1-2. Sigun iti Salmo 25:14, ania ti masapul nga aramidentayo no kayattayo ti agbalin a nasinged a gayyem ni Jehova?

 PANAGKUNAM, ania dagiti kualidad a napateg no kayatmo nga agtalinaed a nasinged a gayyemmo ti maysa? Mabalin a ti sungbatmo ket masapul nga ayaten ken suportaran dagiti nasayaat nga aggayyem ti maysa ken maysa. Baka saanmo a mapanunot a ti panagbuteng ket napateg a kualidad iti nasayaat a panaggayyem. Ngem kas ibaga ti pannakatema a teksto daytoy nga artikulo, dagidiay kayatda ti agbalin a nasinged a gayyem ni Jehova masapul nga “agbuteng kenkuana.”—Basaen ti Salmo 25:14.

² Kasanoman kabayagtayon nga agserserbi ken Jehova, masapul a mantenerentayo amin ti umiso a panagbuteng kenkuana. Ngem ania ti kaipapanan ti panagbuteng iti Dios? Kasanotayo a masursuro ti agbuteng ken Jehova? No maipapan iti panagbuteng iti Dios, ania dagiti masursurotayo ken ni Abdias nga agay-aywan iti sangakabbalayan ti ari, iti nangato a padi a ni Jehoiada, ken ni Ari Jehoas?

3. Ilawlawag dagiti rason a makariknatayo iti buteng ken no kasano a maprotektarannatayo.

³ Mabalin a makariknatayo iti buteng no adda peggad. Nasayaat dayta a klase ti buteng ta tignayennatayo a mangaramid iti nainsiriban a desision. Ditay magna iti igid ti rangkis ta mabutengtayo di la ket ta matnagtayo. Pumanawtayo met iti delikado a situasion ta mabutengtayo di la ket ta madangrantayo. Ditay met agsao wenno agaramid iti aniaman a makapasakit iti ipatpategtayo ta mabutengtayo a madadael ti panaggayyemtayo.

4. Ania a klase ti panagbuteng ken Jehova ti kayat ni Satanas a mariknatayo?

 ⁴ Kayat ni Satanas a di umiso ti panagbuteng dagiti tattao ken Jehova. Kayatna a patien dagiti tattao ti kas iti imbaga idi ni Elifaz—a ni Jehova ket managibales, naunget a Dios, ken imposible a maparagsak. (Job 4:18, 19) Kayat ni Satanas a mabutengtayo unay ken Jehova tapno isardengtayon ti agserbi Kenkuana. Tapno maliklikantayo dayta a silo, masapul a patanorentayo ti umiso a panagbuteng iti Dios.

5. Ania ti kaipapanan ti panagbuteng iti Dios?

⁵ No ti maysa a tao ket umiso ti panagbutengna iti Dios, ay-ayatenna Isuna ken dina kayat ti mangaramid iti aniaman a mangdadael iti relasionna Kenkuana. Kasta ti “panagbuteng [ni Jesus] iti Dios.” (Heb. 5:7) Saanna a pulos a narikna ti sobra a panagbuteng ken Jehova. (Isa. 11:2, 3) Imbes ketdi, ay-ayatenna la unay ti Amana ken kayatna ti agtulnog kenkuana. (Juan 14:21, 31) Kas ken Jesus, mariknatayo ti nauneg a panagraem ken panagamanga ken Jehova ta naayat, masirib, patas, ken mannakabalin. Ammotayo met nga ay-ayatennatayo unay ni Jehova ken maapektaran iti reaksiontayo iti panangiwanwanna. Mabalin a masaktantayo ti rikna ni Jehova wenno maparagsaktayo ti pusona.—Sal. 78:41; Prov. 27:11.

6. Ania ti maysa a pamay-an a masursurotayo ti agbuteng iti Dios? (Salmo 34:11)

⁶ Ditay nayanak nga addaan iti panagbuteng ken Jehova; masapul a patanorentayo dayta. (Basaen ti Salmo 34:11.) Kasano? Ti maysa a pamay-an ket obserbarantayo dagiti parsuana. No kanayon a makitatayo ‘kadagiti inaramid’ ti Dios ti sirib, pannakabalin, ken ti nauneg a panagayatna kadatayo, dumakkel ti panagraem ken panagayattayo kenkuana. (Roma 1:20) Imbaga ti sister a ni Adrienne, “Masmasdaawak iti sirib ni Jehova a makita kadagiti parsuana. Naamirisko nga ammona ti kasayaatan para kaniak.” Gapu iti nautobna, kastoy ti konklusionna: “Apay koma a mangaramidak iti aniaman a mangdadael iti relasionko ken Jehova, ti Gubuayan ti biagko?” Ita a lawas, mabalin kadi a mangiwayaka iti tiempo a mangpanunot iti maysa a parsua ni Jehova? No aramidem dayta, dumakkel ti panagraem ken panagayatmo ken Jehova.—Sal. 111:2, 3.

7. Kasano a makatulong ti kararag tapno mapatanortayo ti umiso a panagbuteng ken Jehova?

⁷ Ti maysa pay a pamay-an tapno mapatanortayo ti panagbutengtayo iti Dios ket ti kanayon a panagkararag. No ad-adda nga agkararagtayo, ad-adda met a napaypayso ni Jehova kadatayo. Tunggal agkiddawtayo kenkuana iti bileg tapno maibturantayo ti maysa a pannubok, maipalagip kadatayo ti nakaskasdaaw a pannakabalinna. No agyamantayo kenkuana gapu ta impaayna ti Anakna, maipalagip kadatayo nga ay-ayatennatayo ni Jehova. Ken no agpakaasitayo tapno tulongannatayo iti maysa a problema, maipalagip kadatayo a nakasirsirib isuna. Dagita a kararag ti mangpauneg iti panagraemtayo ken Jehova. Patibkerenda met ti determinasiontayo a saan a mangaramid iti aniaman a mangdadael iti pannakigayyemtayo kenkuana.

8. Ania ti aramidentayo tapno kanayon nga agbutengtayo iti Dios?

⁸ Kanayon nga agbutengtayo iti Dios no adalentayo ti Biblia tapno makasursurotayo kadagiti nasayaat ken saan a nasayaat a pagarigan. Pagsasaritaantayo ti dua a matalek nga adipen ni Jehova—ni Abdias nga agay-aywan iti sangakabbalayan ni Ari Ahab ken ti nangato a padi a ni Jehoiada. Kalpasanna, kitaentayo dagiti masursurotayo ken Ari Jehoas ti Juda a matalek idi damo ngem simmardeng a nagserbi ken Jehova idi agangay.

9. Kasano a nakatulong ken Abdias ti panagbutengna ken Jehova? (1 Ar-ari 18:3, 12)

⁹ Kastoy ti panangyam-ammo kadatayo ti Biblia ken Abdias: b “Dakkel ti panagbuteng ni Abdias ken ni Jehova.” (Basaen ti 1 Ar-ari 18:3, 12.) Kasano a nakatulong ken Abdias ti umiso a panagbutengna iti Dios? Nagbalin a napudno ken mapagtalkan isu nga impaaywan kenkuana ti ari ti sangakabbalayanna. (Idilig ti Nehemias 7:2.) Gapu iti panagbuteng ni Abdias iti Dios, naisangsangayan met ti kinaturedna. Talaga a kasapulanna unay idi dayta a kualidad. Nagbiag bayat ti panagturay ti dakes nga ari a ni Ahab, nga “iti imatang ni Jehova, dakdakes . . . ngem iti amin [nga ar-ari] nga immun-una kenkuana.” (1 Ar. 16:30) Kasta met, ni Jezebel nga asawa ni Ahab nga agdaydayaw ken Baal kagurgurana unay ni Jehova. Inkagumaanna a pukawen ti pudno a panagdaydayaw iti makin-amianan a pagarian. Impapatayna pay ketdi ti adu a propeta ti Dios. (1 Ar. 18:4) Ngem nagdaydayaw latta ni Abdias ken Jehova bayat daydi a narigat a tiempo.

10. Kasano nga impakita ni Abdias ti naidumduma a kinaturedna?

¹⁰ Kasano nga impakita ni Abdias ti naidumduma a kinaturedna? Idi birbiroken ni Jezebel dagiti propeta ti Dios tapno ipapatayna ida, inlemmeng ni Abdias ti 100 kadakuada a ‘sag-50 ti tunggal grupo ken inik-ikkanna ida iti tinapay ken danum.’ (1 Ar. 18:13, 14) No naduktalan dayta nga inaramid ti natured a ni Abdias, sigurado a mapapatay. Siempre, tao met ni Abdias, ken dina kayat ti matay. Ngem ad-adda nga ay-ayatenna ni Jehova ken dagiti agserserbi Kenkuana ngem iti mismo a biagna.

11. Kasano a tultuladen dagiti adipen ni Jehova ita ni Abdias? (Kitaen met ti ladawan.)

¹¹ Adu nga adipen ni Jehova ita ti aggigian kadagiti lugar a maiparit ti trabahotayo. Ipakpakitada ti respeto kadagiti autoridad. Ngem kas ken Abdias, ipapaay dagitoy a maipatpateg a kakabsat ti kukua ni Jehova—ti naipamaysa a debosion. (Mat. 22:21) Ipakpakitada ti panagbutengda iti Dios babaen ti panagtulnogda  kenkuana imbes a kadagiti tattao. (Ara. 5:29) Itultuloyda nga ikasaba ti naimbag a damag ken aggigimong iti nalimed. (Mat. 10:16, 28) Sigsiguraduenda nga adda naespirituan a taraon dagiti kakabsat. Kitaentayo ti kapadasan ni Henri nga agnanaed iti maysa a lugar iti Africa a maiparit idi ti trabahotayo. Bayat ti pannakaiparit, nagboluntario ni Henri nga agitulod iti naespirituan a taraon kadagiti padana a Saksi. Insuratna: “Managbabainak, isu a kombinsidoak a ti nauneg a panagraemko ken Jehova ti nangpatured kaniak.” Matuladmo met kadi ti kinatured ni Henri? Wen, no patanorem ti umiso a panagbuteng iti Dios.

12. Kasano nga impakita ti nangato a padi a ni Jehoiada ken ni baketna a talaga a matalekda ken Jehova?

¹² Ti nangato a padi a ni Jehoiada ket adda panagbutengna ken Jehova. Matalek ken intandudona ti pudno a panagdaydayaw. Impakitana dayta idi inagaw ni Atalia nga anak ni Jezebel ti panagturay iti Juda. Adda ngarud rason idi a mabutbuteng dagiti umili ken Atalia. Naulpit ken naagum unay iti pannakabalin nga uray la pinadasna a patayen ti amin a kaputotan ti ari—dagiti mismo nga appokona! (2 Cron. 22:10, 11) Ngem adda ubing a nakalasat—ni Jehoas—ta insalakan ni Jehosabeat nga asawa ni Jehoiada. Inlemmeng ken inaywananda nga agassawa dayta nga ubing. Iti kasta, nakatulong da Jehoiada ken Jehosabeat tapno adda latta agari a kaputotan ni David. Ni Jehoiada ket matalek ken Jehova ken saan a nagbuteng ken Atalia.—Prov. 29:25.

13. Idi pito ti tawen ni Jehoas, kasano nga impakita manen ni Jehoiada ti kinamatalekna?

¹³ Idi pito ti tawen ni Jehoas, impakita manen ni Jehoiada ti kinamatalekna ken Jehova. Nangaramid iti plano. No agballigi, agbalin ni Jehoas nga ari, ti adda kalinteganna nga agtawid iti trono ni David. Ngem no di agballigi ti plano, mabalin a mapukaw ni Jehoiada ti biagna. Nagballigi ti plano gapu iti bendision ni Jehova. Sinuportaran dagiti panguluen ken dagiti Levita ni Jehoiada a nangipatugaw ken Jehoas kas ari ken nangipapatay ken Atalia. (2 Cron. 23:1-5, 11, 12, 15; 24:1) Kalpasanna, “nangaramid ni Jehoiada iti tulag iti nagbaetan ni Jehova ken ti ari ken dagiti umili, nga agtultuloyda kas ili ni Jehova.” (2 Ar. 11:17) Ni Jehoiada “impuestona met dagiti parabantay kadagiti ruangan ti balay ni Jehova tapno saan a makastrek ti asinoman a maibilang a narugit.”—2 Cron. 23:19.

14. Kadagiti ania a pamay-an a napadayawan ni Jehoiada gapu ta pinadayawanna ni Jehova?

¹⁴ Imbaga idi ni Jehova: “Padayawak dagiti mangpadpadayaw kaniak.” Agpayso dayta ta ginunggonaanna ni Jehoiada. (1 Sam. 2:30) Kas pagarigan, impaisuratna dagiti nasayaat nga inaramid dayta a nangato a padi a pakasursuruantayo. (Roma 15:4) Ket idi natay ni Jehoiada, naipaay kenkuana ti naisangsangayan a pammadayaw ta naitabon “iti nakaitaneman dagiti ari iti Siudad ni David, ta naimbag ti inaramidna iti Israel para iti pudno a Dios ken iti balay ti Dios.”—2 Cron. 24:15, 16.

15. Ania ti masursurotayo iti salaysay maipapan ken Jehoiada? (Kitaen met ti ladawan.)

¹⁵ Matulongannatay amin ti salaysay maipapan ken Jehoiada a mangpatanor iti panagbuteng iti Dios. Ni Jehoiada ket matulad dagiti panglakayen no kanayon nga alertoda ken simamatalek a protektaranda ti arban ti Dios. (Ara. 20:28) Masursuro dagiti nataengan ken Jehoiada a no kanayon nga agbuteng ken matalekda ken Jehova, usarenna ida a mangitungpal iti panggepna. Saanna ida nga ipuerpuera. Panunoten met koma dagiti agtutubo no kasano ti trato ni Jehova ken Jehoiada. Matuladda  ni Jehova no tratuenda dagiti matalek a nataengan nga addaan iti dignidad ken panagraem, nangruna dagidiay nabayagen a simamatalek nga agserserbi kenkuana. (Prov. 16:31) Kamaudiananna, makasursurotayo amin kadagiti panguluen ken Levita a simmuporta ken Jehoiada. Simamatalek a suportarantayo ‘dagiti mangidadaulo kadatayo’ babaen ti panagtulnogtayo kadakuada.—Heb. 13:17.

16. Ania ti mangipakita a nakapuy ni Ari Jehoas?

¹⁶ Nakatulong ken Ari Jehoas ti nagsayaat nga impluensia ni Jehoiada. (2 Ar. 12:2) Kas resultana, idi ubing pay ti ari, kayatna a paragsaken ni Jehova. Ngem idi natayen ni Jehoiada, dimngeg ni Jehoas kadagiti apostata a prinsipe. Ania ti resultana? Isu ken dagiti iturayanna “nagserbida kadagiti sagrado a poste ken idolo.” (2 Cron. 24:4, 17, 18) Nasaktan unay ti puso ni Jehova isu a “nangibabaon kadagiti propeta a mamagsubli kadakuada . . . , ngem saanda a dimngeg.” Saanda pay ketdi a dimngeg iti anak ni Jehoiada a ni Zacarias, a saan la a propeta ni Jehova ken padi no di ket kasinsin ni Jehoas. Kinapudnona, impapatay ni Ari Jehoas ni Zacarias. Dina man la binigbig a nagdakkel ti utangna a naimbag a nakem iti pamilia a nangsalbar iti biagna.—2 Cron. 22:11; 24:19-22.

17. Ania ti nagbanagan ni Jehoas?

¹⁷ Saan a namantener ni Jehoas ti umiso a panagbutengna ken Jehova isu a nagdakes ti nagbanaganna. Imbaga ni Jehova: “Umsiek  dagiti mangum-umsi kaniak.” (1 Sam. 2:30) Idi agangay, ti bassit nga armada ti Siria inabakna ti “nagdakkel nga armada” ni Jehoas sa “pinanawanda a nakaro ti sugatna.” Idi nakapanawen dagiti Siriano, pinatay isuna dagiti mismo nga adipenna gapu ta impapatayna ni Zacarias. Dayta a nagdakes nga ari ket saan pay ketdi a naibilang a maikari a maitabon “iti nakaitaneman dagiti ari.”—2 Cron. 24:23-25; kitaen ti “son of Barachiah” iti study note ti Mateo 23:35, nwtsty.

18. Sigun iti Jeremias 17:7, 8, kasanotayo a maliklikan ti agbalin a kas ken Jehoas?

¹⁸ Ania ti masursurotayo iti napasamak ken Jehoas? Kayariganna ti maysa a kayo a narabaw dagiti ramutna ken agdepdepende iti tukal, wenno tungkal, a mangsarapa iti dayta. Idi natayen ti tukal—ni Jehoiada—ken nagpalayupoy ti angin ti apostasia, natuang ni Jehoas. Nalawag nga ipakita dayta nga ilustrasion a ti panagbutengtayo iti Dios ket masapul a saan laeng a nakadepende iti nasayaat nga impluensia dagiti padatayo a Kristiano ken kapamiliatayo. Tapno agtalinaed a nabileg ti espiritualidadtayo, masapul a datayo a mismo ti mangpabileg iti debosion ken panagbutengtayo iti Dios babaen ti regular a panagadal, panagutob, ken panagkararag.—Basaen ti Jeremias 17:7, 8; Col. 2:6, 7.

19. Ania ti kayat ni Jehova nga aramidentayo?

¹⁹ Saan nga adu unay ti kayat ni Jehova nga aramidentayo. Mabasatayo iti Eclesiastes 12:13 ti kayatna nga aramidentayo: “Agbutengka iti pudno a Dios ken tungpalem dagiti bilinna, ta daytoy ti intero nga obligasion ti tao.” No adda panagbutengtayo iti Dios, makapagtalinaedtayo a matalek aniaman ti mapasamak iti masanguanan kas kada Abdias ken Jehoiada. Awan ti aniaman a makadadael iti pannakigayyemtayo ken Jehova.