MAADAL NGA ARTIKULO 28
Agturturayen ti Pagarian!
“Ti pagarian ti lubong ket nagbalinen a Pagarian ti Apotayo ken ti Kristona.”—APOC. 11:15.
KANTA 22 Naipasdeken ti Pagarian—Umay Koman!
ITI DAYTOY A PANAGADAL *
1. Ania ti masiguradotayo, ken apay?
NO KITKITAEM dagiti mapaspasamak iti lubong, panagkunam, sumayaatto pay ngata dagiti kasasaad? Lumamlamiis ti ayat dagiti agkakapamilia. Kumarkaro ti kinaranggas, kinamanagimbubukodan, ken kinaagresibo ti kaaduan a tattao. Adu ti marigatan nga agtalek kadagidiay addaan iti autoridad. Ngem uray no kasta ti mapaspasamak, manamnamam a sumayaatto met laeng dagiti kasasaad. Apay? Ar-aramiden ngamin dagiti tattao ita ti eksakto a naipadto a mapasamak “iti maudi nga al-aldaw.” (2 Tim. 3:1-5) Saan a mailibak ti asinoman a napudno a tao a matungtungpalen dayta a padto. Ebidensia dayta nga agturturayen ni Kristo Jesus kas Ari ti Pagarian ti Dios. Ngem maysa la dayta iti adu a padto maipapan iti Pagarian. Mapabileg ti pammatitayo no repasuentayo ti dadduma a padto a natungpal iti nabiit pay a tawtawen.
2. Ania ti usigentayo iti daytoy nga artikulo, ken apay? (Komentuan ti ladawan iti akkub.)
2 Iti daytoy nga artikulo, usigentayo dagitoy: (1) ti maysa a padto a makatulong tapno maammuantayo no kaano a nangrugi a nagturay ti Pagarian, (2) dagiti padto a makatulong tapno maawatantayo a nupay literal a ditay makita, agturturayen ni Jesus kas Ari ti Pagarian ti Dios, ken (3) dagiti padto a mangipakita no kasanonto a madadael dagiti bumusbusor iti Pagarian ti Dios. Makitatayto a dagita a padto ket agkokonektar kas kadagiti paset ti maysa a jigsaw puzzle. Nalawag nga ipakitada no ayantayon iti pagorasan ni Jehova maipapan kadagiti pasamak.
NO KASANO A MAAMMUANTAYO NO KAANO A NANGRUGI A NAGTURAY TI PAGARIAN
3. Ania ti ipasigurado ti padto iti Daniel 7:13, 14 maipapan iti Ari ti Pagarian ti Dios?
3 Ipasigurado kadatayo ti padto iti Daniel 7:13, 14 a ni Kristo Jesus ti kasayaatan nga Agturay iti Pagarian ti Dios. Siraragsakto nga ‘agserbi kenkuana’ dagiti tattao iti amin a nasion, ken saanto a pulos a masukatan kas Agturay. Impakpakauna ti sabali pay a padto iti libro a Daniel a mangrugi nga agturay ni Jesus iti Pagarianna iti ngudo ti tiempo a maawagan iti pito a panawen. Posible kadi a maammuan no kaano a natungpal dayta a naragsak a pasamak?
4. Ilawlawag no kasano a makatulong ti Daniel 4:10-17 tapno maammuantayo no kaano a nagbalin ni Kristo nga Ari ti Pagarian. (Kitaen met ti footnote.)
4 Basaen ti Daniel 4:10-17. Ti “pito a panawen” ket katupag ti 2,520 a tawen. Nangrugi dayta idi 607 B.C.E. idi inikkat dagiti Babilonio ti kaudian nga ari a nakatugaw iti trono ni Jehova idiay Jerusalem. Nagpatingga dayta idi 1914 C.E. idi introno ni Jehova ni Jesus—“daydiay addaan iti kalintegan”—kas Ari ti Pagarian ti Dios. *—Ezek. 21:25-27.
5. Ania ti maysa a pamay-an a pagsayaatantayo no maawatantayo ti padto maipapan iti “pito a panawen”?
5 Apay a pagsayaatantayo no maawatantayo daytoy a padto? No maawatantayo ti maipapan iti “pito a panawen,” makapagtalektayo a tungpalen ni Jehova dagiti karina iti umiso a tiempo. No kasano nga inkeddengna ti tiempo ti panangrugi ti panagturay ti Pagarianna, siguraduennanto met a matungpal ti amin a dadduma pay a padto maitunos iti pagorasanna. Wen, ti aldaw ni Jehova ket “saanto a maladaw!”—Hab. 2:3.
NO KASANOTAYO NGA AMMO NGA AGTURTURAYEN NI JESUS KAS ARI TI PAGARIAN TI DIOS
6. (a) Ania dagiti makita nga ebidensia nga agturturayen ni Kristo idiay langit uray literal a ditay makita? (b) Kasano a ti padto iti Apocalipsis 6:2-8 patalgedanna dagita nga ebidensia?
6 Adda dagiti impakpakauna ni Jesus a mapasamak ditoy lubong idi dandanin agpatingga ti ministeriona ditoy daga. Dagita ti makatulong kadagiti pasurotna tapno maammuanda a nangrugin ti panagarina idiay langit. Karaman kadagita dagiti gubat, bisin, ken ginggined. Impakpakaunana met nga addanto dagiti makapapatay a saksakit “iti nadumaduma a lugar”—ket ti nabiit pay a COVID-19 pandemic ti maysa a pagarigan. Dagita a pasamak ket karaman kadagiti aw-awagan ti Biblia a “pagilasinan” ti kaadda ni Kristo. (Mat. 24:3, 7; Luc. 21:7, 10, 11) Nasurok nga 60 a tawen kalpasan ti ipapatay ken panagsubli ni Jesus idiay langit, inikkanna ni apostol Juan iti kanayonan a pammatalged a talaga a mapasamak dagita. (Basaen ti Apocalipsis 6:2-8.) Napasamak amin dagita manipud idi nagbalin nga Ari ni Jesus idi 1914.
7. Apay a kaasi ti daga idi nagbalin ni Jesus nga Ari?
7 Apay a dimmakes ti kasasaad ti lubong idi nagbalin nga Ari ni Jesus? Adda nagpateg a detalye nga ibaga ti Apocalipsis 6:2: Ti immuna a mision ni Jesus kas kabbaro a nakoronaan nga Ari ket makigubat. Siasino dagiti ginubatna? Ti Diablo ken dagiti demoniona. Sigun iti Apocalipsis kapitulo 12, naabak ni Satanas, isu a naitapuak ditoy daga a kadua dagiti demoniona. Gapu ta makaunget unay ni Satanas, dagiti tattao ti pangipappapasanna iti pungtotna isu a “kaasi pay ti daga.”—Apoc. 12:7-12.
8. Apay a pagsayaatantayo ti pannakakitatayo a matungtungpalen dagiti padto maipapan iti Pagarian?
8 Apay a pagsayaatantayo no maawatantayo dagitoy a padto? Dagiti pasamak iti lubong ken ti nakadkadlaw a panagbalbaliw dagiti kababalin ti tattao ti makatulong tapno maawatantayo a nagbalinen nga Ari ni Jesus. Isu nga imbes a maladingitantayo no makitkitatayo a managimbubukodan ken mananggura dagiti tattao, laglagipentayo a dagiti ar-aramidenda ket kaitungpalan ti padto ti Biblia. Agturturayen ti Pagarian! (Sal. 37:1) Ken ekspektarentayo a kumaronto pay ti panagsagaba ditoy lubong bayat nga umas-asideg ti Armagedon. (Mar. 13:8; 2 Tim. 3:13) Agyamantayo iti nadungngo a nailangitan nga Amatayo ta tultulongannatayo tapno maawatantayo no apay a nagadu ti problema iti lubong.
NO KASANONTO A MADADAEL DAGITI BUMUSBUSOR ITI PAGARIAN TI DIOS
9. Kasano nga inladawan ti Daniel 2:28, 31-35 ti maudi a kabilgan a turay iti lubong, ken kaano a nangrugi dayta?
9 Basaen ti Daniel 2:28, 31-35. Makitkitatayo a matungtungpalen daytoy a padto. Impakita ti tagtagainep ni Nabucodonosor ti mapasamak “iti maudi a paset dagiti aldaw,” kalpasan a nangrugi ti panagari ni Kristo. Ti maudi a kabilgan a turay iti lubong a naipadto iti Biblia nga irepresentar ti “naglaok a landok ken pila a saka” ket karaman kadagiti kabusor ni Jesus ditoy daga. Agturturayen daytoy a kabilgan a turay iti lubong. Nangrugi a nagturay dayta bayat ti Gubat Sangalubongan I idi nagtulag ti United Kingdom ken ti United States a maaddaanda iti espesial a relasion, ti Anglo-America nga aliansa. Iti imahen a natagtagainep ni Nabucodonosor, naipakpakauna met ti dua a banag a nakaidumaan daytoy a kabilgan a turay iti lubong kadagiti immun-una a pagarian.
10. (a) Ania ti makitkitatayo iti Anglo-America a kabilgan a turay iti lubong nga impadto ni Daniel? (b) Ania a peggad ti masapul a liklikantayo? (Kitaen ti kahon nga “ Agannadka iti Pila!”)
10 Umuna, saan a kas kadagiti immun-una a kabilgan a turay iti lubong a nadakamat iti sirmata, ti Anglo-America nga aliansa ket irepresentar ti naglaok a landok ken pila, saan a puro a metal a kas iti balitok wenno pirak. Ti pila irepresentarna ti “annak ti sangatauan,” wenno dagiti ordinario a tattao. (Dan. 2:43, ftn.) Nalawag a makitkitatayo ita ti impluensia dagiti tattao kadagiti eleksion, protesta, kampania a mangilablaban iti kalintegan dagiti umili, ken union dagiti trabahador. Gapu iti dayta, marigatan daytoy a kabilgan a turay iti lubong a mangipatungpal kadagiti paglinteganna.
11. Kasano a ti panagturay ti Anglo-America a Kabilgan a Turay iti Lubong pabilgenna ti panagtalektayo nga agbibiagtayon iti tiempo ti panungpalan?
11 Maikadua, kas irepresentar dagiti saka ti nagdakkel nga imahen, ti Anglo-America ti kaudian a kabilgan a turay iti lubong a naipadto iti Biblia. Awanen ti sabali pay a gobierno ti tao a sumaruno iti dayta. Dayta ken ti amin a dadduma pay a gobierno ti tao ket dadaelento ti Pagarian ti Dios inton Armagedon. *—Apoc. 16:13, 14, 16; 19:19, 20.
12. Ania pay ti ebidensia nga ipaay ti padto ni Daniel a mangted kadatayo iti liwliwa ken namnama?
12 Apay a pagsayaatantayo no maawatantayo daytoy a padto? Adda pay ti kanayonan nga ebidensia iti padto ni Daniel a mangpaneknek nga agbibiagtayon iti tiempo ti panungpalan. Nasurok a 2,500 a tawenen ti napalabas, impadto ni Daniel a kalpasan ti Babilonia, uppat pay a kabilgan a turay iti lubong ti addaan iti dakkel nga epekto iti ili ti Dios. Imbagana met a ti Anglo-America a Kabilgan a Turay iti Lubong ti kaudian kadagita. Dayta ti mangted kadatayo iti liwliwa ken namnama nga asidegen a dadaelen ti Pagarian ti Dios ti amin a gobierno ti tao ken daytanto laengen ti agturay ditoy daga.—Dan. 2:44.
13. Ania ti irepresentar “ti maikawalo nga ari” ken “ti 10 nga ari,” a nadakamat iti Apocalipsis 17:9-12, ken kasano a natungpal dayta a padto?
13 Basaen ti Apocalipsis 17:9-12. Gapu ta adu ti dinadael ti Gubat Sangalubongan I, adda pay sabali a padto ti Biblia a natungpal maipapan iti maudi nga al-aldaw. Kayat dagiti lider ti lubong a maadda ti sangalubongan a talna. Isu nga idi Enero 1920, impasdekda ti League of Nations a sinuktan ti United Nations idi Oktubre 1945. Dayta nga organisasion ket maawagan “ti maikawalo nga ari.” Ngem dayta ket saan a kabilgan a turay iti lubong. Ti pannakabalin ken impluensiana ket agdepdepende kadagiti gobierno a mangsupsuporta iti dayta. Iti Biblia, dagita a gobierno ket nairepresentar kas “ti 10 nga ari.”
14-15. (a) Ania ti ipakita ti Apocalipsis 17:3-5 maipapan iti “Babilonia a Dakkel”? (b) Ania ti mapaspasamak kadagiti mangsupsuporta iti ulbod a relihion?
14 Basaen ti Apocalipsis 17:3-5. Iti sirmata nga impakita ti Dios, nakita ni apostol Juan ti maysa a balangkantis, ti “Babilonia a Dakkel,” a mangirepresentar iti sangalubongan nga imperio ti ulbod a relihion. Kasano a natungpal dayta a sirmata? Dagiti ulbod a narelihiosuan nga organisasion ket nabayagen a sisisinged a makitintinnulong ken mangsupsuporta kadagiti gobierno iti lubong. Ngem asidegen nga ikabil ni Jehova iti puso dagiti gobierno nga “itungpalda ti panunotna.” Ania ti resultana? Dagita a gobierno, “ti 10 nga ari,” bueltaendanto dagiti ulbod a narelihiosuan nga organisasion tapno dadaelenda ida.—Apoc. 17:1, 2, 16, 17.
15 Kasanotayo nga ammo nga asidegen ti panagpatingga ti Babilonia a Dakkel? Tapno masungbatan dayta, nasayaat no lagipentayo a ti dadduma a paset ti nagkauna a siudad ti Babilonia ket protprotektaran ti adu a danum ti dakkel a Karayan Eufrates. Ti libro nga Apocalipsis impadana ti minilion a mangsupsuporta iti Babilonia a Dakkel kas mangprotprotektar nga “adu a danum.” (Apoc. 17:15) Ngem ipakitana met a ti adu a danum ket ‘agmaga,’ kayatna a sawen a ti sangalubongan nga imperio ti ulbod a relihion ket mapukawan iti adu a mangsupsuporta iti dayta. (Apoc. 16:12) Kas kaitungpalan dayta a padto, adu a tattao ita ti nangpanawen iti ulbod a relihion ken sabalin ti pangbirbirokanda kadagiti solusion dagiti problemada.
16. Apay a pagsayaatantayo ta naawatantayon dagiti padto maipapan iti kaadda ti United Nations ken iti pannakadadael ti Babilonia a Dakkel?
16 Apay a pagsayaatantayo no maawatantayo dagitoy a padto? Ti kaadda ti United Nations ken ti bumasbassit a bilang dagiti mangsupsuporta iti ulbod a relihion ti maysa pay nga ebidensia nga agbibiagtayon iti maudi nga al-aldaw. Uray no agmagmagan ti simboliko a danum a mangsupsuporta iti Babilonia a Dakkel, sabalinto ti mangdadael kadagiti ulbod a narelihiosuan nga organisasion. Kas nadakamaten, ti pannakadadaelda ket ikabilto ni Jehova iti puso “ti 10 nga ari”—dagiti gobierno a mangsupsuporta iti United Nations—“tapno itungpalda ti panunotna.” Ti ulbod a relihion ket kellaatto a dadaelen dagidiay a nasion isu a makigtotto ti lubong. * (Apoc. 18:8-10) Ti pannakadadael ti Babilonia a Dakkel ket nagdakkelto ti epektona iti lubong ken mabalin a pakaigapuan ti adu a rigat. Ngem adda dua a rason nga agragsakto ti ili ti Dios. Daytoy nabayagen a kabusor ni Jehova a Dios ket mapukawton iti agnanayon, ken asidegen ti pannakaisalakantayo iti daytoy nakadakdakes a sistema ti bambanag!—Luc. 21:28.
AGTALEKKA A PROTEKTARANTO NI JEHOVA TI ILINA
17-18. (a) Kasanotayo a maitultuloy a patibkeren ti pammatitayo? (b) Ania ti adalentayo iti sumaruno nga artikulo?
17 Impakpakauna ni Daniel nga “umadunto ti pudno a pannakaammo.” Ket kasta a talaga ti mapaspasamaken! Naawatantayon dagiti padto maipapan iti tiempotayo. (Dan. 12:4, 9, 10) Gapu ta eksakto ti pannakatungpal dagita a padto, umuneg nga umuneg ti panangipategtayo ken Jehova ken iti impaisuratna a Saona. (Isa. 46:10; 55:11) Itultuloymo ngarud a patibkeren ti pammatim. Kasano? Gagetam ti agadal iti Biblia ken tumulong iti sabsabali a suminged ken Jehova. Protektarannanto ti amin a naan-anay nga agpannuray kenkuana, ken ipaayanna ida iti “agtultuloy a talna.”—Isa. 26:3.
18 Iti sumaruno nga artikulo, agpokustayo kadagiti padto maipapan iti kongregasion Kristiano iti tiempo ti panungpalan. Kas maammuantayto, dagitoy a padto ket pammaneknek met nga agbibiagtayon iti maudi nga al-aldaw. Maammuantayto ti dadduma pay nga ebidensia a ni Jesus—ti agturturayen nga Aritayo—ti aktibo a mangidadaulo kadagiti matalek a pasurotna.
KANTA 61 Umabantekayo Amin a Saksi!
^ Agbibiagtayon iti maysa kadagiti makapagagar unay a tiempo iti pakasaritaan ti tao! Naipasdeken ti Pagarian ti Dios kas naipakpakauna iti adu a padto ti Biblia. Usigen daytoy nga artikulo ti dadduma kadagita a padto tapno bumileg ti pammatitayo ken Jehova ken tumulong kadatayo nga agtalinaed a kalmado ken agtalek kenkuana ita ken iti masanguanan.
^ Kitaen ti leksion 32 punto 4 iti libro nga Agbiagka a Naragsak iti Agnanayon! ken buyaen ti video a Nangrugi nga Agturay ti Pagarian ti Dios Idi 1914 iti jw.org/ilo.
^ Para iti kanayonan nga impormasion maipapan iti padto ni Daniel, kitaen ti Hunio 15, 2012 a ruar Ti Pagwanawanan, p. 14-19.
^ Para iti kanayonan nga impormasion maipapan iti mapasamak iti asidegen a masanguanan, kitaen ti kapitulo 21 ti libro nga Agturturayen ti Pagarian ti Dios!