ADU ti makaammo iti salaysay a nailansa ni Jesus iti kayo iti nagbaetan ti dua a kriminal. (Mat. 27:35-38) Ngem adda dagiti mangibagbaga a saan kano nga umiso ti salaysay ti Biblia maipapan iti pannakaitabon ti bangkay ni Jesus iti maysa a tanem.​—Mar. 15:42-46.

Dadduma a kritiko dagiti Ebanghelio ti saan a mamati a dagiti nailansa ket mapalubosan a maaddaan iti desente a pakaitabonan kas iti tanem. Imbes ketdi, patienda a sabali ti pannakaitabon dagiti kriminal. Ti periodista a ni Ariel Sabar a mannurat iti magasin nga Smithsonian inlawlawagna no apay a kasta ti patien ti dadduma: “Ti pannakailansa iti krus ket maipaay a dusa para laeng kadagiti kriminal isu a para iti dadduma nga eksperto, nakakatkatawa a panunoten ti ideya a palubosan dagiti Romano a maikkan dagita a tattao iti desente a pannakaitabon.” Kayat dagiti Romano nga ibabain dagiti kriminal isu a masansan nga ibatida iti kayo dagiti bangkay tapno kanen dagiti animal. Kalpasanna, dagiti nabati iti bangkay ket mabalin a maibelleng lattan iti gagangay a pagitabonan.

Ngem sabali ti ipakita ti arkeolohia no maipapan kadagiti tulang ti dadduma a napapatay a Judio. Idi 1968, adda nakali a tultulang ti maysa a lalaki a nasentensiaan iti ipapatay idi umuna a siglo. Nakitada dayta iti tanem ti maysa a pamilia a Judio iti asideg ti Jerusalem. Naikabil dayta iti ossuary, wenno kahon a pagikabilan iti tulang. Karaman iti dayta ti maysa a tulang ti mukod. Nailansa dayta iti kayo babaen ti 11.5 a sentimetro (4.5 in.) a landok a lansa. “Ti mukod ti lalaki nga agnagan Yehochanan,” kuna ni Sabar, “ket ebidensia a posible a husto dagiti salaysay iti Ebanghelio maipapan iti pannakaitabon ni Jesus iti tanem.” Makapainteres ta ti “mukod ni Yehochanan ket maysa a pagarigan nga idi kaaldawan ni Jesus, dagiti Judio a nailansa iti krus ket ipalpalubos dagiti Romano a maitabon.”

Gapu iti nakitada a tulang ti mukod, mabalin nga agduduma ti opinion maipapan iti posision ni Jesus idi nailansa iti kayo. Ngem nalawag a ti dadduma a kriminal a nasentensiaan a mapapatay ket talaga a naitabon ken saan a basta naibelleng. Husto ngarud ti kuna ti Biblia a ti bangkay ni Jesus ket naikabil iti tanem. Suportaran dayta nga ebidensia ti ibagbaga ti Biblia.

Kapatgan iti amin, impaipadto ni Jehova a maitabon ni Jesus iti tanem ti maysa a baknang, ken awan a pulos ti makalapped iti pannakatungpal ti Sao ti Dios.​—Isa. 53:9; 55:11.