20) Gapu iti dayta, imbaga ni apostol Pablo nga immay ni Jesus “kas nangato a padi” sa limmasat “iti napatpateg ken mas perpekto a tolda a saan nga inaramid dagiti ima” ken napan “idiay langit.”—Heb. 9:11, 24.

Saan nga agduma ti tiempo a napatalgedan ti baro a tulag ken ti panangrugi ti pannakaipatungpal dayta. Apay? Idi immuli ni Jesus idiay langit ken indatagna ti pateg ti perpekto a natauan a biagna para kadatayo, inrugina ti proseso a nangpatalged, wenno namagbalin a legal, iti baro a tulag. Dayta met laeng a proseso ti nangirugi iti pannakaipatungpal ti tulag. Ania dagiti addang iti dayta a proseso?

Umuna, dimmatag ni Jesus iti sanguanan ni Jehova; simmaruno, indatagna ken Jehova ti pateg ti datonna; ken kamaudiananna, inawat ni Jehova ti pateg ti naibukbok a dara ni Jesus. Sa la nagepekto ti baro a tulag idi naaramiden dagita.

Saan nga ibaga kadatayo ti Biblia no kaano ti eksakto a tiempo nga inawat ni Jehova ti pateg ti daton ni Jesus. No kasta, ditay maibaga ti espesipiko a tiempo no kaano a napatalgedan ken naipatungpal ti baro a tulag. Ngem ammotayo nga immuli ni Jesus idiay langit 10 nga aldaw sakbay ti Pentecostes. (Ara. 1:3) Iti las-ud dayta nga ababa a tiempo, indatagna ti pateg ti datonna ken Jehova ket inawat dayta ni Jehova. (Heb. 9:12) Ti pammaneknek a nagepekto idin ti baro a tulag ket nalawag a nakita idi Pentecostes. (Ara. 2:1-4, 32, 33) Nabatad ngarud a maipatpatungpal idin ti baro a tulag.

Kas sumario, napatalgedan ken nangrugi a maipatungpal ti baro a tulag kalpasan nga inawat ni Jehova ti pateg ti naibukbok a dara ni Jesus ken inramanna dagiti napulotan iti dayta a tulag. Kalpasanna, nagepekton dayta a tulag, a ti Nangato a Padi a ni Jesus ti nagserbi kas Mangibabaet.—Heb. 7:25; 8:1-3, 6; 9:13-15.