Sigurado a kayat ni Jehova nga agbalin a naragsak ti dua a tao nga agasawa. Kayat ni Jehova a dagiti agkasar ket agbalin a naragsak ken nasinged agingga iti tungpal biagda. (Mat. 19:4-6) No planom ti makiasawa, kasanoka a makabirok iti nasayaat nga asawa? Gapu ta ni Jehova ti Namarsua kadatayo, ammona no kasano nga agballigi ti panaginnarem ken panagasawa. Isu a no iyaplikarmo dagiti prinsipio nga impaayna, agbalinka a naragsak. Usigem ti dadduma kadagita a prinsipio.

Umuna, masapul a maawatantayo daytoy maipapan iti bagitayo: “Ti puso ket ad-adda a manangallilaw ngem iti aniaman a banag ken desperado.” (Jer. 17:9) No ti dua a tao a kayatda ti makiasawa ket agkinnita ken mangrugi nga agdeyt, mabalin a matnag a dagus ti riknada iti maysa ken maysa ken saanda a makaaramid kadagiti nainsiriban a desision. No emosion ti kangrunaan a pangibatayan dagiti tattao iti desisionda a makiasawa, mapaaydanto laeng. (Prov. 28:26) Isu a no saanda pay a naam-ammo a naimbag ti maysa ken maysa, saan a nainsiriban a dagus nga iyebkasda ti marikriknada wenno agkinnarida.

Kuna ti Proverbio 22:3: “Makita ti masirib a tao ti peggad ket aglemmeng, ngem agdiretso latta ti awanan kapadasan ket agsagaba.” Apay a delikado ti panagusar kadagiti app ken website tapno agbirok iti pakiasawaan? Makapaladingit ta adda dagidiay nakiam-ammo babaen ti Internet, nangrugi a makideyt, ngem idi agangay, nabigbigda nga inallilaw ida ti tao a kadeytda. Adda met dagiti di napudno a tattao a nagaramid kadagiti peke nga account tapno allilawen ken takawanda dagiti inosente. No dadduma, dagiti agar-aramid iti kakasta a nagdakes a panangloko ket aginkukuna a Saksi.

Usigenyo ti sabali pay a peggad. Ti dadduma a dating app ken website ket agus-usar kadagiti computer program wenno mathematical algorithm tapno maammuan kano no siasino dagiti agkabagayan. Ngem awan ti ebidensia a sigurado dagita a pamay-an. Nainsiriban kadi nga agtalektayo kadagiti inaramid ti tao a formula tapno makaaramidtayo iti desision kadagiti napateg a banag kas iti panagasawa? Dagiti computer program ket di pulos mapagtalkan no ikompara kadagiti prinsipio ti Biblia.​—Prov. 1:7; 3:5-7.

 Kuna ti prinsipio a mabasa iti Proverbio 14:15: “Patien ti awan ammona ti tunggal sao, ngem panunoten ti masirib ti tunggal addangna.” Sakbay nga agdesisionka no agbalin a nasayaat nga asawa ti maysa a tao, masapul nga am-ammuem a naimbag isuna. Ngem narigat dayta no agusarka kadagiti dating app ken website. Uray no makitayo ti profile ti tunggal maysa ken kanayon ti napaut a panagsaritayo iti Internet, kayatna kadi a sawen a talaga nga agam-ammokayon? Impagarup ti dadduma a nabirokandan ti napudno a mangayat kadakuada. Ngem nakigtotda iti naammuanda idi personal a nagkitada.

Kinuna ti salmista: “Saanak a makikadua kadagiti naulbod a tattao, ken liklikak dagidiay mangilimed iti kinasiasinoda.” (Sal. 26:4) Ibilang ti adu a normal laeng ti agulbod iti profile-da kadagiti dating app ken website tapno pagbalinenda ti bagida a makaay-ayo. Mabalin nga ilemmengda dagiti dakes a kababalinda wenno saanda nga ipakita dagita no makisaritada kadagiti tattao iti Internet. Uray no ibagbaga ti dadduma a maysada a Saksi ni Jehova, talaga kadi a bautisadoda a Kristiano? Nataenganda kadi iti naespirituan? Nasingedda kadi ken Jehova? Mararaemda kadi iti kongregasionda? Wenno baka saanda a mapagulidanan wenno maibilangda pay ketdi a “dakes a kakadua”? (1 Cor. 15:33; 2 Tim. 2:20, 21) Ken nawayada kadi a makiasawa sigun kadagiti prinsipio ti Biblia? Masapul a maammuam dagitoy a banag, ngem narigat a maammuan dagita no awan ti makasaritam a dadduma pay a Saksi a makaam-ammo a naimbag kenkuana. (Prov. 15:22) Ken siempre, ti matalek nga adipen ni Jehova ket dina man la panunoten ti “makisangol” iti dina kapammatian ‘ta saanda nga agpada.’​—2 Cor. 6:14; 1 Cor. 7:39.

Gapu ta napeggad ti panagusar kadagiti dating app ken website, adda dagiti nasaysayaat a pamay-an tapno agbirok ken maam-ammo ti nasayaat a pakiasawaan. Pakasarakam ngay iti posible nga agbalinto nga asawam? No saan a maiparit ti panagtataripnong iti publiko, maam-ammotayo ti dadduma a Saksi ni Jehova no umatendertayo kadagiti gimong, asamblea, kombension, ken iti dadduma pay a taripnong.

No saan a posible dagita a publiko a panagtataripnong, kas no kabayatan ti COVID-19 pandemic, agus-usartayo kadagiti gadyet tapno umatender kadagiti gimong ti kongregasion. Sadiay nga adda dagiti gundaway a maam-ammotayo ti dadduma a single a Saksi. Makitam no kasanoda nga iparang dagiti pasetda iti gimong ken mangngegmo dagiti komentoda. (1 Tim. 6:11, 12) Adda met gundawayyo nga agsarita iti breakout room kalpasan dagiti gimong. Babaen kadagiti virtual social gathering a kaduayo ti dadduma a Saksi, maobserbaram no kasano a makilangen ti kursonadam a tao iti dadduma, ket maammuam ti pudpudno a kinataona. (1 Ped. 3:4) Inton agangay, bayat a mas maam-ammoyo ti maysa ken maysa, makitam no agpadakayo kadagiti kalat ken prinsipio ken no agkabagayankayo.

No agbirok dagiti single iti pakiasawaanda maitunos kadagiti prinsipio ti Biblia, dakdakkel ti posibilidad a mapadasanda ti kinapudno daytoy a proverbio: “Ti nakasarak iti nasayaat nga asawa a babai [wenno asawa a lalaki] ket nakasarak iti napateg a banag, ken immawat iti pabor ni Jehova.”​—Prov. 18:22.