1. Ania ti pagayatan ni Jehova ita?

 PAGAYATAN ti Dios ita a maikasaba iti intero a daga ti naimbag a damag maipapan iti Pagarian. (Mar. 13:10; 1 Tim. 2:3, 4) Trabaho ni Jehova daytoy, ken gapu ta nakapatpateg, pinilina ti dungdungnguenna nga Anak a mangidaulo iti dayta. Gapu ta nalaing a mangidaulo ni Jesus, masiguradotayo a mairingpas ti trabaho a panangasaba sigun iti kayat ni Jehova sakbay nga umay ti panungpalan.​—Mat. 24:14.

2. Ania ti pagsasaritaantayo iti daytoy nga artikulo?

² Iti daytoy nga artikulo, kitaentayo no kasano nga us-usaren ni Jesus “ti matalek ken masirib nga adipen” a mangipaay iti naespirituan a taraon ken mangorganisar kadagiti pasurotna iti kasaknapan a panangasaba iti pakasaritaan ti tao. (Mat. 24:45) Kitaentayto met ti mabalin nga aramiden ti tunggal maysa kadatayo tapno masuportarantayo ni Jesus ken ti matalek nga adipen.

3. Ania nga autoridad ti naited ken Jesus?

³ Idadauluan ni Jesus ti trabaho a panangasaba. Kasanotayo a masigurado dayta? Sakbay la unay a nagpalangit ni Jesus, kinasaritana ti dadduma kadagiti matalek a pasurotna iti maysa a bantay idiay Galilea. Imbagana kadakuada: “Naiteden kaniak ti amin nga autoridad idiay langit ken ditoy daga.” Kalpasan dayta, imbagana: “Inkayo ngarud kadagiti tattao iti amin a nasion ket pagbalinenyo ida nga adalak.” (Mat. 28:18, 19) Karaman ngarud kadagiti naited ken Jesus ti autoridad a mangidaulo iti trabaho a panangasaba.

4. Apay a masiguradotayo nga idadauluan latta ni Jesus ti trabaho a panangasaba agingga ita?

 ⁴ Imbaga ni Jesus a ti trabaho a panangasaba ken panagaramid iti adalan ket maaramid iti “amin a nasion” ken kadua isuna dagiti pasurotna iti “amin nga al-aldaw agingga iti panungpalan daytoy a sistema ti bambanag.” (Mat. 28:20) Nalawag nga ipakita dagiti imbaga ni Jesus nga itultuloyna nga idauluan ti trabaho a panangasaba agingga ita.

5. Kasanotayo a makatulong iti pannakatungpal ti Salmo 110:3?

⁵ Saan idi a madanagan ni Jesus amangan no agkurang dagiti trabahador bayat ti panungpalan ti sistema ti bambanag. Ammona a matungpal ti impakpakauna ti salmista: “Sisasagananto dagiti tattaom nga agboluntario iti aldaw nga idauluam ti puersa militarmo.” (Sal. 110:3) No makiramramanka iti trabaho a panangasaba, supsuportaram ni Jesus ken ti matalek nga adipen ken tumultulongka iti pannakatungpal dayta a padto. Agtultuloy ti trabaho, ngem adda dagiti karit.

6. Ania ti maysa a karit a pakaipaspasanguan dagiti mangikaskasaba iti Pagarian?

⁶ Ti maysa a karit a pakaipaspasanguan dagiti mangikaskasaba iti Pagarian ket ibubusor. Kinaulbod ti ibagbaga dagiti apostata, lider ti relihion, ken politiko maipapan iti trabahotayo. No mamati dagiti kabagian, am-ammo, ken katrabahuantayo kadagita a propaganda, baka pilitendatayo a sumardeng nga agserbi ken Jehova ken mangasaba. Iti dadduma a nasion, ti ibubusor ket mabalin a pamutbuteng, panangatake, panangaresto, ken panangibalud pay ketdi. Ditayon masdaaw iti dayta. Ngamin, impakpakauna ni Jesus: “Guraendakayto ti amin a nasion gapu iti naganko.” (Mat. 24:9) Kinapudnona, no mapadasantayo ti kasta a gura, ebidensia dayta nga adda kadatayo ti pabor ni Jehova. (Mat. 5:11, 12) Ti Diablo ti promotor iti dayta nga ibubusor. Ngem awan a pulos ti pangabakanna ken Jesus! Iti tulong ni Jesus, maipakpakaammo ti naimbag a damag kadagiti tattao iti amin a nasion. Kitaentayo dagiti ebidensia.

7. Ania nga ebidensia ti makitkitam a matungtungpalen ti Apocalipsis 14:6, 7?

⁷ Ti panagduduma ti lengguahe ti maysa pay a karit a pakaipaspasanguantayo kas mangikaskasaba iti Pagarian. Iti apocalipsis nga inted ni Jesus ken apostol Juan, impakpakaunana a maikasaba latta ti naimbag a damag uray adda dayta a lapped. (Basaen ti Apocalipsis 14:6, 7.) Kasano? Ik-ikkantayo iti tsansa ti adu a tattao agingga a posible a mangawat iti mensahe ti Pagarian. Iti intero a lubong, mabasan dagiti tattao dagiti naibatay-Biblia a publikasion iti website-tayo a jw.org gapu ta naglaon dayta kadagiti impormasion iti nasurok a 1,000 a lengguahe! Naaprobaran a maipatarus ti libro nga Agbiagka a Naragsak iti Agnanayon!—ti kangrunaan a publikasion nga us-usarentayo iti panagaramid kadagiti adalan​—iti nasurok a 700 a lengguahe! Magun-odan metten ti naespirituan a taraon babaen ti video para kadagiti tuleng ken umel, ken braille a publikasion para kadagiti bulsek. Makitkitatayon a matungtungpal dagiti padto ti Biblia. Dagiti tattao “manipud iti amin a lengguahe kadagiti nasion” nasursurodan ti agsao iti “nasin-aw a lengguahe” maipapan kadagiti kinapudno iti Biblia. (Zac. 8:23; Sof. 3:9) Maar-aramid amin dagita gapu iti nagsayaat a panangidaulo ni Jesu-Kristo.

8. Ania dagiti makitkitatayon a resulta ti trabahotayo a panangasaba?

⁸ Ita, nasurok a 8,000,000 a tattao iti 240 a pagilian ti paseten ti organisasion ni Jehova, ken rinibribu ti mababautisaran iti kada tawen! Ngem dagiti naespirituan a kualidad, “ti baro a personalidad,” nga ipakpakitan  dagiti kabbaro nga adalan ti napatpateg ngem kadagita a bilang. (Col. 3:8-10) Adu ti saanen nga immoral, naranggas, mangidumduma, ken nasionalistiko. Matungtungpalen ti padto iti Isaias 2:4; ‘saandan a sursuruen ti makigubat.’ Bayat nga ikagkagumaantayo nga isuot ti baro a personalidad, tultulongantayo dagiti tattao a sumrek iti organisasion ti Dios ken pampaneknekantayo a sursurotentayo ti mangidadaulo kadatayo, ni Kristo Jesus. (Juan 13:35; 1 Ped. 2:12) Saan a bigla a napasamak dayta. Ipapaay ni Jesus ti tulong a kasapulantayo.

9. Sigun iti Mateo 24:45-47, ania ti naipadto maipapan iti tiempo ti panungpalan?

⁹ Basaen ti Mateo 24:45-47. Impakpakauna ni Jesus a bayat ti tiempo ti panungpalan, dutokanna “ti matalek ken masirib nga adipen” a mangipaay iti naespirituan a taraon. Ekspektarentayo ngarud a nakaad-adu ti ar-aramiden daytoy nga adipen iti tiempotayo. Ket kasta nga agpayso ti mapaspasamak. Us-usaren ti mangidadaulo kadatayo dayta a bassit a grupo dagiti lallaki a dinutokan ti espiritu a mangipaay iti naespirituan a ‘taraon iti umiso a tiempo’ para iti ili ti Dios ken kadagiti interesado a tattao. Saan nga ibilang dagita a lallaki nga isuda ti mangituray iti pammati ti sabsabali. (2 Cor. 1:24) Bigbigenda ketdi a ni Jesu-Kristo ti “lider ken komander” ti ili ti Dios.​—Isa. 55:4.

10. Ania kadagiti publikasion a makita iti artwork ti nakakombinsiram a magna iti dalan nga agturong iti biag nga agnanayon?

¹⁰ Manipud 1919, nangisagana ti matalek nga adipen iti nadumaduma a publikasion tapno iti damo a gundaway, maramanan dagiti kabbaro nga interesado ti nasustansia a naespirituan a taraon. Idi 1921, inaramid ti adipen ti libro a The Harp of God tapno matulongan  dagiti interesado a mangammo kadagiti kangrunaan a pannursuro ti Biblia. Iti panaglabas dagiti tawen, adda dagiti publikasion a nainayon. Ania a publikasion ti nakatulong kenka a mangammo ken mangayat iti nailangitan nga Amatayo? Ti kadi “Mapapati Coma Ti Dios,” Ti Kinapudno a Mangiturong iti Biag nga Awan Inggana, Mabalinyo ti Agbiag nga Agnanayon iti Paraiso a Daga, Pannakaammo a Mangiturong iti Biag nga Agnanayon, Ania a Talaga ti Isursuro ti Biblia?, Ania ti Isuro ti Biblia Kadatayo?, wenno ti Agbiagka a Naragsak iti Agnanayon!, a kabaruan a publikasiontayo? Nadisenio amin dagita a mangipaay iti eksakto a kasapulantayo a mangaramid kadagiti ad-adalan iti tiempo a nairuar dagita.

11. Apay a masapul a mangantayo amin iti naespirituan a taraon?

¹¹ Saan laeng a dagiti kabbaro nga interesado ti agkasapulan iti natangken a naespirituan a taraon no di ket amintayo. Insurat ni apostol Pablo: “Ti natangken a makan ket para kadagiti nataengan a tattao.” Innayon ni Pablo a no iyaplikartayo dagiti masursurotayo iti Biblia ‘mailasintayo ti umiso ken di umiso.’ (Heb. 5:14) Kadagitoy narigat a tiempo a nakababbaban ti moralidad dagiti tattao, talaga a narigat a suroten dagiti pagalagadan ni Jehova. Ngem sigsiguraduen ni Jesus a magun-odantayo ti naimas a naespirituan a taraon a mangpabileg iti pammatitayo. Ti impaisurat ti Dios a Saona, ti Biblia, ti pagtataudan dayta a taraon. Ti matalek nga adipen ti mangisagsagana ken mangiwarwaras iti dayta a taraon iti panangidaulo ni Jesus.

12. Kas ken Jesus, kasano a padpadayawantayo ti nagan ti Dios?

¹² Kas ken Jesus, padpadayawantayo ti nagan ti Dios a pakaikarianna. (Juan 17:6, 26) Kas pagarigan, idi 1931, inusartayon ti naibatay-Biblia a nagan a Dagiti Saksi ni Jehova. Gapu iti dayta, impakitatayo a nakapatpateg  kadatayo ti nagan ti Dios ken kayattayo a maam-ammodatayo babaen ti nagan ti nailangitan nga Amatayo. (Isa. 43:10-12) Ken manipud idi Oktubre dayta a tawen, makitan ti nagan ti Dios iti akkub ti tunggal ruar daytoy a magasin a Ti Pagwanawanan. Ti nagan ti Dios ket naisubli met iti Baro a Lubong a Patarus ti Nasantuan a Kasuratan kadagiti bersikulo ti Biblia a pakabasaan iti dayta. Talaga a naiduma unay dagiti relihion ti Kakristianuan ta inikkatda ti nagan ni Jehova iti adu a Biblia nga impatarusda!

13. Ania ti nakakombinsiram nga us-usaren ni Jesus “ti matalek ken masirib nga adipen” ita? (Juan 6:68)

¹³ Babaen “ti matalek ken masirib nga adipen,” nangbuangay ni Jesus iti naisangsangayan nga organisasion ditoy daga a mangitantandudo iti nadalus a panagdaydayaw. Ania ti makunam iti daytoy nga organisasion? Baka mapanunotmo ti insungbat ni apostol Pedro ken Jesus: “Sadino koma ti papananmi? Adda kenka ti sasao a makaited iti biag nga agnanayon.” (Juan 6:68) Sadino koma ti ayantayo itan no awantayo iti organisasion ni Jehova? Babaen iti dayta, sigsiguraduen ni Kristo a mabsogtayo iti naespirituan. Sansanayennatayo met tapno epektibo a maitungpaltayo ti ministeriotayo. Kasta met, tultulongannatayo a mangisuot iti “baro a personalidad,” tapno maparagsaktayo ni Jehova.​—Efe. 4:24.

14. Kasano a nagsayaatam ti panagbalinmo a paset ti organisasion ni Jehova bayat ti COVID-19 pandemic?

¹⁴ Mangipapaay ni Jesus kadagiti nainsiriban nga instruksion bayat ti tiempo ti rigat. Nalawag a dakkel ti naitulong dagita nga instruksion idi nangrugi ti COVID-19 pandemic. Saan nga ammo ti adu a tattao iti lubong no ania ti ar-aramidenda, ngem sinigurado ni  Jesus a makaawattayo kadagiti nalawag nga instruksion tapno protektadotayo. Naiparegta nga agisuottayo iti face mask no addatayo kadagiti publiko a lugar ken surotentayo ti physical distancing. Naipalagip kadagiti panglakayen a kanayon a kontakenda ti amin iti kongregasion ken ammuenda dagiti pisikal ken naespirituan a kasapulanda. (Isa. 32:1, 2) Nakaawattayo met kadagiti kanayonan nga instruksion ken pammaregta kadagiti update manipud iti Bagi a Manarawidwid.

15. Ania nga instruksion ti naawattayo maipapan iti panaggigimong ken panangasaba bayat ti pandemic, ken ania dagiti resultana?

¹⁵ Bayat ti pandemic, nakaawattayo met kadagiti nalawag nga instruksion maipapan iti panaggigimong ken panangasaba. Narugiantayo a dagus ti naggigimong, nagasamblea, ken nagkombension babaen ti videoconference. Kaaduanna a nakapangasabatayo metten babaen ti surat, telepono, wenno selpon. Ket binendisionan ni Jehova dagiti panagreggettayo. Adu a sangay ti nangireport a dakkel ti immaduan ti bilang dagiti agibumbunannag. Kinapudnona, adu ti naaddaan kadagiti makaparegta a kapadasan bayat daytoy a tiempo.​—Kitaen ti kahon a “ Bembendisionan ni Jehova ti Panangasabatayo.”

16. Ania ti masiguradotayo?

¹⁶ Baka marikna ti dadduma a sobra ti kinaannad ti organisasion maipapan iti pandemic. Ngem kanayon a mapampaneknekan a nainsiriban ti panangsurot kadagiti maaw-awattayo nga instruksion. (Mat. 11:19) Ken bayat nga ut-utobentayo ti naayat a panangidaulo ni Jesus kadatayo, masiguradotayo nga aniaman ti mapasamak iti masanguanan, kanayon a kaduatayo ni Jehova ken ti dungdungnguenna nga Anak.​—Basaen ti Hebreo 13:5, 6.

17. Ania ti mariknam iti panangidaulo ni Jesus?

¹⁷ Maragsakantayo unay ta ni Jesus ti mangidadaulo kadatayo! Pasettayo ti organisasion nga agkaykaysa aniaman ti kultura, nasion, ken lengguahetayo. Mabmabsogtayo iti naespirituan ken makaaw-awattayo iti pannakasanay iti trabaho a panangasaba. Maisursuro iti tunggal maysa kadatayo no kasano nga isuot ti baro a personalidad ken masursurotayo ti agiinnayat. Talaga nga adu ti rason nga ipagpannakkeltayo ti mangidadaulo kadatayo a ni Jesus!