1. Kasano a mayarig ni Jehova iti agpaspasuso nga ina?

“MALIPATAN aya ti ina ti agsussuso nga anakna?” Insaludsod dayta ni Jehova idi kaaldawan ni propeta Isaias. “Uray no makalipat dagitoy nga inna, pulos a dikayto malipatan,” imbaga ti Dios iti ilina. (Isa. 49:15) Manmano nga ikomparana ti bagina iti maysa nga ina ngem inaramidna dayta iti daytoy a gundaway. Inusar ni Jehova ti relasion ti agina tapno ipakitana no kasano kapateg kenkuana dagiti adipenna. Marikna ti kaaduan nga inna ti narikna ti maysa nga ina nga agnagan iti Jasmin, “No pasusuem ti anakmo, mangbukbukelka iti espesial a relasion nga agpaut iti tungpal biag.”

2. Ania ti marikna ni Jehova no in-inut nga umadayo kenkuana ti maysa kadagiti annakna?

² Ammo ni Jehova no adda anakna a saanen a makigimgimong wenno mangaskasaba. Isu a nakaladladingit la ketdi a makakita iti rinibribu nga adipenna nga agbalbalin a di aktibo * kada tawen.

3. Ania ti kayat ni Jehova?

³ Adu kadagitoy nga ipatpategtayo a kakabsat a nagbalin a di aktibo ti agsubli iti kongregasion, ket maragsakantayo no aramidenda dayta! Kayat ni Jehova nga agsublida, ken kasta met ti mariknatayo. (1 Ped. 2:25) Kasanotayo a matulongan ida? Sakbay a sungbatantayo dayta, nasayaat nga ammuentayo pay nga umuna no apay a sumardeng ti dadduma a makigimong ken mangasaba.

4. Kasano a naapektaran ti dadduma iti sekular a trabahoda?

⁴ Okupado ti dadduma iti trabahoda. “Adu unay a tiempo ken pigsa ti busbusbosek iti trabahok,” inamin ni Hung * a maysa a kabsat a taga-Southeast Asia. “Simamaag nga impagarupko a no ad-adu ti kuartak, nasaysayaat ti panagserbik ken Jehova. Isu a ninayonak ti oras ti panagtrabahok. Saanakon a makigimgimong agingga a simmardengakon a makikadua iti kongregasion. Agparang a nadisenio ti lubong nga in-inut a mangyadayo kadagiti tattao iti Dios.”

5. Ania ti epekto ti agsasaruno a problema iti maysa a kabsat?

⁵ Adu a kakabsat ti maup-upay gapu kadagiti problema. Alaentayo a pagarigan ni Anne a taga-Britain nga addaan lima nga annak. “Maysa kadagiti annakko ti adda nakaro a depektona,” inlawlawag ni Anne. “Idi agangay, maysa a balasangko ti nailaksid, ken maysa a barok ti naaddaan iti problema iti isip. Nadepresak unay nga uray la insardengkon ti makigimong ken mangasaba. Idi agangay, nagbalinakon a di aktibo.” Maasiantayo ken Anne ken iti pamiliana ken iti dadduma pay a maipaspasango iti kasta a problema!

6. Kasano a ti saan a panangyaplikar iti Colosas 3:13 in-inut nga iyadayona ti maysa iti ili ni Jehova?

⁶ Basaen ti Colosas 3:13. Nasaktan ti dadduma nga adipen ni Jehova gapu iti inaramid ti maysa a kapammatianda. Binigbig ni apostol Pablo a no dadduma, mabalin nga adda pangibatayantayo nga “agreklamo maibusor” iti maysa a kabsat. Mabalin pay ketdi a saan a nainkalintegan ti pannakatratotayo. No saantayo nga agannad, baka agipempentayon iti sakit ti nakem. Dayta a rikna ti mabalin a makagapu nga in-inut nga umadayo ti maysa iti ili ni Jehova. Alaentayo a pagarigan ti maysa a kabsat a ni Pablo a taga-South America. Naakusaran iti banag a dina inaramid isu a napukawna ti pribilehiona iti kongregasion. Ania ti reaksionna? “Nakapungtotak,” kuna ni Pablo, “ket in-inut nga immadayoakon iti kongregasion.”

7. Ania ti mabalin nga epekto iti maysa a tao ti panangsidir ti konsiensiana?

⁷ Wenno mabalin a masidsidir ti konsiensia ti maysa a tao gapu ta nakaaramid iti nakaro a basol iti napalabas. Mariknana pay ketdi a saanen a maikari iti ayat ti Dios. Uray no nagbabawin ken naipakitaan iti asi, baka mariknana a saanen a maikari nga agbalin nga adipen ti Dios. Kasta ti narikna ti maysa a kabsat nga agnagan Francisco. “Natubngarak gapu iti naaramidak a seksual nga immoralidad,” kinunana. “Uray no intultuloyko ti makigimong idi damo, nadepresak ken nariknak a saanakon a maikari nga agbalin nga adipen ni Jehova. Sidsidirennak ti konsiensiak ken kombinsidoak a dinak pay pinakawan ni Jehova. Idi agangay, insardengkon ti makikadua iti kongregasion.” Ania ti mariknam kadagiti kakabsat a maipaspasango kadagiti situasion a kas iti nadakamaten? Maasianka kadi kadakuada? Kangrunaanna, ania ti marikna ni Jehova iti kasasaadda?

8. Malipatan kadi ni Jehova dagiti nagserbi idi kenkuana? Ilawlawag.

⁸ Saan a malipatan ni Jehova dagiti nagserbi idi kenkuana ngem temporario a nagsardeng a nakikadua iti ilina. Saanna met a malipatan ti inaramidda a panagserbi kenkuana. (Heb. 6:10) Inrekord ni propeta Isaias ti nagpintas nga ilustrasion a mangipakita nga  ipatpateg ni Jehova dagiti adipenna. Insurat ni Isaias: “Aywanannanto ti arbanna kas maysa a pastor. Ummongennanto dagiti karnero babaen ti takiagna, ket sakruyennanto ida.” (Isa. 40:11) Ania ti marikna ti Naindaklan a Pastor a ni Jehova no mayaw-awan ti maysa a karnerona? Impakita ni Jesus ti marikna ni Jehova idi insaludsodna kadagiti adalanna: “Ania ti panagkunayo? No adda 100 a karnero ti maysa a tao ket maysa kadagitoy ti mayaw-awan, saan aya a panawanna ti 99 iti kabambantayan tapno birokenna daydiay nayaw-awan? Ibagak kadakayo a no masarakanna dayta, ad-addanto ti ragsakna iti daytoy a karnero ngem iti 99 a saan a nayaw-awan.”—Mat. 18:12, 13.

9. Kasano nga inaywanan dagiti nasayaat a pastor dagiti karneroda idi tiempo ti Biblia? (Kitaen ti ladawan iti akkub.)

⁹ Apay a mayanatup a maikompara ni Jehova iti maysa a pastor? Gapu ta ti nasayaat a pastor idi tiempo ti Biblia ket maseknan unay kadagiti karnerona. Kas pagarigan, nakilaban ni David iti leon ken oso tapno maprotektaranna ti arbanna. (1 Sam. 17:34, 35) Ti nasayaat a pastor sigurado a madlawna uray maysa laeng a karnerona ti mapukpukaw. (Juan 10:3, 14) Ibatina ti 99 a karnerona iti kulongan wenno ipaaywanna iti sabali a pastor ket birokenna ti maysa a mapukpukaw. Inusar ni Jesus dayta nga ilustrasion tapno isurona kadatayo daytoy napateg a kinapudno: “Saan a kayat ni Amak idiay langit a mayaw-awan ti uray maysa laeng kadagitoy a nanumo.”—Mat. 18:14.

10. Sigun iti Ezekiel 34:11-16, ania ti inkari ni Jehova nga aramidenna kadagiti napukaw a karnerona?

¹⁰ Ay-ayaten ni Jehova ti tunggal maysa kadatayo, agraman dagiti “nanumo” nga immadayo iti arbanna. Babaen ken propeta Ezekiel, inkari ti Dios a birokenna dagiti napukaw a karnerona ken tulonganna ida tapno maisubli ti naespirituan a salun-atda. Imbagana met dagiti espesipiko nga aramidenna tapno maispalna ida, a kas iti aramiden ti Israelita a pastor  no adda mapukaw a karnerona. (Basaen ti Ezekiel 34:11-16.) Umuna, biroken ti pastor ti karnero, ket agkasapulan dayta iti adu a tiempo ken panagregget. Kalpasanna, no nabirokannan ti mapukpukaw a karnero, isublina dayta iti arban. No adda sugat wenno mabisin ti karnero, siaayat a tulongan ti pastor, bedbedanna ti sugat, ubbaenna, ken pakanenna ti nakapuy nga animal. Masapul a kasta met ti aramiden dagiti panglakayen nga agserserbi kas papastor ti “arban ti Dios,” tapno matulonganda ti asinoman nga immadayo iti kongregasion. (1 Ped. 5:2, 3) Biroken ida dagiti panglakayen, tulonganda ida nga agsubli iti arban, ken ipakitaanda ida iti ayat babaen ti panangipaayda iti kasapulan a naespirituan a tulong. *

11. Ania ti ammo ti maysa a nasayaat a pastor?

¹¹ Ammo ti nasayaat a pastor a mabalin a mapukaw ti maysa a karnero. No adda karnero nga immadayo iti arban, saan a dusaen ti pastor. Usigentayo ti ulidan ni Jehova a Dios idi tinulonganna ti dadduma nga adipenna a nagsardeng apagbiit nga agserbi kenkuana.

12. Kasano ti panangtrato ni Jehova ken Jonas?

¹² Intarayan ni propeta Jonas ti annongen a naited kenkuana. Ngem inan-anusan ni Jehova ni Jonas. Kas nasayaat a pastor, inispal ni Jehova ni Jonas, ken tinulonganna a maaddaan iti bileg tapno maitungpalna ti annongenna. (Jon. 2:7; 3:1, 2) Kalpasanna, nangusar ti Dios iti mula a tabungaw tapno maawatan ni Jonas a napateg ti biag ti tunggal tao. (Jon. 4:10, 11) Ti leksion? Masapul nga an-anusan dagiti panglakayen dagiti nagbalin a di aktibo. Ikagumaanda koma a tarusan no apay nga immadayo ti karnero iti arban. Ket no agsubli dayta a karnero ken Jehova, itultuloy dagiti panglakayen nga ipakita ti ayat ken pannakaseknan kenkuana.

13. Ania ti maadaltayo iti reaksion ni Jehova iti nangisurat iti Salmo 73?

¹³ Naupay ti nangisurat iti Salmo 73 idi napaliiwna a kasla nasaysayaat ti biag dagiti managdakdakes. Pinagduaduaanna no adda  pagsayaatan ti panagaramid iti pagayatan ti Dios. (Sal. 73:12, 13, 16) Ania ti reaksion ni Jehova? Saanna a kinondenar ti salmista. Kinapudnona, impaisurat ti Dios iti Biblia ti sasao ti salmista. Idi agangay, nabigbig ti salmista a ti kapatgan iti biag ket ti nasayaat a relasionna ken Jehova. (Sal. 73:23, 24, 26, 28) Ti leksion? Saan koma a dagus nga ukomen dagiti panglakayen daydiay mangrugi nga agduadua no adda met la pagsayaatan ti panagserbi ken Jehova. Imbes a kondenarenda, masapul nga ikagumaanda a tarusan no apay a kasta ti panagsasao ken panagtigtignayna. Iti kasta, ammo dagiti panglakayen ti usarenda a teksto ti Biblia a mangpabileg kenkuana.

14. Apay a kasapulan idi ni Elias ti tulong, ken kasano a tinulongan ni Jehova?

¹⁴ Intarayan ni propeta Elias ni Reyna Jezebel. (1 Ar. 19:1-3) Impagarupna nga awanen ti kaduana nga agserserbi kas propeta ni Jehova, ken nariknana nga awan serserbi ti ar-aramidenna. Naladingitan unay ni Elias nga uray la kayatnan ti matay. (1 Ar. 19:4, 10) Imbes a kondenaren ni Jehova ni Elias, impasiguradona kenkuana a saan nga agmaymaysa, makapagtalek iti pannakabalin ti Dios, ken adu pay ti aramidenna. Dimngeg a naimbag ni Jehova kadagiti pakaseknan ni Elias ken inikkanna kadagiti baro nga annongen. (1 Ar. 19:11-16, 18) Ti leksion? Amintayo, nangruna dagiti panglakayen, ket masapul a nasayaat ti panangtratotayo kadagiti karnero ni Jehova. Iyebkas man ti maysa ti sakit ti nakemna wenno mariknana a saan a maikari iti asi ni Jehova, dumngeg dagiti panglakayen bayat nga ibukbukbokna ti linaon ti pusona. Kalpasanna,  ipasiguradoda iti napukaw a karnero nga isu ket ipatpateg ni Jehova.

15. Sigun iti Juan 6:39, ania ti panangmatmat ni Jesus kadagiti karnero ni Amana?

¹⁵ Ania ti kayat ni Jehova a mariknatayo maipapan kadagiti napukaw a karnerona? Adda masursurotayo iti ulidan ni Jesus. Ammona a napateg ken Jehova ti amin a karnerona. Isu nga inaramidna ti amin tapno matulonganna nga agsubli ken Jehova ‘dagiti umili ti Israel a nayarig kadagiti napukaw a karnero.’ (Mat. 15:24; Luc. 19:9, 10) Kas nasayaat a pastor, inaramid met ni Jesus ti amin a kabaelanna tapno saan a mapukaw ti asinoman a karnero ni Jehova.—Basaen ti Juan 6:39.

16-17. Ania koma ti marikna dagiti panglakayen maipapan iti panangtulong kadagiti immadayo? (Kitaen ti kahon a “ Ti Mabalin a Rikna ti Napukaw a Karnero.”)

¹⁶ Imparegta ni apostol Pablo kadagiti panglakayen iti kongregasion ti Efeso a tuladenda ti ulidan ni Jesus. “Masapul a tulonganyo dagiti nakapuy ken laglagipenyo ti kinuna ni Apo Jesus: ‘Naragragsak ti mangted ngem ti umawat.’” (Ara. 20:17, 35) Nalawag ngarud nga adda napateg a responsabilidad dagiti panglakayen ita maipapan iti dayta a banag. “No panunotek ti kasta unay a panangipateg ni Jehova kadagiti napukaw a karnerona, matignayak a mangaramid iti amin a kabaelak a mangtulong kadakuada,” kinuna ni Salvador a maysa a panglakayen idiay Spain. “Kas naespirituan a pastor, kombinsidoak a kayat ni Jehova nga aywanak ida.”

¹⁷ Amin nga immadayo a nadakamat iti daytoy nga artikulo ket natulongan nga agsubli ken Jehova. Iti agdama, kayat met ti adu nga immadayo nga aramiden ti kasta. Ad-adu pay ti ilawlawag ti sumaruno nga artikulo no kasanotayo a matulongan ida nga agsubli ken Jehova.