MAMATITAYO amin nga iwanwanwan ni Jehova ti ilina, ken ipapaayna ti naespirituan a kasapulanda kadagitoy “maudi nga al-aldaw.” (2 Tim. 3:1) Ngem masapul nga agtulnog ti tunggal maysa kadatayo ken Jehova. Ti kasasaadtayo ita ket kas iti kasasaad idi dagiti Israelita idiay let-ang. Masapul nga agtulnogda kadagiti uni ti trumpeta.

Nagpaaramid ni Jehova ken Moises iti dua a trumpeta a napanday a pirak, a mausar ‘no maummong dagiti tattao ken no umakarda iti pagkampuan.’ (Num. 10:2) Dagiti papadi ti mangpuyot kadagiti trumpeta iti nadumaduma a pamay-an tapno maipakaammo ti rumbeng nga aramiden dagiti tattao. (Num. 10:3-8) Umaw-awat ita ti ili ti Dios kadagiti direksion iti nadumaduma a pamay-an. Usigentayo ti tallo kadagita a mangipalagip kadatayo kadagiti uni dagiti trumpeta idi. Maawis ti ili ti Dios ita iti dadakkel a panagtataripnong, umawat dagiti nadutokan a manangaywan iti pannakasanay, ken mapabaro wenno mabaliwan dagiti teokratiko nga urnos para iti amin a kongregasion.

No kayat idi ni Jehova nga ummongen ti “intero nga Israel” iti ruangan ti makindaya a paset ti tabernakulo, puyoten dagiti papadi ti dua a trumpeta. (Num. 10:3) Ti uni dagita ket mangngeg ti amin a tribu a nagkampo iti aglawlaw ti tabernakulo iti uppat a grupo. Iti sumagmamano a minuto, makapanen sadiay dagiti nagkampo iti asideg ti ruangan. Ad-adayo ti ayan ti dadduma isu nga ad-adu a tiempo ken panagregget ti kasapulan tapno makapanda. Aniaman ti situasion, kayat ni Jehova nga agtataripnong ken magunggonaan ti amin.

Ita, saantayon nga aguummong iti maysa a tabernakulo, ngem maawistayo kadagiti panagtataripnong ti ili ti Dios. Karaman kadagita dagiti rehional a kombension ken dadduma pay nga espesial nga okasion a sadiay nga awatentayo dagiti nagpapateg nga impormasion ken direksion. Agpapada a programa ti tagtagiragsaken ti ili ni Jehova iti intero a lubong. Isu nga amin nga umatender ket agtataripnong kas naragsak a grupo. Adda dagiti aggapu iti adayo a lugar. Ngem umanamong ti amin nga umatender a magunggonaanda iti panagreggetda.

Dagidiay ngay naiputputong a grupo nga adayo iti dadakkel a panagtataripnong? Gapu iti moderno a teknolohia, adu ti magunggonaan iti isu met la a programa ken mariknada pay ketdi a pasetda kadagiti dadakkel a panagtataripnong. Kas pagarigan, bayat ti ibibisita ti maysa a pannakabagi ti hedkuarter, ti sangay iti Benin inkonektarna ti programa idiay Arlit, Niger, maysa nga ili a pagminasan iti Sahara Desert. Duapulo ket maysa a kakabsat ken interesado ti immatender.  Nupay adayo ti ayanda, nariknada a karamanda iti 44,131 nga immatender. Insurat ti maysa a kabsat: “Naimpusuan nga agyamankami iti panangikonektaryo iti daytoy a programa. Dayta manen ti pakakitaan nga ay-ayatendakami unay.”

No maysa la a trumpeta ti puyoten ti Israelita a padi, dagiti laeng “panguluen, dagiti pannakaulo ti rinibu” ti agtataripnong iti tolda a pagkonsultaan. (Num. 10:4) Sadiay a makaawatda iti impormasion ken pannakasanay manipud ken Moises. Dayta ti makatulong kadakuada a mangasikaso kadagiti responsabilidadda kadagiti tribuda. No maysaka kadagidiay a panguluen, saan kadi nga aramidem ti amin a kabaelam tapno makaatender ken mabenepisiaranka?

Ita, dagiti panglakayen iti kongregasion ket saan a “panguluen”; saanda met nga iturayan ti arban ti Dios nga ay-aywananda. (1 Ped. 5:1-3) Ngem talaga nga ar-aramidenda ti amin a kabaelanda a mangipastor iti arban, isu a nakasaganada a mangawat iti awis para iti kanayonan a pannakasanay, kas iti Kingdom Ministry School. Dita a masursuro dagiti panglakayen no kasano ti agbalin a mas epektibo iti panangaywanda iti kongregasion. Gapu iti dayta, nabilbileg ti espiritualidad ti amin. Uray no saanka a nakaatender iti kasta nga eskuelaan, posible a mabembenipisiarankan iti nasursuro dagiti nakaatenderen iti dayta.

No dadduma, agbaliwbaliw ti uni dagiti trumpeta a puyoten dagiti Israelita a papadi. Kaipapanan dayta a kayat ni Jehova nga umakar ti intero a kampo iti sabali a lugar. (Num. 10:5, 6) Nakaor-organisado ti iyaakar ti kampo ngem dakkel a trabaho dayta para iti tunggal maysa. Mabalin nga adda dagiti tiempo a saan a kayat ti dadduma ti umakar. Apay?

Nalabit narikna ti dadduma a ti bilin nga umakar ket masansan unay ken dida ekspektaren. “No dadduma, agtalinaed laeng ti ulep iti rabii agingga iti bigat.” Adda met dagiti tiempo a ‘dua nga aldaw, makabulan, wenno nabaybayag pay’ ti baet dagiti iyaakarda. (Num. 9:21, 22) Namin-ano nga immakar ti intero a kampo? Dinakamat ti Numeros kapitulo 33 ti agarup 40 a lugar a nagkampuan dagiti Israelita.

No dadduma, agkampoda iti nalinong a lugar. Talaga a makaparagsak dayta iti “naglawa ken nakabutbuteng a let-ang.” (Deut. 1:19) Isu a mabalin a panunotenda a baka saan a nasayaat ti sumaruno a pagakaranda.

No mangrugin nga umakar dagiti tribu, baka matuokan ti dadduma nga aguray. Mangngeg ti amin ti agbaliwbaliw nga uni ti trumpeta, ngem saanda a mabalin nga aggigiddan a pumanaw. Ti agbaliwbaliw nga uni ti trumpeta kaipapananna a masapul a pumanawen dagiti tribu a nagkampo iti daya—dagiti tribu ti Juda, Isacar, ken Zabulon. (Num. 2:3-7; 10:5, 6) No makapanawdan, dagiti papadi puyotenda dagiti trumpeta iti maikadua a daras iti agbaliwbaliw nga uni tapno pumanaw metten ti tallo a tribu a nagkampo iti abagatan. Itultuloy nga aramiden dayta dagiti papadi agingga a makapanaw ti intero a kampo.

Mabalin a marigatanka a mangakseptar iti maysa a panagbalbaliw iti organisasion. Apay? Siguro, pampanunotem a nagadu metten dagiti dimo ekspektaren a panagbalbaliw. Wenno nalabit magustuam ti dadduma nga urnos ket kayatmo a saan koman a mabaliwan dagita. Aniaman ti rasonmo, baka mariknam a masubsubok ti panaganusmo, ken marigatanka a mangakseptar iti panagbalbaliw. Ngem no panunotentayo a pagsayaatantayo dagiti panagbalbaliw, sigurado a makitatayo a bembendisionannatayo ti Dios.

Idi kaaldawan ni Moises, inwanwan ni Jehova ti minilion a lallaki, babbai, ken ubbing iti let-ang. No dina inwanwan ken inaywanan ida, saanda la ketdi a nakalasat. Ita, nasingedtayo ken Jehova ken nabileg ti pammatitayo kenkuana gapu iti panangiwanwanna! Gapuna, determinadotayo koma amin a mangtulad kadagiti matalek nga Israelita a nagtulnog iti nadumaduma nga uni dagiti trumpeta!