1. Ania ti marikna ni Jehova no agsubli kenkuana ti maysa kadagiti karnerona?

KAS naadaltayo iti napalabas nga artikulo, inyarig ni Jehova ti bagina iti nasayaat a pastor a sidudungngo a mangay-aywan iti tunggal karnerona ken mangbirok iti asinoman a nayaw-awan. Imbaga ni Jehova kadagiti Israelita a nangpanaw kenkuana: “Agsublikayo kaniak, ken agsubliakto kadakayo.” Ammotayo a kasta pay laeng ti riknana ta imbagana: “Saanak nga agbalbaliw.” (Mal. 3:6, 7) Imbaga ni Jesus a kasta unay ti ragsak ni Jehova ken dagiti anghel no agsubli Kenkuana ti uray maysa laeng a nayaw-awan nga adipenna.—Luc. 15:10, 32.

2. Ania ti usigentayo iti daytoy nga artikulo?

² Kitaentayo ti tallo nga ilustrasion ni Jesus maipapan iti panangtulong kadagiti immadayo ken Jehova. Pagsasaritaantayo ti dadduma a kualidad a kasapulantayo tapno matulongantayo nga agsubli kenkuana dagiti napukaw a karnero. Kitaentayo met no apay a makagunggona ti panagreggettayo a tumulong kadagiti nakapuy.

3-4. Apay a binirok a naimbag ti babai a nadakamat iti Lucas 15:8-10 ti napukaw a drakmana?

³ Ikagumaantayo a biroken dagiti mayat nga agsubli ken Jehova. Iti maysa nga ilustrasion a nairekord iti Ebanghelio ni Lucas, inyestoria ni Jesus no kasano a binirok ti maysa a babai ti napateg a banag a napukaw—maysa a sinsilio a drakma. Ti napateg a punto ti ilustrasion ket ti kinapinget ti babai a mangbirok iti sinsilio.—Basaen ti Lucas 15:8-10.

⁴ Inladawan ni Jesus ti rikna ti babai idi nabirokanna ti napukaw a napateg a drakma a sinsilio. Idi kaaldawan ni Jesus, ti dadduma a Judio nga inna ket mangted iti anakda a babai iti maysa a set ti 10 a sinsilio a drakma iti aldaw ti kasarna. Mabalin a dayta a napukaw a sinsilio ket karaman iti kasta a set.  Impapan ti babai a natnag ti sinsilio iti suelo, isu a nangsindi iti lampara sa binirokna ngem awan nakitana. Nalabit saan nga immanay ti lawag ti lamparana tapno mabirokanna ti bassit a pirak a sinsilio. Idi agangay, sinagadanna ti intero a balay. Iti naummongna a tapok, nakitana ti napateg a drakma a sumilsileng iti lawag ti lampara. Kasta unay ti bang-arna! Inayabanna dagiti gagayyem ken kaarrubana tapno ibagana ti naragsak a damag.

5. Apay a mabalin a narigat a biroken dagiti nangpanaw iti kongregasion?

⁵ Kas ipakita ti ilustrasion ni Jesus, kasapulan ti panagregget tapno mabirokan ti napukaw. Mabalin a masapul nga ikagumaantayo a biroken dagiti nangpanaw iti kongregasion. Mabalin nga adun a tawen a didan makitimtimpuyog kadatayo. Baka immakarda pay ketdin iti lugar a saan ida nga am-ammo dagiti kakabsat sadiay. Ngem siguradotayo ita a dadduma kadagita a di aktibo ti mailiwen nga agsubli ken Jehova. Kayatda manen ti agserbi ken Jehova a kadua dagiti padada a pudno nga agdaydayaw kenkuana, ngem kasapulanda ti tulongtayo.

6. Kasano a makatulong ti amin a miembro ti kongregasion iti panangbirok kadagiti di aktibo?

⁶ Siasino dagiti makatulong iti panagbirok kadagiti di aktibo? Amintayo—dagiti panglakayen, payunir, kapamilia, ken agibumbunannag iti kongregasion. Adda kadi gayyemmo wenno kabagiam a nagbalin a di aktibo? Adda kadin di aktibo a nakasaritam iti panangasaba iti binalaybalay wenno iti publiko? Ilawlawagmo a no kayatna ti masarungkaran, maragsakanka a mangited iti adres wenno contact number-na kadagiti panglakayenyo.

7. Ania ti masursurom iti imbaga ti panglakayen a ni Thomas?

⁷ Ania dagiti praktikal nga aramiden dagiti panglakayen tapno mabirokanda dagiti mayat nga agsubli ken Jehova? Kitaentayo ti komento ti panglakayen nga agnagan Thomas * nga agnanaed idiay Spain. Nasuroken a 40 a Saksi ti natulonganna nga agsubli iti kongregasion. Imbaga ni Thomas: “Umuna, damagek ti nadumaduma a kakabsat no ammoda no sadinon ti pagnanaedan dagiti di aktibo. Wenno damagek dagiti kakabsat no adda malagipda a saanen a makigimgimong. Magagaran ti kaaduan iti kongregasion a tumulong iti panagbirok. Inton sarungkarakon dagiti di aktibo, komustaek dagiti annak ken ti dadduma a kakabagianda. Ti dadduma a di aktibo ikuykuyogda idi dagiti annakda kadagiti gimong, ket mabalin nga agibumbunannag idi dagita nga annakda. Mabalin met a matulongan dagitoy nga annak nga agsubli ken Jehova.”

8. Iti ilustrasion ti Lucas 15:17-24 maipapan iti napukaw nga anak, kasano ti panangtrato ti ama iti agbabbabawi nga anakna?

⁸ Ania dagiti kualidad a masapul a patanorentayo tapno matulongantayo dagidiay mayat nga agsubli ken Jehova? Kitaentayo ti dadduma a masursurotayo iti ilustrasion ni Jesus maipapan iti nasukir nga anak a pimmanaw iti balayda. (Basaen ti Lucas 15:17-24.) Inlawlawag ni Jesus no kasano a nakapagpampanunot idi agangay ti anak ken nagdesision nga agawiden. Nagtartaray a simmabat ti ama ken sidudungngo nga inarakupna tapno ipariknana ti ayatna iti anakna. Makonkonsiensia ti anak ket mariknana a saanen a maikari a maawagan iti anak. Naasian ti ama bayat nga ibagbaga ti anakna ti rikriknana. Adda dagiti inaramid ti ama tapno maipakitana nga awatenna manen ti anakna, saan a kas trabahador, no di ket  kas madungdungngo a miembro ti pamilia. Kas pammaneknek, nagpaisagana ti ama iti padaya ken inikkanna iti napintas a bado ti agbabbabawi nga anakna.

9. Ania dagiti kualidad a kasapulantayo tapno matulongantayo dagiti di aktibo nga agsubli ken Jehova? (Kitaen ti kahon a “ No Kasano a Tulongan Dagidiay Mayat nga Agsubli.”)

⁹ Ni Jehova ket kas iti ama iti dayta nga ilustrasion. Ay-ayatenna dagiti di aktibo a kakabsattayo ken kayatna nga agsublida kenkuana. No tuladentayo ni Jehova, matulongantayo ida nga agsubli. Kasapulantayo ti anus, empatia, ken ayat. Apay a masapul nga ipakitatayo dagita a kualidad, ken kasanotayo a maaramid dayta?

10. Apay a kasapulantayo ti anus no tulongantayo ti maysa nga agsubli ken Jehova?

¹⁰ Kasapulan ti panawen tapno makasubli ken Jehova ti maysa a di aktibo, isu a masapul a naanustayo. Imbaga ti adu a dati a di aktibo a sada la nagsubli kalpasan ti maulit-ulit nga ibibisita dagiti panglakayen ken ti dadduma a kakabsat iti kongregasion. Insurat ti maysa a kabsat nga agnagan Nancy a taga-Southeast Asia: “Dakkel ti naitulong kaniak ti maysa a nasinged a gayyemko iti kongregasion. Imbilangnak a manangna. Impalagipna dagiti naragsak a kapadasanmi. Siaanus a dimngeg bayat nga iyeb-ebkasko ti rikriknak ken impaayna ti balakad a kasapulak. Talaga nga isu ket pudno a gayyem a nakasagana a tumulong iti aniaman a tiempo.”

11. Apay a kasapulantayo ti empatia tapno maliwliwatayo dagiti nasaktan ti rikriknada?

¹¹ Ti empatia ket kas iti nasamay a sapsapo; makatulong a mangagas iti nasaktan a rikrikna. Dadduma a di aktibo ket adu a tawenen a nasakit ti nakemda iti maysa a kakongregasionda.  Gapu iti dayta, dida kayat ti agsubli ken Jehova. Baka adda met dagiti mangpanunot a di nainkalintegan ti pannakatratoda. Mabalin a kasapulanda ti maysa a dumngeg ken makatarus iti rikriknada. (Sant. 1:19) Kinuna ni María a dati a di aktibo: “Kasapulak ti maysa a gayyem a dumngeg, mangliwliwa, ken mangbagbaga kaniak.”

12. Kasano a ti ayat ni Jehova ket kas iti tali?

¹² Kuna ti Biblia a ti ayat ni Jehova iti ilina ket kas iti singdan wenno tali. Kasano a kasta? Panunotentayo daytoy nga ilustrasion: Ipapanmo a malmalmeska iti nadawel a baybay ket adda nangipuruak kenka iti salbabida. Sigurado nga apresiarem dayta a tulong tapno saanka a malmes. Ngem saan nga umdas ti salbabida tapno agbiagka. Nalamiis ti danum ket maispalka laeng no makadanonka iti lifeboat. Kasapulan nga adda mangipalladaw kenka iti tali ken mangguyod kenka tapno makaluganka iti lifeboat. Imbaga ni Jehova a maulit-ulit nga inusarna ti “singdan ni ayat” a mangyasideg kenkuana kadagiti Israelita a pimmanaw. (Os. 11:4) Kasta met la ita ti marikrikna ti Dios maipapan kadagidiay simmardeng nga agserbi kenkuana ken malmalmes kadagiti problema ken pakadanagan. Kayatna a maammuanda nga ay-ayatenna ida ken kayatna nga agsublida kenkuana. Ket mabalin nga usarennaka ni Jehova a mangiparikna iti ayatna kadakuada.

13. Isalaysay ti maysa a kapadasan a mangipakita iti bileg ti nainkabsatan nga ayat.

¹³ Napateg nga ipasiguradotayo kadagiti di aktibo nga ay-ayaten ida ni Jehova ken ay-ayatentayo met ida. Imbaga ti di aktibo iti nasurok a 30 a tawen nga agnagan Pablo, a nadakamat iti napalabas nga artikulo: “Maysa  nga agsapa, idi rummuarak iti balaymi, adda nasingpet a baket a sister a sidudungngo a nakisarita kaniak. Nagsangitak a kasla ubing. Imbagak a kasla imbaon isuna ni Jehova a makisarita kaniak. Iti dayta met la a kanito, nagdesisionak nga agsubli ken Jehova.”

14. Sigun iti ilustrasion iti Lucas 15:4, 5, ania ti inaramid ti pastor idi nasarakanna ti napukaw a karnero?

¹⁴ Kasapulan dagiti di aktibo ti agtultuloy a suportatayo. Kas iti napukaw nga anak iti ilustrasion ni Jesus, mabalin a nasakit pay laeng ti rikriknada agingga ita. Ken mabalin a kimmapuy ti espiritualidadda gapu iti napasaranda iti lubong ni Satanas. Masapul a tulongantayo ida a mangpabileg manen iti pammatida ken Jehova. Iti ilustrasion maipapan iti napukaw a karnero, inladawan ni Jesus no kasano nga imbaklay ti pastor ti karnero ken insublina iti arban. Adun nga oras ken pigsa ti inusar ti pastor a mangbirok iti napukaw a karnero. Ngem ammona a saan a makasubli ti karnero a bukbukodna isu a kasapulan nga ibaklayna nga ipan iti arban.—Basaen ti Lucas 15:4, 5.

15. Kasanotayo a masuportaran dagiti nakapuy a kayatda ti agsubli ken Jehova? (Kitaen ti kahon a “ Nakapatpateg a Katulongan.”)

¹⁵ Mabalin nga adu a tiempo ken pigsa ti kasapulantayo a mangtulong iti dadduma a di aktibo tapno mapagballigianda dagiti pagkapuyanda. Ngem iti tulong ti espiritu ni Jehova, ti Saona, ken dagiti publikasion nga ipapaay ti organisasionna, matulongantayo ida a mangpapigsa manen iti espiritualidadda. (Roma 15:1) Kasano? Kinuna ti maysa nga eksperiensiado a panglakayen: “Kasapulan a mayadalan iti Biblia ti kaaduan a di aktibo a nagdesision nga agserbi manen ken Jehova.” *  Isu a no makiddaw nga iyadalam ti maysa a di aktibo, siraragsak koma nga awatem dayta a pribilehio. Innayon ti panglakayen: “Ti kabsat a mangyadal ket masapul nga agbalin a nasayaat a gayyem a mabalin a pangyebkasan ti di aktibo iti rikriknana.”

16. Kasanotayo a makasigurado a tulongannatayo dagiti anghel?

¹⁶ Ipakita ti adu a kapadasan a makipagtrabtrabaho kadatayo dagiti anghel tapno mabirokantayo dagiti di aktibo a mayat nga agsubli ken Jehova. (Apoc. 14:6) Alaentayo a pagarigan ni Silvio a taga-Ecuador. Impakaasina ken Jehova a matulongan a makasubli iti kongregasion. Bayat nga agkarkararag, adda nag-doorbell. Dua a panglakayen ti adda iti ridaw. Iti dayta nga ibibisita, siraragsak a rinugianda a tinulongan.

17. Ania ti mariknatayo no matulongantayo dagiti nakapuy iti naespirituan?

¹⁷ Mapasarantayo ti kasta unay a rag-o no matulongantayo dagiti nakapuy iti naespirituan nga agsubli ken Jehova. Kuna ni Salvador a maysa a payunir nga agregregget a tumulong kadagiti di aktibo: “No dadduma, diak magawidan ti agsangit gapu iti ragsakko. Maragsakanak unay a mangpanunot nga inispal ni Jehova ti maysa kadagiti patpatgenna a karnero manipud iti lubong ni Satanas ken adda pribilehiok a makipagtrabaho Kenkuana.”—Ara. 20:35.

18. No maysaka a di aktibo, ania ti masiguradom?

¹⁸ No nagbalinka a di aktibo, masiguradom nga ay-ayatennaka pay laeng ni Jehova ket kayatna nga agsublika kenkuana. Masapul nga agreggetka nga agsubli. Ngem kas iti ama iti ilustrasion ni Jesus, ur-urayen ni Jehova ti panagsublim, ket siraragsakto a mangabrasa kenka.