1. Ania ti inaramid ni Jehova kalpasan la unay a nagbasol da Adan ken Eva? (Genesis 3:15)

 KALPASAN la unay a nagbasol da Adan ken Eva, nangted ni Jehova iti namnama kadagiti agbalin nga annakda babaen ti nagpateg a padto. Mabasa dayta iti Genesis 3:15.—Basaen.

2. Apay a napateg daytoy a padto?

² Makitatayo dayta a padto iti umuna a libro ti Biblia. Ngem nagpateg dayta ta adda pakainaiganna iti amin a dadduma pay a libro ti Biblia. No kasano a ti spring ti mamagtitipon kadagiti binulong ti maysa a notebook, dagiti sasao iti Genesis 3:15 ti mamagkokonektar iti tunggal libro ti Biblia gapu iti maymaysa a mensahe: adda maibaon a Manangisalakan a mangdadael iti Diablo ken iti amin a dakes a pasurotna. * Talaga a bendisionto dayta kadagiti mangay-ayat ken Jehova!

3. Ania ti pagsasaritaantayo iti daytoy nga artikulo?

³ Iti daytoy nga artikulo, sungbatantayo dagitoy a saludsod maipapan iti padto ti Genesis 3:15: Siasino dagiti karakter a nadakamat iti dayta? Kasano a natungpal ti padto? Ken apay a pagsayaatantayo dayta?

4. Asino ti “uleg,” ken kasanotayo nga ammo?

⁴ Dagitoy dagiti karakter iti salaysay iti Genesis 3:14, 15:  ti “uleg,” ti ‘kaputotan’ ti uleg, ti “babai,” ken ti ‘kaputotan’ ti babai. Makatulong ti Biblia tapno maammuantayo no siasino ti irepresentar ti tunggal maysa kadagita. * Mangrugitayo iti “uleg.” Saan a maawatan ti literal nga uleg ti imbaga ni Jehova idiay hardin ti Eden. No kasta, ti inukom ni Jehova ket maysa la ketdi nga intelihente a parsua. Asino? Ilawlawag dayta ti Apocalipsis 12:9. Imbagana a “ti nagkauna nga uleg” ket nalawag a ni Satanas a Diablo. Ngem siasino ti kaputotan ti uleg?

5. Siasino ti kaputotan ti uleg?

⁵ No dadduma, us-usaren ti Biblia ti termino a kaputotan a tumukoy kadagidiay mangtultulad iti panagpampanunot ken panagtigtignay ti maysa isu a maawaganda no kuan kas annakna. Ti ngarud kaputotan ti uleg ket buklen dagiti espiritu a parsua ken tattao a kas ken Satanas a kumonkontra ken Jehova ken bumusbusor iti ili ti Dios. Karaman kadagita dagiti anghel a nangpanaw iti saadda idiay langit idi tiempo ni Noe ken dagiti dakes a tattao nga agtigtignay a kas iti Diablo nga amada.​—Gen. 6:1, 2; Juan 8:44; 1 Juan 5:19; Jud. 6.

6. Apay a ti “babai” ket saan a mabalin a ni Eva?

⁶ Sumaruno, ammuentayo no asino ti “babai.” Saan la ketdi a ni Eva dayta. Apay? Panunotentayo ti maysa a rason. Kuna ti padto a ti kaputotan ti babai “rumekennanto” ti ulo ti uleg. Kas napagsasaritaantayon, ti uleg ket ti espiritu a parsua a ni Satanas, ken awan ti imperpekto a kaputotan ni Eva a makabael a mangrumek kenkuana. Kasano ngarud a madadael ni Satanas?

7. Sigun iti Apocalipsis 12:1, 2, 5, 10, asino ti babai a nadakamat iti Genesis 3:15?

 ⁷ Ti kinasiasino ti babai a nadakamat iti Genesis 3:15 ket ipakaammo ti maudi a libro ti Biblia. (Basaen ti Apocalipsis 12:1, 2, 5, 10.) Saan nga ordinario daytoy a babai! Adda iti baba ti sakana ti bulan, ken adda 12 a bituen iti koronana. Impasngayna ti naisangsangayan unay nga anak​—ti Pagarian ti Dios. Ti Pagarian ket adda idiay langit, isu a ti babai ket masapul nga adda met idiay langit. Ti babai irepresentarna ti nailangitan a paset ti organisasion ni Jehova a buklen dagiti matalek nga espiritu a parsuana.​—Gal. 4:26.

8. Asino ti kangrunaan a kaputotan ti babai, ken kaano a nagbalin a kasta? (Genesis 22:15-18)

⁸ Makatulong ti Sao ti Dios tapno maammuantayo ti kinasiasino ti kangrunaan a kaputotan ti babai. Dayta a kaputotan ket masapul a direkta a kaputotan ni Abraham. (Basaen ti Genesis 22:15-18.) Kas naipadto, ni Jesus ket direkta a kaputotan dayta a matalek a patriarka. (Luc. 3:23, 24) Ngem dayta a kaputotan ket masapul a mas mannakabalin ngem iti tao ta masapul a rumekenna ni Satanas a Diablo tapno interamente a madadaelen. Idi ngarud agarup 30 ti tawenen ni Jesus, isu ket nadutokan kas Anak ti Dios babaen ti nasantuan nga espiritu. Iti dayta a pannakadutokna, ni Jesus ti nagbalin a kangrunaan a kaputotan ti babai. (Gal. 3:16) Kalpasan ti ipapatay ken panagungar ni Jesus, ti Dios ‘kinoronaanna iti dayag ken dayaw’ ken intedna kenkuana ti “amin nga autoridad idiay langit ken ditoy daga,” agraman ti autoridad a ‘mangdadael kadagiti aramid ti Diablo.’​—Heb. 2:7; Mat. 28:18; 1 Juan 3:8.

9-10. (a) Siasino pay dagiti paset ti kaputotan ti babai, ken kaano a nagbalinda a kasta? (b) Ania ti sumaruno a repasuentayo?

⁹ Ngem malaksid ken Jesus, adda pay dadduma nga agbalin a paset ti kaputotan ti babai. Impakaammo ni apostol Pablo ti kinasiasino dayta a paset ti kaputotan idi imbagana kadagiti Judio ken Gentil a Kristiano a dinutokan ti espiritu: “No kukuanakayo met ni Kristo, talaga a kaputotannakayo ni Abraham, ket tawidenyonto ti naikari kenkuana.” (Gal. 3:28, 29) No ti maysa a Kristiano ket dutokan ni Jehova babaen ti nasantuan nga espiritu, dayta a tao ket agbalin a paset ti kaputotan ti babai. Isu a ni Jesu-Kristo ken ti 144,000 a kakaduana nga agturay ti mangbukel iti kaputotan ti babai. (Apoc. 14:1) Tultuladenda ti panagpampanunot ken panagtigtignay ti Amada, ni Jehova a Dios.

¹⁰ Ita ta naammuantayon ti kinasiasino dagiti karakter iti Genesis 3:15, repasuentayo biit dagiti inaramiden ni Jehova tapno in-inut a matungpal dayta a padto ken no apay a pagsayaatantayo dayta.

11. Ania ti kayatna a sawen a nasugat ‘ti mukod’ ti kaputotan ti babai?

¹¹ Sigun iti padto ti Genesis 3:15, ti uleg sugatenna ‘ti mukod’ ti kaputotan ti babai. Natungpal dayta idi inusar ni Satanas dagiti Judio ken Romano a mangpapatay iti Anak ti Dios. (Luc. 23:13, 20-24) No kasano a marigatanka a magna no nasugatan ti mukodmo, temporario nga awan ti naaramidan ni Jesus idi natay bayat ti kaaddana iti tanem iti agarup tallo nga aldaw.​—Mat. 16:21.

12. Kasano ken kaano a marumek ti ulo ti uleg?

¹² Tapno matungpal ti padto ti Genesis 3:15, masapul a saan nga agtalinaed ni Jesus  iti tanem. Apay? Sigun ngamin iti padto, ti kaputotan masapul a rumekenna ti ulo ti uleg. Kayat a sawen dayta a masapul nga umimbag ti sugat ti mukod ni Jesus. Ket kasta nga agpayso ti napasamak! Iti maikatlo nga aldaw kalpasan ti ipapatayna, napagungar ni Jesus kas maysa nga immortal nga espiritu a parsua. Iti tiempo nga inkeddeng ti Dios, rumekento ni Jesus ni Satanas tapno interamente a madadaelen. (Heb. 2:14) Dagidiay makipagturay ken Kristo tumulongdanto a mangdadael iti kaputotan ti uleg​—ti amin a bumusbusor iti Dios.​—Apoc. 17:14; 20:4, 10. *

13. Apay a pagsayaatantayo ti pannakatungpal daytoy a padto?

¹³ No maysaka a dedikado nga adipen ti Dios, pagsayaatam ti pannakatungpal dayta a padto. Immay ni Jesus ditoy daga kas tao ket perpekto a tinuladna ti personalidad ni Amana. (Juan 14:9) Babaen ngarud ken Jesus, naam-ammo ken inayattayo ni Jehova a Dios. Pagsayaatantayo met dagiti pannursuro ken panangiwanwan ni Jesus bayat nga idadauluanna ita ti kongregasion Kristiano. Insuronatayo no kasano ti agbiag iti pamay-an a mangparagsak ken Jehova. Ken pagsayaatantayo amin ti ipapatay ni Jesus​—ti pannakasugat ti mukodna. Kasano? Idi napagungar ni Jesus, indatagna ti pateg ti darana kas perpekto a daton a “mangdalus kadatayo iti amin a basol.”​—1 Juan 1:7.

14. Masapul kadi nga ekspektaren dagiti tattao a matungpal a dagus ti naipadto idiay Eden? Ilawlawag.

¹⁴ Ipakita ti imbaga ni Jehova idiay Eden a tiempo ti kasapulan sakbay a naan-anay a matungpal dayta a padto. Tiempo ti kasapulan tapno mayanak ti naikari a kaputotan, tapno maaddaan ti Diablo kadagiti pasurotna, ken tapno agginnura ti dua a grupo. Pagsayaatantayo no maawatantayo daytoy a padto. Ngamin, pakdaar daytoy kadatayo a ti lubong a konkontrolen ni Satanas guraenna dagiti agdaydayaw ken Jehova. Kasta met laeng ti impakdaar ni Jesus idi agangay kadagiti adalanna. (Mar. 13:13; Juan 17:14) Talaga a makitkitatayon a matungtungpal dayta a paset ti padto, nangruna bayat ti napalabas a 100 a tawen. Kasano?

15. Apay a kumarkaro ti pananggura ti lubong iti kaputotan ti babai, ngem apay nga awan ti rason a mabutengtayo ken Satanas?

¹⁵ Di nagbayag kalpasan a naitrono ni Jesus kas Mesianiko nga Ari idi 1914, napapanaw ni Satanas idiay langit. Adda itan ditoy daga nga agur-uray iti pannakadadaelna. (Apoc. 12:9, 12) Ngem saan la a basta agur-uray nga awan ti ar-aramidenna. Desperado ken makaung-unget unay ni Satanas, isu nga ipappapasna ti pungtotna iti ili ti Dios. (Apoc. 12:13, 17) Dayta ti rason a kumarkaro ti pananggura ti lubong iti ili ti Dios. Ngem awan ti rason a mabutengtayo ken Satanas ken kadagiti pasurotna. Agtalektayo ketdi a kas ken apostol Pablo a nangisurat: “No adda kadatayo ti Dios, asinonto ti bumusor kadatayo?” (Roma 8:31) Naan-anay a makapagtalektayo ken Jehova ta kas nakitatayon, natungpalen ti kaaduan a paset ti padto iti Genesis 3:15.

16-18. Kasano a nagsayaatan da Curtis, Ursula, ken Jessica idi naawatanda ti Genesis 3:15?

¹⁶ Matulongannatayo ti kari ni Jehova iti Genesis 3:15 tapno maibturantayo ti aniaman a rigat a dumteng iti biagtayo. Imbaga ni Curtis a misionero idiay Guam: “Adda dagiti  tiempo a nasuot ken naupayak a nangsubok iti debosionko ken Jehova. Ngem ti kanayon a panangpanunotko iti padto iti Genesis 3:15 ti nakatulong tapno agtultuloyak nga agtalek iti nailangitan nga Amak.” Eksayteden ni Curtis iti aldaw inton pagpatinggaenen ni Jehova ti amin a rigattayo.

¹⁷ Kinuna ti sister a ni Ursula a taga-Bavaria nga idi naawatanna ti Genesis 3:15, nakombinsir a ti Biblia ket impaisurat ti Dios. Imbagana pay: “Idi naammuak nga adda ti inaramid a dagus ni Jehova tapno maaddaantayo iti namnama, immuneg ti panagayatko kenkuana.”

¹⁸ Imbaga ni Jessica a taga-Micronesia: “Diak malipatan ti riknak idi damo a naammuak ti kinapudno! Matungtungpalen ti padto iti Genesis 3:15. Nakatulong dayta tapno tantandaanak a ti biagtayo ita ket saan nga isu ti pudpudno a biag. Dayta a padto ti nangpabileg met iti pammatik a ti panagserbi ken Jehova ti mangipaay iti kasayaatan pay la a biag ita ken adayo a nasaysayaatto pay a biag iti masanguanan.”

19. Apay a masiguradotayo a matungpalton ti maudi a paset ti padto?

¹⁹ Kas nakitatayon, matungtungpalen ti Genesis 3:15. Nalawag a naammuantayon no siasino ti kaputotan ti babai ken ti kaputotan ti uleg. Immimbagen ti sugat ti mukod ni Jesus, ti kangrunaan a kaputotan ti babai, ken maysa itan a mannakabalin ken immortal nga Ari. Dandanin makompleto ti pannakapili dagiti mangbukel iti dadduma a paset ti kaputotan. Napasamaken ti umuna a paset ti padto, isu a masiguradotayo a matungpalto metten ti maudi a paset, ti pannakarumek ti ulo ti uleg. Sigurado a maragsakanto dagiti matalek a tattao inton madadaelen ni Satanas! Bayat nga ur-urayentayo dayta, ditay sumuksuko. Mapagtalkan ti Diostayo. Babaen ti kaputotan ti babai, ipaaynanto ti aglaplapusanan a bendision iti “amin a nasion iti daga.”​—Gen. 22:18.