Ti ama ni Rehoboam ket ni Solomon, a nagturay iti Israel iti 40 a tawen. (1 Ar. 11:42) Natay ni Solomon idi 997 B.C.E. Kalpasanna, manipud Jerusalem, nagpaamianan ni Rehoboam a nagturong idiay Siquem tapno mapulotan kas ari. (2 Cron. 10:1) Surotenna ngata ti addang ni Solomon, a pagaammo a naisangsangayan ti siribna? Ammo ngata ni Rehoboam a masubokto ti abilidadna a mangrisut kadagiti komplikado nga isyu?

Ammo la ketdi ni Rehoboam ti nariribuk idi a kasasaad ti Israel. Idi agangay, napan kenkuana dagiti pannakabagi dagiti umili ket prangka nga imbagada: “Ni amam, iti biangna, pinagbalinna a nadagsen ti sangolmi; ket ita pagbalinem a nalaglag-an ti narigat a panagserbi iti amam ken ti nadagsen a sangol nga inkabilna kadakami, ket agserbikamto kenka.”​—2 Cron. 10:3, 4.

Mabalin a saan nga ammo ni Rehoboam ti aramidenna! No pagustuanna dagiti umili, mabalin a maksayan ti pagnam-ayanna, ti pamiliana, ken dagiti opisial ti palasiona ket maksayan ti obligasion dagiti umilina. Ngem mabalin nga agrebeldeda no dina pagustuan ida. Ania ti aramidenna? Nagkonsulta ti baro nga ari kadagiti lallakay a dati a mamalbalakad ni Solomon. Nupay kasta, nagpabalakad met kadagiti agtutubo a kasadaranna. Sinurotna ti balakadda ket nagdesision a padagsenanna pay ida. Insungbatna: “Pagbalinekto a nadagdagsen ti sangolyo, ket siak, iti biangko, nayonakto dayta. Ni amak, iti biangna, dinusanakayo babaen kadagiti baut, ngem siak, iti biangko, babaen kadagiti pannaplit.”​—2 Cron. 10:6-14.

Ania ti maadaltayo? Nalawag a masansan a nainsiriban nga ipangagtayo dagiti lallakay ken nataenganen iti naespirituan. Gapu ta adun ti kapadasanda, mabalin a makitada ti posible a resulta ti maysa a desision ket makaitedda iti nasayaat a balakad.​—Job 12:12.

Gapu iti dayta a panagrebelde, inummong ni Rehoboam ti armadana. Ngem bimmallaet ni Jehova babaen ken propeta Semaias, ket kinunana: “Dikay sumang-at ken makirupak iti kakabsatyo nga annak ti Israel. Agsublikayo tunggal maysa iti balayna, ta daytoy a banag napasamak iti panangtignayko.”​—1 Ar. 12:21-24. *

Ania, saan a makilaban? Nariribukan la ketdi ni Rehoboam! Ania laengen ti panunoten dagiti umili iti ari a nangipangta a mangdusa kadagiti iturayanna “babaen kadagiti pannaplit” ngem bay-anna lattan ti panagrebeldeda! (Idilig ti 2 Cronicas 13:7.) Nupay kasta, “nagtulnogda iti sao ni Jehova, ket nagawidda maitunos iti sao ni Jehova.”

Ania ti maadaltayo? Nainsiriban ti agtulnog iti Dios uray no mabalin a maibabaintayo iti panangaramidtayo iti dayta. Ti panagtulnog iti Dios ket agresulta iti anamong ken bendisionna.​—Deut. 28:2.

Ania ti nagimbagan dayta ken Rehoboam? Kas panagtulnogna, dina intuloy ti planona a makilaban iti simmina a baro a nasion, ket nagibangon kadagiti siudad iti teritoria ti Juda ken Benjamin a sakupna. Pinatibkerna iti “napalalo unay” ti adu a siudad. (2 Cron. 11:5-12) Napatpateg pay, sinurotna dagiti linteg ni Jehova iti dayta a tiempo. Bayat a naigamer iti idolatria ti sangapulo-tribu a pagarian ti Israel nga iturturayan ni Jeroboam, adu sadiay ti nangsuporta ken Rehoboam babaen ti ipapanda idiay Jerusalem para iti pudno a panagdaydayaw. (2 Cron. 11:16, 17) Bimmileg ti turay ni Rehoboam gapu ta nagtulnog.

Ngem idi nabilegen ti turay ni Rehoboam, adda di ninamnama nga inaramidna. Binay-anna ti linteg ni Jehova ket sinurotna ti pagano a panagdaydayaw! Ngem apay? Gapu ngata iti impluensia ti Ammonita nga inana? (1 Ar. 14:21) Aniaman ti makagapu, simmurot kenkuana ti intero a nasion. Impalubos ngarud ni Jehova a rauten ni Sisac nga ari ti Egipto ti adu a siudad ti Juda, uray no pinatibker dagita ni Rehoboam!​—1 Ar. 14:22-24; 2 Cron. 12:1-4.

Kimmaro pay ti kasasaad idi nakadanon ni Sisac iti Jerusalem, a pagturturayan ni Rehoboam. Iti daytoy a gundaway, indanon ni propeta Semaias ti mensahe ti Dios ken Rehoboam ken kadagiti prinsipena: “Binaybay-andak, ket siak, met, iti biangko, binaybay-ankayo iti ima ni Sisac.” Ania ti reaksion ni Rehoboam iti dayta a mangdisiplina a mensahe? Nagsayaat! Kuna ti Biblia: “Dagiti prinsipe ti Israel ken ti ari impakumbabada ti bagbagida ket kinunada: ‘Ni Jehova nalinteg.’” Gapuna, insalakan ni Jehova ni Rehoboam ken ti Jerusalem.​—2 Cron. 12:5-7, 12.

Kalpasanna, nagtultuloy a nagturay ni Rehoboam iti makin-abagatan a pagarian. Sakbay ti ipapatayna, adu a sagut ti intedna iti adu nga annakna tapno saanda nga agrebelde iti kabsatda a ni Abias, ti sumaruno nga agturay. (2 Cron. 11:21-23) Impakitana ditoy ti pannakatarus a saanna idi a naipakita.

Nupay kasta, kurang ti naaramidan ni Rehoboam tapno anamongan ti Dios. Kuna ti Biblia maipapan iti panagturayna: “Inaramidna no ania ti dakes.” Apay? Gapu ta “saanna a naipasdek a sititibker ti pusona a mangbirok ken Jehova.”​—2 Cron. 12:14.

Daytoy ti maadaltayo: Nagtulnog ni Rehoboam iti Dios no dadduma. Adda met dagiti nasayaat nga inaramidna para iti nasion ni Jehova. Ngem saan a naaddaan iti nasinged a relasion ken Jehova wenno iti nasged a tarigagay a mangparagsak kenkuana. Iti kasta, nagbasol ket sinurotna ti ulbod a panagdaydayaw. Mabalin a maisaludsodmo: ‘Idi impangag ni Rehoboam ti panangilinteg ti Dios, gapu ngata dayta iti impluensia ti dadduma wenno iti naimpusuan a panagbabawi ken tarigagayna a mangparagsak iti Dios?’ (2 Cron. 11:3, 4; 12:6) Idi lumakayen, nagaramid manen iti dakes. Naiduma unay ni Rehoboam ken lolona a ni Ari David! Wen, nakaaramid ni David  kadagiti kamali, ngem ad-adda a makita iti biagna ti panagayat ken Jehova, panangipateg iti pudno a panagdaydayaw, ken naimpusuan a panagbabawi kadagiti basolna.​—1 Ar. 14:8; Sal. 51:1, 17; 63:1.

Makasursurotayo ken Rehoboam. Makomendaran dagiti tattao a mangipapaay iti kasapulan ti pamiliada ken agar-aramid iti nasayaat. Ngem tapno anamongannatayo ti Dios, ipangpangrunatayo ti pudno a panagdaydayaw ken agtalinaedtayo iti dayta.

Maaramidtayo dayta no ikagumaantayo a taginayonen ti nauneg nga ayat ken Jehova. No kasano a rubrobantayo ti apuy tapno saan a matay, pagtalinaedentayo met a nasged ti ayattayo iti Dios babaen ti regular a panagadaltayo iti Saona, panangutob iti basbasaentayo, ken kanayon a panagkararag. (Sal. 1:2; Roma 12:12) Kas resultana, ti ayattayo ken Jehova ti mangrubrob iti tarigagaytayo a mangparagsak kenkuana iti amin nga aramidentayo. Dayta ti pakatignayantayo a naimpusuan nga agbabawi, no kasapulan. Saan a kas ken Rehoboam, makapagtalinaedtayo a matalek iti pudno a panagdaydayaw.​—Jud. 20, 21.