MAADAL NGA ARTIKULO 24
“Pagkaykaysaem ti Pusok nga Agbuteng iti Naganmo”
“Pagkaykaysaem ti pusok nga agbuteng iti naganmo. Idaydayawka iti amin a pusok, O Jehova a Diosko.”—SAL. 86:11, 12.
KANTA 7 Jehova, Sika ti Pigsami
ITI DAYTOY A PANAGADAL *
1. Ania ti kayat a sawen ti panagbuteng iti Dios, ken apay a napateg dayta kadagiti mangay-ayat ken Jehova?
AY-AYATEN dagiti Kristiano ti Dios ken agbutengda met kenkuana. Para iti dadduma, kasla agkontra dayta. Ngem ditay tuktukoyen ti buteng a mangpaalinggaget kenka. Pagsasaritaantayo ti maysa a kita ti buteng. Dagiti tattao nga addaan iti kasta a buteng agamangada iti Dios ken naimpusuan a raraemenda. Saanda a kayat a pagladingiten ti nailangitan nga Amada ta dida kayat a madadael ti pannakigayyemda kenkuana.—Sal. 111:10; Prov. 8:13.
2. Maibatay iti sasao ni Ari David iti Salmo 86:11, ania ti dua a banag a pagsasaritaantayo?
2 Basaen ti Salmo 86:11. Bayat a pampanunotem dagita a sasao, maibagam a natarusan ti matalek nga ari a ni David ti kinapateg ti panagbuteng iti Dios. Kitaentayo no kasanotayo a mayaplikar ti imbaga ni David iti kararagna. Umuna, usigentayo ti dadduma a rason no apay a rumbeng a maaddaantayo iti nauneg a panagraem iti nagan ti Dios. Maikadua, pagsasaritaantayo no kasano nga inaldaw a maipakitatayo a raraementayo ti nagan ti Dios.
APAY A MASAPUL A NAUNEG TI PANAGRAEMTAYO ITI NAGAN NI JEHOVA?
3. Ania a kapadasan ti nakatulong ken Moises tapno agtalinaed a nauneg ti panagraemna iti nagan ti Dios?
3 Panunotem ti narikna ni Moises bayat a nakarukob iti rengngat ti dakkel a bato. Nakitana ti sirmata a lumablabas ti dayag ni Jehova. Sigun iti Pannakatarus iti Kasuratan, “nalabit [dayta ti] kadadayagan a kapadasan ti asinoman a tao sakbay ti Ex. 33:17-23; 34:5-7) Mabalin a malagip ni Moises dayta a pasamak no usarenna idi ti nagan ni Jehova. Isu nga idi agangay, pinakdaaran ni Moises ti ili ti Dios nga Israel nga ‘agbutengda iti dayta a nadayag ken nakaskasdaaw a nagan.’—Deut. 28:58.
iyaay ni Jesu-Kristo.” Kastoy ti nangngeg ni Moises a nalawag nga imbaga ti maysa nga anghel: “Ni Jehova, ni Jehova, maysa a Dios a naasi ken mannakipagrikna, nabannayat nga agpungtot ken dakkel ti napudno nga ayatna ken kanayon a tungpalenna ti saona, mangipakpakita iti napudno nga ayat kadagiti rinibu, mangpakpakawan kadagiti kamali, biddut, ken basol.” (4. Ania dagiti kualidad nga utobentayo tapno ad-adda pay a raementayo ni Jehova?
4 No panunotentayo ti nagan ni Jehova, masapul a panunotentayo met a naimbag ti kinasiasinona. Masapul a laglagipentayo dagiti kualidadna, kas iti pannakabalin, sirib, kinahustisia, ken ayat. No utobentayo dagita ken ti dadduma pay a kualidadna, ad-adda pay a raementayo isuna.—Sal. 77:11-15.
5-6. (a) Ania ti kaipapanan ti nagan ti Dios? (b) Sigun iti Exodo 3:13, 14 ken Isaias 64:8, ania dagiti pamay-an a pagbalbalinen ni Jehova a posible ti bambanag?
5 Ania ti ammotayo maipapan iti kaipapanan ti nagan ti Dios? Umanamong ti adu nga eskolar a ti kaipapanan ti nagan ni Jehova ket “Pagbalinenna.” Ipalagip dayta kadatayo a saan a malapdan ti pagayatan ni Jehova ken mapagbalinna a posible ti bambanag. Kasano?
6 Mapagbalin ni Jehova a posible ti bambanag babaen ti panagbalinna iti aniaman a kasapulan tapno matungpal ti panggepna. (Basaen ti Exodo 3:13, 14.) Masansan a mapalpalagipantayo a mangpanunot iti dayta a nakaskasdaaw a paset ti personalidad ti Dios. Mapagbalin met ni Jehova dagiti imperpekto nga adipenna iti kasapulan a pagbalinanda tapno makapagserbida kenkuana ken maitungpalda ti pagayatanna. (Basaen ti Isaias 64:8.) Kadagiti kastoy a pamay-an nga itungtungpal ni Jehova ti pagayatanna. Awan ti makalapped kenkuana a mangitungpal kadagiti panggepna.—Isa. 46:10, 11.
7. Kasano a mapaunegtayo ti apresasiontayo iti nailangitan nga Amatayo?
Sal. 8:3, 4) Ken no panunotentayo a naimbag no kasano a tinulongannatayo ni Jehova tapno maitungpaltayo ti pagayatanna, umuneg ti panagraemtayo kenkuana. Talaga a nakaskasdaaw ti nagan ni Jehova! Ramanen dayta ti intero a kinasiasino ti Amatayo, ti amin nga inaramidna, ken ti amin nga aramidennanto pay.—Sal. 89:7, 8.
7 Mapaunegtayo ti apresasiontayo iti nailangitan nga Amatayo no utobentayo dagiti inaramidna ken dagiti pinagbalinna a posible a maaramidantayo. Kas pagarigan, no panunotentayo dagiti nakaskasdaaw a pinarsua ni Jehova, masdaawtayo kadagiti naaramidanna, dagiti bambanag a pinataudna. (“IPAKAAMMOKTO TI NAGAN NI JEHOVA”
Makaparegta dagiti insuro ni Moises. Naisentro dagita iti nagan ken kinasiasino ni Jehova a Dios (Kitaen ti parapo 8) *
8. Sigun iti Deuteronomio 32:2, 3, ania ti kayat ni Jehova nga aramiden dagiti adipenna maipapan iti naganna?
8 Sakbay unay a simrek dagiti Israelita iti Naikari a Daga, insuro ni Jehova ken Moises ti liriko ti maysa a kanta. (Deut. 31:19) Naibilin met ken Moises nga isurona dayta a kanta kadagiti tattao. (Basaen ti Deuteronomio 32:2, 3.) Bayat nga ut-utobentayo ti bersikulo 2 ken 3, nalawag a saan a kayat ni Jehova a mailemmeng ti naganna, a kas man la nakasagsagrado nga ibalikas. Kayatna a maammuan ti amin nga intelihente a parsuana ti naganna! Anian a pribilehio dagiti tattao a makangngeg ken Moises a mangisursuro kadakuada maipapan ken Jehova ken iti nadayag a naganna! Napabileg ken naparegtada iti insuro kadakuada ni Moises a kas iti panangpalangto ti arbis kadagiti mula. Kasanotayo a masigurado nga agbalin a kasta ti panangisurotayo?
9. Kasano a makatulongtayo iti pannakasantipikar ti nagan ni Jehova?
9 No mangaskasabatayo iti binalaybalay wenno iti publiko, mabalintay nga usaren ti Bibliatayo tapno ipakita kadagiti tattao ti personal a nagan ti Dios a Jehova. Mabalin a mangipaimatayo iti nagpipintas a publikasion, mangipabuyatayo kadagiti nagsayaat a video, ken mangipakitatayo kadagiti material iti website-tayo a pakaidayawan ni Jehova. Addatay man iti trabaho, eskuelaan, wenno iti biahe, mabalintay ti makisarita maipapan iti ipatpategtayo a Dios ken iti kinasiasinona. No ibagatayo ti naayat a panggep ni Jehova iti sangatauan ken iti daga, mabalin a mabigbig dagiti tattao nga ay-ayatennatayo unay ni Jehova. No ipakaammotayo ti kinapudno maipapan iti naayat nga Amatayo, tumultulongtayo iti pannakasantipikar ti naganna. Ik-ikkatentayo ti dadduma a kinaulbod ken pammadakes maipapan ken Jehova a mabalin a naisuro kadakuada. Isursurotayo kadagiti tattao ti awan kapadana a pannursuro a mangpabileg ken mangparegta kadakuada.—Isa. 65:13, 14.
10. No mangyad-adaltayo iti Biblia, apay a saan la a basta isurotayo dagiti linteg ken pagalagadan ti Dios?
10 No mangyad-adaltayo iti Biblia, kayattayo a tulongan dagiti iyad-adalantayo a mangammo iti nagan ni Jehova ken mangusar iti dayta. Kayattayo met a naan-anay a maam-ammoda ni Jehova. Maaramidantayo kadi dayta no basta isurotayo laeng dagiti bilin, pagalagadan, ken pagannurotan ti Dios? Mabalin a masursuro ti nalaing a mayad-adalan ti maipapan kadagiti linteg ti Dios ken maapresiarna pay ketdi dagita. Ngem agtulnogto kadi ken Jehova gapu ta ay-ayatenna? Laglagipentayo nga ammo ni Eva ti linteg ti Dios, ngem saanna a talaga nga ay-ayaten ti nangted iti Linteg, ket kasta met ni Adan. (Gen. 3:1-6) Isu a masapul a saantayo laeng nga isuro iti sabsabali dagiti linteg ken pagalagadan ti Dios.
11. No isursurotayo dagiti linteg ken pagalagadan ni Jehova, kasanotayo a matulongan dagiti iyad-adalantayo a mangayat kenkuana?
11 Dagiti linteg ken pagalagadan ni Jehova Sal. 119:97, 111, 112) Ngem mabalin a saan a kasta ti panangmatmat dagiti iyad-adalantayo, malaksid no maawatanda nga inaramid dagita ni Jehova gapu ta ay-ayatennatayo. Isu a mabalintayo nga isaludsod: “Para kenka, apay a kidkiddawen ti Dios kadagiti adipenna nga aramidenda daytoy wenno saanda nga aramiden daytoy? Ania ti masursurotayo iti dayta maipapan Kenkuana?” No tulongantayo ida a mangpanunot maipapan ken Jehova ken mangpatanor iti pudno nga ayat iti nadayag a naganna, ad-adda a madanontayo ti pusoda. Iti kasta, masursurodanto nga ipateg, saan laeng a dagiti linteg no di pay ket ti nangted kadagita. (Sal. 119:68) Bumileg ti pammatida ken maibturanda dagiti narigat a pannubok.—1 Cor. 3:12-15.
ket kanayon a pagsayaatantayo. (“MAGNATAYTO ITI NAGAN NI JEHOVA”
Impalubos ni David a mabingay ti pusona iti maysa a gundaway (Kitaen ti parapo 12)
12. Kasano a saan a napagtalinaed ni David a nagkaykaysa ti pusona iti maysa a gundaway, ket ania ti resulta dayta?
12 Napateg ti sasao a “pagkaykaysaem ti pusok” iti Salmo 86:11. Insurat dagita ni Ari David. Bayat ti panagbiagna, nakitana no kasano kalaka a mabingay ti puso. Naminsan, bayat nga adda iti tuktok ti palasiona, natannawaganna nga agdigdigus ti maysa a naasawaan a babai. Iti dayta a gundaway, nagkaykaysa kadi wenno nabingay ti puso ni David? Ammona nga imbilin ni Jehova: “Dimo tarigagayan ti asawa a babai ti padam a tao.” (Ex. 20:17) Ngem nalawag nga intultuloyna ti kimmita. Imbes a naan-anay ti pusona a mangparagsak ken Jehova, nabingayen dayta gapu iti tarigagayna ken Bat-sheba. Uray nabayagen nga ay-ayaten ken pagbutbutngan ni David ni Jehova, timmulok iti managimbubukodan a tarigagayna. Iti dayta a gundaway, nakaaramid ni David iti nakadakdakes a banag. Nakaiyeg iti pakaumsian ti nagan ni Jehova. Gapu iti inaramid ni David, naglak-am met dagiti inosente a tattao iti nakaro a panagsagaba, a pakairamanan ti bukodna a pamilia.—2 Sam. 11:1-5, 14-17; 12:7-12.
13. Kasano nga ammotayo a nagkaykaysa manen ti puso ni David?
13 Dinisiplina ni Jehova ni David, ket naisubli ti nasayaat a relasionna kenkuana. (2 Sam. 12:13; Sal. 51:2-4, 17) Linagip ni David ti riribuk ken panagsagaba a resulta ti panangipalubosna a mabingay ti pusona. Ti sasaona iti Salmo 86:11 ket mabalin met nga ipatarus a kastoy: “Ikkannak iti saan a nabingay a puso.” Tinulongan kadi ni Jehova ni David tapno agbalin a nakaykaysa wenno di nabingay ti pusona? Wen, ta idi agangay, ti Sao ni Jehova dinakamatna ni David kas lalaki a “naan-anay ti pusona ken Jehova a Diosna.”—1 Ar. 11:4; 15:3.
14. Ania ti masapul nga isaludsodtayo iti bagitayo, ken apay?
14 Ti kapadasan ni David ket mangparegta ken mangpakdaar kadatayo. Ti pannakatnagna iti nadagsen a basol ket pakdaar kadagiti adipen ti Dios ita. Datayo man ket nabiit pay wenno nabayagen nga agserserbi ken Jehova, masapul nga isaludsodtayo iti bagitayo, ‘Lablabanak kadi dagiti panangikagumaan ni Satanas a mangbingay iti pusok?’
Aramiden ni Satanas ti amin a kabaelanna tapno mabingay ti pusom. Dimo ipalubos! (Kitaen ti parapo 15-16) *
15. Kasano a salaknibannatayo ti panagbuteng iti Dios no makakitatayo iti ladawan wenno pabuya a mangriing iti seksual a tarigagay?
15 Kas pagarigan, ania ti aramidem no adda makitam iti TV wenno Internet a mabalin a mangriing kadagiti seksual a tarigagay? Mabalin a nalaka nga irasonmo a saan met a pornograpia dayta a ladawan wenno pelikula. Ngem mabalin ngata nga us-usaren dayta ni Satanas a mangbingay iti pusom? (2 Cor. 2:11) Dayta a ladawan ket kas iti wasay nga usaren ti maysa a tao a pagbalsig iti dakkel a kayo. Saan a dagus a mapisi ti kayo iti damo a panangbalsigna. Ngem no ulit-ulitenna nga ibalsig ti wasay, mapisinto met laeng ti kayo inton agangay. Umasping iti dayta ti mapasamak no makakitatayo iti makagargari a pabuya. Mabalin a saan a madlaw a dagus ti epektona ngem inton agangay, mabingay ti pusotayo ket makaaramidtayo iti basol a mangdadael iti relasiontayo iti Dios. Isu a dimo ipalubos a makastrek iti pusom ti aniaman a dakes a banag! Pagtalinaedem ti pusom nga agkaykaysa nga agbuteng iti nagan ni Jehova!
16. No maipasangotayo iti sulisog, ania dagiti masapul nga isaludsodtayo iti bagitayo?
16 Malaksid kadagiti makagargari a ladawan wenno pabuya, adu pay ti us-usaren ni Satanas a pangsulisog kadatayo nga agaramid Sant. 1:5) Talaga a masalaknibanka no aramidem dayta. Matulongannaka dayta a sititibker a saan nga agpasulisog, kas iti inaramid ni Jesus idi imbagana: “Pumanawka, Satanas!”—Mat. 4:10.
iti dakes. Ania ti masapul nga aramidentayo? Nalaka laeng ti agrason. Kas pagarigan, nalabit irasontayo: ‘Saanak met ketdi a mailaksid no aramidek daytoy, isu nga okey laeng daytoy.’ Saan nga umiso ti kasta a panagrasrason. Nasaysayaat no isaludsodtayo dagitoy iti bagitayo: ‘Us-usaren kadi ni Satanas daytoy a sulisog tapno mabingay ti pusok? No tumulokak kadagiti dakes a tarigagay, makaiyegak kadi iti pakaumsian ti nagan ni Jehova? No aramidek daytoy, sumingedak kadi iti Diosko wenno mayadayoak kenkuana?’ Panunotem a naimbag dagita a saludsod. Ikararagmo ti sirib ken sipupudno a sungbatam dagita a saanmo nga allilawen ti bagim. (17. Apay a pagdaksantayo no nabingay ti pusotayo? Mangted iti ilustrasion.
17 Pagdaksantayo no nabingay ti pusotayo. Panunotem ti maysa nga sports team a di agkakatunosan dagiti miembrona. Adda dagiti miembro a kayatda nga isuda ti maidaydayaw, adda met dagidiay dida kayat a suroten dagiti pagannurotan, ken saan a resrespetuen ti dadduma ti coach-da. Sigurado a saan a mangabak ti kasta a team. Iti sabali a bangir, sigurado nga agballigi ti agkaykaysa a team. Mayarig ti pusom iti kasta a naballigi a team no agkaykaysa ti panunot, tarigagay, ken emosionmo iti panagserbi ken Jehova. Laglagipem a kayat ni Satanas a bingayen ti pusom. Kayatna a ti panunot, tarigagay, ken emosionmo ket maikontra kadagiti pagalagadan ni Jehova. Ngem masapul a naan-anay ti pusom tapno makapagserbika ken Jehova. (Mat. 22:36-38) Dimo ipalubos a bingayen ni Satanas ti pusom!
18. Maitunos iti Mikias 4:5, ania ti determinasionmo?
18 Kas ken David, ikararagmo: “Pagkaykaysaem ti pusok nga agbuteng iti naganmo.” Ikagumaam nga iyaplikar dayta a kararag. Iti tunggal aldaw, determinadoka koma a dagiti desisionmo, babassit man wenno dadakkel, ipakitada ti nauneg a panagraemmo iti nasantuan a nagan ni Jehova. No aramidem dayta, mapaneknekam a talaga a maysaka a Saksi ni Jehova. (Prov. 27:11) Maibagatayto met ti imbaga ni propeta Mikias: “Magnatayto iti nagan ni Jehova a Diostayo iti agnanayon nga awan inggana.”—Mik. 4:5.
KANTA 41 Pangngaasim ta Denggem ti Kararagko
^ par. 5 Iti daytoy nga artikulo, pagsasaritaantayo ti maysa a paset ti kararag ni David a nairekord iti Salmo 86:11, 12. Ania ti kayat a sawen ti panagbuteng iti nagan ni Jehova? Apay a rumbeng nga adda panagbutengtayo iti dayta a naindaklan a nagan? Ken kasano nga agbalin a proteksion ti panagbuteng iti Dios no masulisogtayo?
^ par. 53 LADAWAN: Insuro ni Moises iti ili ti Dios ti maysa a kanta a mangidaydayaw ken Jehova.
^ par. 57 LADAWAN: Timmulok ni Eva kadagiti dakes a tarigagay. Ngem laksidentayo dagiti ladawan wenno mensahe a mabalin a mangriing kadagiti dakes a tarigagay ken mangyeg iti pakaumsian ti nagan ti Dios.