Dakamaten dagitoy a bersikulo ti siam a Nakristianuan a kualidad: “Ti bunga ti espiritu ket ayat, rag-o, talna, kinaanus, kinaimbag, kinasayaat, pammati, kinaalumamay, panagteppel.” Ngem saan laeng a dagita a nagsasayaat a kualidad ti mapatanortayo iti tulong ti espiritu ti Dios.

Kitaenyo dagiti insurat ni apostol Pablo iti immuna a bersikulo: “Dagiti aramid ti lasag, ket . . . seksual nga immoralidad, kinarugit, nakaal-alas a kababalin, idolatria, espiritismo, guranggura, apa, imon, panagpungpungtot, panagkikinnontra, panagsisina, panangbuangay kadagiti sekta, apal, panagbarbartek, nalabes a panagragragsak, ken dagiti bambanag a kas kadagitoy.” (Gal. 5:19-21) Isu a mabalin a nangdakamat pay koma ni Pablo iti dadduma pay a karaman kadagiti “aramid ti lasag,” kas kadagiti nadakamat iti Colosas 3:5. Kasta met laeng ti kaso idi dinakamat ni Pablo ti siam a nagsasayaat a kualidad a mabasa iti Galacia 5:22, 23. Saan ngarud a dinakamat ni Pablo ti amin a nagsasayaat a kualidad a mapatanortayo iti tulong ti nasantuan nga espiritu.

Nalawag a kasta no ikomparatayo dagitoy iti insurat ni Pablo iti kongregasion iti Efeso: “Ti bunga ti lawag ket ti amin a kita ti kinasayaat ken kinalinteg ken kinapudno.” (Efe. 5:8, 9) Wen, ti “kinasayaat,” agraman ti kinalinteg ken kinapudno, ket paset ti “bunga ti lawag,” ngem paset met dayta ti “bunga ti espiritu.”

Kasta met, imparegta ni Pablo ken Timoteo nga ikagumaanna nga ‘ipakita ti kinalinteg, debosion iti Dios, pammati, ayat, panagibtur, ken kinaalumamay’—innem a nagsasayaat a kualidad. (1 Tim. 6:11) Tallo laeng kadagita (pammati, ayat, ken kinaalumamay) ti nadakamat kas aspeto ti “bunga ti espiritu.” Ngem sigurado a kasapulan met ni Timoteo a patanoren ti kinalinteg, debosion, ken kinaanus babaen ti tulong ti nasantuan nga espiritu.—Idilig ti Colosas 3:12; 2 Pedro 1:5-7.

Gapuna, saan a dakamaten ti Galacia 5:22, 23 ti amin a Nakristianuan a kualidad. Matulongannatayo ti espiritu ti Dios a mangpatanor iti siam nga aspeto a nadakamat kas “bunga ti espiritu.” Ngem ad-adu pay a kualidad ti masapul a patanorentayo bayat a rumangrang-aytayo kas Kristiano ken ‘isusuottayo ti baro a personalidad a pinarsua ti Dios maitunos iti pagayatanna ken iti agpayso a kinalinteg ken kinapudno.’—Efe. 4:24.