1. Ania ti panagriknam iti kinapudno?

 IPATPATEG ti ili ni Jehova ti kinapudno a masarakan iti Sao ti Dios. Iti dayta a naibatay ti pammatitayo. (Roma 10:17) Nakombinsirtayo a ni Jehova ti nangipasdek iti kongregasion Kristiano kas “maysa nga adigi ken pundasion ti kinapudno.” (1 Tim. 3:15) Maragsakantayo met nga agpasakup “kadagiti mangidadaulo” kadatayo. Isuda ti mangilawlawag iti kinapudno manipud iti Biblia ken mangipapaay kadagiti instruksion tapno maaramidtayo ti pagayatan ti Dios.—Heb. 13:17.

2. Sigun iti Santiago 5:​19, ania ti mabalin a mapasamak kadatayo uray naammuantayon ti kinapudno?

² Ngem uray no inawattayon ti kinapudno ken kombinsidotayon a masapul a surotentayo ti panangiwanwan ti organisasion ti Dios, mabalin latta a mayaw-awantayo. (Basaen ti Santiago 5:19.) Awanen ti sabali pay a kayat ni Satanas no saan a tay mapukawtayo ti panagtalektayo iti Biblia wenno ti panagtalektayo iti panangiwanwan ti organisasion ti Dios.—Efe. 4:14.

3. Apay a masapul a petpetantayo ti kinapudno? (Efeso 6:​13, 14)

³ Basaen ti Efeso 6:​13, 14. Dandanin mangusar ti Diablo iti nabileg a propaganda tapno mayaw-awanna ti amin a nasion a bumusor ken Jehova. (Apoc. 16:​13, 14) Ammotayo met a lallalo pay nga ikagumaan ni Satanas nga iyaw-awan ti ili ni Jehova. (Apoc. 12:9) Masapul ngarud a sanayentayo ti bagitayo a mangilasin iti nagdumaan ti kinapudno ken kinaulbod, ken agtulnogtayo iti kinapudno. (Roma 6:17; 1 Ped. 1:22) Nakadepende iti dayta ti pannakaisalakantayo inton dakkel a rigat!

4. Ania ti pagsasaritaantayo iti daytoy nga artikulo?

 ⁴ Iti daytoy nga artikulo, ammuentayo ti dua a kualidad a kasapulantayo tapno mailasintayo ti kinapudno manipud iti Biblia ken tapno masurottayo dagiti instruksion manipud iti organisasion ti Dios. Kalpasanna, pagsasaritaantayo ti tallo a suhestion a masapul nga aramidentayo tapno maitultuloytayo a mapetpetan ti kinapudno.

DAGITI KUALIDAD A MAKATULONG TAPNO MAILASINTAYO TI KINAPUDNO

5. Kasano a matulongannatayo ti panagbuteng ken Jehova tapno mailasintayo ti kinapudno?

⁵ Panagbuteng ken Jehova. Ti umiso a panagbuteng ken Jehova kaipapananna nga ay-ayatentayo unay isuna, isu a ditay kayat ti agaramid iti aniaman a kagurana. Magagarantayo a mangammo iti nagdumaan ti umiso ken di umiso, ken ti nagdumaan ti kinapudno ken kinaulbod, tapno maragsakan ni Jehova kadatayo. (Prov. 2:​3-6; Heb. 5:14) Ditay ipalubos a dakdakkel ti butengtayo iti tao ngem iti ayattayo ken Jehova. Apay? Ngamin, kaaduanna a no aramidentayo ti pagayatan dagiti tao, mapaguratayo ni Jehova.

6. Apay a ti panagbuteng iti tao ti rason a tiniritir ti 10 a panguluen ti kinapudno?

⁶ No dakdakkel ti panagbutengtayo iti tao ngem iti Dios, mabalin a mayadayotayo iti kinapudno. Kitaentayo ti napasamak iti 12 a panguluen iti tunggal tribu a nagespia iti daga nga inkari ni Jehova kadagiti Israelita. Dakdakkel ti panagbuteng ti 10 nga espia kadagiti Canaanita ngem iti ayatda ken Jehova. Imbagada kadagiti padada nga Israelita: “Ditay kabaelan dagidiay a tattao, ta napigpigsada ngem datayo.” (Num. 13:​27-31) No iti panangmatmat ti tao, agpayso a nabilbileg dagiti Canaanita ngem kadagiti Israelita. Ngem no ibagatayo a saan a kabaelan dagiti Israelita nga abaken dagiti kabusorda, kamali dayta. Apay? Ngamin, dida pinanunot ti kabaelan nga aramiden ni Jehova. Nagpokus koma dagitoy a  10 nga espia iti kayat ni Jehova nga aramiden dagiti Israelita. Inutobda met koma dagiti naaramidannan kadakuada iti nabiit pay. Pinanunotda koma nga awan ti nakaimudingan wenno serserbi ti bileg dagiti Canaanita no ikompara iti naindaklan a pannakabalin ni Jehova. Ngem saan a kas kadagita nga awanan pammati nga espia, kayat da Josue ken Caleb a paragsaken ni Jehova. Imbagada kadagiti tattao: “No maragsakan ni Jehova kadatayo, sigurado nga ipan ken itedna dayta kadatayo.”—Num. 14:​6-9.

7. Kasanotayo a mapatibker ti panagbutengtayo ken Jehova? (Kitaen met ti ladawan.)

⁷ Tapno mapatibkertayo ti panagbutengtayo ken Jehova, masapul nga agpokustayo iti panangparagsak kenkuana iti amin a desision nga aramidentayo. (Sal. 16:8) Kas pagarigan, no agbasbasaka kadagiti salaysay iti Biblia, isaludsodmo iti bagim, ‘No addaak idi iti dayta a situasion, ania koma ti inaramidko?’ Kas pagarigan, imadyinem a maysaka kadagiti dumdumngeg iti negatibo a report ti 10 a panguluen iti tunggal tribu ti Israel. Patiem kadi lattan ti ibagbagada gapu iti buteng iti tao, wenno saan, gapu ta nabilbileg ti ayatmo ken Jehova ken ti tarigagaymo a mangparagsak kenkuana? Saan a nabigbig ti intero a henerasion ti Israel ti kinapudno nga ibagbaga da Josue ken Caleb. Kas resultana, saanda a nakastrek iti Naikari a Daga.—Num. 14:​10, 22, 23.

8. Ania a kualidad ti masapul nga ikagumaantayo a patanoren, ken apay?

⁸ Kinapakumbaba. Ipakpakaammo ni Jehova ti kinapudno kadagiti napakumbaba. (Mat. 11:25) Nasursurotayo ti kinapudno gapu ta sipapakumbaba nga inawattayo ti tulong. (Ara. 8:​30, 31) Ngem masapul nga agannadtayo tapno saantayo nga agbalin a napannakkel. No napannakkeltayo, mabalin a panunotentayo a dagiti personal nga opiniontayo ket maitunos kadagiti prinsipio iti Biblia ken instruksion a maaw-awattayo iti organisasion ni Jehova.

9. Kasanotayo nga agtalinaed a napakumbaba?

⁹ Tapno agtalinaedtayo a napakumbaba, masapul a laglagipentayo a nakabasbassittayo no ikompara iti kinatan-ok ni Jehova. (Sal. 8:​3, 4) Mabalintayo met nga ikararag a tulongannatayo nga agbalin a napakumbaba ken nalaka a maisuro. Tulongannatayo ni Jehova a mangyun-una iti panagpampanunotna ngem iti panagpampanunottayo. Masursurotayo dayta babaen ti Saona ken ti organisasionna. No agbasbasaka iti Biblia, kitaem dagiti punto a mangipakita kenka kadagiti ebidensia nga ipatpateg ni Jehova dagiti napakumbaba ken kagurana dagiti napannakkel, napangas, ken natangsit. Mas kasapulan met nga agtalinaedka a napakumbaba no makaawatka kadagiti pribilehio a mangted kenka iti kanayonan nga autoridad, wenno panggapuan ti dadduma a mangpadayaw kenka.

NO KASANOTAYO A MAPETPETAN TI KINAPUDNO

10. Siasino dagiti inusar ni Jehova a mangipaay iti instruksion ken panangiwanwan iti ilina?

¹⁰ Agtultuloyka nga agtalek iti panangiwanwan ti organisasion ni Jehova. Iti nagkauna nga Israel, inusar ni Jehova ni Moises, sa idi kuan, ni Josue a mangipaay iti instruksion iti ilina. (Jos. 1:​16, 17) Nabendisionan dagiti Israelita gapu ta binigbigda dagitoy a lallaki kas pannakabagi ni Jehova a Dios. Ginasut a tawen kalpasan ti damo a pannakaipasdek ti kongregasion Kristiano, ti 12 nga apostol ti nangipaayen iti panangiwanwan. (Ara. 8:​14, 15) Kalpasanna, karaman metten iti dayta a grupo ti dadduma a panglakayen iti Jerusalem. Gapu ta sinurotda ti panangiwanwan dagitoy a matalek a lallaki, “nagtultuloy a timmibker ti pammati dagiti kongregasion ken inaldaw nga immadu ti bilangda.”  (Ara. 16:​4, 5) Mabendisionantayo met ita no surotentayo ti panangiwanwan ti organisasion ni Jehova. Ngem ania ngata ti marikna ni Jehova no saantayo nga agtulnog kadagiti inapointaranna a mangidaulo kadatayo? Masungbatan dayta a saludsod no usigentayo ti napasamak kadagiti Israelita idi mapmapanda iti Naikari a Daga.

11. Ania ti napasamak kadagiti nagrebelde ken Moises a pinili ni Jehova a mangidaulo iti ilina? (Kitaen met ti ladawan.)

¹¹ Bayat nga agturturong dagiti Israelita iti Naikari a Daga, nagrebelde dagiti prominente a lallaki maibusor ken Moises ken kinuestionaranda ti akem nga inted ni Jehova kenkuana. Imbagada: “Nasantuan ti intero nga Israel [saan la a ni Moises,] ket adda kadakuada ni Jehova.” (Num. 16:​1-3) Agpayso met ketdi a para iti Dios, nasantuan “ti intero nga Israel.” Ngem pinili ni Jehova ni Moises a mangidaulo iti ilina. (Num. 16:28) Isu nga idi a ni Moises ket krinitikar dagiti rebelde, ni Jehova ti talaga a krinitikarda. Saanda a nagpokus iti kayat ni Jehova, no di ket iti kayatda—ti agbalin a prominente ken maaddaan iti ad-adu pay nga autoridad. Pinatay ti Dios dagiti nangidaulo iti panagrebelde, kasta met ti rinibu pay a dimmasig kadakuada. (Num. 16:​30-35, 41, 49) Ita, siguradotayo met a kagura ni Jehova dagiti saan a mangraraem kadagiti urnos ti organisasionna.

12. Apay a makapagtalektayo iti organisasion ni Jehova?

¹² Makapagtalektayo iti organisasion ni Jehova. No adda nalawag a rason a masapul a mabalbaliwan wenno malawlawagan ti pannakaawattayo iti espesipiko a kinapudno iti Biblia wenno iti pamay-antayo nga agserbi ken Jehova, saan a bumdeng dagiti mangidadaulo kadatayo, wenno ti Bagi a Manarawidwid, nga agaramid kadagiti kasapulan a panagbalbaliw. (Prov. 4:18) Ti kangrunaan a rason nga aramidenda dayta ket gapu ta kayatda a paragsaken ni Jehova. Ikagkagumaanda met nga ibatay dagiti desisionda iti Sao ti Dios. Dayta ti  pagtuladan a sursuroten ti amin nga agserserbi ken Jehova.

13. Ania “ti pagtuladan iti nasayaat a sasao,” ken ania ti masapul nga aramidentayo iti dayta?

¹³ “Itultuloymo a suroten ti pagtuladan iti nasayaat a sasao.” (2 Tim. 1:13) “Ti pagtuladan iti nasayaat a sasao” ket tumukoy kadagiti Nakristianuan a pannursuro a masarakan iti Biblia. (Juan 17:17) Dagita ti nakaibatayan ti amin a patpatientayo. Sinursuruannatayo ti organisasion ni Jehova a kumpet iti dayta a pagtuladan. Agingga nga ar-aramidentayo dayta, agtultuloy met a mabendisionantayo.

14. Apay a saan a nagtultuloy a napetpetan ti dadduma a Kristiano “ti pagtuladan iti nasayaat a sasao”?

¹⁴ Ania ti mabalin a mapasamak no saantayo nga itultuloy a petpetan “ti pagtuladan iti nasayaat a sasao”? Kitaentayo ti maysa a pagarigan. Idi umuna a siglo, dadduma a Kristiano ti nangiwaras iti saan nga agpaypayso a damag a dimteng kanon ti aldaw ni Jehova. Adda pay ketdi kano surat a naggapu ken apostol Pablo a mangibagbaga iti dayta. Adda dagiti Kristiano a taga-Tesalonica a namati lattan ken nangiwaras iti dayta a damag a dida man la sinigurado no agpaypayso dayta. Saanda koma a naallilaw no tinandaananda dagiti insuro kadakuada ni Pablo idi kaduada pay isuna. (2 Tes. 2:​1-5) Binalakadan ni Pablo dagiti kakabsat a dida patien ti amin a mangngegda. Ken tapno saanto manen a maulit dayta kadakuada, inngudo ni Pablo ti maikadua a suratna kadagiti taga-Tesalonica kadagitoy a sasao: “Awatenyo ti pakomusta nga insurat daytoy kabsatyo a ni Pablo. Kastoy ti panagsuratko iti amin a suratko.”—2 Tes. 3:17.

15. Kasanotayo a maprotektaran ti bagitayo kadagiti kinaulbod a kasla umiso? Mangted iti pagarigan. (Kitaen met dagiti ladawan.)

¹⁵ Ania ti masursurotayo iti imbaga ni Pablo kadagiti taga-Tesalonica? No adda mangngegtayo a maikontra iti naammuantayo iti Biblia, wenno no adda agdindinamag nga estoria, usarentayo koma ti pannakatarustayo. Iti dati a Soviet Union, adda inwaras dagiti bumusbusor kadatayo a surat a kasla naggapu iti sangalubongan a hedkuarter. Pinaregta dayta a surat ti dadduma a kakabsat a mangbukelda iti sabali  nga organisasion. Kasla agpaypayso dayta a surat, ngem saan a naallilaw dagiti matalek a kakabsat. Nabigbigda a ti mensahe ti surat ket maikontra iti naisuro kadakuada. Ita, us-usaren no dadduma dagiti kabusortayo ti Internet wenno ti social media a mangallilaw ken mamagsisina kadatayo. Imbes a dagus a “patien[tayo] ti tunggal pannursuro a kasla naggapu iti Dios,” maprotektarantayo ti bagitayo no panunotentayo a naimbag no ti mangmangngeg wenno ti mabasbasatayo ket maitunos kadagiti kinapudno a naammuantayon.—2 Tes. 2:2; 1 Juan 4:1.

16. Sigun iti Roma 16:​17, 18, ania ti masapul nga aramidentayo no saan nga itultuloy ti dadduma a petpetan ti kinapudno?

¹⁶ Agtalinaedtayo a naikaykaysa kadagiti napudno ken Jehova. Kayat ti Dios nga agkaykaysatayo nga agkakabsat a mangidaydayaw kenkuana. Agtultuloytayo nga agkaykaysa no itultuloytayo a petpetan ti kinapudno. Asinoman nga agiwarwaras iti aniaman a damag a maikontra iti kinapudno, pagsisinaenna ti kongregasion. Isu a pakpakdaarannatayo ti Dios a ‘liklikantayo ida.’ Ta no saan, mayadayotayo iti kinapudno.—Basaen ti Roma 16:​17, 18.

17. Ania dagiti magunggonatayo no mailasintayo ti kinapudno ken mapetpetantayo a naimbag dayta?

¹⁷ No mailasintayo ti kinapudno ken mapetpetantayo a naimbag dayta, agtalinaedtayo a nasinged ken Jehova ken kanayon a nabileg ti pammatitayo. (Efe. 4:​15, 16) Saantayo a maallilaw kadagiti ulbod a pannursuro ken propaganda ni Satanas, ken agtalinaedtayo met a natalged inton dakkel a rigat ta aywanannatayto ni Jehova. Itultuloytay ngarud a petpetan a naimbag ti kinapudno, ‘ket addanto kadatayo ti Dios ti talna.’—Fil. 4:​8, 9.