Binasayo kadi a naimbag dagiti nabiit pay a ruar Ti Pagwanawanan? Kitaenyo no masungbatanyo dagiti sumaganad a saludsod:

Ania ti uppat nga aramidentayo tapno sumayaat ti panagkantatayo?

Agtakder a nasayaat ken ipangato ti pagkantaan. Umanges iti umiso a pamay-an. Ungapen a naimbag ti ngiwat tapno napigpigsa ti panagkanta.​—w17.11, p. 5.

Ania ti maapresiartayo kadagiti lokasion ken dalan a mapan kadagiti siudad a pagkamangan idiay Israel?

Adda innem a siudad a pagkamangan a naiwaras iti Israel. Naaywanan a naimbag dagiti kalsada nga agturong kadagita. Gapuna, alisto ken saan unay a marigatan nga agkamang kadagita ti maysa a tao.​—w17.11, p. 14.

Apay a ti sagut ti Dios a subbot babaen ken Jesus ti kasayaatan a regalo a maawattayo?

Pennekenna ti tarigagaytayo nga agtultuloy nga agbiag, ken ipaayna ti kasapulantayo a pannakawayawaya iti basol ken ipapatay. Gapu ta ipatpateg ti Dios dagiti kaputotan ni Adan, impaayna ni Jesus nupay managbasoltayo pay laeng.​—wp17.6, p. 6-7.

Kasano a tumukoy iti panagungar ni Jesus ti Salmo 118:22?

Nailaksid ni Jesus kas Mesias ken napapatay. Tapno agbalin nga “ulo ti nagsulian,” kasapulan a mapagungar.​—w17.12, p. 9-10.

Kanayon kadi nga addaan iti kalintegan kas inauna dagiti nagbalin a kapuonan ti Mesias?

No dadduma, ti linia ti kapuonan nga agturong ken Jesus ket babaen ti inauna nga anak a lalaki, ngem saan a kanayon a kasta. Saan a ni David ti inauna nga anak ni Jesse; ngem ni David ti nagtaudan ti Mesias.​—w17.12, p. 14-15.

Ania ti dadduma a prinsipio iti medisina ti masarakan iti Biblia?

Iti Mosaiko a Linteg, maisina dagidiay addaan iti espesipiko a kita ti sakit. Masapul nga agbuggo dagiti tattao no nagiggemda iti bangkay. Imbilin ti Linteg ti umiso a panagibelleng iti rugit ti tao. Maaramid ti panagkugit iti maikawalo nga aldaw ti ubing, a kasayaatan a tiempo a panagbalay ti dara.​—wp18.1, p. 7.

Apay a saan a dakes nga ayaten ti Kristiano ti bagina?

Masapul nga ayatentayo ti padatayo a tao a kas iti bagitayo. (Mar. 12:31) Dagiti lallaki rumbeng nga “ayatenda dagiti assawada a kas kadagiti bukodda a bagi.” (Efe. 5:28) Ngem posible nga agbalin a di balanse ti panagayat iti bagi.​—w18.01, p. 23.

Ania dagiti makatulong tapno rumang-aytayo iti naespirituan?

Masapul nga adalen ken utobentayo ti Sao ti Dios sa iyaplikartayo dayta. Nasken met a pagtalinaedentayo a nakalukat ti panunot ken pusotayo iti panangiwanwan ti nasantuan nga espiritu ken siraragsak nga akseptarentayo ti tulong ti sabsabali.​—w18.02, p. 26.

Apay a di makatulong ti astrolohia ken panagpadles iti panangammo iti masanguanan?

Adda nagduduma a rason, ngem ti kangrunaan a rason ket kondenaren dagita ti Biblia.​—wp18.2, p. 4-5.

Ania ti aramidentayo no inawattayo ti awis a pannangan?

No inawattayo ti maysa nga awis, ikagumaantayo a tungpalen ti saotayo. (Sal. 15:4) Saantay koma a kanselaren dayta nga awan gapgapuna. Mabalin a nagsagana a naimbag ti nagawis kadatayo.​—w18.03, p. 18.

Ania dagiti masursuro dagiti nadutokan a lallaki ken ni Timoteo?

Pudpudno a maseknan ni Timoteo kadagiti tattao ken inyun-unana ti naespirituan a bambanag. Nagaget iti sagrado a panagserbi ken inyaplikarna dagiti nasursurona. Nagtultuloy a nagsanay ken nagpannuray iti espiritu ni Jehova. Kabaelan dagiti panglakayen ken ministerial nga adipen a tuladen ti ulidanna.​—w18.04, p. 13-14.