1. Ania ti mariknatayo iti pribilehiotayo nga agkararag ken Jehova?

 INIKKANNATAYO ti nangaramid iti langit ken daga iti nagsayaat a pribilehio. Ipalpalubosna nga agkararagtayo kenkuana. Panunotentayo: Mabalintayo nga ibaga ken Jehova ti amin nga adda iti pusotayo iti aniaman nga oras ken aniaman a lengguahe, a saanen a kasapulan a mangaramidtayo iti appointment wenno makitulag kenkuana. Makapagkararagtayo uray no naidalittayo iti ospital wenno addatayo iti pagbaludan, ken makapagtalektayo a denggennatayo ti nadungngo nga Amatayo. Agyamantayo unay iti daytoy a pribilehio.

2. Kasano nga impakita ni Ari David nga ipatpategna ti pribilehio nga agkararag?

² Impateg ni Ari David ti pribilehio nga agkararag. Inkantana ken Jehova: “Maisagana koma ti kararagko kas insienso iti sanguanam.” (Sal. 141:1, 2) Idi tiempo ni David, naannad ti pannakaisagana ti sagrado nga insienso nga inusar dagiti papadi iti pudno a panagdaydayaw. (Ex. 30:34, 35) Idi dinakamat ni David ti insienso, ipakita dayta a kayatna a panunoten a naimbag ti ibagana iti nailangitan nga Amana. Kasta met ti kayattayo nga aramiden. Kayattayo a maragsakan ni Jehova kadagiti kararagtayo.

3. No agkararagtayo ken Jehova, ania koma ti kababalintayo, ken apay?

³ No agkararagtayo ken Jehova, saantayo koma a napasig unay. Imbes ketdi, agkararagtayo nga addaan iti nauneg a panagraem. Panunotentayo dagiti nakaskasdaaw a nasirmata da Isaias, Ezekiel, Daniel, ken Juan. Agduduma dagita a sirmata, ngem adda ti nagpapadaanda. Iladawanda amin ni Jehova kas ti nadayag nga Ari. Ni Isaias ‘nakitana ni Jehova a situtugaw iti nadayag ken nangato a tronona.’ (Isa. 6:1-3) Nakita ni Ezekiel  ni Jehova a situtugaw iti nailangitan a karuahe, a “nakaranraniag ti intero nga aglikmutna a kas iti bullalayaw.” (Ezek. 1:26-28) Nakita ni Daniel “Daydiay Sibibiag iti Agnanayon” a nakabado iti puraw, ken gumilgil-ayab ti tronona. (Dan. 7:9, 10) Nakita met ni Juan ni Jehova a situtugaw iti trono a napalikmutan iti napintas a bullalayaw a kasla berde nga esmeralda. (Apoc. 4:2-4) No panunotentayo ti awan kapadana a kinadayag ni Jehova, maipalagip kadatayo ti nakaskasdaaw a pribilehiotayo nga agkararag kenkuana ken ti kinapateg ti panangaramid iti dayta nga addaan iti nauneg a panagraem. Ngem ania dagiti mabalintayo nga ikararag?

4. Ania dagiti masursurotayo iti umuna a paset ti pagtuladan a kararag iti Mateo 6:9, 10?

⁴ Basaen ti Mateo 6:9, 10. Iti Sermon iti Bantay, insuro ni Jesus kadagiti adalanna no kasano ti agkararag iti pamay-an a mangparagsak iti Dios. Kalpasan nga imbaga ni Jesus ti “kastoy ngarud ti panagkararagyo,” dinakamatna nga umuna dagiti napateg a banag nga adda direkta a pakainaiganda iti panggep ni Jehova: ti pannakasantipikar ti naganna; ti iyaay ti Pagarian, a mangdadael iti amin a bumusbusor iti Dios; ken dagiti nagsasayaat a banag nga aramidennanto para iti daga ken para kadagiti tattao. No iramantayo dagita a banag kadagiti kararagtayo, ipakpakitatayo a napateg kadatayo ti pagayatan ti Dios.

5. Umiso kadi nga ikararagtayo dagiti personal a banag?

⁵ Iti sumaruno a paset ti kararag, impakita ni Jesus nga umiso nga ikararagtayo dagiti personal a banag. Mabalintayo a kiddawen ken Jehova nga ipaayna ti taraontayo iti daytoy nga aldaw, pakawanenna dagiti basoltayo, protektarannatayo iti sulisog, ken isalakannatayo iti managdakdakes. (Mat. 6:11-13) No kiddawentayo ken Jehova dagita, ipakpakitatayo nga agdepdependetayo kenkuana ken kayattayo a gun-oden ti paborna.

6. Ti kadi mabalintayo nga ikararag ket dagiti laeng espesipiko a nadakamat iti pagtuladan a kararag? Ilawlawag.

⁶ Saan a kayat ni Jesus nga eksakto a tuladen dagiti pasurotna ti sasao iti pagtuladan a kararag. Iti dadduma a kararag ni Jesus, dinakamatna ti nadumaduma a banag a napateg kenkuana iti daydi a tiempo. (Mat. 26: 39, 42; Juan 17:1-26) Mabalintayo met nga ikararag ti aniaman a napateg kadatayo. No adda desision nga aramidentayo, mabalintayo a kiddawen ti sirib ken pannakaawat. (Sal. 119:33, 34) No adda naawattayo a narigat nga asaynment, mabalintayo nga ikararag a tulongannatayo a mangtarus no kasanotayo nga aramiden dayta. (Prov. 2:6) Mabalin nga ikararagan dagiti nagannak dagiti annakda. Mabalin met nga ikararagan dagiti annak dagiti nagannakda. Mabalin ken masapultay amin nga ikararagan dagiti iyad-adalantayo iti Biblia ken dagiti kaskasabaantayo. Ngem siempre, saan koma a puro dawat ti linaon dagiti kararagtayo.

7. Apay a masapul nga idaydayawtayo ni Jehova iti kararag?

⁷ Ditay koma liplipatan nga idaydayaw ni Jehova kadagiti kararagtayo. Awanen ti sabali a maikari a maidaydayaw no di laeng ti Diostayo. Isu ket ‘naimbag ken sisasagana a mangpakawan.’ Kasta met, isu ket ‘naasi ken mannakipagrikna, nabannayat nga agpungtot ken dakkel ti napudno nga ayatna ken kanayon a matalek.’ (Sal. 86:5, 15) Talaga ngarud nga adda nasayaat a rason nga idaydayawtayo ni Jehova gapu iti kinasiasinona ken kadagiti ar-aramidenna.

8. Ania ti dadduma a mabalintayo a pagyamanan ken Jehova? (Salmo 104:12-15, 24)

⁸ Saantay la nga idaydayaw ni Jehova kadagiti kararagtayo. Masapul met nga agyamantay kenkuana gapu kadagiti nagsayaat a banag nga ipapaayna. Kas pagarigan, agyamantay kenkuana gapu kadagiti nagpipintas a kolor dagiti sabong, ti awan inggana a kinanadumaduma dagiti naimas a taraon, ken ti makaparagsak a pannakikadua kadagiti patpatgen a gagayyem. Nagadu pay ti ipapaay kadatayo ti nadungngo nga Amatayo tapno laeng maparagsaknatayo. (Basaen ti Salmo 104:12-15, 24.) Kangrunaan iti amin, agyamantay ken Jehova gapu iti aglaplapusanan a naespirituan a taraon nga ipapaayna ken gapu iti naraniag a namnamatayo iti masanguanan.

9. Ania ti makatulong tapno ditay malipatan ti agyaman ken Jehova? (1 Tesalonica 5:17, 18)

⁹ Naglaka laeng a malipatantayo ti agyaman ken Jehova gapu iti amin nga ar-aramidenna para kadatayo. Ania ti makatulong tapno saanka  a makalipat? Mabalinmo nga ilista dagiti espesipiko a kiddawmo ken pasaray kitaem no kasano a sinungbatan ni Jehova dagita. Kalpasanna, agkararagka tapno agyaman gapu iti tulongna. (Basaen ti 1 Tesalonica 5:17, 18.) Panunotem daytoy: Naragsak ken mariknatayo nga ipatpategdatayo no pagyamanandatayo. Kasta met, sigurado a maragsakan ni Jehova no ditay malipatan ti agyaman kenkuana gapu iti panangsungbatna kadagiti kararagtayo. (Col. 3:15) Ngem ania pay ti napateg a rason nga agyamantayo iti Diostayo?

10. Sigun iti 1 Pedro 2:21, apay a masapul nga agyamantayo ken Jehova gapu ta imbaonna ni Jesus ditoy daga?

¹⁰ Basaen ti 1 Pedro 2:21. Masapul nga agyamantayo ken Jehova ta imbaonna ti dungdungnguenna nga Anak tapno isuronatayo. No adalentayo ti biag ni Jesus, adu ti maammuantayo maipapan ken Jehova ken no kasanotayo a maparagsak isuna. No ipakitatayo ti pammati iti daton ni Kristo, agbalintayo a nadekket a gayyem ni Jehova a Dios ken maikappiatayo kenkuana.​—Roma 5:1.

11. Ania ti papel ni Jesus no agkararagtayo ken Jehova?

¹¹ Agyamantayo ken Jehova ta makapagkararagtayo kenkuana babaen ti Anakna. Us-usaren ni Jehova ni Jesus tapno patganna dagiti kiddawtayo. Dengdenggen ken sungsungbatan ni Jehova dagiti kararag a naipadalan iti nagan ni Jesus. Kuna ni Jesus: “Aramidekto met ti aniaman a kiddawenyo iti naganko, tapno maipadayag ti Ama babaen ti Anak.”​—Juan 14:13, 14.

12. Ania pay ti sabali a rason nga agyamantayo ken Jehova gapu iti Anakna?

¹² Pakawanen ni Jehova dagiti basoltayo gapu iti daton a subbot ni Jesus. Sigun iti Biblia, ni Jesus ti ‘nangato a paditayo nga agtugtugaw iti makannawan ti trono ti Kangatuan idiay langit.’ (Heb. 8:1) Ni Jesus ti ‘katulongantayo a kadua ti Ama.’ (1 Juan 2:1) Agyamantayo unay ken Jehova ta inikkannatayo iti mannakipagrikna a Nangato a Padi a makaawat kadagiti pagkapuyantayo ken “agpakpakaasi” para kadatayo! (Roma 8:34; Heb. 4:15) Imperpektotayo, isu a no awan ti daton ni Jesus, saantayo a makapagkararag ken Jehova. Sigurado nga umanamongka a talaga a kurang ti sasao a mangyebkas iti napalaus a panagyamantayo iti nagpateg a regalo ni Jehova kadatayo​—ti insagutna a patpatgenna nga Anak!

13. Iti rabii sakbay ti ipapatay ni Jesus, kasano nga impakitana nga ay-ayatenna dagiti adalanna?

¹³ Iti rabii sakbay ti ipapatay ni Jesus, nagkararag iti atiddog para kadagiti adalanna, ket kiniddawna iti Amana a ‘protektaranna ida iti daydiay managdakdakes.’ (Juan 17:15) Talaga nga ay-ayaten ida ni Jesus! Dandanina idin sanguen ti narigat a panagsagaba; ngem pampanunotenna latta ti pagimbagan dagiti apostolna.

14. Kasanotayo a maipakita nga ay-ayatentayo dagiti kakabsat?

¹⁴ Tapno matuladtayo ni Jesus, saan la koma a dagiti kasapulantayo ti ikararagtayo. Kanayon met koma nga ikararagantayo dagiti kakabsat. No aramidentay dayta, sursurotentayo ti bilin ni Jesus nga agiinnayattayo ken ipakpakitatayo ken Jehova nga ay-ayatentayo unay dagiti kapammatiantayo. (Juan 13:34) Saan a sayang ti orastayo no ikararagantayo dagiti kakabsat. Ngamin, kuna ti Sao ti Dios a “ti panagpakaasi ti nalinteg a tao ket nabileg ti epektona.”​—Sant. 5:16.

15. Apay a kasapulan dagiti kapammatiantayo dagiti kararagtayo?

¹⁵ Kasapulan dagiti kapammatiantayo dagiti  kararagtayo ta adu ti problemada. Mabalintayo a kiddawen ken Jehova a tulonganna ida a mangibtur kadagiti sakit, natural a didigra, gerra sibil, pannakaidadanes, wenno dadduma pay a pakarigatan. Mabalintayo met nga ikararagan dagiti managsakripisio a kakabsat a tumultulong kadagiti agkasapulan. Baka personal pay ketdi nga am-ammom ti dadduma kadakuada. Mabalinmo kadi a dakamaten ti naganda kadagiti personal a kararagmo? Maipakitatayo ti pudpudno a nainkabsatan nga ayat no kiddawentayo ken Jehova a tulonganna ida nga agibtur.

16. Apay a masapul nga ikararagantayo dagiti mangidadaulo kadatayo?

¹⁶ Dagiti kakabsat a lallaki a mangidadaulo iti kongregasion apresiarenda unay dagiti kararagtayo ta makatulong dagita kadakuada. Kasta ti narikna ni apostol Pablo. Insuratna: “Ikararagandak met, nga ammokto dagiti ibagak inton agsaoak tapno situtured a maipakaammok ti sagrado a palimed ti naimbag a damag.” (Efe. 6:19) Ita, addaantay met kadagiti nagaget a kakabsat a mangidadaulo kadatayo. Ipakpakitatayo nga ay-ayatentay ida no kiddawentayo ken Jehova a bendisionanna ti trabahoda.

17-18. Kaano a mabalin a makiddaw a mangidaulotayo iti kararag, ken ania ti masapul a laglagipentayo?

¹⁷ No dadduma, maawistayo a mangidaulo iti kararag. Kas pagarigan, ti maysa a sister a mangyad-adal iti Biblia mabalin a kiddawenna iti inkuyogna a sister nga isu ti mangidaulo iti kararag. Ti naikuyog a sister mabalin a dina am-ammo unay ti mayad-adalan, isu a baka pilienna nga isu lattan ti mangidaulo iti pangserra a kararag. Iti kasta, nalaklakana nga ibagay ti kararagna iti kasapulan ti mayad-adalan.

¹⁸ Mabalin a makiddaw iti maysa a brother nga idauluanna ti kararag para iti gimong wenno taripnong sakbay ti panangasaba. Dagiti brother a maikkan iti kasta a pribilehio masapul a laglagipenda ti panggep ti taripnong wenno gimong. Saan a mausar ti kararag a mangbalakad iti kongregasion wenno mangibaga iti pakaammo. Para iti kaaduan a gimong ti kongregasion, lima a minuto laeng ti naikeddeng para iti kanta ken kararag, isu a ti brother a mangidaulo iti kararag masapul a saan nga “atiddog” ti kararagna, nangruna iti rugi ti gimong.​—Mat. 6:7.

19. Ania ti makatulong kadatayo tapno nakasaganatayo iti aldaw ti panangukom ni Jehova?

¹⁹ Masapul a pagbalinentayo ti kararag nga ad-adda a prioridad iti biagtayo bayat nga umas-asideg ti aldaw ti panangukom ni Jehova. Imbaga ni Jesus maipapan iti dayta: “Agtultuloykayo ngarud nga agbantay, ken kanayon nga agpakpakaasikayo tapno malasatanyo amin dagitoy a masapul a mapasamak.” (Luc. 21:36) Wen, makatulong kadatayo ti kanayon a panagkararag tapno agtultuloytayo a siririing iti naespirituan. Iti kasta, nakasaganatayo iti aldaw ti Dios.

20. Kasano nga agbalin dagiti kararagtayo a kas iti nabanglo nga insienso?

²⁰ Ania dagiti napagsasaritaantayon? Ipatpategtayo unay ti pribilehiotayo nga agkararag. Ti koma kangrunaan nga ikararagtayo ket dagiti banag nga adda direkta a pakainaiganda iti panggep ni Jehova. Iyebkastayo met ti apresasiontayo iti Anak ti Dios ken iti panagturay ti Pagarianna, ken ikararagantayo dagiti kapammatiantayo. Ngem siempre, mabalintayo nga ikararag dagiti material ken naespirituan a kasapulantayo. No panunotentayo a naimbag dagiti ikararagtayo, ipakpakitatayo nga ipatpategtayo daytoy nagsayaat a pribilehio. Dagiti sasaotayo ket agbalin a kas iti nabanglo nga insienso para ken Jehova​—a ‘pakaragsakanna.’​—Prov. 15:8.